የየዕለት ቀላል የሰውነት እንቅስቃሴዎች ዕድሜን እንደሚያረዝሙ ያውቃሉ?

ረዥም ሰዓት ተቀምጦ ማሳለፍ አሊያም እንቅስቃሴ የሌለው የሕይወት ዘይቤ ታዲያ ለከባድ የጤና ችግሮች የመጋለጥ ዕድልን ይጨምራል
የምስሉ መግለጫ, ረዥም ሰዓት ተቀምጦ ማሳለፍ አሊያም እንቅስቃሴ የሌለው የሕይወት ዘይቤ ታዲያ ለከባድ የጤና ችግሮች የመጋለጥ ዕድልን ይጨምራል
ታትሟል
የንባብ ጊዜ: 5 ደቂቃ

ሙሉ ቀን ተቀምጠን የምናሳልፍባቸው አጋጣሚዎች ብዙ ናቸው።

ለምሳሌ በሥራ ገበታችን ላይ ተቀምጠን እንውላለን፣ በመቀጠልም መኪና ውስጥ፣ ከዚያም ደግሞ ቤት ገብተን አንድ ሁለት ሰዓት መቀመጫ ላይ አረፍ ልንል እንችላለን።

ረዥም ሰዓት ተቀምጦ ማሳለፍ አሊያም እንቅስቃሴ የሌለው የሕይወት ዘይቤ ታዲያ ለከባድ የጤና ችግሮች የመጋለጥ ዕድልን ይጨምራል።

ስለዚህ ተቀምጠን የምንውልበትን ጊዜ ለመቀነስ የምናደርገው ማንኛውም ጥረት ለአጠቃላይ ጤናችን ያለው ጥቅም ከፍተኛ ቢሆንም፣ ለዚህ የሚሆን ጊዜ ማግኘት ግን ፈታኝ ሳይሆን አይቀርም። ለዚህ ታዲያ አንድ መፍትሄ አለ።

ፕሮግራም ይዘን፣ ረዥም ሰዓት መድበን ከምንሠራው ስፖርት ውጭ ያሉ የአካል እንቅስቃሴዎችን ማድረግ።

በኒውዚላንድ በሚገኘው የኦክላንድ ቴክኖሎጂ ዩኒቨርሲቲ የኮሌጅ ተመራማሪ የሆኑት አናንታ ናራያናን እንደሚሉት፤ ይህ ቀለል ያለ እና ከመደበኛው አካላዊ እንቅስቃሴ ውጭ ለምናደርገው ማንኛውም እንቅስቃሴ በተለየ ኃይል የምናወጣበት ነው።

ተቀምጠው ከሆነ እግርዎትን ማንቀሳቀስ፣ ቤት ከሆኑ እቃ ማጠብ የመሳሰሉ ቀላል እንቅስቃሴዎች ተቀምጦ በመዋል የሚመጣን የጤና ችግር ይቀንሳሉ። ይህ በዕለት ከዕለት ሕይወታችን የምናደርገው እንቅስቃሴ በእንግሊዘኛው ኢንሲደንታል እንቅስቃሴ (Incidental exercise) ይባላል።

"የአቀማመጥ ሁኔታን መቀየር፣ ትከሻን ማንቀሳቀስ ወይም እግርን ማወዛወዝ የመሰሉ ትንንሽ እንቅስቃሴዎችም እንደ ስፖርት ይቆጠራሉ" ይላሉ ናራያናን።

እነዚህ ቀላል እና ተራ የሚመስሉ እንቅስቃሴዎች በአስገራሚ ሁኔታ ጤናችንን በመጠበቅ ከፍተኛ አቅም ያላቸው መሣሪያዎች እየሆኑ ነው።

ከላይ የተጠቀሱት በውሏችን ማከናወን የምንችላቸው እንቅስቃሲዎች ቀላል ቢመስሉም ብዙ ካሎሪዎችን ለማቃጠል፣ ለልብ እና የደም ቧንቧ በሽታዎች የመጋለጥ አጋጣሚን ለመከላከል፣ ለሞት የሚያጋልጡ አደጋዎችን ለመቀነስ አስገርሚ እና ውጤታማ መንገድ ሆነዋል።

ድንገት ስለምናደርጋችው ቀላል የሚመስሉ ጥቅማቸው ግን አያሌ ስለሆኑት እንቅስቃሴዎች ከተረዳን የተወሰኑትን የእንቅስቃሴ ዓይነቶች እንመልከት።

ተቀምጠው ከሆነ እግርዎትን ማንቀሳቀስ፣ ቤት ከሆኑ እቃ ማጠብ የመሳሰሉ ቀላል እንቅስቃሴዎች ተቀምጦ በመዋል የሚመጣን የጤና ችግር ይቀንሳሉ
የምስሉ መግለጫ, ተቀምጠው ከሆነ እግርዎትን ማንቀሳቀስ፣ ቤት ከሆኑ እቃ ማጠብ የመሳሰሉ ቀላል እንቅስቃሴዎች ተቀምጦ በመዋል የሚመጣን የጤና ችግር ይቀንሳሉ

ሰውነትን ማላወስ

Skip podcast promotion and continue reading
BBC News Amharic የቢቢሲ አማርኛ ዩቲዩብ ቻናላችንን ይቀላቀሉ!
የቢቢሲ አማርኛ ዩቲዩብ ቻናል

ዜና፣ ትንታኔ እና ታሪኮችን በምሥል እና በድምጽ ለማግኘት

ይህንን በመጫን ሰብስክራይብ ያድርጉ

End of podcast promotion

መቁነጥነጥ የመሰላቸት እና ትኩረት ያለመስጠት ምልክት ተደርጎ ስለሚቆጠር አብዛኞቻችን በልጅነት ዕድሜ ላይ "ምን ያቁነጠንጥሃል/ሻል?" ተብለን እናውቅ ይሆናል።

ሆኖም ግን አሁን ላይ ይህንን ምክር ችላ ለማለት የሚያስችሉ በርካታ ምክንያቶች አሉ።

ለረዥም ጊዜ ተቀምጠን በምናሳልፍበት ጊዜ፣ የእግር ጡንቻዎቻችን በተወሰነ መልኩ እንቅስቃሴ አልባ ይሆናሉ።

ይህም ከደም ዝውውር ውስጥ ግሉኮስን (ስኳርን) ለማስወገድ እና ጤናማ የደም ዝውውር እንዲኖር የሚረዳውን መደበኛ የጡንቻ መኮማተር ይቀንሰዋል ይላሉ ናራያናን።

ነገር ግን ሰውነትን ማላወስ ወይም መቁነጥነጥ የጡንቻ እንቅስቃሴን ስለሚጨምር ምንም ሳንንቀሳቀስ፣ ረጋ ብለን ከምንቀመጥበት ጊዜ ጋር ሲነጻጸር ተጨማሪ ካሎሪዎችን እንድናቃጥል እንደሚረዳን በቅርቡ በተደረገ ጥናት ተረጋግጧል።

"ቀደም ያሉ ጥናቶች እንደሚያመለክቱት፣ እግርን ማንቀሳቀስ የደም ሥር ተግባርን ጠብቆ ለማቆየት እና የደም ውስጥ ስኳር ቁጥጥርን ለማሻሻል ሊረዳ ይችላል" ሲሉ የኦክላንድ ቴክኖሎጂ ዩኒቨርሲቲ የኮሌጅ ተመራማሪ ናራያናን ተናግረዋል።

ይህን በሚያደርጉበት ጊዜ መቆም እነዚህን ጥቅሞች የበለጠ ሊጨምር ይችላል።

የሰውነት ማፍታቻ መንገድ የሆነው አዘውትሮ እግርን ማወዛወዝ ለረዥም ሰዓት ከመቀመጥ ጋር ሲነጻጸር 16% ገደማ ተጨማሪ ኃይልን ለማውጣት እንደሚረዳ ጥናት አረጋግጧል።

ተመራማሪዎቹ እንዳረጋገጡት፣ ቀላል እንቅስቃሴዎችን አብዝተን የምናደርግ ከሆነ በቀን ከ11 ሰዓታት በላይ ከመቀመጥ ጋር ተያይዘው የሚመጡ የጤና አደጋዎችን ሊቀንስ ይችላል።

በተደጋጋሚ የማናስተውለው ጉዳይ የቤት ውስጥ ሥራዎችን ማከናወን ተቀምጠን የምቆይበትን ጊዜ እንደሚቀንሱ ነው።

ምግብ ማብሰል፣ አትክልቶችን መንከባከብ፣ ቤት ማጽዳት ሕይወታችን የሚታደጉ ተጓዳኝ እንቅስቃሴዎች ናቸው።

ጤናችንን ለመጠበቅ የግድ ሰዓታትን የሚወስዱ እንቅስቃሴዎችን ማድረግ ላይጠበቀብን ይችላል።

ደጋግመው ይንቀሳቀሱ

ከታቀዱ እና መደበኛ አካላዊ እንቅስቃሴዎች በተለየ መልኩ፣ ዕለት ከዕለት የሚደረጉ ቀላል እንቅስቃሴዎች የጂም አባልነትን አይጠይቁም፤ ወይም የታቀደ እና የታሰበ ጊዜ እንድንመድብ አያስገድዱንም።

ከአካላዊ እንቅስቃሴ የሚገኙ የጤና ጥቅሞችን ለማግኘት በየቀኑ ሰዓታትን በእንቅስቃሴ ማሳለፍ አያስፈልገንም።

በአውሮፓውያኑ በ2024 የተደረገ አንድ ሰፋ ያለ ጥናት እንደሚያመለክተው፣ ከአንድ ደቂቃ በታች የሚወስዱ አጫጭር እንቅስቃሴዎችን በቀን ለአራት ደቂቃ ያህል ብቻ ማድረግ፣ እንቅስቃሴ አልባ ከመሆን አሊያም አብዝቶ ከመቀመጥ የሚመጣውን የልብ እና ደም ቧንቧ በሽታዎች የመጋለጥ ዕድልን ለመቀነስ ይረዳል።

ይህ ጥናት ከ22 ሺህ በላይ የእንግሊዝ ዜጎችን ያሳተፈ ነው።

እነዚህ ዜጎች ላይ ታዲያ በቀን ውስጥ ያደረጉትን እንቅስቃሴ የሚመዘግብ መከታተያ መሣሪያ ታስሮላቸው ነበር።

ጥናቱ የተካሄደው መደበኛ እና የታቀደ ስፖርት የማይሠሩ ሰዎችን ብቻ በመለየት ሲሆን፣ ለስምንት ዓመት የቆየ ክትትል ተደርጎባቸዋል።

በዚህ ጥናት ተመራማሪዎቹ አንድ ነገር ማረጋገጥ ቻሉ።

የዕለት ከዕለት ቀላል እንቅስቃሴዎችን (incidental activity) አብዝቶ ማድረግ በቀን ከ11 ሰዓታት በላይ ተቀምጦ በመዋል የሚመጡ የጤና አደጋዎችን የመቀነስ ፍቱን መድኃኒት መሆኑን።

በቀጣይ የተደረጉ ጥናቶችም እነዚህ እንቅስቃሴዎች ቶሎ ለሞት የመጋለጥን ዕድልን እንደሚቀንሱ አሳይተዋል።

የጥናቱ መሪ እና በአውስትራሊያ የሞናሽ ዩኒቨርሲቲ ተመራማሪ የሆኑት ኒኮላስ ኮመል እንደሚሉት፤ በዕለት ተዕለት እንቅስቃሴዎቻችን ውስጥ ልናካትታቸው የምንችላቸው ተግባራት፤ ለምሳሌ ደረጃዎችን መውጣት፣ ከበድ ያሉ ቦርሳዎችን መሸከም ወይም ከልጆች ጋር መጫወት ሕይወት አድን እንቅስቃሴዎች ናችው።

በቀኑ ውስጥ እንቅስቃሴያችንን ለመጨመር የሚረዱ አጋጣሚዎችን ትኩረት ሰጥተን በመጠቀም፣ የእነዚህን ቀላል የሚመስሉ ግን የማናስተውላቸውን እንቅስቃሴዎችን ማሳደግ እንችላለን ይላሉ ኮመል።

ፍጥነት የታከለበት እርምጃ ማድረግ መኪናችንን ከምንፈልገው ቦታ ራቅ አድርገን አቁመን መራመድ ጤናችንን ለመጠበቅ ወሳኝ መፍትሔ ናቸው።

የሞናሽ ዩኒቨርስቲ ተመራማሪው ይቀጥላሉ፤ ለሸመታ ገበያ ከወጣን የገዛናቸውን እቃዎች በጋሪ እየገፋን ከምንንቀሳቀስ በቦርሳ ተሸክመን ብንራመድ ቀላል የሚመስል ግን ደግሞ ለጤና በጣም ጠቃሚ እንቅስቃሴ መሆኑን አስረድተዋል።

ለሸመታ ገበያ ከወጣን የገዛናቸውን እቃዎች በጋሪ እየገፋን ከምንቀሳቀስ በቦርሳ ተሸክመን ብንቀሳቀስ ቀላል የሚመስል ግን ደግሞ  ለጤና በጣም ጠቃሚ ነው
የምስሉ መግለጫ, ለሸመታ ገበያ ከወጣን የገዛናቸውን እቃዎች በጋሪ እየገፋን ከምንቀሳቀስ በቦርሳ ተሸክመን ብንቀሳቀስ ቀላል የሚመስል ግን ደግሞ ለጤና በጣም ጠቃሚ ነው

ልምድን ማቀናጀት

ለመሆኑ ልምድን ማቀናጀት ሲባል ምን ማለት ነው?

እያደረጉት ባለው የዕለት ከዕለት ተግባር ላይ የተወሰነ እንቅስቃሴን መጨመር አልያም ማቀናጀት ማለት ነው።

ለምሳሌ ጥርስዎን በሚቦርሹበት ጊዜ በእግር ጣቶችዎ ከፍ ዝቅ እያሉ የባት ጡንቻዎን ማንቀሳቀስ፣ ከጠረጴዛዎ ሥር እግርዎን ማንቀሳቀስ ወይም ስልክ ሲያወሩ ከመቀመጥ ይልቅ እየተራመዱ ማውራትን የመሳሰሉ እንቅስቃሴዎችን የሚመለከት ነው።

እነዚህን መሰል ቀላል እንቅስቃሴዎች አንድ ላይ አዳብለን ብንሠራቸው ጥቅሙ አያሌ ነው ይላሉ በእንግሊዝ የሎፍቦሮህ ዩኒቨርሲቲ የሥነ ባህሪ ሕክምና ፕሮፌሰር አማንዳ ዴሊ።

ለምሳሌ ዴሊ አዘውትራ የምታደርገው አንድ ልምድ አላት፤ ይኸውም በበይነ መረብ የምታዛቸው ማንኛቸውም ዕቃዎች በቀጥታ ወደ ቤት እንዲመጣ አታደርግም።

ይልቁኑ እዚያው መንደሯ አካባቢ ባለ የእቃ መቀበያ ሳጥን እንዲቀመጥ ታደርጋለች "አንድን ነገር ከፈለግን ሄደን መውሰድ አለብን" ትላለች።

ይህ አሠራር "ወጣቶች ከክፍላቸው ወጥተው በቀናቸው ውስጥ የተወሰነ የእግር ጉዞ እንዲያደርጉ ለማድረግም እጅግ ጥሩ መንገድ ነው" ስትል ያዳበረችን ልምድ አስረድታለች።

ዴሊ እና ባልደረቦቿ፣ ለሐኪሞች ቆመው ለመሥራት የሚያስችሉ ጠረጴዛዎችን በመስጠት አንድ ጥናት አደረጉ።

ሐኪሞቹ ጠረጴዛን ከተረከቡ በኋላ ተቀምጠው ሊያስልፉት ከሚችሉት ጊዜ ውስጥ ይችሉ በቀን በሁለት ሰዓት ያህል እንዲቀንሱ ረድቷቸዋል።

በተጨማሪም ሐኪሞቹ ከታካሚዎቻቸው ጋር ለረዥም ሰዓት መቀመጥ ማስወገድ ስላለው ጥቅም በሰፊው እንዲወያዩ በር እንደከፈተላቸው የነ ዴሊ ጥናት አሳይቷል።

"በዕለት ከዕለት አጋጣሚ የሚደረግ እንቅስቃሴ ጊዜን የሚቆጥብ አካላዊ እንቅስቃሴ የማድረጊያ ወሳኝ መንገድ ነው፤ ምክንያቱም ለብቻ ሰፊ ጊዜ በመመደብ የሚከናወኑ ባለመሆናቸው" ይላሉ ፕሮፌሰር ዴሊ።

"ከሁሉ በላይ ደግሞ፣ በየቀኑ የሚያደርጉትን እንቅስቃሴ በጨመሩ ቁጥር፣ በጊዜ ሒደት የበለጠ ዓላማ ያለው እና የታቀደ ልምድ እየሆነ ይመጣል። ይህም ደግሞ ሊያበረታታ ይችላል" ሲሉ በአውስትራሊያ ውስጥ ሞናሽ ዩኒቨርሲቲ ተመራማሪ የሆኑት ኩመል ገልጸዋል።

አክለውም "በሕይወት ዘይቤያችን ውስጥ አንድ ልምድ ካዳበርን ውስጣችን የተዋሃደ ቋሚ ልምድ ይሆናል ማለት ነው" ሲሉ ቀላል እንቅስቃሴዎችን አዘውትሮ ማድረግ መልመድን እንዳለብን ተመራማሪው ተናግረዋል።