தனுஷ், மம்மூட்டி, சாய் பல்லவி நடித்துள்ள 'ஓம்' படம் எப்படி இருக்கிறது? ஊடக விமர்சனம்

பட மூலாதாரம், DivoMusic/Youtube
'அமரன்' திரைப்படத்தின் வெற்றிக்குப் பிறகு இயக்குநர் ராஜ்குமார் பெரியசாமி இயக்கியுள்ள 'ஓம்: ஆபரேஷன் மோல்' திரைப்படம் இன்று (நவம்பர் 20) திரையரங்குகளில் வெளியாகியுள்ளது.
தனுஷ், மம்மூட்டி, சாய் பல்லவி, ஸ்ரீலீலா, நசிருதீன் ஷா உள்ளிட்டோர் நடித்துள்ள இந்தப் படத்திற்கு சாய் அபயங்கர் இசையமைத்துள்ளார்.
செம்மரக் கடத்தலை மையமாகக் கொண்ட இந்தப் படம், காவல்துறையின் ரகசிய நடவடிக்கையையும் அதில் சிக்கிக்கொள்ளும் மனிதர்களின் வாழ்க்கையையும் பேசுகிறது.
படத்தில் தனுஷ், மம்மூட்டி, சாய் பல்லவி ஆகியோரின் நடிப்புக்கு ஊடகங்கள் மற்றும் ரசிகர்களிடையே பாராட்டுகள் கிடைத்துள்ளன. அதேநேரத்தில், திரைக்கதையின் வேகம், கதாபாத்திர வடிவமைப்பு, விறுவிறுப்பு ஆகிய அம்சங்கள் குறித்து சில விமர்சனங்களும் எழுந்துள்ளன.
ஓம் திரைப்படத்தின் கதை என்ன?

பட மூலாதாரம், DivoMusic/Youtube
ஆந்திரப் பிரதேசத்தில் நடைபெறும் செம்மரக் கடத்தலைத் தடுக்க காவல்துறை சிறப்பு நடவடிக்கை ஒன்றைத் தொடங்குகிறது.
செம்மரக் கடத்தல் வலையமைப்பின் முக்கிய நபர்களைக் கண்டறியும் பொறுப்பு, சாய் பல்லவி நடித்துள்ள காவல்துறை அதிகாரி பாத்திரமான நித்யா ரெட்டியிடம் ஒப்படைக்கப்படுகிறது.
இதற்காகப் பழனி என்ற காவல்துறை அதிகாரி, தனது அடையாளத்தை மறைத்து கடத்தல் கும்பலுக்குள் ஊடுருவுகிறார். இந்தக் கதாபாத்திரத்தில் தனுஷ் நடித்துள்ளார்.
மம்மூட்டி நடித்துள்ள பர்மா கார்த்திகேயன் என்ற கடத்தல்காரரின் நம்பிக்கையைப் பெற்று, அவருக்கு நெருக்கமானவராக தனுஷ் மாறுகிறார்.
இந்த ரகசிய நடவடிக்கையில் அவர் எதிர்கொள்ளும் சிக்கல்கள் என்ன? கடத்தல் வலையமைப்பை காவல்துறையால் முறியடிக்க முடிந்ததா? என்பதுதான் படத்தின் கதைக்களம்.
ஓம் திரைப்படத்தின் திரைக்கதை எப்படி?

பட மூலாதாரம், DivoMusic/Youtube
வழக்கமான செம்மரக் கடத்தல், காவல்துறை நடவடிக்கை ஆகியவற்றை மையமாகக் கொண்ட கதையாக இருந்தாலும், விறுவிறுப்பான காட்சிகள் மூலம் இயக்குநர் ராஜ்குமார் பெரியசாமி பார்வையாளர்களின் கவனத்தைத் தக்க வைத்திருப்பதாக மாலை மலர் பாராட்டியுள்ளது.
குறிப்பாக, இடைவேளை மற்றும் இறுதிக்காட்சிகள் படத்தின் முக்கியமான பலமாக இருப்பதாகக் கூறும் அந்த விமர்சனம், சில காட்சிகளை முன்கூட்டியே ஊகிக்க முடிவதாகவும் தெரிவித்துள்ளது.
செம்மரக் கடத்தல் கும்பலுக்குள் காவல்துறை அதிகாரி ஒருவர் ஊடுருவிச் செயல்படுவதை நுணுக்கமான விவரங்களுடன் இயக்குநர் காட்சிப்படுத்தியிருப்பதாக டைம்ஸ் ஆஃப் இந்தியா கூறியுள்ளது.
காவல்துறையினரும் கடத்தல்காரர்களும் எவ்வாறு செயல்படுகிறார்கள் என்பதை விளக்கும் விதமாகத் திரைக்கதை அமைந்துள்ளதாகவும், இயக்குநரின் உழைப்பு படத்தில் தெரிவதாகவும் அந்த விமர்சனம் பாராட்டியுள்ளது.
ஆனால், ஓர் உளவுத் திரைப்படத்துக்குத் தேவையான பரபரப்பும் பதற்றமும் போதுமான அளவில் இல்லை என டைம்ஸ் ஆஃப் இந்தியா விமர்சித்துள்ளது.
பல காட்சிகள் மிக வேகமாக நகர்வதால், அவற்றின் உணர்வுப்பூர்வமான தாக்கத்தைப் பார்வையாளர்கள் முழுமையாக உணர்வதற்கான வாய்ப்பு குறைவதாகவும் அது தெரிவித்துள்ளது.
படத்தின் முதல் பாதியில் கதாபாத்திரங்களை அறிமுகப்படுத்துவதற்கும் அவற்றின் பின்னணியை விளக்குவதற்கும் அதிக நேரம் எடுத்துக் கொள்ளப்படுவதாக இந்தியா டுடே விமர்சித்துள்ளது.
இதனால் திரைக்கதையின் விறுவிறுப்பு குறைகிறது என்றும், இடைவேளைக்குப் பிறகே கதை நகர்வில் முன்னேற்றம்இருப்பதாகவும் அந்த விமர்சனம் கூறுகிறது.
வழக்கமான அதிரடி உளவுத் திரைப்படமாக இல்லாமல், கதாபாத்திரங்களின் உணர்வுகளுக்கும் அவர்களின் முடிவுகளால் ஏற்படும் விளைவுகளுக்கும் முக்கியத்துவம் அளிக்க இயக்குநர் முயன்றிருப்பதாக இந்தியா டுடே பாராட்டியுள்ளது.
அதேநேரத்தில், செம்மரக் கடத்தலில் பழங்குடிகள் சுரண்டப்படுவது, காவல்துறையின் அத்துமீறல்கள் போன்ற முக்கியமான பிரச்னைகளைப் படம் தொட்டுச் சென்றாலும், அவற்றை ஆழமாகப் பேசத் தவறியிருப்பதாகவும் அந்த விமர்சனம் சுட்டிக்காட்டியுள்ளது.
படத்தின் திரைக்கதை விறுவிறுப்பாக இருப்பதாக மாலை மலர் பாராட்டியுள்ள நிலையில், திரைக்கதையின் வேகமும் உணர்வுப்பூர்வமான தாக்கமும் எதிர்பார்த்த அளவில் இல்லை என்று டைம்ஸ் ஆஃப் இந்தியா மற்றும் இந்தியா டுடே விமர்சித்துள்ளன.
தனுஷ், சாய் பல்லவியின் நடிப்பு எப்படி?

பட மூலாதாரம், DivoMusic/Youtube
படத்தில் தனுஷ், சாய் பல்லவி ஆகியோரின் நடிப்பை ஊடக விமர்சனங்கள் பாராட்டியுள்ளன.
நீண்ட நாட்களுக்குப் பிறகு துறுதுறுப்பான நடிப்பையும் ஆழமான உணர்வுகளையும் வெளிப்படுத்த வேண்டிய கதாபாத்திரத்தில் தனுஷ் சிறப்பாக நடித்திருப்பதாக மாலை மலர் கூறியுள்ளது.
குறிப்பாக, அவரது அறிமுகக் காட்சி மற்றும் சண்டைக் காட்சிகள் பாராட்டப்பட்டுள்ளன.
காவல்துறை அதிகாரியாக வரும் சாய் பல்லவி, தனது கதாபாத்திரத்தின் கம்பீரத்தையும் தனிப்பட்ட உணர்வுகளையும் சிறப்பாக வெளிப்படுத்தியிருப்பதாகவும் அந்த விமர்சனம் தெரிவித்துள்ளது.
தனுஷும் மம்மூட்டியும் சிறப்பாக நடித்திருந்தாலும், படத்தின் மிகப்பெரிய பலம் சாய் பல்லவியின் நடிப்புதான் என்று இந்தியா டுடே தெரிவித்துள்ளது.
வழக்கமான காவல்துறை அதிகாரியாக மட்டுமின்றி, தனிப்பட்ட இழப்புகளையும் மன உறுதியையும் கொண்ட பெண்ணாக அவர் நடித்திருப்பதை அந்த ஊடகம் பாராட்டியுள்ளது.
தனுஷின் கதாபாத்திரத்தில் பல்வேறு உணர்வுகளை வெளிப்படுத்துவதற்கான வாய்ப்புகள் இருப்பதாகவும், அவற்றை அவர் திறம்படக் கையாண்டிருப்பதாகவும் இந்தியா டுடே குறிப்பிட்டுள்ளது.
இதே கருத்தை டைம்ஸ் ஆஃப் இந்தியாவும் முன்வைத்துள்ளது. மகிழ்ச்சி, உறுதி, துயரம், கோபம், குற்றவுணர்வு எனப் பல்வேறு உணர்வுகளைத் தனுஷ் சிறப்பாக வெளிப்படுத்தியிருப்பதாகக் கூறியுள்ள அந்த விமர்சனம், சாய் பல்லவியும் தனது கதாபாத்திரத்துக்கு ஏற்ற நடிப்பை வழங்கியிருப்பதாகப் பாராட்டியுள்ளது.
தனுஷ் மற்றும் சாய் பல்லவியின் நடிப்பை இந்த மூன்று ஊடகங்களுமே பாராட்டியுள்ள நிலையில், சாய் பல்லவி தனித்துக் கவனம் ஈர்ப்பதாக இந்தியா டுடே தெரிவித்துள்ளது.
மம்மூட்டியின் கதாபாத்திரம் குறித்து விமர்சகர்கள் சொல்வது என்ன?

பட மூலாதாரம், DivoMusic/Youtube
பர்மா கார்த்திகேயன் என்ற கதாபாத்திரத்தில் மம்மூட்டியின் அனுபவமிக்க நடிப்பு படத்திற்குப் பெரும் பலமாக இருப்பதாக மாலை மலர் கூறியுள்ளது.
வழக்கமான கடத்தல்காரராக இல்லாமல், உணர்வுப்பூர்வமான பின்னணியைக் கொண்ட நபராக அவர் நடித்திருப்பதாகவும் அந்த விமர்சனம் பாராட்டியுள்ளது.
ஆனால், மம்மூட்டியின் கதாபாத்திரம் அவருடைய நடிப்புத் திறமைக்கு ஏற்றதாக அமைந்துள்ளதா என தி இந்து ஆங்கில நாளிதழ் கேள்வி எழுப்பியுள்ளது.
செம்மரக் கடத்தல் உலகில் செல்வாக்கு மிக்க நபராக மம்மூட்டியின் கதாபாத்திரம் அறிமுகப்படுத்தப்பட்டாலும், அதற்கேற்ற வலிமையுடன் அந்தக் கதாபாத்திரம் எழுதப்படவில்லை என்று தி இந்து விமர்சித்துள்ளது.
கடத்தல் தொழிலில் நீண்ட அனுபவம் கொண்ட ஒருவரின் செயல்பாடுகளாக, கார்த்திகேயனின் சில முடிவுகள் நம்பும்படியாக இல்லை என்றும் குறிப்பிட்டுள்ளது.
தனுஷுக்கும் மம்மூட்டிக்கும் இடையிலான உறவு கதையின் முக்கிய அம்சமாக இருந்தாலும், மம்மூட்டி போன்ற அனுபவமிக்க நடிகரின் திறமையை முழுமையாகப் பயன்படுத்தும் அளவுக்கு அவரது கதாபாத்திரம் அமைக்கப்படவில்லை என்றும் விமர்சித்துள்ளது.
அதேநேரத்தில், படத்தின் இறுதிப் பகுதியில் இடம்பெறும் முக்கியமான காட்சிகளில் மம்மூட்டி தனது நடிப்புத் திறமையை வெளிப்படுத்தியிருப்பதாக தி இந்து பாராட்டியுள்ளது.
மம்மூட்டியின் கதாபாத்திரம் குறித்துப் பேசியுள்ள டைம்ஸ் ஆஃப் இந்தியா, கடத்தல் கும்பலின் தலைவராக வரும் அவர், அந்த உலகில் எதிர்பார்க்கப்படும் சந்தேகமும் எச்சரிக்கையும் இல்லாதவராகச் சித்தரிக்கப்பட்டிருப்பதாகக் கூறியுள்ளது.
இருப்பினும், தனது அனுபவமிக்க நடிப்பின் மூலம் மம்மூட்டி அந்தக் கதாபாத்திரத்துக்கு வலு சேர்த்திருப்பதாகவும் தெரிவித்துள்ளது.
மம்மூட்டியின் கதாபாத்திரம் உணர்வுப்பூர்வமான மாற்றங்களைச் சந்திப்பதாகவும், அந்த மாற்றங்களை அவரது நடிப்பு சிறப்பாக வெளிப்படுத்துவதாகவும் இந்தியா டுடே குறிப்பிட்டுள்ளது.
இசை, ஒளிப்பதிவு எப்படி இருக்கின்றன?
சாய் அபயங்கரின் இசையும் எழில் அரசுவின் ஒளிப்பதிவும் பார்வையாளர்களைப் படத்துடன் ஒன்றவைக்க உதவுவதாக மாலை மலர் பாராட்டியுள்ளது.
சாய் அபயங்கரின் பின்னணி இசை, படத்தின் முக்கியமான தருணங்களுக்கு உற்சாகத்தையும் உணர்வுப்பூர்வமான தாக்கத்தையும் வழங்குவதாக டைம்ஸ் ஆஃப் இந்தியா கூறியுள்ளது. திரைக்கதையில் சில காட்சிகள் எதிர்பார்த்த தாக்கத்தை ஏற்படுத்தாதபோதும், பின்னணி இசை அவற்றுக்கு வலுசேர்ப்பதாக அந்த விமர்சனம் தெரிவித்துள்ளது.
ஆனால், சாய் அபயங்கரின் பின்னணி இசை எதிர்பார்ப்பை முழுமையாக பூர்த்தி செய்யவில்லை என்று இந்தியா டுடே விமர்சித்துள்ளது. அதேநேரத்தில், 'வீழா வீரா' பாடல் முக்கியமான காட்சி ஒன்றின் உணர்வுக்கு ஏற்றவாறு அமைந்துள்ளதாக அந்த ஊடகம் பாராட்டியுள்ளது.
எழில் அரசுவின் ஒளிப்பதிவும் கலைவாணனின் படத்தொகுப்பும் படத்தின் காட்சியமைப்புக்குப் பலம் சேர்ப்பதாகவும் இந்தியா டுடே தெரிவித்துள்ளது.
மற்ற நடிகர்களின் நடிப்பு எப்படி இருக்கிறது?

பட மூலாதாரம், DivoMusic/Youtube
ஸ்ரீலீலா, பிரசன்னா, இந்திரன்ஸ், ரேணு தேசாய் உள்ளிட்டோர் தங்களுக்கு வழங்கப்பட்ட கதாபாத்திரங்களைச் சிறப்பாகச் செய்திருப்பதாக மாலை மலர் கூறியுள்ளது.
ஆனால், நசிருதீன் ஷா போன்ற மூத்த நடிகரின் கதாபாத்திரத்தை இன்னும் வலுவாக உருவாக்கியிருக்கலாம் என்றும் விமர்சித்துள்ளது.
ஸ்ரீலீலாவுக்கு வழங்கப்பட்டுள்ள குறைவான வாய்ப்பை அவர் பயன்படுத்தியிருப்பதாக இந்தியா டுடே கூறியுள்ளது.
ஸ்ரீலீலா, நசிருதீன் ஷா உள்ளிட்டோரின் கதாபாத்திரங்கள் படத்தில் பெரிய தாக்கத்தை ஏற்படுத்தவில்லை என்று டைம்ஸ் ஆஃப் இந்தியா தெரிவித்துள்ளது.
- இது, பிபிசிக்காக கலெக்டிவ் நியூஸ்ரூம் வெளியீடு
































