ትራምፕ የኢንቪዲያ ኃላፊ ለቻይና በመሰለል ከተጠረጠረች ሴት ጋር የነበራቸው ግንኙነት በኤፍቢአይ እየተመረመረ መሆኑን አስታወቁ

የፎቶው ባለመብት, Reuters
የአሜሪካ ፕሬዝዳንት ዶናልድ ትራምፕ፣ በግዙፉ የቴክኖሎጂ ኩባንያ ኢንቪዲያ ዋና ሥራ አስፈፃሚ እና ቻይናዊ ሰላይ እንደሆነች በተጠረጠረችው ሴት መካከል ያለው ግንኙነት በኤፍቢአይ እየተመረመረ መሆኑን ተናገሩ።
ትራምፕ ይህንን ያሉት፣ የአሜሪካ የስለላ ተቋማት ዋና ሥራ አፈስጻሚው ጄንሰን ሁዋንግ የቻይና የስለላ ዘመቻ ዒላማ ተደርጓል የሚል እምነት እንዳላቸው የሚያሳዩ ዘገባዎች መውጣታቸውን ተከትሎ ነው። ትራምፕ ዘገባዎቹ ከወጡ በኋላ ሰኞ ዕለት ከሁዋንግ ጋር መነጋገራቸውን ገልጸዋል።
" 'ሰላይ ስለመሆኗ ትንሽም ቢሆን ሀሳብ ነበረህ ወይ?' ብዬ ጠይቄው ነበር። እርሱም 'ሰላይ መሆኗን ምንም ፍንጭ አልነበረኝም' ብሏል፣ በትክክል አምኜዋለሁ" ብለዋል።
ቻይና፣ ሁዋንግ የስለላ ዒላማ ሆኗል የሚለውን ክስ ውድቅ አድርጋለች። የአገሪቱ የውጭ ጉዳይ ሚኒስቴር ውንጀላዎቹ "ሙሉ በሙሉ መሠረተ የለሽ፣ ግምታዊ እንዲሁም ቻይናን ለማጠልሸት እና ለማጥላላት ያለሙ ናቸው" በማለት ተከላክሏል።
ኢንቪዲያ በበኩሉ ዋና ሥራ አስፈጻሚው የቻይና ሰላይ ናት ከተባለችው አሊስ ሁዋንግ ጋር የነበራቸውን ግንኙነት በተመለከተ ገለልተኛ ምርመራ እንዲካሄድ እያደረገ ነው። ይሁን እንጂ የኩባንያው ሚስጥሮች ወይም የአሜሪካ ብሔራዊ ደኅንነት አደጋ ላይ እንደወደቀ ለማመን የሚያበቃ ምንም ምክንያት እንደሌለ ገልጿል።
ከአፕል ቀጥሎ የዓለም ሁለተኛው ባለ ከፍተኛ ዋጋ ኩባንያ የሆነው ኢንቪዲያ፣ ለሰው ሰራሽ አስተውሎት (ኤአይ) ቴክኖሎጂ እድገት ወሳኝ የሆኑትን የኮምፒውተር ቺፖች ይሰራል።
ዋና ሥራ አስፈጻሚው የቻይና ሰላይ ናት ተብላ ከተጠረጠረች ሴት ጋር ግንኙነት እንዳላቸው ይፋ መሆኑን ተከትሎ፣ ሰኞ ዕለት የኩባንያው የአክስዮን ዋጋ ከ4 በመቶ በላይ አሽቆልቁሏል። በዚህም ኩባንያው የነበረው ዋጋ በ250 ቢሊዮን ዶላር ገደማ ወድቋል።
ትራምፕ ኋላ ላይ በዋይት ሃውስ ከጋዜጠኞች ጋር በነበራቸው ቆይታ፣ ኤፍቢአይ ጉዳዩን እየመረመረ መሆኑን ቢያስታውቁም፣ ምርመራው መቼ እንደተጀመረም ሆነ ሌሎች ዝርዝር መረጃዎችን ከመግለጽ ተቆጥበዋል። ኤፍቢአይ አስተያየት እንዲሰጥ ከቢቢሲ የቀረበለትን ጥያቄ አልተቀበለም።
የአሜሪካ የስለላ ባለሥልጣናት ሁዋንግ ሌ በሚል ስም የምትታወቀው አሊስ ሁዋንግ ለቻይና ትሰራለች ብለው እንደሚያምኑ ኒው ዮርክ ታይምስ ዘግቧል። ግለሰቧ ከዋና ሥራ አስፈጻሚው ጋር የሥጋ ዝምድና የላትም።
እንደ ጋዜጣው ዘገባ፣ የአሜሪካ ውጭ ጉዳይ ሚኒስትር ማርኮ ሩቢዮ፣ የኢንቪዲያው ዋና ሥራ አስፈጻሚ ከአንዲት ቻይናዊት ሰላይ ጋር የቅርብ ግንኙነት እንዳላቸው የሚያስጠነቅቅ ማስታወሻ ባለፈው ዓመት በዋሽንግተን ለሚገኙ ከፍተኛ ባለሥልጣናት ልከዋል።
አሊስ ሁዋንግ ከኢንቪዲያ ጋር የንግድ ስምምነት የነበረው 'ሜጋስፒድ' የተባለ የሲንጋፖር ኩባንያ ማኔጂንግ ዳይሬክተር ነበረች።
ትራምፕ ያደረጉት ገለጻ የኢንቪዲያው ሁዋንግ ግለሰቧ ከቻይና የስለላ ተቋም ጋር አላት ስለሚባለው ግንኙነት ያውቁ ነበር ወይ ስለሚለው ጥያቄ የተሰጠ የመጀመሪያው አስተያየት ነው።
በሲንጋፖር የንግድ ማዕከል በሆነው ስፍራ የሚገኘው የሜጋስፒድ ቢሮ ማክሰኞ ዕለት በስራ ላይ እንደሆነ ታይቷል።
ጄንሰን ሁዋንግ ከመስራቾች አንዱ የሆነበት ኢንቪዲያ፣ አሜሪካ እና ቻይና የኤአይ ቴክኖሎጂ የበላይነት ለመያዝ በሚያደርጉት ፉክክር ውስጥ ዋነኛ የትኩረት ማዕከል ነው።
የአሜሪካ ባለሥልጣናት ቺፖችን ወደ ቻይና ኤክስፖርት ማድረግን የሚመለከቱት እንደ ብሔራዊ ደኅንነት ጉዳይ ነው። ሁዋንግ ከግለሰቧ ጋር አለው የተባለው ግንኙነት ስጋት የፈጠረውም በዋነኛነት በዚሁ ምክንያት ነው።
በተጨማሪም ሰኞ ዕለት ሁዋንግ እና ኢንቪዲያ ከተጠርጣሪዋ ቻይናዊ ሰላይ ጋር ያላቸውን ግንኙነት በመደበቅ ባለአክስዮኖችን አታልለዋል የሚል ክስ በካሊፎርኒያ ፍርድ ቤት ቀርቦባቸዋል።
የክስ መዝገቡ እንደሚገልጸው፣ ኩባንያው ጄንሰን ሁዋንግ "የኢንቪዲያ ምርቶችን በድብቅ ወደ ቻይና ለማስገባት ስትጥር ከነበረችው" ከአሊስ ሁዋንግ ጋር ያላቸውን ግንኙነት አስመልክቶ መገናኛ ብዙኃንን ዋሽተዋል።
ቢቢሲ ክሱን አስመልክቶ ከኢንቪዲያ ምላሽ ለማግኘት ጥያቄ አቅርቧል።

































