ஐபிஎல்-லில் இருந்து ஓய்வு: சிஎஸ்கே அணியில் தோனிக்கு புதிய பொறுப்பு

ஐபிஎல்-லில் இருந்து ஓய்வு: சிஎஸ்கே அணியில் தோனிக்கு புதிய பொறுப்பு
பிரசுரிக்கப்பட்டது
வாசிக்கும் நேரம்: 3 நிமிடங்கள்

சிஎஸ்கே ரசிகர்களால் 'தல' என்று செல்லமாக அழைக்கப்படும் தோனி ஐபிஎல்லுக்கு விடை கொடுத்துள்ளார். சர்வதேச கிரிக்கெட்டில் மட்டுமின்றி, ஐபிஎல் மற்றும் சாம்பியன்ஸ் லீக்கிலும் வெற்றிகரமான கேப்டன் என்று பெயரெடுத்த அவரது ஓய்வு குறித்த அறிவிப்பை சிஎஸ்கே அணி வெளியிட்டுள்ளது.

சிஎஸ்கேவின் எக்ஸ் பக்கத்தில், " வாழ்நாளில் ஒருமுறை மட்டுமே கிடைக்கக்கூடிய வீரர். ஒரு புதிய பொறுப்பு. என்றென்றும் நீடிக்கும் பிணைப்பு. மகேந்திர சிங் தோனி, சென்னை சூப்பர் கிங்ஸ் அணியின் 'ஆலோசகர்' பொறுப்பை ஏற்கிறார். எண்ணற்ற வெற்றிகள், சவாலான காலங்கள் மற்றும் நம் இதயங்களில் என்றும் நிலைத்திருக்கும் நினைவுகள் என, நமது பயணத்தின் தொடக்கத்திலிருந்தே எம்.எஸ். அதன் மையப்புள்ளியாக இருந்து வருகிறார்.

அணியை வெற்றியை நோக்கி அழைத்துச் சென்றது முதல், அடுத்த தலைமுறை சூப்பர் கிங்ஸ் வீரர்களுக்கு வழிகாட்டுவது வரை, 'தல' எப்போதும் நமது அடையாளத்தின் ஒரு அங்கமாகவே இருப்பார். சென்னை எப்போதும் அவருக்கு இல்லமாகவே இருக்கும்." என்று குறிப்பிட்டுள்ளது.

சிஎஸ்கே உரிமையாளர் சீனிவாசன் கூறியது என்ன?

தோனி புதிய அத்தியாயத்தைத் தொடங்க உள்ள நிலையில், சிஎஸ்கே அணிக்கு அவர் எவ்வளவு முக்கியமானவர் என்பது குறித்து அந்த அணியின் உரிமையாளர் என். சீனிவாசன் கூறியுள்ளார்.

"எம்.எஸ். தோனி இல்லாமல் சிஎஸ்கே இல்லை. ஏறக்குறைய இரண்டு தசாப்தங்களாக வெற்றிகள், தோல்விகள், பின்னடைவுகள் என அனைத்திலும் நாங்கள் ஒருவருக்கொருவர் துணையாகப் பயணித்து வளர்ந்திருக்கிறோம். எங்களுடைய உறவு இவ்வளவு வலுவாக இருப்பதற்கு ஒரே காரணம்தான். ஒருவர் மற்றொருவரின் நோக்கத்தின் மீது ஒருபோதும் சந்தேகம் கொள்வதில்லை. அந்த நம்பிக்கையே இந்தப் பயணத்தைச் சாத்தியமாக்கியது." என்று அவர் குறிப்பிட்டுள்ளார்.

மேலும் தொடர்ந்துள்ள அவர், "2008ஆம் ஆண்டு தோனி சிஎஸ்கே அணியில் இடம்பெற வேண்டும் என்று நான் வலியுறுத்தினேன். நான் எடுத்த மிகச் சிறந்த முடிவு அதுதான் என்பது பின்னர் தெரியவந்தது. அந்த அணிக்காக அவர் படைத்த சாதனைகளுக்காக மட்டுமல்ல, அவர் எப்படிப்பட்ட மனிதர் என்பதற்காகவும் அந்த முடிவு சிறந்ததாக அமைந்தது. தோனி எப்போதும் எங்களுடைய அடையாளத்தின் ஒரு பகுதியாக இருப்பார். இந்த அணி எப்போதும் அவருடைய வீடாக இருக்கும்." என்று தெரிவித்துள்ளார்.

"தோனி தொடர்ந்து சிஎஸ்கே குடும்பத்தின் ஒரு பகுதியாக வழிகாட்டியாக இருப்பார். அவரது அனுபவமும் நிபுணத்துவமும் எங்களுக்கு மிகவும் மதிப்புமிக்கவை. குறிப்பாக, இந்த மாற்றக் காலகட்டத்தில் அவை பெரிதும் உதவும். அணியில் பல இளம் வீரர்கள் இருப்பதால், அடுத்த தலைமுறை சிஎஸ்கே வீரர்களை உருவாக்க அவரது வழிகாட்டுதல் உதவும்." என்று சென்னை சூப்பர் கிங்ஸ் அணியின் மற்றொரு உரிமையாளர் ரூபா குருநாத் கூறியுள்ளதாக அந்த வலைதளத்தில் தெரிவிக்கப்பட்டுள்ளது.

ஐபிஎல்-லில் இருந்து ஓய்வு: சிஎஸ்கே அணியில் தோனிக்கு புதிய பொறுப்பு

சிஎஸ்கே நிர்வாக இயக்குநர் கூறியது என்ன?

தோனி ஓய்வு பற்றி சென்னை சூப்பர் கிங்ஸ் அணியின் நிர்வாக இயக்குநர் கே.எஸ். விஸ்வநாதன், "நாங்கள் கடந்த காலத்தைத் திரும்பிப் பார்க்கும்போது, கோப்பைகள் நினைவுகூரப்படும். ஆனால், அந்தக் கோப்பைகளை நாங்கள் வென்ற விதமும் நினைவுகூரப்படும். அதுதான் தோனியின் உண்மையான மரபு. மைதானத்தில் மஞ்சள் நிற உடையில் அவரைப் பார்க்க முடியாது என்பதை நினைத்து வருந்தினாலும், எங்கள் வீரர்களுக்கு அவர் தொடர்ந்து வழிகாட்டுவார் என்பதில் மகிழ்ச்சி அடைகிறோம். இந்தப் பிணைப்பு தொடர்ந்து வலுப்பெற்று, பல ஆண்டுகளுக்கு இந்த அணியை வழிநடத்தும்." என்று குறிப்பிட்டுள்ளார்.

ஐபிஎல்-லில் இருந்து ஓய்வு: சிஎஸ்கே அணியில் தோனிக்கு புதிய பொறுப்பு

ஐபிஎல் தொடரில் தோனியின் சாதனைகள்

ஐபிஎல் தொடரில் தோனி தலைமையில் சென்னை சூப்பர் கிங்ஸ் அணி 5 கோப்பைகளைக் கைப்பற்றியுள்ளது. இதுதவிர, சாம்பியன்ஸ் லீக் டி20 தொடரில் இரண்டு முறை கோப்பையை வென்றுள்ளது.

கேப்டனாக மட்டுமின்றி, ஐபிஎல் வரலாற்றின் மிகச் சிறந்த பேட்ஸ்மேன்களில் ஒருவராகவும் தோனி திகழ்கிறார்.

சென்னை சூப்பர் கிங்ஸ் அணிக்காக அதிக ரன்கள் எடுத்த வீரர்கள் பட்டியலில் 5,314 ரன்களுடன் இரண்டாவது இடத்தில் உள்ளார். அதேபோல், சிஎஸ்கே அணிக்காக அதிக போட்டிகளில் விளையாடிய வீரர் என்ற பெருமையையும் பெற்றுள்ளார். இதுவரை 272 போட்டிகளில் அவர் விளையாடியுள்ளார்.

அவரது ஹெலிகாப்டர் ஷாட்கள் சிஎஸ்கே மற்றும் ஐபிஎல் வரலாற்றின் மறக்க முடியாத பகுதிகளாக உள்ளன.

பரபரப்பான ஆட்டங்களின் போது ரசிகர்கள் பதற்றத்தில் நகங்களைக் கடித்துக் கொண்டிருக்க, அவர் வெளிப்படுத்திய அமைதியான அணுகுமுறை, பேட்ஸ்மேன்களைத் திகைக்க வைக்கும் மின்னல் வேக ஸ்டம்பிங், வித்தியாசமான உத்திகள் எனப் பல்வேறு அம்சங்கள் மூலம் ரசிகர்களுக்கு தோனி நம்பிக்கையூட்டினார்.

ஐபிஎல்-லில் இருந்து ஓய்வு: சிஎஸ்கே அணியில் தோனிக்கு புதிய பொறுப்பு

தோனி ஓய்வு பற்றி முன்னாள் வீரர்கள், வர்ணனையாளர்கள் கருத்து

வாட்ஸ்அப் விளம்பரம் - ஐ புறக்கணித்துவிட்டு தொடர்ந்து படிக்கவும்
வாட்ஸ்அப் விளம்பரம் - படம்
வாட்ஸ்ஆப்பில்

பிபிசி தமிழ் செய்திகளை செல்போனிலேயே படிக்கலாம்

பின்தொடர கிளிக் செய்யவும்

வாட்ஸ்அப் விளம்பரம் - முடிவு

சிறந்த ஃபினிஷரான தோனி, தனது பாணியிலேயே பயணத்தை முடித்துக்கொண்டார் என்று சிஎஸ்கேவின் முன்னாள் வீரர் அம்பத்தி ராயுடு தெரிவித்துள்ளார்.

"தோனி தனது ஆட்டத்தின் உச்சத்தில் இருந்தபோது, எதிரணியினரை விட எப்போதும் ஒரு படி முன்னால் இருந்தார். கேப்டன்சியில் ஒரு படி முன்னால், பேட்டிங்கில் ஒரு படி முன்னால், விக்கெட் கீப்பிங்கிலும் ஒரு படி முன்னால் இருந்தார். அவரைப் போன்ற ஒருவர் இனி வரப்போவதில்லை. அவர் உண்மையிலேயே ஒரு ஜாம்பவான். அவருடன் இணைந்து விளையாடும் வாய்ப்பு கிடைத்தது எனது அதிர்ஷ்டம்." என்று பதிவிட்டுள்ளார்.

இந்திய கிரிக்கெட்டில் மிகுந்த தாக்கத்தை ஏற்படுத்திய ஆளுமைகளில் ஒருவர் தோனி என்று இந்திய முன்னாள் வீரர் இர்ஃபான் பதான் தெரிவித்துள்ளார்.

"தோனி ஒரு தலைவன், சிறந்த ஃபினிஷர், நெருக்கடியான சூழல்களிலும் நிதானத்தையும் அமைதியையும் இழக்காதவர். வாழ்த்துகள், தோனி! உங்களுடைய அபரிமிதமான அனுபவமும் கிரிக்கெட் அறிவும் அடுத்த தலைமுறை வீரர்களுக்கு தொடர்ந்து ஊக்கமளிக்கும் என்பதில் சந்தேகமில்லை." என்று பதிவிட்டுள்ளார்.

ஐபிஎல் கிரிக்கெட்டில் மகேந்திர சிங் தோனியின் ஓய்வு, ஒரு சகாப்தத்தின் முடிவு என கிரிக்கெட் வர்ணனையாளர் ஹர்ஷா போக்ளே வர்ணித்துள்ளார்.

"ஐபிஎல் தொடர் ஒவ்வோர் ஆண்டும் வளர்ந்து வருகிறது. ஆனால், இன்று அந்தத் தொடர் சற்று சோகமானதாகவும், ஏதோ ஒன்றை இழந்துவிட்டதைப் போன்றும் உணர வைக்கிறது. சென்னைக்குச் சென்று, ரசிகர்களுக்கும் அவர்களின் நாயகனுக்கும் இடையிலான உறவை நேரில் பார்ப்பது ஐபிஎல் தொடரில் எனக்குக் கிடைத்த மிகச்சிறந்த அனுபவங்களில் ஒன்று." என்றும் சமூக ஊடகத்தில் அவர் பதிவிட்டுள்ளார்.

(சிஎஸ்கே வலைதளத்தில் உரிமையாளர்கள், நிர்வாக இயக்குநர் குறிப்பிட்ட கருத்துகள் இந்த கட்டுரையில் சேர்க்கப்பட்டுள்ளன.)

- இது, பிபிசிக்காக கலெக்டிவ் நியூஸ்ரூம் வெளியீடு