ለአንድ ወር በግጭት በተናጠችው ሞያሌ በማክሰኞ ጀምሮ ተኩስ መቆሙን ነዋሪዎች እና ቀይ መስቀል ገለጹ

የፎቶው ባለመብት, Getty Images
ለአንድ ወር ቀጥሎ የቆየው ድንበር ከተማዋ ሞያሌ ግጭት ከማክሰኞ ከሰዓት አንስቶ መቆሙን ነዋሪዎች እና በከተማዋ የሚንቀሳቀሰው የቀይ መስቀል ቅርንጫፍ ለቢቢሲ ገለጹ።
የፌደራል መንግሥጥ የፀጥታ ኃይሎች በአካባቢው መሰማራቸውን እና ግጭቱን ለመፍታት "ወይይት መጀመሩን" በኢትዮጵያ ቀይ መስቀል ማኅበር የሞያሌ ቅርንጫፍ አስተባባሪ የሆኑት ፀጋዬ ደስታ ለቢቢሲ ተናግረዋል።
ኦሮሚያ እና ሶማሌ ክልሎች በሚጋሯት የድንበር ከተማዋ ሞያሌ ግጭት የተነሳው በጥቅምት ወር አጋማሽ ገደማ ከክልል ሰንደቅ ዓላማ መሰቀል ጋር ተያይዞ በተፈጠረ ውዝግብ ምክንያት ነበር። በዚህ ውዝግብ አንዲት የ13 ዓመት ልጅ መገደሏን ተከትሎም ላለፈው አንድ ወር የዘለቀ ግጭት ተቀስቅሷል።
በአካባቢው በሚገኙት የሶማሌ እና ኦሮሞ ማኅበረሰብ ታጣቂዎች መካከል የሚደረገው የተኩስ ልውውጥ በከባድ መሣሪያ ጭምር የታገዘ መሆኑን ነዋሪዎች በተለያዩ ጊዜያት ለቢቢሲ ተናግረዋል።
በግጭቱ የሰዎች ሕይወት ማለፉንም ነዋሪዎች እና የሆስፒታል ምንጮች ቢገልጹም፤ ትክክለኛው የሞቿች ቁጥር እስካሁን በትክክል አልታወቀም።
ይህንን ግጭት የሸሹ በአስር ሺህዎች የሚቆጠሩ ነዋሪዎች በኬንያ ማርሳቢት ግዛት ውስጥ ወደሚገኘው ሌላኛው ሞያሌ ተሻግረዋል። ግጭቱ ባለፈው ሳምንት ላይም ጋብ ብሎ የነበረ ቢሆንም በሳምንቱ መጨረሻ ቀናት በድጋሚ ተቀስቅሷል።
ቢቢሲ ዛሬ ሐሙስ ኅዳር 10 ቀን 2019 ዓ.ም. ያነጋገራቸው አንድ የከተማዋ ነዋሪ፣ "በተለይ የሰኞ እና እሁድ አካባቢ በጣም ኃይለኛ ተኩስ ነበር። ቤት ሁሉ፣ የመናኸሪያ ሰፈር እንደተቃጠለ ነው፤ ብዙ ከባድ ነበር" ሲሉ ሁኔታውን ገልጸውታል።
ነዋሪው እንደሚናገሩት፣ ይህ የተኩስ ልውውጥ ማክሰኞ ዕለት እስከ ስምንት ሰዓት ገደማ ቀጥሎ ከቆየ በኋላ ቆሟል። ረቡዕ ወደ ያቤሎ ከተማ የተጓዙ ሌላ ነዋሪም ይህንን አረጋግጠዋል።
ሞያሌ የሚገኙት ነዋሪ፣ "የጥይት ድምፅ አሁን የለም፤ ቆሟል። ከማክሰኞ ከ10 ሰዓት ጀምሮ እስካሁን የጥይት ድምፅ የለም፣ ሰላም ነው" ሲሉ ፋታ መኖሩን አስረድተዋል።
ረቡዕ አመሻሽ ላይ ከቢቢሲ አፋር ኦሮሞ ጋር ቆይታ ያደረጉት የኢትዮጵያ ቀይ መስቀል ማኅበር የሞያሌ ቅርንጫፍ አስተባባሪ ፀጋዬ ደስታም በተመሳሳይ ተኩስ መቆሙን ገልጸዋል።
የቀይ መስቀል አስተባባሪው እንደሚናገሩት ግጭቶ ጋብ ያለው "የፌደራል የፀጥታ አካላት" ወደ አካባቢው መግባታቸውን ተከትሎ ነው።
"የፌደራል የፀጥታ አካላት በተጋጩት መሃል መግባታቸውን ሰምቻለሁ። ከትናንት [ማክሰኞ] ከሰዓት ጀምሮ እስካሁን ተኩስ ቆሟል። አሁን ላይ ውይይት መጀመሩን ሰምቻለሁ" ብለዋል።
እንደ አስተባባሪው ገለጻ፣ ውይይቱ የሚደረገው "እንዴት ወደ ቀድሞ ሠላም መመለስ እንችላለን" በሚለው ጉዳይ ላይ ነው።
ቢቢሲ ያነጋገራቸው ሁለት ነዋሪዎችም በተመሳሳይ ስለ ውይይቱ መስማታቸውን ገልጸዋል። አንድ ነዋሪ "የኦሮሞ እና ሶማሌ ማኅበረሰብ ሽማግሌዎች ወደ ከተማዋ ገብተዋል" የሚል መረጃ እንደደረሳቸው ጠቅሷል።
ቢቢሲ የፌደራል መንግሥት ኃይሎች ወደ ሞያሌ መግባታቸውንም ሆነ ውይይት መጀመሩን በገለልተኝነት ሊያረጋግጥ አልቻለም። ለአንድ ወር የዘለቀውን ግጭት በተመለከተ እስካሁን ድረስ ከፌደራል መንግሥት በኩል በይፋ የተሰጠ አስተያየት የለም።
ሞያሌ ላለፉት ሁለት ቀናት የተኩስ ልውውጥ ባታስተናግድም አሁንም ቢሆን እንቅስቃሴ እንደሌለ አንድ ነዋሪ ተናግረዋል።
የቀይ መስቀል አስተባባሪው ፀጋዬ በበኩላቸው፤ "ዋናውን ጨምሮ የተዘጉ መንገዶች አልተከፈቱም፤ የትራንስፖርት አገልግሎትም አልተመለሰም" ብለዋል።
ፀጋዬ እንደሚያስረዱት ለአንድ ወር በዘለቀው ግጭት ምክንያት በሞያሌ ከተማ እና አጎራባች ቀበሌዎች የሚገኙ "ነዋሪዎች ሙሉ በሙሉ" ተፈናቅለዋል።
የኢትዮጵያ ቀይ መስቀል ማኅበር ወደ ሞያሌ አጎራባች አካባቢዎች ለተፈናቀሉ አንድ ሺህ አባውራዎች ጊዜያዊ ድጋፍ ማድረጉን የሚናገሩት አስተባባሪው፤ "ቢሆንም ብዙ ድጋፍ ያስፈልጋቸዋል። እዚያ አካባቢ የዓለው የሰብአዊ ድጋፍ ፍላጎት ከፍተኛ ነው" ብለዋል።
አክለውም፣ "ከፍተኛ የምግብ፣ የመጠለያ ድጋፍ ያስፈልጋል። ከተፈናቃዮቹ መሃል አካል ጉዳተኞች፣ አራሶች ይገኙበታል። ያጋጠመው ሰብአዊ ቀውስ ከፍተኛ ነው" በማለት አሳስበዋል።
ከሞያሌ ከተማ የተፈናቀሉ አብዛኛዎቹ ነዋሪዎች የሸሹት ወደ ኬንያ ማርሳቢት ግዛት ነው። የተበባሩት መንግሥታት የዓለም ምግብ ፕሮግራም የኬንያ ቅርንጫፍ ከማክሰኞ ዕለት ባወጣው መረጃ 30,000 ገደማ ተፈናቃዮች ወደ ኬንያ ሞያሌ መሸሻቸውን አስታውቋል። ሌሎች መረጃዎች የተፈናቃዮቹን ቁጥር እስከ 60,000 ያደርሱታል።
ከእነዚህ መካከል የተወሰኑት እዚያ የሚገኙ ዘመዶቻቸው ወይም ተቀባይ ቤተሰቦች ጋር፣ ሌሎች ደግሞ በትምህርት ቤቶች እና የማኅበረሰብ ማዕከሎች ውስጥ በተዘጋጁ ጊዜያዊ ጣቢያዎች መጠለላቸውን የዓለም የምግብ ፕሮግራም አስረድቷል።
የዓለም የፍልሰተኞች ድርጅት ባለፈው ሳምንት መጀመሪያ ባወጣው መረጃ፣ 50,000 ከሚገመቱት ተፈናቃዮች ውስጥ 71 በመቶ ያህሉ የምግብ እጥረት እንዳጋጠማቸው አስታውቋል።


































