'அகல் விளக்கு' நூல்களை வாங்க எழுத்தாளர் பெருமாள் முருகன் பரிந்துரையா? குற்றச்சாட்டுக்கு அவர் பதில்

தமிழ்நாட்டில் அரசு நூலகங்களுக்கான புத்தகங்கள் கொள்முதலில் நடந்துள்ள முறைகேடு, மக்களின் மனசாட்சியை உலுக்கியுள்ளதாகக் கூறியுள்ள உயர் நீதிமன்றம், கடந்த 20 ஆண்டுகளுக்கும் மேலாக நூலகங்களுக்கு புத்தகங்கள் கொள்முதல் செய்யப்பட்டது எவ்வாறு என்பது குறித்து விரிவான விசாரணை நடத்தி அறிக்கை தாக்கல் செய்ய வேண்டுமென்று மாநில அரசுக்கு உத்தரவிட்டுள்ளது. இதில் வெள்ளை அறிக்கை தாக்கல் செய்வது பொருத்தமாக இருக்கும் என்றும் கூறியுள்ளது.
இந்நிலையில், நிபுணர் குழுவால் பரிந்துரைக்கப்பட்ட பல புத்தகங்கள் வாங்கப்படாமல், யாருமே பரிந்துரைக்காத புத்தகங்கள் வாங்கப்பட்டு இருப்பதாக பிபிசியிடம் கூறினார் எழுத்தாளர் சு.வேணுகோபால்.
பதிப்பகங்களும் தவறு செய்ததாக கூறும் எழுத்தாளரும் பதிப்பகத் தலைவருமான ஸ்டாலின் குணசேகரன், பெரும்பாலும் அதிகாரிகள்தான் புத்தகங்கள் கொள்முதலில் முறைகேடு நடக்கக் காரணமாக இருந்ததாகக் கூறுகிறார்.
உயர் நீதிமன்ற உத்தரவு என்ன?
கோவை பெரியார் அறிவுலகத்துக்கு புத்தகங்கள் கொள்முதல் செய்ததில் ஊழல் நடந்திருப்பதாக எழுத்தாளர் பெருமாள் முருகன் கூறிய குற்றச்சாட்டுக்குப் பின்பு, அங்கு மட்டுமின்றி தமிழ்நாடு முழுவதும் நூலகங்களில் இருந்த பல ஆயிரம் தரமற்ற புத்தகங்கள் அகற்றப்பட்டுள்ளன. இதுதொடர்பாக லஞ்ச ஒழிப்புத் துறை விசாரணை மேற்கொண்டு வருகிறது.
ஏற்கெனவே அரசு நூலகங்களுக்கான புத்தகங்கள் கொள்முதலில் வெளிப்படைத்தன்மையைக் கடைப்பிடிக்க வேண்டுமென உயர் நீதிமன்றம் உத்தரவிட்ட நிலையில், அதற்குப் பின் இத்தகைய முறைகேடு நடந்துள்ளதைச் சுட்டிக்காட்டி, ராமசுப்பு என்பவர் நீதிமன்ற அவமதிப்பு வழக்கு தாக்கல் செய்தார். அந்த மனுவை விசாரித்த உயர் நீதிமன்ற மதுரை அமர்வு நீதிபதிகள் ஜி.ஆர். சுவாமிநாதன், எம்.டி. சுமதி அமர்வு, பொது, சிறப்பு என இரு வகையாக புத்தகங்கள் கொள்முதல் செய்யப்பட்டதைச் சுட்டிக்காட்டி பல்வேறு கேள்விகளை எழுப்பியது.

நீதிபதிகள் எழுப்பிய கேள்விகள்:
- பொது கொள்முதலுக்குப் பொருந்தும் அதே கொள்கைகள், சிறப்புக் கொள்முதலுக்கும் பின்பற்றப்பட்டதா?
- 137 உறுப்பினர்களைக் கொண்ட நிபுணர் குழுவால் எத்தனை புத்தகங்கள் பரிந்துரைக்கப்பட்டு, எவ்வளவு புத்தகங்கள் இறுதியில் கொள்முதல் செய்யப்பட்டன?
- 'அகல் விளக்கு' நிறுவனத்திடம் 2,300 புத்தகங்களில் 1,700 புத்தகங்கள் கொள்முதல் செய்யப்பட்டுள்ளது. மீதமுள்ள 600 புத்தகங்களை நிராகரித்தது யார்?
- தமிழ், ஆங்கிலப் புத்தகங்களுக்கு தனித்தனியாக ஒதுக்கப்பட்ட நிதி எவ்வளவு, அது முழுமையாகப் பயன்படுத்தப்பட்டுள்ளதா?
- நிபுணர் குழு பரிந்துரைத்தும் கொள்முதல் செய்யப்படாத புத்தகங்கள் எவ்வளவு, அதற்கான காரணங்கள் என்ன?
நீதிபதிகள் இந்தக் கேள்விகளை எழுப்பிய நிலையில், அரசால் எடுக்கப்பட்ட நடவடிக்கைகள் விளக்கப்பட்டு, முறைகேட்டில் தொடர்புடைய அனைவரும் சட்டப்படி தண்டிக்கப்படுவார்கள் என்று அரசுத் தரப்பில் உறுதியளிக்கப்பட்டது.
தமிழ்நாட்டில் நூலக வரி எப்படி செலவிடப்பட்டது என்ற விவரத்தையும் அடுத்த பதில் மனுவில் தருமாறு நீதிபதிகள் உத்தரவிட்டனர்.
இந்த விவகாரம் மக்களின் மனசாட்சியை உலுக்கியுள்ளதாகக் கூறிய நீதிபதிகள், ''கடந்த 20 ஆண்டுகளுக்கும் மேலாக அரசு நூலகங்களுக்கு எவ்வாறு புத்தகங்கள் கொள்முதல் செய்யப்பட்டது என்பது குறித்து விரிவான விசாரணை நடத்தி ஓர் அறிக்கையைச் சமர்ப்பிக்க வேண்டும். இது தொடர்பாக ஒரு வெள்ளை அறிக்கையைத் தாக்கல் செய்தால் பொருத்தமானதாக இருக்கும்'' என்றும் கூறியுள்ளனர்.
அகல் விளக்கு பதிப்பக நூல்களை வாங்க பரிந்துரையா? பெருமாள் முருகன் பதில்

உயர்நீதிமன்றத்தில் இந்த வழக்கு விசாரணை நடந்து வரும் நிலையில், புத்தகங்கள் கொள்முதல் தொடர்பாக பணியிடை நீக்கம் செய்யப்பட்ட நூலகர் காமாட்சி என்பவர் சார்பில் ஆஜரான மூத்த வழக்கறிஞர் ராகவாச்சாரி, நூல் கொள்முதல் விவகாரத்தில் கீழ்நிலை நூலகர்கள் மீது மட்டும் நடவடிக்கை எடுக்கப்படுவது ஏன் என்றும், முடிவுகளை எடுத்த உயர் அதிகாரிகள் மீதும் நடவடிக்கை எடுக்கப்பட வேண்டும் என்றும் வாதிட்டார்.
அப்போது, எழுத்தாளர் பெருமாள் முருகனால் குற்றம்சாட்டப்பட்டு சர்ச்சைக்குள்ளாகி அகற்றப்பட்ட அகல்விளக்கு பதிப்பகத்தின் சில நூல்களை வாங்குவதற்கு நூல் பரிந்துரைக் குழுவில் இடம்பெற்றிருந்த பெருமாள் முருகனும் பரிந்துரை செய்ததாக அவர் தெரிவித்தார். அதற்கு நீதிபதிகள், ''அந்த நூல்களை அவர் பரிந்துரைத்திருக்க வாய்ப்பில்லை.'' என்றனர்.
அதற்கு, "அந்த நூல்களை பெருமாள் முருகன் பரிந்துரைக்கவில்லையெனில், அந்த தகவலை அவர் இந்த நீதிமன்றத்தில் பிரமாணப் பத்திரமாக தாக்கல் செய்ய உத்தரவிட வேண்டும்." என்ற வாதத்தை முன் வைத்தார்.
இந்த வாதம் குறித்து எழுத்தாளர் பெருமாள் முருகனிடம் பிபிசி கேள்வி எழுப்பியபோது, ''அகல் விளக்கு பதிப்பகத்தின் எந்த புத்தகங்களையும் நான் பரிந்துரைக்கவில்லை. குழுவில் வேறு யாரும் பரிந்துரை செய்தார்களா என்பது எனக்குத் தெரியாது. இதுபற்றி எனது தரப்பை நான் விளக்குவேன்.'' என்றார்.
பரிந்துரைக் குழு பரிந்துரைத்தும் வராத புத்தகங்களும், பரிந்துரைக்காமல் வந்த புத்தகங்களும்
தமிழ்நாட்டில் கடந்த 30 ஆண்டுகளாக, தரமான பதிப்பகங்கள் பெரும்பாலும் அரசு நூலகங்களுக்கு புத்தகங்களைத் தருவதே இல்லை என்கிறார், எழுத்தாளரும் பேராசிரியருமான சு.வேணுகோபால். இவர் முந்தைய திமுக அரசால் பொது நூலகங்களுக்கான நூல்கள் பரிந்துரைக் குழுவில் நவீன இலக்கியங்கள் பிரிவில் இடம்பெற்றிருந்தவர்.
பிபிசி தமிழிடம் பேசிய சு.வேணுகோபால், ''அரசு நூலகங்களுக்குத் தரப்படும் புத்தகங்களுக்கு ஃபாரம் அடிப்படையில் விலை நிர்ணயிக்கப்படும். ஒரு புத்தகத்தின் விலை 300 ரூபாய் என்றால் அதில் பாதி விலைதான் அரசு கொடுக்கும். அதற்கேற்ப சில பதிப்பகங்கள், புத்தகத்தின் தரத்தைக் குறைத்துக் கொடுப்பார்கள். தரமான பதிப்பகங்கள் தரமான தாள்களில் நேர்த்தியாக அச்சிடுவார்கள். அவர்களுக்கு அது கட்டுப்படியாகாது. அதனால் அவர்கள் தருவதில்லை'' என்றார்.

சு.வேணுகோபால் மற்றும் சில எழுத்தாளர்களும், பதிப்பகத்தாரும், தமிழ்நாட்டில் இருந்த புத்தகங்கள் கொள்முதல் நடைமுறையில் இருந்த சில சிக்கல்கள் குறித்து விவரித்தனர். அதில், ஒரு புத்தகத்தை வாங்குவதற்கு 5 புத்தகங்களை நூலக ஆணைக் குழுவுக்கு அனுப்பும் முறையைச் சுட்டிக்காட்டுகின்றனர்.
ஒரு பதிப்பகம் ஆண்டுக்கு 100 புத்தகங்கள் வெளியிடும்போது, நூலக ஆணைக் குழுவுக்கு தலா 5 என்று 500 புத்தகங்களை அனுப்ப வேண்டும். அதை அவர்கள் வாங்கலாம், வாங்காமலும் தவிர்க்கலாம். வாங்காவிட்டாலும் அந்த 500 புத்தகங்களும் திரும்ப வராது என்பதால் பல பதிப்பகங்கள் அனுப்புவதே இல்லை என்கின்றனர்.
ஆனால், அதிகாரிகள் மட்டத்தில் தவறுகள் நடப்பதாக குற்றம் சாட்டுகிறார், எழுத்தாளரும், நியூ செஞ்சுரி புக் ஹவுஸ் தலைவருமான ஸ்டாலின் குணசேகரன்.
"நாங்கள் கொடுப்பதை வாங்க வேண்டிய இடத்தில் பதிப்பகங்கள் இருப்பதாக அதிகாரிகள் நினைக்கும் மனப்பான்மை மாறவேண்டும்" என்கிறார் அவர்.

பிபிசி தமிழிடம் பேசிய ஸ்டாலின் குணசேகரன், ''நல்ல தரமான புத்தகங்களை வாங்க வேண்டுமென்று அரசும் நினைப்பதில்லை. பல பதிப்பகங்களும் அதை விரும்புவதில்லை. அரசு நூலகங்கள் என்றால் தரமற்ற தாள்களில்தான் புத்தகங்களை அச்சிட்டுத் தருகின்றனர். ஒரு எழுத்தாளனாக ஒரு வார்த்தையை எழுதுவதற்கு முன்பாக அது சரியான வார்த்தையா என்று 2 நாட்கள் யோசிக்கும் நிலையில், மக்கள் படிக்கும் ஒரு புத்தகத்தை வாங்கும்போது அரசு தீர்க்கமாக ஆலோசித்து, புத்தகக் கொள்முதலில் அடிப்படை அறத்தைக் கடைபிடிக்க வேண்டும். இந்த விசாரணையால் ஒரு நிரந்தரத் தீர்வு கிடைத்தால் நல்லது'' என்றார்.
பரிந்துரைக் குழுக்கள் இருந்தும் எப்படி இவ்வளவு புத்தகங்கள் வந்தன என்பது பற்றிப் பலரும் கேள்வி எழுப்பும் நிலையில், அந்தப் பரிந்துரைக் குழு என்பதே ''வெறும் வெளிப்பூச்சுதான்'' என்கிறார் எழுத்தாளரும், குழு உறுப்பினருமான சு.வேணுகோபால்.
அதுபற்றி விளக்கிய அவர், ''என்னைப் போலவே பல குழுக்களில் எழுத்தாளர்கள், ஆங்கில இலக்கியவாதிகள், நிபுணர்கள் பலர் இருந்தனர். இந்தாண்டு ஜனவரியில் சட்டப்பேரவைத் தேர்தலுக்கு முன்பாக பெரியார் அறிவுலகத்தைத் திறக்க முடிவு செய்து, சென்ற ஆண்டு செப்டம்பரில் குறுகிய கால அவகாசம் அளித்து எங்களிடம் இருந்து ஒரு பட்டியல் வாங்கினர். ஆனால், வாசிப்பு அனுபவம் மற்றும் இலக்கிய அறிவை வைத்து 15 பதிப்பகங்களின் 2500க்கும் அதிகமான புத்தகங்களை நான் பரிந்துரைத்தேன். இதேபோல, குழுவில் இருந்தவர்கள் பல ஆயிரம் புத்தகங்களைப் பரிந்துரைத்தார்கள்'' என்றார்.
''ஆனால் பரிந்துரைக் குழு பரிந்துரைத்த பல ஆயிரம் புத்தகங்கள் வாங்கப்படவில்லை. அதேநேரத்தில், குழுக்கள் பரிந்துரைக்காத பல ஆயிரம் புத்தகங்கள் வாங்கப்பட்டுள்ளன. உதாரணமாக, ஒரு சில புதிய பதிப்பகங்கள் மிகச் சிறந்த சில புத்தகங்களை வெளியிட்டிருந்தன. அவற்றில் நான் பரிந்துரைத்த ஒரு புத்தகத்தையும் கொள்முதல் செய்யவில்லை'' என்றார் சு.வேணுகோபால்.

பிபிசி தமிழிடம் பேசிய கோவை விஜயா பதிப்பகத்தின் உரிமையாளர் வேலாயுதம், ''சில பதிப்பகங்கள், சங்கத்தின் பெயரை வைத்துக் கொண்டு நூல்கள் கொள்முதலில் ஆதிக்கம் செலுத்தியதை மறுக்க முடியாது'' என்றார்.
நூல்கள் கொள்முதலில் சில தவறுகள் நடந்திருக்கலாம் என்று ஒப்புக்கொள்ளும் தென்னிந்திய புத்தக விற்பனையாளர்கள் மற்றும் பதிப்பகத்தார் சங்கத்தின் (BAPASI) தலைவர் சண்முகம், கடந்த 20 ஆண்டுகள் புத்தகங்கள் கொள்முதல் தொடர்பாக விசாரணை நடத்த உயர் நீதிமன்றம் அளித்துள்ள உத்தரவை தங்களுடைய அமைப்பு வரவேற்பதாகத் தெரிவித்தார்.
ஆனால் இந்த விசாரணையைக் காரணம் காட்டி, அது முடியும் வரை தற்போதுள்ள புத்தகங்கள் கொள்முதல் நடைமுறையை நிறுத்தக்கூடாது என்றும் அவர் வலியுறுத்தினார்.
பிபிசியிடம் பேசிய சண்முகம், ''ஒரு பதிப்பகத்தால் வெளியிடப்பட்ட புத்தகம் விற்காமல் போய்விட்டால் பெயர் மாற்றி விற்பார்கள். அதேபோன்று ஒரே புத்தகத்தை ஆண்டுதோறும் விற்க முடியாது என்பதாலும், தலைப்பை மாற்றி விற்பார்கள். இத்தகைய முறைகேடுகளில் 'பபாசி' உறுப்பினர்கள் யாரும் ஈடுபட்டதில்லை. சில பதிப்பகங்கள் சிண்டிகேட் போட்டதாகச் சொல்வார்கள். அதுவும் எங்கள் காலத்தில் நடக்கவில்லை'' என்றார்.

''ஒரு புதிய கொள்முதல் நடைமுறையை உருவாக்கினால் முறைகேட்டுக்கு வழியில்லை. இன்றைக்கு புத்தகங்கள் படிப்போர் குறைந்துவிட்டதால், பதிப்பகங்களின் நிலை மிக மோசமாகவுள்ளது. மொத்த கொள்முதல் என்பது அரசு நூலகங்களுக்கு வாங்குவது மட்டும்தான். அதுவும் நின்றுவிட்டால் மிகவும் கஷ்டமாகிவிடும்'' என்றார் சண்முகம்.
புத்தக கொள்முதல் சர்ச்சை மற்றும் நீதிமன்ற வழக்கு காரணமாக இது பற்றி நூலகத் துறை அதிகாரிகள் யாரும் பேச முன்வரவில்லை.
பெயர் கூற விரும்பாத சிறந்த நூலகர் விருது பெற்ற ஒருவரிடமும், தமிழ்நாடு அரசின் நூல்கள் கொள்முதல் ஆய்வுக் குழுவில் இடம் பெற்றிருந்த நூலகரிடமும் பிபிசி தமிழ் பேசியபோது அவர்கள் சில விஷயங்களைப் பகிர்ந்தனர்.
ஐஏஎஸ் அதிகாரி இளம் பகவத், பொது நூலக இயக்குநராக இருந்தபோது ஒரு நல்ல நடைமுறையைக் கொண்டு வந்ததாக அவர்கள் கூறுகின்றனர்.
''காகிதம், அட்டை (ஜிஎஸ்எம்), அச்சுத் தரம் ஆகியவற்றை மிகவும் கண்டிப்பாகக் கடைபிடித்த அவர், புத்தகங்கள் கொள்முதலில் வெளிப்படைத்தன்மையை உருவாக்கத் தனியாக இணையதளத்தை உருவாக்கி, பதிப்பகத்தார், நூலகர் மற்றும் அதிகாரிகளுக்குத் தனித்தனி 'லாக் இன்' கொடுத்து, புத்தகத்தை இணையத்தில் அனுப்பி தேர்வு செய்யும் நடைமுறையை வைத்திருந்தார்.'' என அவர்கள் கூறினர்
ஒரு புத்தகத்தை ஐந்து பேர் பரிந்துரைத்தால்தான் அந்தப் புத்தகம் தேர்வு செய்யப்படும் என்றும், உறுதியளித்த தரத்தில் புத்தகம் இல்லாவிட்டால், அடுத்த 5 ஆண்டுகளுக்கு நூலகங்களுக்கு அந்தப் பதிப்பகம் புத்தகத்தை அனுப்ப முடியாத அளவுக்கு அவர் விதிகளை உருவாக்கி இருந்ததாகவும் அவர்கள் தகவல் பகிர்ந்தனர்.

அந்த நடைமுறையிலும் வாசகர்கள் விரும்பிக் கேட்கும் புத்தகங்களை வாங்க வழியில்லாமல் இருந்தது என்று கூறிய அவர்கள், நூலக வரி வசூலிக்கப்படுவதால் எத்தகைய புத்தகம் வேண்டுமெனக் கேட்கும் உரிமை மக்களுக்கு இருப்பதால் அவர்கள் விருப்பமும் கருத்தில் கொள்ளப்பட வேண்டுமென்று வலியுறுத்துகின்றனர்.
''சென்னை, கோவை நூலகங்களுக்கும், கடைக்கோடி கிராமங்களில் உள்ள நூலகங்களுக்கும் ஒரே மாதிரியான புத்தகங்களை அனுப்புவது தவறானது. உதாரணமாக 'கடல்புறா' நூலை கிராமங்களில் அதிகமாகக் கேட்பார்கள். ஆனால் அந்தப் புத்தகம் கிழிந்து பயன்படுத்த முடியாத நிலையில் இருக்கும். எங்களால் அதை வாங்கவும் முடியாது. நூலகங்களுக்கு ஒதுக்கப்படும் தொகையில் ஒவ்வொரு பிரிவுக்கும் அவர்கள் அனுப்பிய புத்தகங்களில்தான் எங்களால் புத்தகங்களைத் தேர்வு செய்ய முடியும்'' என்றார் ஒரு நூலகர்.
ஒரு கிளை நூலகத்துக்கு ஒன்றே கால் லட்சம் நிதி ஒதுக்கப்பட்டால், அதில் தமிழ் நாவல்களுக்கு ரூ.10 ஆயிரம், ஆங்கில நாவல்களுக்கு ரூ.7 ஆயிரம், போட்டித் தேர்வு நூல்களுக்கு ரூ.3 ஆயிரம் என்று தொகை நிர்ணயிக்கப்படும் என்றும், அவற்றுக்குள்தான் புத்தகங்களை வாங்க முடியுமென்றும் அவர்கள் விளக்கினர்.
''நிபுணர்கள் குழு பரிந்துரைக்கும் புத்தகங்களுடன் வாசகர்களிடமும் கருத்து கேட்டு அந்தப் புத்தகங்களை வாங்கினால் 99% தரமற்ற புத்தகங்கள் நூலகத்திற்குள் வருவது தடுக்கப்படும்'' என்றார் ஒரு நூலகர்.
- இது, பிபிசிக்காக கலெக்டிவ் நியூஸ்ரூம் வெளியீடு

































