ரஷ்யாவில் பிளேக் நோய் தொற்றா? ஆய்வகப் பணியாளர் மரணத்தால் எழும் அச்சத்தின் பின்னணி

சைபீரியாவில் உள்ள ஒரு பிளேக் ஆராய்ச்சி மையத்தில் பணியாற்றிய ரஷ்ய ஆய்வக தொழில்நுட்ப நிபுணர் ஒருவர் உயிரிழந்தது, உலகளாவிய கவலையை ஏற்படுத்தியுள்ளது. அத்துடன், இந்த அரிதான தொற்றுநோய் ஆய்வகத்திலிருந்து கசிந்திருக்கலாம் என்ற ஊகங்களுக்கும் வழிவகுத்துள்ளது.

ரஷ்ய அதிகாரிகள் ஆரம்பத்தில் அவரது மரணத்தை பிளேக் நோயுடன் தொடர்புபடுத்தினர். ஆனால், சுயாதீன ஊடகங்கள் அப்பகுதியில் உள்ளூர் அளவில் தனிமைப்படுத்தல் நடவடிக்கைகள் மேற்கொள்ளப்பட்டதாக செய்திகளை வெளியிட்டிருந்தாலும் தற்போது அதிகாரிகள் அதனை மறுத்து வருகின்றனர்.

அப்படியானால் அந்த பெண்ணுக்கு உண்மையில் என்ன நடந்தது? மக்கள் எவ்வளவு கவலைப்பட வேண்டும்?

நமக்குத் தெரிந்தது என்ன?

28 வயதான தரியா ஷிபிலோவா, சைபீரியா மற்றும் தூரக் கிழக்கிற்கான பிளேக் தடுப்பு நிறுவனத்தில் பணியாற்றி வந்தார். செப்டம்பர் இறுதியில் அவர் மருத்துவமனையில் அனுமதிக்கப்பட்டார். மூன்று நாட்களுக்குப் பிறகு, ஷெலெகோவ் நகரில் அவர் உயிரிழந்தார். இது அக்டோபர் 2ஆம் தேதி நடந்ததாக தகவல்கள் தெரிவிக்கின்றன. ஆனால், இதை பிபிசியால் உறுதிப்படுத்த முடியவில்லை.

அந்த மருத்துவமனை தனிமைப்படுத்தப்பட்டது. உள்ளூர் அலுமினிய ஆலையில் முகக்கவசம் அணியும் நடைமுறை அமல்படுத்தப்பட்டது. பிராந்திய தலைநகரான இர்குட்ஸ்கில் நடைபெறவிருந்த பொது நிகழ்ச்சி ஒன்று ரத்து செய்யப்பட்டது.

வெள்ளிக்கிழமை, பிராந்திய ஆளுநர் இகோர் கோப்சேவ், "மிகவும் ஆபத்தான தொற்று நோய் இருப்பதாக சந்தேகிக்கப்படும் ஒரு சம்பவம்" குறித்து விசாரிப்பதற்காக ரஷ்யாவின் தலைமை சுகாதார அதிகாரி இர்குட்ஸ்க் வந்திருப்பதாகத் தெரிவித்தார். ஷிபிலோவாவுடன் தொடர்பில் இருந்தவர்களையும் அதிகாரிகள் கண்காணித்து வருவதாக அவர் கூறினார். சுமார் 197 பேர் மருத்துவக் கண்காணிப்பில் இருப்பதாக இஸ்வெஸ்தியா நாளிதழ் தெரிவித்தது.

அதே நாளில், அண்டை பிராந்தியமான புரியாத்தியாவின் ஆளுநர், அந்த ஆய்வகப் பணியாளர் பிளேக் நோயால் உயிரிழந்ததாகக் கூறினார். இதையடுத்து, பிளேக் தடுப்பு நிறுவனத்தில் இருந்து நோய் கசிந்திருக்கலாம் என்ற ஊகங்கள் எழுந்தன. உள்ளூர் செய்தியாளர் ஒருவர் வெளியிட்ட உறுதிப்படுத்தப்படாத தகவலில், இறந்த ஆய்வாளர் ஒரு பரிசோதனைக் குழாயை உடைத்த பிறகு நோய்வாய்ப்பட்டதாக கூறப்பட்டது.

இந்த தகவல் எவ்வாறு மாறியது?

ரஷ்யாவின் நுகர்வோர் பாதுகாப்பு மற்றும் பொது சுகாதார கண்காணிப்பு அமைப்பான ரோஸ்போட்ரெப்னட்ஸோர், அந்தப் பெண் பிளேக் நோயால் இறந்தார் என்ற கூற்றிலிருந்து பின்வாங்க முயன்றது. இந்த வாரம் வெளியிட்ட அறிக்கையில், பெயர் குறிப்பிடப்படாத அந்த ஆய்வகப் பணியாளர், காரணம் உறுதியாகத் தெரியாத நிமோனியாவால் உயிரிழந்ததாகவும், மேற்கொள்ளப்பட்ட பரிசோதனைகளில் "அவரது தொழில்சார் நடவடிக்கைகளுடன் தொடர்புடைய எந்த நுண்ணுயிரும் கண்டறியப்படவில்லை" என்றும் கூறியது.

இந்த அறிக்கையைத் தொடர்ந்து, அரசுக்கு ஆதரவான ஒரு தேசிய செய்தி நிறுவனம் பிளேக் நோய் இருப்பதாகக் கூறப்பட்ட சாத்தியம் தொடர்பான ஐந்து பதிவுகளை நீக்கியது. பைக்கல்ஸ்க் நகர அதிகாரிகள், பிளேக் தொற்று ஏற்படக்கூடும் என்பதால் ஷெலெகோவ் நகருக்குப் பயணம் செய்வதைத் தவிர்க்குமாறு அறிவுறுத்தியிருந்த செய்தியையும் நீக்கினர்.

ஆனால் நிலைமையின் தீவிரத்தை குறைத்து காட்டுவதற்காக அதிகாரிகள் ஒருங்கிணைந்த தகவல் பரப்பலில் ஈடுபட்டிருக்கலாம் எனத் தோன்றிய நிலையில், சுயாதீன உள்ளூர் செய்தி தளமான பீப்பிள் ஆஃப் பைக்கல், தனது தகவல் மூலங்களை மேற்கோள் காட்டி, இர்குட்ஸ்கில் குறைந்தது நான்கு மருத்துவமனைகள் மூன்று வாரங்களுக்கு தனிமைப்படுத்தப்பட்டதாக செய்தி வெளியிட்டது. இது அதிகாரப்பூர்வமாக உறுதிப்படுத்தவில்லை.

இதற்கிடையில், அக்டோபர் மாத இறுதியில் இர்குட்ஸ்க் ஆண்டி-பிளேக் நிறுவனம், சீனா, மங்கோலியா மற்றும் முன்னாள் சோவியத் நாடுகளின் விஞ்ஞானிகள் பங்கேற்கும் சர்வதேச பிளேக் கட்டுப்பாட்டு மாநாட்டை நடத்தத் திட்டமிட்டிருப்பதாக பிபிசி நியூஸ் ரஷ்யன் அறிந்துள்ளது. இந்த நிகழ்வு நடைபெறுமா என்பதை உறுதிப்படுத்த பிபிசி அந்த நிறுவனத்தை தொடர்புகொண்டுள்ளது.

பிளேக் நோய் என்றால் என்ன?

பிளேக் நோயை ஏற்படுத்தும் பாக்டீரியாவான யெர்சினியா பெஸ்டிஸ் (Yersinia pestis), 14ஆம் நூற்றாண்டில் ஐரோப்பாவின் மக்கள்தொகையில் பாதி வரை உயிரிழக்கக் காரணமாக இருந்தது. அப்போது அது "கருப்பு மரணம்" என்று அழைக்கப்பட்டது. விலங்குகளைப் பாதிக்கும் இந்த நோய் ஓசியானியாவைத் தவிர அனைத்து கண்டங்களிலும் காணப்படுகிறது. ரஷ்யாவின் புரியாத்தியா பிராந்தியத்தில் காணப்படும் மர்மாட் உள்ளிட்ட கொறித்துண்ணிகளிலும் இந்த நோய் காணப்படுகிறது.

பிளேக் நோய், பூச்சிக்கடிகள், உடல் திரவங்கள் அல்லது மாசுபட்ட பொருட்களுடன் தொடர்பு கொள்வது மூலம் மனிதர்களுக்குப் பரவலாம்.

உலக சுகாதார அமைப்பின் கூற்றுப்படி, நோயை ஆரம்பத்திலேயே கண்டறிந்து சிகிச்சை அளிக்காவிட்டால் அது உயிரிழப்பை ஏற்படுத்தக்கூடும்.

மூச்சுத்திணறல் மற்றும் இருமல் ஆகியவை இதன் அறிகுறிகளில் அடங்கும். இருமலின் போது வெளியேறும் சளியில் பெரும்பாலும் ரத்தம் கலந்திருக்கும்.

ஆனால், ஆய்வகப் பணியாளர் எந்தக் காரணத்தால் உயிரிழந்திருந்தாலும், வளர்ந்த நாடுகளில் ஒரு தொற்றுநோய் நீடித்துப் பரவுவதற்கான சூழல் இல்லை என்பதால் பிளேக் தொற்று பெருந்தொற்றாக மாறுவதற்கான ஆபத்து மிகக் குறைவு என்று ரஷ்ய அறிவியல் செய்தியாளர் இரினா யாகுதென்கோ கூறுகிறார்.

"அடிப்படை ஆன்டிபயாட்டிக் மருந்துகள் பிளேக் நோய்க்கு எதிராக நன்றாகச் செயல்படுகின்றன. ஏனெனில், இந்த நோய் இப்போது மிகவும் அரிதாக உள்ளது. அதனால் பரவலான மருந்து எதிர்ப்புத் திறனை அது உருவாக்கிக் கொள்ள வாய்ப்பு கிடைக்கவில்லை" என்று அவர் பிபிசி ரஷ்யன் பாட்காஸ்ட்டிடம் தெரிவித்தார்.

சர்வதேச அளவில் என்ன எதிர்வினை ஏற்பட்டுள்ளது?

இந்த நிலைமை மற்றும் சர்வதேச பொது சுகாதாரத்தில் அதன் தாக்கங்கள் குறித்து மதிப்பிடுவதற்காக உலக சுகாதார அமைப்பு, ரஷ்ய அதிகாரிகளைத் தொடர்புகொண்டுள்ளது என்று அந்த அமைப்பின் செய்தித் தொடர்பாளர் செய்தி நிறுவனமான பொலிடிக்கோவிடம் தெரிவித்தார்.

ஐரோப்பிய தொற்றுநோய் கண்காணிப்பு அமைப்பான இசிடிசி-யின் நிபுணர்களும் நிலைமையை கண்காணித்து வருவதாக ஐரோப்பிய ஆணையத்தின் செய்தித் தொடர்பாளர் தெரிவித்தார்.

ரஷ்யாவில் பிளேக் நோய் இருப்பதாகக் கூறப்படும் தகவல்களை அமெரிக்கா "மிகவும் தீவிரமாக" கவனித்து வருவதாக அதிபர் டொனால்ட் டிரம்ப் திங்கள்கிழமை தெரிவித்தார். அதை கட்டுப்படுத்த அமெரிக்கா உதவத் தயாராக இருப்பதாகவும் அவர் கூறினார். ஆனால், இந்த விவகாரம் குறித்து கிரெம்ளினுடன் தான் பேசவில்லை என்றும் தெரிவித்தார்.

அமெரிக்க வெளியுறவுத் துறை செயலாளர் மார்கோ ரூபியோவும் இதே கருத்தை பிரதிபலித்தார்.

"ரஷ்யா வெளிப்படைத்தன்மையுடன் செயல்பட்டு, உலக நாடுகளுடன் கூடுதல் தகவல்களைப் பகிர வேண்டும் என்று நாங்கள் வலியுறுத்துகிறோம். இதன் மூலம் நாம் அனைவரும் அதற்கேற்ப நடவடிக்கை எடுக்க முடியும்" என்று ஐஸ்லாந்தில் நடைபெற்ற செய்தியாளர் சந்திப்பில் ரூபியோ தெரிவித்தார்.

செவ்வாய்க்கிழமை, டிரம்பின் கருத்தை கிரெம்ளின் செய்தித் தொடர்பாளர் டிமிட்ரி பெஸ்கோவ் வரவேற்றார்.

"உதவி வழங்க முன்வருவது எப்போதுமே மிகவும் நல்ல விஷயம்" என்று பிபிசி ரஷ்யப் பிரிவு ஆசிரியர் ஸ்டீவ் ரோசன்பெர்க்கிடம் பெஸ்கோவ் தெரிவித்தார்.

இர்குட்ஸ்கில் நிலவும் நிலைமை குறித்து அதிகாரப்பூர்வமாக வெளியிடப்படும் தகவல்களை மட்டுமே நம்ப வேண்டும் என்றும் அவர் கூறினார்.

இணையத்தில் என்னென்ன கூற்றுகள் பரவி வருகின்றன?

ரஷ்யாவிலும் சர்வதேச அளவிலும் சமூக ஊடகங்களில் பல முரண்பட்ட தகவல்கள் பரவி வருகின்றன.

பிளேக் நோயால் பாதிக்கப்பட்டதாகக் கூறப்படும் இரண்டாவது நபர் ஒருவர் இருப்பதாக உறுதிப்படுத்தப்படாத தகவல்களைப் பகிர்ந்த குறைந்தது ஐந்து இன்ஸ்டாகிராம் கணக்குகளை பிபிசி அடையாளம் கண்டுள்ளது. மொத்தம் சுமார் 1,69,000 பின்தொடர்பவர்களைக் கொண்ட அந்தக் கணக்குகள், தரியா ஷிபிலோவாவின் சக பணியாளர் என்று கூறப்படும் விக்டர் நக்லோனென்னி என்ற நபரும் உயிரிழந்துவிட்டதாக ரஷ்ய மொழியில் கிட்டத்தட்ட ஒரே மாதிரியான தகவல்களை வெளியிட்டன.

ரஷ்யாவின் ரோஸ்போட்ரிப்னாட்ஸோர் (Rospotrebnadzor) அமைப்புக்கு நெருக்கமான ஒரு வட்டாரம் இந்தத் தகவல்களை உறுதிப்படுத்தவில்லை. இதுகுறித்து கருத்து தெரிவிக்குமாறு பிபிசி அந்த அமைப்பைத் தொடர்புகொண்டுள்ளது. சைபீரியா மற்றும் தூரக் கிழக்கிற்கான பிளேக் தடுப்பு நிறுவனம் கருத்து தெரிவிக்க மறுத்துவிட்டது.

பின்னர் இந்த உறுதிப்படுத்தப்படாத தகவல்களை, பிரிட்டனின் டெய்லி மெயில் உள்ளிட்ட பல சர்வதேச ஊடகங்கள் வெளியிட்டன. அவை இந்தத் தகவல்களுக்கு ரஷ்யாவின் "உள்ளூர் ஊடகங்களை" ஆதாரமாகக் குறிப்பிட்டன.

இந்தப் பதிவுகள் இணையத்தில் கலவையான எதிர்வினைகளை ஏற்படுத்தின. சிலர் பொது சுகாதார நடவடிக்கைகள் குறித்து கவலை தெரிவித்தனர். மற்றவர்கள் இந்தக் கணக்குகள் தவறான தகவல்களைப் பரப்புவதாகக் குற்றம்சாட்டினர்.

எக்ஸ் தளத்தில் வெளியான பல உறுதிப்படுத்தப்படாத தகவல்களையும் பிபிசி கண்டறிந்துள்ளது. அவற்றில் சில மில்லியன்கணக்கான பார்வைகளைப் பெற்றுள்ளன. ரஷ்யாவின் இரண்டாவது பெரிய நகரமான செயின்ட் பீட்டர்ஸ்பர்க் விரைவில் முடக்கப்படவுள்ளதாக நண்பர் ஒருவர் தனக்கு தகவல் அனுப்பியதாக ஒரு பதிவர் கூறினார். அந்தப் பதிவு 60 லட்சத்துக்கும் அதிகமான பார்வைகளைப் பெற்றுள்ளது.

ஆனால், செயின்ட் பீட்டர்ஸ்பர்க் அதிகாரிகளோ அல்லது ஊடகங்களோ அந்த நகரில் பிளேக் நோய்த் தொற்று ஏற்பட்டதாகவோ, முடக்கநிலை அமல்படுத்தப்படவுள்ளதாகவோ எந்தத் தகவலையும் வெளியிடவில்லை.

மற்றொரு பதிவில், ரஷ்யாவில் உள்ள ஆய்வகத்திலிருந்து தப்பியதாகக் கூறப்படும் "நியூமோனிக் பிளேக், கோவிட் நோயைவிட சுமார் 100 மடங்கு அதிக உயிரிழப்பை ஏற்படுத்தக்கூடியது" என்று மற்றொரு பயனர் கூறினார். அந்தப் பதிவு 1.13 கோடி பார்வைகளைப் பெற்றது.

சிகிச்சை அளிக்கப்படாவிட்டால் பிளேக் நோய் அதிக உயிரிழப்பை ஏற்படுத்தக் கூடியதாக இருந்தாலும், ஆன்டிபயாட்டிக் மருந்துகளால் அதை கட்டுப்படுத்த முடியும் என்பதால், கோவிட் நோய் ஏற்படுத்திய அதே அளவிலான உயிரிழப்பை அது ஏற்படுத்த வாய்ப்பில்லை.

- இது பிபிசிக்காக கலெக்டிவ் நியூஸ்ரூம் வெளியீடு