حکومت مطالبات ماننے میں سنجیدہ ہوئی تو تحریک انصاف دوبارہ مذاکرات کی میز پر آ جائے گی: شیخ وقاص اکرم کا رانا ثنا اللہ کو جواب
،تصویر کا ذریعہx.com/PTIofficial
پاکستان تحریک انصاف (پی ٹی آئی) کے مرکزی سیکریٹری اطلاعات شیخ وقاص اکرم نے کہا ہے کہ حکومت مطالبات ماننے میں سنجیدہ ہوئی تو پارٹی دوبارہ مذاکرات کی میز پر آ جائے گی۔
سوشل میڈیا پلیٹ فارم ایکس پر بیان میں انھوں نے الزام عائد کیا کہ ملک میں سیاسی اور معاشی عدم استحکام کی ذمہ دار تحریک انصاف نہیں بلکہ موجودہ حکومت ہے، جبکہ مذاکرات حکومت کی ’ہٹ دھرمی، ضد اور انا‘ کے باعث ناکام ہوئے۔
واضح رہے کہ پی ٹی آئی اپنے مطالبات کے حق میں لانگ مارچ کر رہی ہے، جبکہ گذشتہ روز وزیر اعظم پاکستان شہباز شریف نے کہا تھا کہ دھرنوں اور لانگ مارچ سے ملکی معیشت متاثر ہوتی ہے اور ملک کو نقصان پہنچتا ہے۔
شہباز شریف کے مشیر برائے سیاسی امور رانا ثنا اللہ نے آج بدھ کے روز بتایا کہ وزیر اعظم نے تحریک انصاف کو ایک بار پھر تمام مسائل مذاکرات کے ذریعے حل کرنے کی پیشکش کی ہے۔
رانا ثنا اللہ کو جواب میں شیخ وقاص اکرم نے کہا کہ تحریک انصاف نے کبھی مذاکرات کے راستے سے گریز نہیں کیا اور آج بھی اس کے بنیادی مطالبات میں ذاتی معالج کی نگرانی میں عمران خان کا علاج، ’نا حق‘ قید کا خاتمہ، عمران خان کی بہنوں اور دیگر افراد کی نظر بندی ختم کرنا شامل ہیں۔
انھوں نے کہا کہ عمران خان سمیت تمام زیر حراست افراد کو آئین اور قانون کے مطابق انصاف فراہم کیا جائے اور عدالتی و قانونی عمل میں رکاوٹیں ڈالنا بند کیا جائے۔
شیخ وقاص اکرم کے مطابق جس دن حکومت ان مطالبات پر سنجیدگی کا مظاہرہ کرے گی، تحریک انصاف اسی دن دوبارہ مذاکرات کی میز پر موجود ہو گی۔ ان کا کہنا تھا کہ ان کے مطالبات ’اس سے کم ہیں اور نہ زیادہ۔‘
