நிகில் சௌத்ரி: பிறந்த நாள் கொண்டாட சென்றவர் கோவிட் காலத்தில் சிக்கி ஆஸ்திரேலியாவின் நட்சத்திர வீரரான கதை

நிகில் சௌத்ரி: பிறந்த நாள் கொண்டாட சென்றவர் கோவிட் காலத்தில் சிக்கி ஆஸ்திரேலியாவின் நட்சத்திர வீரரான கதை
படக்குறிப்பு, நிகில் சௌத்ரி
    • எழுதியவர், மேத்யூ ஹென்றி
    • பதவி, விளையாட்டு செய்தியாளர், பிபிசி
  • பிரசுரிக்கப்பட்டது
  • வாசிக்கும் நேரம்: 5 நிமிடங்கள்

ஆஸ்திரேலியா – இங்கிலாந்து அணிகளுக்கு இடையே சனிக்கிழமை மெல்போர்னில் நடைபெற்ற முதல் டி20 சர்வதேச கிரிக்கெட் போட்டியில், இந்திய வம்சாவளியைச் சேர்ந்த நிகில் சௌத்ரி ஆஸ்திரேலியாவின் வெற்றியில் முக்கியப் பங்காற்றினார்.

கடைசி ஓவர் வரை நீடித்த இந்தப் போட்டி மிகவும் விறுவிறுப்பாக அமைந்தது.

எதிர்பாராத விதமாக ஆஸ்திரேலிய அணியில் இடம்பிடித்த நிகில் சௌத்ரி, பேட்டிங் மற்றும் பந்துவீச்சு என இரண்டிலும் சிறப்பாகச் செயல்பட்டு இங்கிலாந்து அணியின் தோல்விக்கு முக்கிய காரணமாக அமைந்தார்.

முதலில் பேட்டிங் செய்த இங்கிலாந்து அணி, நிர்ணயிக்கப்பட்ட 20 ஓவர்களில் 187 ரன்கள் எடுத்தது. நிகில் சௌத்ரி தான் வீசிய நான்கு ஓவர்களில் 21 ரன்கள் மட்டுமே விட்டுக்கொடுத்து, இங்கிலாந்து அணியின் இரண்டு விக்கெட்டுகளைக் கைப்பற்றினார். அதிரடியாக விளையாடி வந்த இங்கிலாந்து கேப்டன் ஹாரி புரூக்கை தனது சுழற்பந்துவீச்சால் வீழ்த்தினார் நிகில்.

இதையடுத்து களமிறங்கிய ஆஸ்திரேலிய அணி, கடைசி ஓவரில் ஒரு பந்து மீதமிருந்த நிலையில் வெற்றி பெற்றது. ஆஸ்திரேலிய அணிக்காக அதிக ரன்கள் எடுத்த நிகில் சௌத்ரி, சிறப்பாக விளையாடி அரைசதம் அடித்தார்.

ஆனால், ஆஸ்திரேலிய கிரிக்கெட் அணியில் இடம்பிடிப்பதற்கான நிகில் சௌத்ரியின் பயணம் ஒரு கனவைப் போல அமைந்துள்ளது.

நிகில் சௌத்ரியின் பயணம்

நிகில் சௌத்ரி

டெல்லியில் பிறந்த நிகில் சௌத்ரி, இந்திய உள்நாட்டு கிரிக்கெட்டில் சுப்மன் கில்லுடன் இணைந்து விளையாடியுள்ளார்.

கொரோனா பெருந்தொற்று காலத்தில் தனது 24-வது பிறந்தநாளைக் கொண்டாடுவதற்காக பிரிஸ்பேனுக்குச் சென்ற அவர், அங்கேயே சிக்கிக்கொண்டார். பெருந்தொற்றுக்குப் பிறகு ஆஸ்திரேலியாவுக்காக கிரிக்கெட் விளையாடத் தொடங்கினார்.

வாட்ஸ்அப் விளம்பரம் - ஐ புறக்கணித்துவிட்டு தொடர்ந்து படிக்கவும்
வாட்ஸ்அப் விளம்பரம் - படம்
வாட்ஸ்ஆப்பில்

பிபிசி தமிழ் செய்திகளை செல்போனிலேயே படிக்கலாம்

பின்தொடர கிளிக் செய்யவும்

வாட்ஸ்அப் விளம்பரம் - முடிவு

அதன்பிறகு, ஆஸ்திரேலியாவின் கிளப் மற்றும் உள்நாட்டுப் போட்டிகளில் படிப்படியாக முன்னேறினார். இந்த காலகட்டத்தில் மெக்சிகன் உணவகம் ஒன்றிலும் அவர் பணியாற்றியுள்ளார்.

இந்திய கலாசாரத்தைவிட ஆஸ்திரேலிய கலாசாரத்துடன் தனக்கு அதிக நெருக்கம் இருப்பதாக உணர்ந்ததால், ஆஸ்திரேலியாவுக்காக விளையாட முடிவெடுத்ததாக நிகில் சௌத்ரி ஒருமுறை கூறியிருந்தார்.

பாட்காஸ்ட் நேர்காணல் ஒன்றில் அவர் பேசுகையில், "பஞ்சாப் அணிக்காக நான் விளையாடிய கடைசி டி20 போட்டி, 2020ஆம் ஆண்டு மார்ச் மாதத்தில் மும்பை அணிக்கு எதிராக நடைபெற்றது. அப்போதே எனது பிறந்தநாளைக் கொண்டாடுவதற்காக ஆஸ்திரேலியா செல்லத் திட்டமிட்டிருந்தேன்.

"2020ஆம் ஆண்டு மார்ச் 15-ஆம் தேதி ஆஸ்திரேலியாவுக்கு வந்தேன். மே 6-ஆம் தேதி திரும்புவதற்கான விமான டிக்கெட்டையும் முன்பதிவு செய்திருந்தேன். ஆனால், நான் ஆஸ்திரேலியாவுக்கு வந்த ஓரிரு நாட்களிலேயே கொரோனா பெருந்தொற்றின் தாக்கம் அதிகரித்தது.

"ஆஸ்திரேலியாவில் அனைத்து எல்லைகளும் மூடப்பட்டன. மாகாணங்களுக்கு இடையிலான எல்லைகளும்கூட மூடப்பட்டன. எங்கும் செல்ல முடியாத நிலை ஏற்பட்டது.

"அடுத்த ஆறு மாதங்களுக்கு இந்திய உள்நாட்டு கிரிக்கெட் போட்டிகள் நடைபெறுமா என்பதுகூடத் தெளிவாகத் தெரியவில்லை. ஆனால், ஆஸ்திரேலியாவில் ஆறு மாதங்களுக்குள் கிரிக்கெட் போட்டிகள் தொடங்கின. பிரிஸ்பேனிலும் வானிலை நன்றாக இருந்தது.

"அதனால் அங்குள்ள கிளப் ஒன்றில் விளையாடத் தொடங்கினேன். எனது ஆட்டத்தை அவர்கள் மிகவும் விரும்பினர். என்னால் நான்கு நாள் போட்டிகளில் விளையாட முடியாது என்று அவர்கள் கருதினர். முதலில் டி20 போட்டிகளுக்காக என்னைத் தேர்வு செய்தனர்.

"சுற்றுலா விசாவில் அங்கு சென்ற நான், பின்னர் மாணவர் விசா பெற்றேன். மூன்று ஆண்டுகள் படித்தேன். தோட்டக்கலைத் துறையில் படித்ததால், இப்போது பட்டப்படிப்பு முடித்த விவசாயியாகவும் இருக்கிறேன்.

"மூன்று மாதங்கள் மெக்சிகன் உணவகம் ஒன்றில் பணியாற்றினேன். அதன்பிறகு, இரண்டரை ஆண்டுகள் ஆஸ்திரேலியா போஸ்ட் நிறுவனத்தில் வேலை பார்த்துக்கொண்டே கிரிக்கெட் தொடர்ந்து விளையாடினேன்" என்றார்.

போட்டியை காண இந்தியாவில் இருந்து சென்ற பெற்றோர்

2025-ஆம் ஆண்டில், நியூ சவுத் வேல்ஸ் மற்றும் டாஸ்மேனியா அணிகளுக்கு இடையே நடைபெற்ற ஷெஃபீல்ட் ஷீல்ட் போட்டியில், நிகில் 150 ஓட்டங்களை எடுத்தார்.
படக்குறிப்பு, 2025-ஆம் ஆண்டில், நியூ சவுத் வேல்ஸ் மற்றும் டாஸ்மேனியா அணிகளுக்கு இடையே நடைபெற்ற ஷெஃபீல்ட் ஷீல்ட் போட்டியில், நிகில் 150 ஓட்டங்களை எடுத்தார்.

30 வயதான நிகில் சௌத்ரி, மெல்போர்ன் கிரிக்கெட் மைதானத்தில் தனது நான்காவது சர்வதேசப் போட்டியில் இதுவரை இல்லாத அளவுக்கு சிறப்பான ஆட்டத்தை வெளிப்படுத்தினார்.

ஹாரி புரூக் 28 பந்துகளில் 65 ரன்கள் விளாசியபோதிலும், நிகில் சௌத்ரியின் சுழற்பந்துவீச்சு இங்கிலாந்து அணியை 9 விக்கெட் இழப்புக்கு 187 ரன்களுடன் கட்டுப்படுத்த உதவியது.

21 ரன்களை மட்டுமே விட்டுக்கொடுத்து இரண்டு விக்கெட்டுகளைக் கைப்பற்றிய அவர், பின்னர் 66 ரன்கள் எடுத்து ஆஸ்திரேலிய அணியின் வெற்றிக்கு வித்திட்டார்.

ஆஸ்திரேலியா வெற்றிக்கான ரன்னை எடுத்த போது, எம்.சி.ஜி. மைதானத்தில் ரசிகர்கள் எழுப்பிய ஆரவாரத்துக்கு மத்தியில் அவர் கொண்டாடிய விதம் சிறப்பான தருணமாக அமைந்தது.

இதுகுறித்து அவர் கூறுகையில், "எனது பெற்றோர் போட்டியைக் காண இந்தியாவில் இருந்து வந்தனர். நான் விளையாடுவதை அவர்கள் நேரில் பார்த்த முதல் போட்டி இதுதான்" என்றார்.

போட்டியின் போது வலதுகை பேட்டரான நிகில், லியாம் டாசன் மற்றும் சாம் கரனுடன் வாக்குவாதத்தில் ஈடுபட்டதையும் பார்க்க முடிந்தது.

கடைசி நேரத்தில் இங்கிலாந்து அணி ஆட்டத்தின் வேகத்தைக் குறைத்த போது, மைதானத்தில் இருந்த ரசிகர்கள் கூச்சலிட்டு எதிர்ப்புத் தெரிவித்தனர்.

இதுகுறித்து நிகில் சௌத்ரி கூறுகையில், "இங்கிலாந்துக்கு எதிரான போட்டி எப்போதுமே பெரிய போட்டிதான் என்பது உங்களுக்குத் தெரியும். அதனால் களத்தில் இதுபோன்ற வாக்குவாதங்கள் ஏற்படுவது இயல்புதான்" என்றார்.

கடைசி ஓவரில் 11 ரன்களை தடுத்து இங்கிலாந்துக்கு வெற்றியைப் பெற்றுத் தரும் பொறுப்பு சாம் கரனிடம் ஒப்படைக்கப்பட்டது. ஆனால், ஆல்ரவுண்டர் ஜாக் எட்வர்ட்ஸ் ஆட்டமிழக்காமல் 25 ரன்கள் எடுத்து ஆஸ்திரேலியாவின் வெற்றியை உறுதி செய்தார்.

சொந்த மண்ணில் ஆஸ்திரேலிய அணியின் அதிகபட்ச வெற்றிகரமான ரன் சேஸாக இது அமைந்தது. மூன்று விக்கெட்டுகள் மீதமிருந்த நிலையில், ஒரு பந்து எஞ்சியிருக்க ஆஸ்திரேலியா வெற்றி பெற்றது.

உப்புத்தாள் (Sandpaper) சர்ச்சைக்கு மத்தியில், பல புதிய வீரர்களைக் கொண்ட ஆஸ்திரேலிய அணிக்கு இந்த வெற்றி ஓரளவு நிம்மதியை அளித்தது. ஐந்து போட்டிகள் கொண்ட தொடரில் ஆஸ்திரேலியா 1-0 என முன்னிலை பெற்றது.

செவ்வாய்க்கிழமை கோல்ட் கோஸ்ட்டில் நடைபெறும் போட்டியில் தொடரைச் சமன் செய்யும் நோக்கில் இங்கிலாந்து களமிறங்குகிறது.

விளையாட்டின் மூலம் பதிலடி கொடுத்த நிகில்

சனிக்கிழமையன்று இங்கிலாந்துக்கு எதிரான ஆஸ்திரேலியாவின் வெற்றியில் நிகில் சௌத்ரி மிகச்சிறந்த பங்களிப்பை வழங்கினார்.
படக்குறிப்பு, சனிக்கிழமை இங்கிலாந்துக்கு எதிரான ஆஸ்திரேலியாவின் வெற்றியில் நிகில் சௌத்ரி மிகச்சிறந்த பங்களிப்பை வழங்கினார்.

இந்தச் சுற்றுப்பயணத்தில் மைதானத்துக்கு வெளியே பல்வேறு சர்ச்சைகள் நீடித்தாலும், கிரிக்கெட் கண்ணோட்டத்தில் இந்தப் போட்டி மிகவும் சுவாரஸ்யமாகவும் விறுவிறுப்பாகவும் அமைந்தது.

போட்டியின் முதல் பந்திலேயே ஃபில் சால்ட் ஆட்டமிழந்தார். அதன்பிறகு, பவுண்டரிகளும் சிக்ஸர்களுமாக ஆட்டம் சூடுபிடித்தது. ஆஸ்திரேலிய அணியின் ஃபீல்டிங் மிகவும் மோசமாக இருந்தது. இதனால் வீரர்களுக்கு இடையே வாக்குவாதங்களும் ஏற்பட்டன. இறுதியில் போட்டி பரபரப்பான கட்டத்தை எட்டியது.

இந்தப் போட்டியில் நிகில் சௌத்ரியின் ஆட்டம் குறிப்பாகப் பாராட்டப்பட வேண்டியது.

ஆஸ்திரேலிய அணிக்கு தொடக்க ஓவரிலேயே தொடக்க ஆட்டக்காரர் ஜேக் ஃப்ரேசர்-மெக்கர்க் ஆட்டமிழந்தார். மிட்செல் மார்ஷும் 37 ரன்கள் எடுக்கத் தடுமாறினார். இந்தச் சூழலில் நிகில் மிக எளிதாக ரன்களைக் குவித்தார்.

ஆஃப் சைடு திசையில் தொடர்ந்து பல்வேறு ஷாட்களை ஆடினார். 143 ரன்களுக்கு 3 விக்கெட்டுகளை இழந்திருந்த ஆஸ்திரேலிய அணி, அடுத்த 13 ரன்களுக்குள் மேலும் மூன்று விக்கெட்டுகளை இழந்தது.

இதையடுத்து, வில் ஜாக்ஸ் பந்துவீச்சில் ஒரு சிக்ஸரையும், ஜேமி ஓவர்டன் பந்துவீச்சில் அடுத்தடுத்து இரண்டு பவுண்டரிகளையும் விளாசி ரன் குவிப்பை வேகப்படுத்தினார் நிகில்.

டாசன் மற்றும் கரனுடன் ஏற்பட்ட மோதல்கள் பெரிதாகத் தெரியவில்லை என்றாலும், இரு தரப்பினருக்கும் இடையே சில வார்த்தைப் பரிமாற்றங்கள் நடந்தன.

கரனுடன் ஏற்பட்ட வாக்குவாதத்தின் போது நடுவர் தலையிட்டு, நிகிலைத் தொடர்ந்து விளையாடச் செய்ய வேண்டியிருந்தது.

18-வது ஓவரின் முடிவில் ஓவர்டன் வீசிய பந்தை டீப் ஸ்கொயர் லெக் திசையில் அடிக்க முயன்ற நிகில் ஆட்டமிழந்தார். இதனால் மீண்டும் போட்டிக்குள் வருவதற்கான வாய்ப்பு இங்கிலாந்து அணிக்குக் கிடைத்தது. இருப்பினும், எட்வர்ட்ஸ் பதற்றமின்றி விளையாடி அணியின் வெற்றியை உறுதி செய்தார்.

மறுபுறம், ஆட்டத்தின் 19-வது ஓவரில் நான்கு பந்துகளை வீசியிருந்த ஜேக்ஸ், கையில் ஏற்பட்ட காயம் காரணமாக மைதானத்தைவிட்டு வெளியேற வேண்டிய நிலை ஏற்பட்டது.

புரூக்கின் அதிரடி வீணானது

சனிக்கிழமையன்று மெல்போர்னில் இங்கிலாந்துக்கு எதிராகப் பந்துவீசிய நிகில் சௌத்ரி, இரண்டு விக்கெட்டுகளை வீழ்த்தினார்.
படக்குறிப்பு, சனிக்கிழமையன்று மெல்போர்னில் இங்கிலாந்துக்கு எதிராகப் பந்துவீசிய நிகில் சௌத்ரி, இரண்டு விக்கெட்டுகளை வீழ்த்தினார்.

இங்கிலாந்து அணி முதலில் பேட்டிங் செய்கையில் ஒன்பதாவது ஓவரில் 2 விக்கெட் இழப்புக்கு 110 ரன்கள் எடுத்திருந்தபோது, அந்த அணி எளிதாக 200 ரன்களைக் கடக்கும் என்றே தோன்றியது.

16-வது ஓவரில் ஆஸ்திரேலிய அணி நான்கு விக்கெட்டுகளை வீழ்த்தியதால், வெற்றி பெறுவதற்கான வாய்ப்பு இங்கிலாந்துக்கு அதிகரித்தது. இருப்பினும், மேலும் 15 முதல் 20 ரன்கள் வரை எடுக்கத் தவறியது இங்கிலாந்து அணிக்குப் பெரும் பின்னடைவாக அமைந்தது.

ஒருநாள் போட்டித் தொடரில் இங்கிலாந்து கேப்டன் ஹாரி புரூக், மூன்று போட்டிகளில் வெறும் 23 ரன்கள் மட்டுமே எடுத்திருந்தார். ஆனால், முதல் டி20 போட்டியில் மீண்டும் தனது திறமையை நிரூபித்தார். குறைந்த ஓவர்கள் கொண்ட போட்டிகளில் உலகின் முன்னணி பேட்டர்களில் ஒருவர் என்பதை அவரது ஆட்டம் மீண்டும் உறுதிப்படுத்தியது.

இரண்டு மற்றும் மூன்று ரன்களில் இருந்தபோது புரூக்கை ஆட்டமிழக்கச் செய்ய கிடைத்த வாய்ப்புகளை ஆஸ்திரேலிய அணி வீணாக்கியது. ஆஸ்திரேலிய வீரர்கள் மொத்தம் ஆறு கேட்ச்களை தவறவிட்டனர்.

நான்காவது ஓவரில் மெரிடித் பந்துவீச்சில் தொடர்ச்சியாக மூன்று சிக்ஸர்களை விளாசி தனது அதிரடியை வெளிப்படுத்தினார் புரூக். குறிப்பாக, புல் ஷாட்கள் மூலம் அவர் சிறப்பாக ரன் குவித்தார்.

நிகில் சௌத்ரி வீசிய பந்தை கட் ஷாட் அடிக்க முயன்றபோது புரூக் ஆட்டமிழந்தார். அடுத்த ஓவரிலேயே டாம் பான்டனும் ஆட்டமிழந்தார். அவர் 39 ரன்கள் எடுத்திருந்தார். புரூக்குடன் இணைந்து 97 ரன்கள் பார்ட்னர்ஷிப் அமைத்திருந்தார்.

அதன்பிறகு, இங்கிலாந்து அணியால் மீண்டு வரவே முடியவில்லை.

- இது, பிபிசிக்காக கலெக்டிவ் நியூஸ்ரூம் வெளியீடு