ஒரு குறிப்பிட்ட கொசுக்களை மட்டும் பிடித்து அரைக்கும் தமிழக சுகாதாரத்துறை - எதற்காக தெரியுமா?

டெங்கு
  • பிரசுரிக்கப்பட்டது
  • வாசிக்கும் நேரம்: 3 நிமிடங்கள்

ஒரு தெருவில் டெங்கு பரவத் தொடங்கிய பிறகுதான் சுகாதாரத்துறை நடவடிக்கை எடுக்க முடியுமா? அப்படியில்லை. அந்தப் பகுதியில் உள்ள கொசுக்களிலேயே டெங்கு வைரஸ் இருக்கிறதா என்று முன்கூட்டியே கண்டறிய முடியும்.

இதற்காகத்தான் கொசுக்களைப் பிடித்து, அரைத்து, அவற்றில் பிசிஆர் பரிசோதனை செய்து வருகிறது தமிழக சுகாதாரத்துறை. இந்தப் பரிசோதனை எப்படி நடக்கிறது? இதன் மூலம் டெங்குவை எப்படிக் கட்டுப்படுத்த முடியும்?

ஒரு சிறிய குப்பியில் அடைக்கப்பட்டிருக்கும் கொசுக்கள். அவற்றுடன் சிறிதளவு திரவம் சேர்க்கப்படுகிறது. கண்ணாடிக் கம்பியால் அவை நன்றாக அரைக்கப்படுகின்றன. பிறகு அந்தத் திரவம் பல்வேறு பரிசோதனைகளுக்கு உட்படுத்தப்படுகிறது. கேட்பதற்குச் சற்று வித்தியாசமாக இருந்தாலும், டெங்கு பரவலைக் கட்டுப்படுத்த தமிழக சுகாதாரத்துறை பயன்படுத்தும் ஒரு முக்கியமான கண்காணிப்பு முறை இது.

பொதுவாக, ஒருவருக்கு டெங்கு காய்ச்சல் வந்த பிறகுதான் அவரைப் பரிசோதித்து நோயைக் கண்டறிவார்கள். ஆனால், மனிதர்களுக்கு நோய் ஏற்படுவதற்கு முன்பே, குறிப்பிட்ட பகுதியில் டெங்கு வைரஸ் பரவுவதற்கான அறிகுறி இருக்கிறதா என்பதைத் தெரிந்துகொள்ள முடியுமானால்? அதற்கான முயற்சிதான் கொசுக்களில் மேற்கொள்ளப்படும் இந்தப் பிசிஆர் பரிசோதனை.

தமிழ்நாட்டில் கொசுக்களை அரைத்து பரிசோதனை -  டெங்குவை முன்பே கண்டறிய முடியுமா?

முதலில் கொசுக்களைப் பிடிப்பது எப்படி?

டெங்கு நோய் ஏடிஸ் எஜிப்டை (Aedes aegypti) வகை கொசுக்களால் பரவுகிறது. இந்த வகைக் கொசுக்களில் பெண் கொசுக்கள்தான் மனிதர்களைக் கடித்து ரத்தத்தை உறிஞ்சுகின்றன. முட்டை உற்பத்திக்குத் தேவையான புரதங்களைப் பெறுவதற்கு அவற்றுக்கு ரத்தம் தேவைப்படுகிறது. ஆண் கொசுக்கள் மனிதர்களைக் கடிப்பதில்லை.

ஏடிஸ் கொசுக்கள் பெரும்பாலும் பகல் நேரத்தில் கடிக்கக்கூடியவை. இவற்றின் உடலில் கருப்பு, வெள்ளை நிறக் கோடுகள் காணப்படுவதால் 'டைகர் கொசுக்கள்' என்றும் அழைக்கப்படுகின்றன.

"ஏடிஸ் கொசுக்கள் பொதுவாக இருட்டான, சற்று குளிர்ச்சியான இடங்களில் இருக்கும். அவற்றின் உடலில் உள்ள வெள்ளை புள்ளிகளை வைத்தே மற்ற கொசுக்களிலிருந்து வேறுபடுத்திக் கண்டறிய முடியும். சில நேரங்களில் பூதக்கண்ணாடியையும் பயன்படுத்துவோம்" என்கிறார் சுகாதாரத்துறையில் பணியாற்றும் பூச்சியியல் வல்லுநர் ஆனந்த்.

களப்பணியாளர்கள் பிரத்யேகக் குழாய்கள் மூலம் கொசுக்களை பிடிக்கின்றனர். அப்போது டெங்குவைப் பரப்பும் ஏடிஸ் கொசுக்கள் மட்டுமல்லாமல், யானைக்கால் நோயைப் பரப்பும் க்யூலெக்ஸ் உள்ளிட்ட மற்ற வகைக் கொசுக்களும் சிக்கலாம்.

தினமும் கொசுக்களைச் சேகரித்துப் பழகிய களப்பணியாளர்கள், அவற்றைப் பார்த்தவுடனேயே எந்த வகையைச் சேர்ந்தவை என்று அடையாளம் காண்கின்றனர். பின்னர் ஆய்வகத்திலும் அவை ஏடிஸ் கொசுக்கள்தானா என்பது உறுதி செய்யப்படுகிறது.

தமிழ்நாட்டில் கொசுக்களை அரைத்து பரிசோதனை -  டெங்குவை முன்பே கண்டறிய முடியுமா?

கொசுக்களை ஏன் அரைக்க வேண்டும்?

சேகரிக்கப்பட்ட ஏடிஸ் கொசுக்கள் சோதனைக் குழாய்களில் அடைக்கப்பட்டு ஆய்வகத்துக்கு அனுப்பப்படுகின்றன.

தமிழ்நாட்டில் சென்னையிலும் ஓசூரிலும் உள்ள பொது சுகாதார ஆய்வகங்களில் இந்த பரிசோதனையை செய்ய முடியும்.

"தமிழ்நாட்டின் பல்வேறு மாவட்டங்களிலிருந்து கொசு மாதிரிகள் இங்கு வருகின்றன. ஒரே பகுதியில் பிடிக்கப்பட்ட 25 ஏடிஸ் கொசுக்கள் ஒன்றாக ஒரு குப்பியில் சேகரிக்கப்படும். அவற்றுடன் ஒரு திரவத்தைச் சேர்த்து, கண்ணாடிக் கம்பி கொண்டு நன்றாக அரைப்போம்" என்கிறார் சென்னை தேனாம்பேட்டையில் உள்ள மாநிலப் பொது சுகாதார ஆய்வகத்தின் துணை இயக்குநர் ராஜூ.

தமிழ்நாட்டில் கொசுக்களை அரைத்து பரிசோதனை -  டெங்குவை முன்பே கண்டறிய முடியுமா?

கொசுக்களை அரைப்பதன் நோக்கம், அவற்றின் உடலில் இருக்கும் வைரஸ் உள்ளிட்ட உயிரியல் கூறுகளைப் பிரித்துப் பரிசோதிப்பதுதான்.

அரைக்கப்பட்ட கொசுக்களிலிருந்து கிடைக்கும் திரவத்தில் பல்வேறு கூறுகள் இருக்கும். அவற்றிலிருந்து ஆர்என்ஏ (RNA) தனியாகப் பிரித்தெடுக்கப்படுகிறது. பின்னர், அந்த மாதிரியில் டெங்கு வைரஸின் ஆர்என்ஏ இருக்கிறதா என்பதைக் கண்டறிய பிசிஆர் பரிசோதனை செய்யப்படுகிறது.

எளிமையாகச் சொன்னால், மனிதர்களின் ரத்த மாதிரியில் டெங்கு வைரஸ் இருக்கிறதா என்று கண்டறிவதற்கு இணையாக, கொசுக்களின் மாதிரியிலும் வைரஸ் இருக்கிறதா என்று ஆய்வு செய்யப்படுகிறது.

டெங்கு

ஒரு தெருவில் வைரஸ் இருந்தால் என்ன நடக்கும்?

பரிசோதனையில் டெங்கு வைரஸ் இருப்பது உறுதி செய்யப்பட்டால், அந்தக் கொசுக்கள் எந்தப் பகுதியில் பிடிக்கப்பட்டன என்ற விவரங்கள் ஆய்வு செய்யப்படும்.

கொசுக்கள் எந்த மண்டலம், எந்தப் பகுதி, எந்தத் தெருவில் பிடிக்கப்பட்டன என்பது வரை தகவல்கள் சேகரிக்கப்படுகின்றன.

உதாரணமாக, சென்னை சைதாப்பேட்டையில் ஒரு குறிப்பிட்ட தெருவில் சேகரிக்கப்பட்ட கொசுக்களில் டெங்கு வைரஸ் இருப்பது கண்டறியப்பட்டால், அந்தப் பகுதியைச் சுகாதாரத்துறை கூடுதல் கவனத்துடன் கண்காணிக்கும் என்கிறார் தமிழ்நாடு பொது சுகாதாரத்துறை இயக்குநர் சோமசுந்தரம்.

''அந்தப் பகுதியில் கொசு ஒழிப்பு நடவடிக்கைகள் மேற்கொள்ளப்படும். கொசுக்கள் உற்பத்தியாகும் இடங்கள் கண்டறியப்பட்டு அழிக்கப்படும். தேவைக்கேற்ப காய்ச்சல் முகாம்களும் நடத்தப்படும். அதாவது, அந்தப் பகுதியில் அதிகமானோருக்கு டெங்கு காய்ச்சல் ஏற்பட்டு மருத்துவமனைகளுக்கு வரத் தொடங்குவதற்கு முன்பே தடுப்பு நடவடிக்கைகளைத் தீவிரப்படுத்த முடியும்" என்கிறார் சோமசுந்தரம்.

2017 முதல் தமிழகத்தில் செயல்படுத்தப்படும் முறை

2017 முதல் தமிழகத்தில் செயல்படுத்தப்படும் முறை

வாட்ஸ்அப் விளம்பரம் - ஐ புறக்கணித்துவிட்டு தொடர்ந்து படிக்கவும்
வாட்ஸ்அப் விளம்பரம் - படம்
வாட்ஸ்ஆப்பில்

பிபிசி தமிழ் செய்திகளை செல்போனிலேயே படிக்கலாம்

பின்தொடர கிளிக் செய்யவும்

வாட்ஸ்அப் விளம்பரம் - முடிவு

கொசுக்களில் டெங்கு வைரஸ் இருக்கிறதா என்று பரிசோதிக்கும் இந்த முறை 2017-ம் ஆண்டு முதல் தமிழகத்தில் நடைமுறைப்படுத்தப்பட்டு வருவதாகப் பொதுச் சுகாதாரத்துறை இயக்குநர் மருத்துவர் சோமசுந்தரம் தெரிவிக்கிறார்.

"கடந்த மூன்று, நான்கு ஆண்டுகளாக டெங்கு பரவலைக் கட்டுக்குள் வைத்திருப்பதில் இந்த முறை மிகவும் உதவியாக இருக்கிறது. கொசு மருந்து அடிப்பதற்கும், அதற்குப் பயன்படுத்தப்படும் வாகனங்களுக்கான டீசல் செலவுக்கும் அதிகம் செலவாகிறது. எந்தப் பகுதியில் டெங்கு வைரஸ் இருக்கிறது என்று முன்கூட்டியே கண்டறிவதன் மூலம், தேவையான இடங்களில் மட்டும் தடுப்பு நடவடிக்கைகளைத் தீவிரப்படுத்தி செலவுகளைக் குறைக்க முடிகிறது" என்கிறார் அவர்.

"கொசுக்கள் மனிதர்களைத் தாக்குவதற்கு ஒரு படி முன்பாகவே சென்று நோயைக் கட்டுப்படுத்தும் முயற்சி இது" என்கிறார் ராஜூ.

மனிதர்களுக்கு டெங்கு காய்ச்சல் வந்த பிறகு சிகிச்சை அளிப்பது ஒருபுறம் இருக்க, நோயைப் பரப்பும் கொசுக்களிலேயே வைரஸ் இருக்கிறதா என்று தேடிக் கண்டுபிடித்து, நோய் பரவலைத் தடுப்பதற்கான நடவடிக்கைகளை முன்கூட்டியே மேற்கொள்வது மற்றொரு பக்கம்.

"இந்த அணுகுமுறைதான் தமிழகத்தின் டெங்கு கண்காணிப்பு முறையில் முக்கியத்துவம் பெறுகிறது" என்கிறார் ராஜூ.

எனினும், கொசுக்களில் வைரஸ் கண்டறியப்படுவது அந்தப் பகுதியில் மனிதர்களுக்கு டெங்கு பாதிப்பு ஏற்பட்டுவிட்டது என்பதற்கான நேரடி ஆதாரம் அல்ல. மேலும் இது டெங்குவை முழுமையாக தடுக்கும் எனவும் கூறமுடியாது.

இது நோய் பரவுவதற்கான அபாயத்தை முன்கூட்டியே அடையாளம் காண உதவும் ஒரு கண்காணிப்பு முறை.

கொசு உற்பத்தியைக் கட்டுப்படுத்துவதும், தண்ணீர் தேங்காமல் பார்த்துக்கொள்வதும், காய்ச்சல் அறிகுறிகள் இருந்தால் மருத்துவப் பரிசோதனை செய்துகொள்வதும் தொடர்ந்து அவசியம்.

மத்திய அரசு தரவுகளின்படி, தமிழ்நாட்டில் 2024-ஆம் ஆண்டு 27,378 டெங்கு பாதிப்புகளும் 13 இறப்புகளும் ஏற்பட்டன. 2025-ஆம் ஆண்டு 23407 பாதிப்புகளும் 12 இறப்புகளும் பதிவாகின. 2026-ஆம் ஆண்டு பிப்ரவரி மாதம் வரையிலான தரவுகளின்படி, 2873 பாதிப்புகளும் ஓர் இறப்பும் பதிவாகியிருந்தது.

- இது, பிபிசிக்காக கலெக்டிவ் நியூஸ்ரூம் வெளியீடு