'எதிர்பாராத வகையில் கிடைத்த தடயம்' ஏடிஎம் கொள்ளை வழக்கில் ஒருவரை கைது செய்ய உதவியது எப்படி?

தமிழ்நாட்டில் அடுத்தடுத்து நடந்த ஏடிஎம் கொள்ளைச் சம்பவங்களை விசாரித்த போலீசார், இந்தக் கொள்ளைகளில் ஈடுபட்டோருக்கு ஏடிஎம் இயந்திரங்களை உடைப்பது குறித்து சிறப்புப் பயிற்சி அளிக்கப்பட்டிருக்கலாம் என்ற கோணத்தில் விசாரணையை ஹரியாணாவை நோக்கி விரிவுபடுத்தியுள்ளனர்.

சென்னை மற்றும் அதன் புறநகர்ப் பகுதிகளில் ஆகஸ்ட், செப்டம்பர் மாதங்களில் நடந்த கொள்ளைச் சம்பவங்களில், எரிவாயு வெல்டிங் கருவிகளைப் பயன்படுத்தி ஏடிஎம் இயந்திரங்களைத் திறந்து பணம் கொள்ளையடிக்கப்பட்டது. இதில் சோமங்கலம் மற்றும் கும்மிடிப்பூண்டி சம்பவங்களில் ஹரியாணாவின் மேவாட் பகுதியைச் சேர்ந்த கும்பலுக்கு தொடர்பு இருக்கிறதா என போலீசார் விசாரித்து வருகின்றனர்.

"அவர்கள் எரிவாயு வெல்டிங் மூலம் ஏடிஎம் இயந்திரங்களை வெட்டியிருப்பதால், அதற்காக அவர்களுக்கு பயிற்சி அளிக்கப்பட்டிருக்க வேண்டும். இயந்திரத்தை மிகக் குறுகிய நேரத்தில் வெட்ட வேண்டும். அதே நேரத்தில் போலீசாரிடம் சிக்கக்கூடாது. இயந்திரத்திற்குள் இருக்கும் பணத்தாள்களும் சேதமடையக் கூடாது. இந்த இரண்டுக்கும் பயிற்சி தேவை," என்று தாம்பரம் காவல் ஆணையர் பிரேம் ஆனந்த் சின்ஹா பிபிசி தமிழிடம் தெரிவித்தார்.

இந்த கொள்ளைச் சம்பவங்களின் பின்னணியில் செயல்படும் கும்பல்களைப் பற்றிய விசாரணை தற்போது தமிழ்நாட்டைக் கடந்து செல்கிறது. குறிப்பாக, கொள்ளையர்களுக்கு இந்தத் தொழில்நுட்பத்தை யார் கற்றுக் கொடுத்தது, அதற்காக ஏடிஎம் இயந்திரங்கள் அல்லது பிற கருவிகள் எங்கிருந்து கிடைத்தன என்பது குறித்தும் போலீசார் விசாரித்து வருகின்றனர்.

சோமங்கலம் கொள்ளையில் கிடைத்த தடயம்

ஆகஸ்ட் 25ஆம் தேதி சோமங்கலத்தில் உள்ள ஐசிஐசிஐ வங்கி ஏடிஎம் குறிவைக்கப்பட்டது. இந்தச் சம்பவத்தில் சுமார் ஒன்பது லட்சம் ரூபாய் கொள்ளையடிக்கப்பட்டதாக தாம்பரம் போலீசார் தெரிவித்துள்ளனர். கொள்ளையர்கள் ஏடிஎம் மையத்தில் இருந்த கண்காணிப்பு கேமராக்களை செயலிழக்கச் செய்துவிட்டு, எரிவாயு மற்றும் வெல்டிங் கருவிகளைப் பயன்படுத்தி இயந்திரத்தைத் திறந்ததாக போலீசார் தெரிவித்தனர்.

இந்த வழக்கில் உத்தர பிரதேசத்தைச் சேர்ந்த ஓ. பவன் குமார் (28), ராஜஸ்தானின் ஜெய்ப்பூரில் கைது செய்யப்பட்டதாக தாம்பரம் போலீசார் தெரிவித்துள்ளனர். பவனை அடையாளம் காண்பதில் எதிர்பாராதவிதமாகக் கிடைத்த ஒரு தடயம் முக்கியமானதாக அமைந்ததாக சின்ஹா கூறினார்.

"சோமங்கலம் சம்பவத்திற்குப் பிறகு, அந்த கும்பலைப் பிடிக்க அண்டை மாநில போலீசாருக்கு உடனடியாக தகவல் தெரிவிக்கப்பட்டது. கொள்ளையர்கள் பயன்படுத்திய வெள்ளை நிற எஸ்யூவி வாகனம் தெலங்கானாவின் ஆதிலாபாத் மாவட்டத்தின் வழியாகச் சென்றபோது, அங்குள்ள போலீசார் அதைத் தடுத்து நிறுத்த முயன்றனர். அப்போது அவர்கள் போலீஸ் தடுப்பில் வாகனத்தை மோதிவிட்டு வனப்பகுதி வழியாகத் தப்பிச் சென்று, பின்னர் லாரி ஒன்றில் ஏறி அங்கிருந்து தப்பினர்."

"அப்போது ஒரு கொள்ளையரின் செல்போன் எதிர்பாராதவிதமாக கீழே விழுந்தது. அதன் மூலம் அந்த நபர் ஹரியாணாவின் மேவாட் பகுதியைச் சேர்ந்தவர் என்பதைத் தெரிந்துகொண்டோம். பின்னர் ஹரியாணா போலீசாரை தொடர்புகொண்டோம். அவர்கள் மூலம் குற்றம்சாட்டப்பட்ட நபரின் பெயர் பவன் என்பது தெரிய வந்தது," என்று அவர் கூறினார்.

பவன் ஜெய்ப்பூரில் கைது செய்யப்பட்டு, சட்டபூர்வமான நடவடிக்கைகளுக்குப் பிறகு தமிழ்நாட்டுக்கு அழைத்து வரப்பட்டதாக சின்ஹா தெரிவித்தார். அவரிடம் நடத்தப்பட்ட விசாரணையின் மூலம் அந்தக் கும்பல் குறித்த மேலும் தகவல்கள் கிடைத்ததாகவும் அவர் கூறினார்.

இந்த வழக்கில் ஹரியாணாவின் பால்வால் மாவட்டத்தைச் சேர்ந்த முகமது முஸ்தஃபாவும் கைது செய்யப்பட்டுள்ளார். இந்த கும்பலுடன் தொடர்புடைய மேலும் சிலரைத் தேடி வருவதாக தாம்பரம் காவல் ஆணையரகம் தெரிவித்துள்ளது.

2023 திருவண்ணாமலை கொள்ளைகளுக்கும் தொடர்பா?

சோமங்கலம் சம்பவத்தில் கைது செய்யப்பட்டவர்களிடம் நடத்தப்பட்ட விசாரணையில், இதே கும்பல் ஏற்கெனவே வேறு மாநிலங்களிலும் ஏடிஎம் கொள்ளைகளில் ஈடுபட்டிருப்பது தெரிய வந்ததாக சின்ஹா கூறுகிறார்.

"இந்தக் கும்பல் ஏற்கெனவே இதுபோன்ற கொள்ளைகளில் ஈடுபட்டுள்ளது. 2023ஆம் ஆண்டு திருவண்ணாமலையிலும் இதே கும்பல் எரிவாயு வெல்டிங் இயந்திரங்களைப் பயன்படுத்தி தொடர் ஏடிஎம் கொள்ளைகளில் ஈடுபட்டது. மேவாட் பகுதியைச் சேர்ந்த இதே கும்பல் கேரளாவிலும் ஏடிஎம் கொள்ளைகளில் ஈடுபட்டுள்ளது. இதேபோல, ஜெய்ப்பூரிலும் இந்தக் கும்பல் ஏடிஎம் கொள்ளையில் ஈடுபட்டது," என்று அவர் தெரிவித்தார்.

கும்மிடிப்பூண்டியில் ஏடிஎம்-ஐ கண்டறிய உதவிய நபர்

ஆகஸ்ட் 27ஆம் தேதி கும்மிடிப்பூண்டியில் உள்ள ஆக்சிஸ் வங்கி ஏடிஎம் உடைக்கப்பட்டு சுமார் 11.5 லட்சம் ரூபாய் கொள்ளையடிக்கப்பட்டதாக போலீசார் தெரிவித்துள்ளனர். இந்தச் சம்பவத்திலும் கண்காணிப்பு கேமராக்களை செயலிழக்கச் செய்துவிட்டு, எரிவாயு வெல்டிங் கருவிகளைப் பயன்படுத்தி ஏடிஎம் இயந்திரத்தைத் திறந்ததாக போலீசார் தெரிவித்துள்ளனர்.

சோமங்கலம் சம்பவத்தில் பயன்படுத்தப்பட்டதாகக் கூறப்படும் அதே முறையும் கருவிகளும் கும்மிடிப்பூண்டி சம்பவத்திலும் காணப்பட்டதால், இரு சம்பவங்களுக்கும் தொடர்பு உள்ளதா என்ற கோணத்தில் போலீசார் விசாரித்தனர்.

"இதற்கிடையில், அதே மேவாட் பகுதியைச் சேர்ந்த மற்றொரு கும்பல் கும்மிடிப்பூண்டியில் ஏடிஎம் கொள்ளையில் ஈடுபட்டது. அந்த கும்பலைச் சேர்ந்த முஸ்தஃபா சென்னையில் சுற்றித் திரிந்தபோது கைது செய்யப்பட்டார். எந்த ஏடிஎம்-ஐ குறிவைத்து கொள்ளையடிக்க வேண்டும் என்பதை கொள்ளை கும்பலுக்குத் தெரிவிக்கும் பணியில் அவர் ஈடுபட்டிருந்தார்," என்று சின்ஹா கூறினார்.

சோமங்கலம், கும்மிடிப்பூண்டி சம்பவங்களில் தொடர்புடைய மேலும் மூன்று கொள்ளையர்களை ஹரியாணா போலீசாரின் உதவியுடன் தேடி வருவதாகவும் சின்ஹா தெரிவித்தார்.

வெள்ளவேடு கொள்ளை: வேறு கும்பல்

செப்டம்பர் 5ஆம் தேதி வெள்ளவேடு-குடப்பாக்கம் பகுதியில் நடந்த ஏடிஎம் கொள்ளை, இதே விசாரணையில் இடம்பெற்றாலும், அது வேறு கும்பலால் நடத்தப்பட்டதாக போலீசார் தெரிவித்துள்ளனர். தனியார் வங்கி ஏடிஎம்-இல் இருந்த சுமார் பத்து லட்சம் முதல் 12 லட்சம் ரூபாய் வரையிலான பணம் கொள்ளையடிக்கப்பட்டதாக ஆவடி காவல் ஆணையரகம் தெரிவித்துள்ளது.

இந்தச் சம்பவத்தில் கொள்ளையர்கள் சுடுகாட்டில் இருந்து சவ ஊர்தி ஒன்றைத் திருடியதாகவும், அந்த வாகனத்தைப் பயன்படுத்தி ஏடிஎம் இயந்திரத்தை முழுமையாக அகற்றி வேறு இடத்துக்குக் கொண்டு சென்றதாகவும் ஆவடி காவல் ஆணையரகம் வெளியிட்ட செய்திக் குறிப்பில் தெரிவித்துள்ளது. பின்னர் அந்த ஏடிஎம் இயந்திரத்தை உடைத்துப் பணத்தை எடுத்ததாக போலீசார் தெரிவித்துள்ளனர்.

இந்த வழக்கில் குற்றவாளிகளைப் பிடிக்க தொழில்நுட்ப விசாரணை, நாடு முழுவதும் உள்ள ஏடிஎம் கொள்ளையர்கள் குறித்த தகவல் சேகரிப்பு மற்றும் பிற மாநிலங்களில் கள விசாரணை எனப் பல்வேறு குழுக்கள் அமைக்கப்பட்டதாக ஆவடி காவல் ஆணையரகம் தெரிவித்துள்ளது.

மேற்கு வங்கத்தைச் சேர்ந்த எஸ்.கே. சமீர், சர்பார் கான், ரசூல் ஆகிய மூவர் கைது செய்யப்பட்டுள்ளனர். அவர்களிடம் இருந்து கொள்ளையடிக்கப்பட்ட பணத்தில் ஒரு லட்சத்து 72 ஆயிரம் ரூபாய் மீட்கப்பட்டதுடன், சம்பவத்தில் பயன்படுத்தப்பட்ட டிவிஎஸ் அப்பாச்சி இரு சக்கர வாகனமும் பறிமுதல் செய்யப்பட்டுள்ளதாக ஆவடி காவல் ஆணையரகம் தெரிவித்துள்ளது.

இந்த வழக்கில் தொடர்புடைய மேலும் சிலரைப் பிடிக்க நடவடிக்கை நடைபெற்று வருவதாகவும் ஆவடி போலீசார் தெரிவித்துள்ளனர். ஆவடி காவல் ஆணையர் செந்தில்குமார் பிபிசி தமிழிடம் பேசுகையில், வெள்ளவேடு ஏடிஎம் கொள்ளை வழக்கில் தொடர்புடைய மேலும் சிலரைத் தேடி வருவதாகத் தெரிவித்தார்.

"இது பாதுகாப்பு தொடர்பான விவகாரம் என்பதால், இந்த நேரத்தில் வழக்கின் மேலதிக விவரங்களை வெளியிட முடியாது," என்று அவர் கூறினார். வெள்ளவேடு சம்பவம் குறித்து சின்ஹா கூறுகையில், இந்தக் கொள்ளையில் ஈடுபட்டவர்கள் சோமங்கலம், கும்மிடிப்பூண்டி சம்பவங்களில் தொடர்புடையதாகக் கூறப்படும் ஹரியாணா கும்பலைச் சேர்ந்தவர்கள் அல்ல என்றார். அதோடு, "வெள்ளவேடு ஏடிஎம் கொள்ளையில் ஈடுபட்டவர்கள் வேறொரு கும்பலைச் சேர்ந்தவர்கள். அவர்கள் ஹரியாணா கும்பல் மீது பழியைப் போட்டு தப்பிக்க முயன்ற காப்பியடிப்பு கும்பல்," என்று அவர் கூறினார்.

இதனால், மூன்று ஏடிஎம் கொள்ளைகளிலும் ஒரே கும்பல் ஈடுபட்டதாக போலீசார் கூறவில்லை. சோமங்கலம், கும்மிடிப்பூண்டி வழக்குகளில் மேவாட் தொடர்பு குறித்து விசாரணை நடந்து வரும் நிலையில், வெள்ளவேடு வழக்கில் மேற்கு வங்கத்தைச் சேர்ந்த மூவர் கைது செய்யப்பட்டுள்ளனர்.

- இது பிபிசிக்காக கலெக்டிவ் நியூஸ்ரூம் வெளியீடு