Dowladda Soomaaliya oo cambaareysay weerar lagu qaaday xarun koronto oo ku taalla Madiina

Tebin toos ah

1. 3 Oktoobar 2026Xog: Cadaadis Mareykanku ku hayo Sri Lanka si ay u diiddo inay adeegyo u fidiso maraakiibta shidaalka ee Iran.

   Wasaaradda Arrimaha Dibadda ee Sri Lanka ayaa sheegtay in cunaqabataynta labaad ee Mareykanka aysan khuseyn oo keliya Sri Lanka laakiin ay qayb ka tahay siyaasadda caalamiga ah ee Washington.

   War-saxaafadeedka Wasaaradda Arrimaha Dibadda ee Sri Lanka ayaa yimid ka dib markii ay soo baxeen warar sheegaya in Mareykanka uu uga digay Sri Lanka in ay adeeg siiyaan maraakiibta Iiraan ee go'doonsan isla markaana uu ku hanjabay ciqaab.

   Wasaaradda Arrimaha Dibadda ee Sri Lanka ayaa sheegtay in habka loo fulin doono cunaqabataynta labaad ee Mareykanka uu yahay mid cad oo khuseyn doona dhammaan biyaha adduunka oo dhan, waxaana ku jira dhammaan dalalka, ma aha oo kaliya dalkan.

   Wargeyska Wall Street Journal ayaa Arbacadii sheegay in qiyaastii 20 markab oo saliida Iiraan qaada oo maran ay ku xayiran yihiin qiyaastii 24 kiiloomitir xeebta koonfur-galbeed ee Sri Lanka, kuwaas oo qaarkood ay wajahayaan cunto yaraan, shidaal yaraan, iyo biyaha la cabbo oo ku yar iyaguna.

   Sida laga soo xigtay warbixinta, mas'uuliyiinta Mareykanka ayaa Sri Lanka ku cadaadiyay toddobaadyadii la soo dhaafay inay ka hortagaan shirkadaha maxalliga ah inay adeegyo siiyaan maraakiibtaan.

   Mas'uuliyiinta Sri Lanka ayaa hore u sheegay inay la socdaan marakiibta Iiraan ee ka baxsan biyaha dhulkeeda.

   Safaaradda Mareykanka ee Sri Lanka ayaa dhawaan tababar saddex maalmood ah u qabatay in ka badan 40 sarkaal oo Sri Lankan ah, taasoo looga gol lahaa in lagu baro hababka lagu aqoonsado loogana hortago in laga baxsasado cunaqabataynta badda.

   Warar dheeraad ah:

   Netanyahu oo sheegay in ninkii weeraray diyaaradda Flydubai uu aaminsanaa "fikir xagjirnimo Islaami ah oo lagu soo barbaariyay"

   Caqabadaha ay weriyeyaasha Soomaaliya kala kulmaan xog helista

2. 3 Oktoobar 2026Qaraxyo waawayn oo laga maqlay caasimadda Sanca

   AFP ayaa ku warantay in qaraxyo culus laga maqlay magaalada Sanaa, caasimadda Yemen.

   Telefishinka Xuutiyiinta ee Al-Masirah Channel, ayaa sheegay in Sacuudigu uu duqeeyay goobo ka tirsan Sanca.

   Wariyeyaasha AFP ayaa sheegay inay maqleen ugu yaraan shan qarax oo ka dhacay meelo kala duwan, ayna arkeen laba diyaaradood oo dagaal oo gantaallo ku ridaya magaalada.

   Faahfaahin dheeraad ah lama shaacin.

   Xuutiyiinta xulafada la ah Iiraan ayaa sii wada weerarrada ay ku qaadayaan ciidamada Sacuudiga iyo goobaha ay joogaan, iyagoo iyagana bartilmaameedsanaya duqeymaha cirka ee dowladda Sacuudiga iyo Yemen.

   Marka laga soo tago caasimadda, Xuutiyiintu waxay maamulaan inta badan waqooyiga Yemen iyo xeebteeda Badda Cas.

   Warar dheeraad ah:

   Netanyahu oo sheegay in ninkii weeraray diyaaradda Flydubai uu aaminsanaa "fikir xagjirnimo Islaami ah oo lagu soo barbaariyay"

   Caqabadaha ay weriyeyaasha Soomaaliya kala kulmaan xog helista

3. 3 Oktoobar 2026Xeer ilaaliyaha guud ee Imaaraadka oo sheegay in weerarkii lagu qaaday duuliyihii Flydubai uu ahaa mid aragagixiso

   Xeer ilaaliyaha guud ee Imaaraadka Carabta ayaa sheegay in duuliyaha diyaaradda Flydubai uu damacsanaa inuu fuliyo weerar "argagixiso". Waa markii ugu horreysay ee mas'uuliyiinta Imaaraadka ay dhacdada ku tilmaamaan "argagixiso."

   Sida laga soo xigtay Wakaaladda Wararka ee rasmiga ah ee Imaaraadka, Hamad Saif Shamsi ayaa sheegay in duuliyaha diyaaradda uu ku weeraray duuliyaha faas xaaladaha degdeg ah loogu talagalay isla markaana uu isku dayay inuu la wareego maamulka diyaaradda.

   Faas loogu talogalay in lagu badbaado ayaa yaalla qolka diyaaradda laga hagoiyada oo loogu talagalay xaaladaha degdegga ah, sida hadii shil diyaaradeed uu dhaco.

   Wuxuu intaas ku daray in baaritaanno ay socdaan si loo ogaado faahfaahinta dhacdada, sababaha suurtagalka ah iyo xiriirka, iyo in la baaro caddaymaha.

   Wakaaladda wararka ee Reuters, oo soo xiganaysa ilo xog ogaal ah, ayaa duuliyaha diyaaradda ku tilmaantay "Hammam Al-Hamami," oo u dhashay dalka Cumaan.

   Mas'uuliyiinta Imaaraadka weli kama aysan jawaabin codsiyada xaqiijinta rasmiga ah ee aqoonsigiisa.

   Warar dheeraad ah:

   Netanyahu oo sheegay in ninkii weeraray diyaaradda Flydubai uu aaminsanaa "fikir xagjirnimo Islaami ah oo lagu soo barbaariyay"

   Caqabadaha ay weriyeyaasha Soomaaliya kala kulmaan xog helista

4. 3 Oktoobar 2026Kuuriyada Waqooyi oo ridday gantaal ballistic ah.

   Koonfur Kuuriya iyo Japan ayaa sheegay in Waqooyi Kuuriya ay Sabtidii ridday gantaal nooca ballistic-ga ah oo ku dhacay biyaha ku teedsan xeebteeda bari. Tani waa tallaabadii ugu dambeysay ee dalkaas uu ku rido gantaal sanadkan.

   Ciidamada Koonfur Kuuriya ayaa bayaan ay soo saareen ku sheegay in gantaalka laga riday aagga Wonsan abaaro 6:30-kii subaxnimo ee waqtiga maxalliga ah maalintii Sabtida, uuna gaaray masaafo ka badan 700 oo kiiloomitir.

   Bayaanka ayaa sidoo kale lagu xusay in Seoul iyo Washington ay dib u eegis ku sameynayaan faahfaahinta tijaabadaas. Koonfur Kuuriya ayaa horay dalkaas ugu eedaysay inuu askarteeda dhaawac u geystay qaraxyo miinooyin dhulka lagu aasay oo ay sameysay Waqooyi Kuuriya; eedeyntaas oo ay Waqooyi Kuuriya shalay beenisay.

   Warar dheeraad ah:

   Netanyahu oo sheegay in ninkii weeraray diyaaradda Flydubai uu aaminsanaa "fikir xagjirnimo Islaami ah oo lagu soo barbaariyay"

   Caqabadaha ay weriyeyaasha Soomaaliya kala kulmaan xog helista

5. 3 Oktoobar 2026La taliyeyaasha sare ee Trump oo la sheegay inay si qarsoodi ah uga tashteen Iiraan

   Sida ay sheegtay Axios, xubno sare oo ka tirsan golaha wasiirrada madaxweynaha Mareykanka Donald Trump ayaa Jimcihii si qarsoodi ah ugu kulmay xarunta Camp David, si ay uga wada hadlaan tallaabooyinka xiga ee ku aaddan dagaalka Iran iyo colaadda u dhexeysa Sacuudiga iyo Xuutiyiinta ee Yemen.

   Axios ayaa sheegtay, iyadoo soo xiganaysa dad xog-ogaal u ah arrinta, in kulanka uu shir-guddoominayay J.D. Vance, madaxweyne ku xigeenka Mareykanka.

   Kulanka ayaa dhacay xilli wada-hadallada u dhexeeya Iran iyo Mareykanka ay meel xasaasi ah oo aan horumar lahayn gaareen. Sida warbixintu sheegtay, Madaxweyne Ku-xigeenka Mareykanka J.D. Vance iyo saraakiil sare oo ka tirsan maamulka Mareykanka ayaa dhowr saacadood ka wada hadlay fursadaha Washington ay ka haysato jawaab ka bixinta arrimaha ka socda gobolka.

   Axios waxay xustay in qabashada kulan noocan oo kale ah iyadoo aan horay loo sii shaacin ay tahay tallaabo aan caadi ahayn, iyadoo qortay in kulankii ugu dambeeyay ee la midka ahaa, oo ay ka qaybgaleen saraakiil sare oo ka tirsan dowladda Mareykanka, lagu qabtay Camp David bishii Juun 2025, maalmo ka hor inta uusan bilaaban dagaalkii Israa'iil iyo Iran.

   Warar dheeraad ah:

   Netanyahu oo sheegay in ninkii weeraray diyaaradda Flydubai uu aaminsanaa "fikir xagjirnimo Islaami ah oo lagu soo barbaariyay"

   Caqabadaha ay weriyeyaasha Soomaaliya kala kulmaan xog helista

6. 3 Oktoobar 2026Markab lagu weeraray Cummaan

   Hay’adda Hawlgallada Ganacsiga Badda ee UK (UKMTO) ayaa sheegtay aroortii hore ee Sabtida in markab shidaal uu ku dhacay gantaal ama walax aan la aqoonsan, qiyaastii 4 mayl-badeed dhanka bari kaga beegan Cumaan.

   Hay’addu waxay sidoo kale sheegtay in dhammaan shaqaalaha markabka la soo sheegay inay badqabaan, isla markaana aanay xilligan jirin wax war ah oo sheegaya waxyeello deegaanka soo gaartay.

   Hay’addu waxay hore u sheegtay in Jimcihii markab shidaal uu gantaal ku dhacay isagoo ka sii baxayay marin-biyoodka Hormuz, taas oo sababtay dab yar iyo koronto ka go’day markabka.

   Warar dheeraad ah:

   Netanyahu oo sheegay in ninkii weeraray diyaaradda Flydubai uu aaminsanaa "fikir xagjirnimo Islaami ah oo lagu soo barbaariyay"

   Caqabadaha ay weriyeyaasha Soomaaliya kala kulmaan xog helista

7. 3 Oktoobar 2026Kaniini laga yaabo inaad in badan isticmaashay oo 'khatar ku ah beerka'

   Waxaa laga helaa farmashiyeyaasha iyadoo uusan dhaqtar qorin, kaniinigan pracetamol-ka waa mid ka mid ah dawooyinka aadka looga isticmaalo adduunka.

   Dalka Mareykanka, waxaa lagu qiyaasaa in sanadkii la iibiyo ilaa 49,000 oo tan, amaba in 298 kaniini ah ay sanadkii kusoo aadeyso qofkiiba.

   Dalka UK, celcelis ahaan 70 xabbo oo kaniinigan ah ayaa qofkii kusoo aada sanadkii.

   Inkastoo qarniyo la yaqaannay kaniinigan, haddana weli si qoto dheer uma aysan baarin saynisyahannada.

   Saameynta kaniinigan ayaa kala duwan: Dadka qaar ayaa ka sheegta dhabar-xanuun, kuwo kalena waxay isku arkaan calaamado kale.

   Sii akhri.....

8. 3 Oktoobar 2026Trump oo carrabaabay xilliga uu dhammaan karo dagaalka Iiraan

   

   Xigashada Sawirka, Getty Images

   Madaxweynaha Maraykanka Donald Trump, oo ka hadlayay isu soo bax olole doorasho oo ka dhacay magaalada Mobile ee gobolka Alabama, ayaa mar kale sheegay in dagaalka Iiraan uu dhammaan doono "malaha wax yar kadib doorashooyinka dhexe."

   Warbaahinta NBC News ayaa sheegtay in Trump toddobaadyadii u dambeeyay marar badan ku celceliyay hadalladan, xilli uu sii kordhayo tirada Maraykan ka soo horjeeda dagaalka Iiraan.

   Khudbaddiisa, Donald Trump wuxuu ka hadlay dhibaatooyinka dhaqaale ee Iiraan, isagoo ku andacooday in sicir-bararka dalkaasi uu gaaray qiyaastii 310%.

   Wuxuu yiri: "Dhaqaalahoodu gebi ahaanba waa burburay. Hal shay oo ay dhab ahaantii haystaan waa sicir-barar... Waa inaan aragnaa waxa dhaca."

   Trump wuxuu sidoo kale u sheegay dadkii isu soo baxay: "Dagaalkani si dhakhso ah ayuu u dhammaan doonaa, malaha isla marka doorashadu dhammaato. Laakiin marka uu dhammaado, qiimaha shidaalku si weyn ayuu hoos ugu dhici doonaa."

   Wuxuu dhowr jeer ku celiyay in dagaalkani uu mar dhow dhammaan doono, "si uun ama si kale."

   Sida lagu sheegay warbixintan, hadallada Donald Trump ayaa imanaya xilli xogta la heli karo ay muujinayso in celceliska qiimaha hal gaaloon oo shidaal ah gudaha Maraykanka uu hadda yahay $3.94.

   Sheekooyinka kale ee aad sii akhrin karto:

   'Ma oggolaan lahayn inay dadka kale dhintaan' - ayuu yiri duuliyaha Hindiga ah ee badbaadiyay rakaabka diyaaraddii loo weeciyay Sacuudiga

   Khilaafka Itoobiya iyo Eritriya oo cirka isku shareeray iyo labada dal oo safaaradaha kala qaatay

   Baasaboorka cusub ee Maraykanka ee uu samayn doono Garaadka Macmalka (AI) oo la soo bandhigay

9. 3 Oktoobar 2026Dalalka G7 oo fasixi doona 100 milyan oo foosto shidaal iyo naafto ah kadib hanjabaadda Trump ee xannibaadda dhoofinta

   

   Xigashada Sawirka, Reuters

   Kooxda G7 ayaa ku heshiisay inay suuqa kusii deyso 100 milyan oo foosto oo shidaal cayriin ah iyo naafto ah, si loo yareeyo cadaadiska dhanka sahayda ee sababay in qiimaha shidaalku si weyn u kaco.

   Kooxdan oo uu ku jiro Maraykanka, ayaa sheegtay in tallaabadan ay ka mid noqon doonto sii deyn ballaaran oo naafto ah maalmaha soo socda.

   Madaxweyne Donald Trump ayaa hore ugu hanjabay inuu mamnuuci doono dhoofinta naaftada Maraykanka, taasoo ah tallaabo hoos u dhigi lahayd cadaadiska qiimaha ee saaran macaamiisha Maraykanka ka hor doorashooyinka dhexe ee bisha Noofambar, balse kor u qaadi lahayd qiimaha shidaalka ee dalalka kale.

   Bayaan wadajir ah oo ay soo saareen, G7 waxay ku sheegeen in dalalka xubnaha ahi ay ku heshiiyeen inay iska ilaaliyaan xayiraadaha dhoofinta tamarta iyo wax soo saarka tamarta dhexdooda.

   Kooxda G7 waxaa xubno ka ah Maraykanka, Boqortooyada Ingiriiska, Canada, Japan, Jarmalka, Talyaaniga iyo Faransiiska, waxaana sidoo kale shirarkeeda ka qayb gala Midowga Yurub.

   Trump ayaa uga digay inuu joojin doono dhoofinta naaftada Maraykanka haddii dalalka Yurub aysan oggolaan inay suuqyada keenaan qayb ka badan kaydadkooda shidaalka.

   Sheekooyinka kale ee aad sii akhrin karto:

   'Ma oggolaan lahayn inay dadka kale dhintaan' - ayuu yiri duuliyaha Hindiga ah ee badbaadiyay rakaabka diyaaraddii loo weeciyay Sacuudiga

   Khilaafka Itoobiya iyo Eritriya oo cirka isku shareeray iyo labada dal oo safaaradaha kala qaatay

   Baasaboorka cusub ee Maraykanka ee uu samayn doono Garaadka Macmalka (AI) oo la soo bandhigay