Қозоғистон: Тўқаев армияда "радикал ислоҳот" бошлади - видео
Сурат манбаси, akorda.kz
Қозоғистон Ҳарбий-денгиз кучларининг машқлари пайтида Каспий денгизида ҳарбийлар ҳалок бўлгани ортидан Президент Қосим-Жўмарт Тўқаев мамлакат қуролли кучларида "радикал ислоҳот" бошлаганини эълон қилди.
Фожеа ортидан Президент Тўқаев Қозоғистон мудофаа раҳбарияти иштирокида мажлис ўтказди.
Мудофаа вазирлиги раҳбариятининг фожеа олдини ололмаганини "жиноий нопрофессионализм" деб таърифлади Президент Тўқаев.
"Ўтмишдаги фожиалардан ҳеч қандай хулоса чиқарилмаган. Бу ўқув машғулотларининг ғоясини ким ишлаб чиққан ва тасдиқлаган? Бош штабнинг роли ва мувофиқлаштириши қандай бўлган? Нега ҳарбий-денгиз кучларининг бош қўмондони машқларда бўлмаган? Масъулиятсизлик, бепарволик, кўз-кўз қилиш одатий ҳолга айланган. Тизимли иш йўқ, инқирозли вазиятларга жавоб қайтариш режалари ҳеч қандай танқидга дош бермайди. Буларнинг барчаси ҳарбий раҳбариятнинг бефарқлиги оқибатидир", – деди Тўқаев йиғилишда.
Президент Тўқаев айтишича, Қозоғистон Хавфсизлик Кенгаши Мудофаа вазирлигидаги талабга жавоб бермаслик ҳамда молиявий бесамар бошқарув илдизларини аниқлаш мақсадида кенг миқёсли текширишларни аллақачон бошлаган.
Президент Тўқаев таъбирича, Мудофаа вазирлиги "ўтган асрда қолиб кетган".
Қозоғистон президенти Хавфсизлик Кенгаши ва Мудофаа вазирлигига ҳарбий ислоҳотларнинг комплекс режасини ишлаб чиқиш буйруғини берди.
Ушбу режа янги қўмондонларни компетентлиги ва тажрибасига таяниб тайинланиш, маблағларни талон-тарож қилиш ҳолатларини бартараф этиш ва бюджет ресурсларини мақсадли сарфланишини таъминлаш билан замонавий армияни барпо этиш мақсадига қаратилган.
Президент Тўқаев айтишича, Қозоғистон Хавфсизлик Кенгаши ислоҳотлар боришини назорат қилиб боради.
Президент Тўқаев Даурен Косановни Мудофаа вазири лавозимидан бўшатди.
Қозоғистон Мудофаа вазири этиб 45 яшар генерал-майор Айдос Мирзахметов тайинланди.
Шу вақтгача Айдос Мирзахметов Қозоғистон Қуролли кучларининг Махсус операциялар кучларига қўмондонлик қилиб келган.
Президент Тўқаев янги Мудофаа вазири Айдос Мирзахметовни президент қароргоҳида қабул қилди, унга қатор муҳим вазифалар топширди.
Улардан бири ҳарбий хизматчиларнинг хавфсизлиги устувор вазифа бўлиши кераклиги урғуланди, дея хабар берди Оқ Ўрда.
Генерал Косанов Мудофаа вазири лавозимида атиги бир йилча ишлади.
Ундан олдинги вазир Руслан Жаксиликов Мудофаа вазирлигидаги қатор ҳалокатли воқеалар ва ўз жонига қасд қилиш ҳолатлари сабаб лавозимидан бўшатилган эди.
25 сентябр. Қозоғистондаги машғулотлар пайтида Каспий денгизига оқиб кетган 14 нафар ҳарбий ҳалок бўлди
Сурат манбаси, Манғистау вилояти ҳокимлиги/Telegram
Қозоғистондаги ҳарбий машғулотлар пайтида Каспий денгизига оқиб кетган 17 нафар ҳарбийдан 14 нафари ҳалок бўлгани тасдиқланди. Яна уч нафари қутқарилган.
25 сентябр куни бедарак кетган икки ҳарбийнинг жасади топилгач, қидирув ишлари якунланган.
Россия президенти Владимир Путин ва Ўзбекистон президенти Шавкат Мирзиёев Қозоғистон президенти Қосим-Жомарт Тўқаевга таъзия билдиришди.
Ҳодиса 24 сентябр куни Қозоғистоннинг жануби-ғарбидаги Манғистау вилоятида юз берган.
Қозоғистон бош вазири ўринбосари Қанат Бозумбаев Telegram'да 17 ҳарбий денгизга оқиб кетганини маълум қилди.
Унинг сўзларига кўра, бу "об-ҳаво шароити кескин ёмонлашиб, шамол кучайгани сабабли ўқув-жанговар вазифани бажариш вақтида" содир бўлган.
Ҳодиса юзасидан тергов олиб борилмоқда.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Воқеалар ривожи
Сурат манбаси, Манғистау вилояти ҳокимлиги/Telegram
Бироқ 22 сентябрь куни Қозоғистон Мудофаа вазирлигининг Telegram саҳифасида Каспий денгизининг Қозоғистонга тегишли қисмида "Каспий ҳимояси - 2026" ҳарбий машғулотлари ўтказилаётгани ҳақида хабар пайдо бўлганди. Машғулотларда 500 нафардан ортиқ ҳарбий хизматчи, жанговар кемалар ва соҳил бўлинмалари иштирок этаётгани айтилган.
Пайшанба куни кечқурун Қозоғистон Мудофаа вазирлиги ҳалок бўлган 12 ҳарбийнинг исмлари келтирилган рўйхатини эълон қилди. Рўйхатга муддатли ҳарбий хизматдаги 11 нафар матрос ва бир катта лейтенант киритилган.
Lada.kz нашри эълон қилган кадрларда қутқарув ишлари акс этган бўлиши мумкин. Кундузи олинган кадрларда ҳодиса жойида кучли шамол ҳали ҳам эсаётгани, қутқарув ишлари олиб борилаётган денгиз ҳудудида эса ҳарбий кема борлиги кўринган.
Қозоғистон президенти Қосим-Жомарт Тўқаев ҳарбийларнинг ҳалок бўлгани муносабати билан ҳамдардлик билдирди ва 25 сентябрни умуммиллий мотам куни деб эълон қилди.
"Казинформ" агентлиги хабар беришича, бош вазир ўринбосари Бозумбаев ҳодисани текшириш бўйича комиссияга раҳбарлик қила бошлаганини айтган. Унинг сўзларига кўра, "ҳодиса муносабати билан ваколатли идоралар томонидан аллақачон жиноят ишлари қўзғатилган".
