Iran oo sheegtay inay ogolaansho siisay dhowr markab oo shidaal oo laga leeyahay Ciraaq si ay u maraan Marinka Hormuz.

Tebin toos ah

1. 22 Agoosto 2026Dagaalka ganacsi ee Maraykanka iyo Canada oo meel xun gaaray

   Ra'iisul Wasaaraha Canada Mark Carney ayaa sheegay in mowjado cusub oo canshuuraha Mareykanka ah oo saaran Canada ay tahay "xisaab khaldan" oo loogu talagalay in lagu "dhaawaco oo ay na kala qaybiso", ka dib markii wadahadalladii ganacsiga ay burbureen Jimcihii dambe.

   Carney wuxuu sheegay inuu ka baxay heshiiska maadaama uusan diyaar u ahayn inuu "wax u dhimo madax-bannaanida Canada", isagoo intaas ku

   Ra'iisul wasaaraha ayaa sheegay in Canada ay soo rogi doonto doonto canshuuraha Mareykanka ee "doollarkiiba -doollar" laga bilaabo 8-da Sebtembar, oo ay ku jiraan canshuuraha birta, caanaha, qalabka korontada iyo elektarooniga. Donald Trump weli wax faallo ah kama bixin.

   Labada dalba waxay rajo wanaagsan ka qabeen heshiis horraantii toddobaadkan, laakiin wadahadalladu way burbureen habeenkii Jimcaha ka dib markii labada dhinac uu midba midka kale ku eedeeyay inuu sameeyay isbeddello daqiiqadihii ugu dambeeyay.

   Hadda oo ay wadahadalladii fashilmeen, Canada waxa saaran canshuurro cusub oo dhan 50% oo ay Mareykanku ku soo rogeen badeecado kala duwan ee Canada laga keeno, kuwaas oo dheeri ku ah canshuuraha uu Mareykanku horey ugu soo rogay birta, aluminiumka, baabuurta iyo qoryaha laga keeno anada.

   Ra'iisul Wasaaraha ayaa sheegay in Canada ay tallaabooyin jawaab-celin ah qaadayso iyadoo si ay u ilaaliso danaha dalkeeda. Wuxuu intaas ku daray in faahfaahinta tallaabooyinkaas jawaab-celinta ah la soo saari doono maalmaha soo socda.

2. 22 Agoosto 2026Dab ka kacay Laptop-ka diyaarad Mareykan ah iyo rakaabkii oo lagu daweeyay garoonka diyaaradaha

   Hal qof ayaa la daweeyay ka dib markii laptop rakaab uu dab qabsaday diyaarad ay leedahay shirkadda American Airlines.

   Duuliyaha ayaa ku wargeliyay maamulka duulimaadka hawada " dab ka kacay qeybta dambe ee diyaaradda" isagoo sheegay "shaqaalaha diyaaradda in ay isku dayayaan in ay hadda damiyaan", sida laga soo xigtay cod ay BBC-da ka heshay CBS News oo ay bah wadaag yihiin.

   "Waxa aan u maleynayaa inaan haysanno afar ilaa shan rakaab ah oo laptop-ku gubay. Laptop-ku wuxuu yiilay qeybta dhexe diyaaradda ."

   Hal rakaab ah ayaa goobta lagu daweeyay, waana la fasaxay ka dib markii Duulimaadka American Airlines Flight 2398 - oo ka timid Atlanta, Georgia - ay ka degtay Garoonka Diyaaradaha Caalamiga ah ee Dallas Fort Worth ee Texas Jimcihii.

   Shirkadda diyaaradaha ayaa BBC-da u sheegtay in duulimaadku si nabad ah u degay "ka dib markii lasoo sheegay in qiiq kasoo baxay qalab macaamiil intii ay soo degaysay. Waxa aan uga mahadcelineynaa shaqaalaheenna xirfaddooda iyo jawaabta degdegga ah ee ay si degdeg ah u bixiyeen sidii loo xakameyn lahaa qalabka."

   Kadib markii ay soo degtay, diyaaraddu waxaa loo weeciyay qeybta Albaabka, shaqaalaha gurmadka degdegga ahna waxay la kulmeen diyaaradda markii ay timid, sida ku cad nidaamka.

   Maamulka Duulista Hawada ee Federaalka (FAA) ayaa ka digaya in batariyada lithium-ka, oo ay ku jiraan batariyada laptop-ka, ay awood u leeyihiin inay kululaadaan, "sababo kala duwan awgood, oo ay ku jiraan haddii batarigu uu waxyeelloobay, aad u kululaado, ama ay biya gaaraan, aad loo buuxiyo, ama si aan habboonayn loo baakadeeyo ".

   Hay'adda FAA waxay diiwaan gelisay, shilal hawada oo dibadda ah oo 58 ah oo la xaqiijiyay oo batariyada lithium ah sanadkan oo ku lug lahaa qiiq, dab ama kulayl aad u daran. 20-kii sano ee la soo dhaafay, tirada ugu badan ee shilalka waxay la xiriirtay xirmooyinka batariyada, iyadoo 84 kiis ay la xiriireen laptop-yada.

   Warar dheeraad ah:

   Canada oo sheegtay inay qaadayso taalabo kasta oo u dhiganta tan Maraykanka kaddib hadal ka soo baxay Raysal Wasaaraha dalkaas

   Turkiga oo soo saaray waaran lagu xirayo Netanyahu sababo la xiriira Gaza

3. 22 Agoosto 2026Israa'iil: Waxaan beegsanay "argagixiso" weerar ka dhacay koonfurta Suuriya.

   Suuriya ayaa maanta sheegtay in hal qof uu ku dhaawacmay weerar ka dhacay koonfurta dalka, halka militariga Israa'iil ay sheegeen in bartilmaameedku uu ahaa nin hubeysan. Waa weerarkii labaad ee noocan oo kale ah muddo toddobaad ah gudaheed.

   Telefishinka dowladda Suuriya ayaa sheegay in ninkan uu dhaawacmay markii "diyaaradaha aan duuliyaha lahayn ee Israa'iil" ay bartilmaameedsadeen gaari marayay tuulada Beit Jin, koonfur-galbeed ee Dimishiq iyo meel u dhow Buuraha Golan ee Israa'iil qabsatay. Shabakaddu waxay sidoo kale muujisay gaari burburay.

   Milatariga Israa'iil ayaa bayaan ay soo saartay ku sheegtay in ciidamadeeda koonfurta Suuriya "ay rasaas ku fureen argagixiso ku jirtay marxaladihii ugu dambeeyay ee diyaarinta weerarrada argagixisada."

   Milatariga Israa'iil ma faahfaahin aqoonsiga qofka ama xiriirka uu la leeyahay koox gaar ah, laakiin bayaanka ayaa lagu sheegay in "dhaqdhaqaaqa argagixisadu uu halis degdeg ah ku ahaa askarta Israa'iil."

   Tan iyo markii la afgambiyay Bashar al-Assad bishii Diseembar 2024, Israa'iil waxay boqolaal weerar ka fulisay Suuriya waxayna ciidamadeeda u rartay aagga kaydka ah ee Qaramada Midoobay ay maamusho kaas oo kala fogeeyay ciidamada Israa'iil iyo Suuriya ee Buuraha Golan muddo tobanaan sano ah.

   Israa'iil ayaa sidoo kale si isdaba joog ah u gashay dhulka Suuriya waxayna sheegtay inay ciidamadeeda ku hayn doonto waxa loogu yeero "aag amni" oo ku yaal koonfurta Suuriya. Israa'iil waxay sidoo kale raadineysaa inay ka dhisto aag ballaaran oo ka caagan militariga koonfurta Suuriya.

   Warar dheeraad ah:

   Canada oo sheegtay inay qaadayso taalabo kasta oo u dhiganta tan Maraykanka kaddib hadal ka soo baxay Raysal Wasaaraha dalkaas

   Turkiga oo soo saaray waaran lagu xirayo Netanyahu sababo la xiriira Gaza

4. 22 Agoosto 2026Sawirro la baahiyay oo muujinaya sarkaal sare oo ka tirsan militariga Iiraan oo ku sugan xarun lagu sameeyo gantaalada ballistic-ga ee dhulka hoostiisa

   Telefishanka dawladda Iiraan ayaa baahiyay muuqaallo laga duubay Cali Abdollahi, Madaxa Shaqaalaha ee Ciidamada Qalabka Sida ee Iiraan, isagoo booqanaya xarun lagu soo saaro gantaalada ballistic-ga dhulka hoostiisa mara.

   Wuxuu sheegay in sannadkii la soo dhaafay, wax soo saarka Iiraan uu "aad u kordhay."

   Telefishanka dawladda Iiraan ayaa sheegay in soo saarista diyaaradaha aan duuliyaha lahayn ee Iiraan ay "saddex jibaarantay" tan iyo bilowgii dagaalkii 40-ka maalmood socday.

   Waxaa la sheegay in booqashada Madaxa Shaqaalaha ee Ciidamada Qalabka Sida ee xaruntan ay ahayd "mid aad u xiiso badan".

   Bilo ka dib bilowgii dagaalka, weli ma jiro sawir cad oo ku saabsan awoodaha milatari ee Jamhuuriyadda Islaamiga ah ee harsan. Qaybo ka mid ah warshadaha difaaca iyo xarumaha wax soo saarka gantaalada ayaa la bartilmaameedsaday, laakiin ma jiraan tirakoob madax-bannaan oo ku saabsan kaydka ama heerka burburka hubka Iiraan.

   Qaar ka mid ah qiimeynta sirdoonka Mareykanka, ugu yaraan bilaha hore ee dagaalka, ayaa soo jeediyay in qayb muhiim ah oo ka mid ah awooddani ay weli sugan tahay. CNN ayaa werisay horraantii Abriil, iyadoo soo xiganaysa ilo xog ogaal u ah qiimeynta sirdoonka Mareykanka, in qiyaastii kala bar gantaalada Iiraan ay wali shaqeynayaan iyo in Tehran ay haysato kumanaan diyaaradood oo weerar ah.

   Hay'adda cilmi-baarista Chatham House ayaa sidoo kale ku sheegtay qiyaasteedii ugu dambeysay inaysan jirin qiimeyn la isku halleyn karo oo ku saabsan kaydka gantaalada ee Iiraan hadda.

   Warar dheeraad ah:

   Canada oo sheegtay inay qaadayso taalabo kasta oo u dhiganta tan Maraykanka kaddib hadal ka soo baxay Raysal Wasaaraha dalkaas

   Turkiga oo soo saaray waaran lagu xirayo Netanyahu sababo la xiriira Gaza

5. 22 Agoosto 2026Iran: Farriimo badan ayaa nooga yimid waddamada deriska ah.

   Mohammad Baqer Qalibaf, oo ah Afhayeenka Baarlamaanka Iiraan (Golaha Wadatashiga Islaamiga ah) isla markaana ah madaxa kooxda gorgortanka Iiraan, ayaa farriin uu ku daabacay barta bulshada ee X ku yiri: "Waxaan ka helnay dalalka deriska ah farriimo badan oo ku saabsan dejinta qaab-dhismeed cusub oo dhanka amniga ah iyo iskaashi dhaqaale oo ka dhex dhasha gobolka."

   Wuxuu intaas ku daray: "Mareykanku wuxuu khatar geliyay amniga mid kasta oo ka mid ah xulafadiisa isagoo adeegsanaya awood-sheegasho iyo dayac buuxa oo ku aaddan danahooda, taasna wuxuu u sameeyay Israa'iil darteed, oo iyadu muddo kooban aragtay in jiritaankeeda oo dhan uu halis ku jiro."

   Mudane Qalibaf ayaa sidoo kale qoray in "nidaam ka soo unkamay gudaha gobolka oo madax-bannaan uu dhab ahaantii gobolka u keeni doono nabad iyo amni."

   Warar dheeraad ah:

   Canada oo sheegtay inay qaadayso taalabo kasta oo u dhiganta tan Maraykanka kaddib hadal ka soo baxay Raysal Wasaaraha dalkaas

   Turkiga oo soo saaray waaran lagu xirayo Netanyahu sababo la xiriira Gaza

6. 22 Agoosto 2026Diblomaasiyiin hore oo u dhashay Faransiiska iyo Ingiriiska ayaa ugu baaqaya dowladahooda inay iska kaashadaan taageeridda xuquuqda Falastiiniyiinta.

   Tobanaan diblomaasiyiin sare oo hore oo ka soo kala jeeda Faransiiska iyo Ingiriiska ayaa Sabtidii ugu baaqay dowladahooda inay si wadajir ah u ilaaliyaan sharciga caalamiga ah ee dhulka Falastiin.

   Waxay ku eedeeyeen Israa'iil inay raadineyso inay "burburiso" rajo kasta oo ah inay samaysanto dowlad madax-bannaan oo Falastiin ah.

   102-da saxiixe ee warqadda, oo lagu daabacay wargeyska Le Monde, waxaa ka mid ah safiirradii hore ee Ingiriiska ee Qaramada Midoobay iyo sidoo kale agaasimayaashii hore ee waaxda Bariga Dhexe ee Wasaaradda Arrimaha Dibadda Faransiiska.

   Saxiixayaasha warqaddan, oo xoogga saaraya doorka Faransiiska iyo Ingiriiska ee arrintan, ayaa sheegay in iskaashiga labada dal uu muhiim yahay sababtoo ah Faransiiska iyo Ingiriiska waxaa loo arkaa awoodo door taariikhi ah ku leh Bariga Dhexe, labaduba waa xubno joogto ah oo ka tirsan Golaha Amniga ee Qaramada Midoobay, waxayna aqoonsadeen dowladda Falastiin sanadka 2025.

   Warqadda waxay ku qoran tahay: "Waxaan aaminsanahay in kuwa mas'uulka ka ah dambiyada dagaalka iyo dambiyada ka dhanka ah aadanaha ay tahay in lala xisaabtamo. Markaas oo keliya ayay dowladdeennu diidi kartaa eedeynta labanlaaban. Sababtan awgeed, waa inay si wadajir ah u dhaqmaan si ay u ilaaliyaan sharciga caalamiga ah ee dhulka Falastiin."

   Warqadda ayaa lagu eedeeyay Israa'iil inay "isku dayayso inay burburiso rajo kasta oo ku saabsan dowlad madax-bannaan oo Falastiin ah iyo inay muujinayso ixtiraam la'aanta sharciga caalamiga ah iyadoo iska indha tiraysa sharciga caalamiga ah, go'aannada Maxkamadda Caalamiga ah ee Caddaaladda, iyo qaraarro badan oo Golaha Amniga ee Qaramada Midoobay."

   Warar dheeraad ah:

   Canada oo sheegtay inay qaadayso taalabo kasta oo u dhiganta tan Maraykanka kaddib hadal ka soo baxay Raysal Wasaaraha dalkaas

   Turkiga oo soo saaray waaran lagu xirayo Netanyahu sababo la xiriira Gaza

7. 22 Agoosto 2026Iran: Duuliyeyaasha la waayay waa dhaawacan yihiin waana la hayaa.

   Mohammad Bagherzadeh, oo ah taliyaha Guddiga Raadinta Dadka La La'yahay ee Taliska Guud ee Ciidamada Qalabka Sida ee Iiraan, ayaa mar kale ku celiyay — inkastoo Doha ay arrintaas beenisay — in "duuliyeyaasha Iiraan ee la la'yahay lagu hayo xabsi ku yaalla Qatar," wuxuuna intaas ku daray inay "si daran u dhaawacan yihiin oo ay xanuunsan yihiin."

   Bogga internetka ee Guddiga Raadinta Dadka La La'yahay ayaa sheegay in Mohammad Bagherzadeh uu "soo dhaweeyay tallaabada ay dawladda Qatar ku aqbashay kooxda khubarada ah ee ka socota Jamhuuriyadda Islaamiga ah ee Iran, isla markaana ay codsatay inay bixiso wada-shaqeynta lagama maarmaanka ah."

   Wuxuu yiri, "Ma habboona in maxaabiista lagu hayo biyaha dushooda. Wuxuu ugu baaqay dawladda Qatar inay u soo wareejiso dhinaca bariga iyo isbitaal si wanaagsan u qalabaysan sida ugu dhakhsaha badan si loo ilaaliyo caafimaadka maxaabiista."

   Taliyaha Guddiga Raadinta Dadka La La'yahay ee ka tirsan Taliska Guud ee Ciidamada Qalabka Sida ayaa ka codsaday Laanqeyrta Cas inay u dirto "diyaarad ambalaas ah dalka Qatar" si ay dib ugu soo celiso duuliyeyaasha Iran ee la qabtay dalkooda "sida ugu dhakhsaha badan."

   Horay, Qatar waxay "si adag" u diidday sheegashada Iran ee ku saabsan "qabashada" saddex duuliye oo u dhashay Iran, iyadoo sheegtay inay ka yaabtay "hadallada marin-habaabinta ah" ee la sameeyay xilli ay socdaan dadaallo diblomaasiyadeed oo lagu yareynayo xiisadda.

   Qatar waxay sheegtay in laba diyaaradood oo dagaal oo laga leeyahay Iran la bartilmaameedsaday ka dib markii ay ku xad-gudbeen hawada Qatar, isla markaana aysan duuliyeyaashu ka jawaabin farriimaha, kooxaha Qatar-na ay heleen oo kaliya haraadiga mid ka mid ah duuliyeyaasha.

   Iran waxay sheegtay in diyaaradahan dagaalku ay si guul leh u fuliyeen hawlgal duqeyn ah oo lagu qaaday saldhigga ciidamada cirka ee Mareykanka, balse la bartilmaameedsaday xilli ay ku soo laabanayeen hawlgalka.

   Hadalladiisii ​​maanta, Mr. Bagherzadeh wuxuu sheegay in Kuwait ay "ixtiraamtay" xuquuqda afarta maxbuus ee dagaalka ee u dhashay Iran.

   Wasaaradda Arrimaha Gudaha ee Kuwait ayaa bishii Maajo ku dhawaaqday inay xirtay "afar qof oo si sharci-darro ah dalka u soo galayay, kuwaas oo xiriir la lahaa Ciidanka Ilaalada Kacaanka (Revolutionary Guard Corps)," kuwaas oo isku dayayay inay dalka ka soo galaan dhinaca badda. Sida lagu sheegay bayaan ka soo baxay Wasaaradda Arrimaha Gudaha ee Kuwait, dadka la xiray waxay ahaayeen laba sarkaal oo leh darajada 'Colonel', hal 'Captain', iyo hal 'Lieutenant' oo ka tirsan ciidamada badda ee Ilaalada Kacaanka Iran (IRGC), kuwaas oo "qirtay" inay haysteen hawlgal ay ku doonayeen inay "si qarsoodi ah u galaan" jasiiradda Bubiyan.

   Warar dheeraad ah:

   Canada oo sheegtay inay qaadayso taalabo kasta oo u dhiganta tan Maraykanka kaddib hadal ka soo baxay Raysal Wasaaraha dalkaas

   Turkiga oo soo saaray waaran lagu xirayo Netanyahu sababo la xiriira Gaza

8. 22 Agoosto 2026Iran oo sheegtay inay ogolaansho siisay dhowr markab oo shidaal oo laga leeyahay Ciraaq si ay u maraan Marinka Hormuz.

   Wakaaladda wararka ee rasmiga ah ee Jamhuuriyadda Islaamiga ah ee Iran, IRNA, ayaa warbixin gaar ah ku sheegtay in Iran ay siisay dhowr markab oo shidaal oo laga leeyahay Ciraaq "ogolaansho ay ku mari karaan Marinka Hormuz" ka dib codsiyo soo noqnoqday oo uga yimid dhinaca Ciraaq.

   Warbixintu waxay xustay in codsiyada ku saabsan marinka maraakiibta Ciraaq loo gudbiyay Iran "marar badan iyadoo la adeegsanayo waddooyin kala duwan."

   IRNA waxay sidoo kale qortay in intii lagu guda jiray booqashadii Mohammad Baqer Qalibaf uu ku tagay Ciraaq, "bixinta ogolaansho gaar ah" oo ay maraakiibta shidaalka ee dalkaas ku mari karaan Marinka Hormuz ay ahayd "codsigii ugu muhiimsanaa" ee ay soo jeediyeen mas'uuliyiinta Baqdaad.

   Dhaqdhaqaaqa maraakiibta ee Marinka Hormuz, oo ah marin muhiim u ah gaadiidka shidaalka iyo gaaska ee gobolka, ayaa hoos u dhac weyn sameeyay.

   Warar dheeraad ah:

   Canada oo sheegtay inay qaadayso taalabo kasta oo u dhiganta tan Maraykanka kaddib hadal ka soo baxay Raysal Wasaaraha dalkaas

   Turkiga oo soo saaray waaran lagu xirayo Netanyahu sababo la xiriira Gaza

9. 22 Agoosto 2026Iran oo ku tilmaamay weerarka lagu qaaday saldhigga Mareykanka ee Jordan mid qayb ka ah isbeddelka Iiraan ku samaysay istiraatiijiyaddeeda ciidan

   Isagoo sharraxaya isbeddelka ku yimid istiraatiijiyadda milateri ee dalka oo laga dhigay mid "ka guurtay difaaca una wareegtay weerarka," afhayeenka milateriga Iiraan, Mohammad Akraminia, ayaa sheegay in habkan uu ka muuqday dagaalkii dhawaa iyadoo la adeegsanayo "jawaab degdeg ah oo baaxad leh" iyo "hawlgallo ka hor-tag ah."

   Mohammad Akraminia ayaa wareysi uu siiyay wakaaladda IRNA ku yiri: "Dagaalkan, mar aan weeraraynay saldhigga Mareykanka ee Jordan, waxaan dhab ahaantii muujinnay habka ka hor-tagga ah; ka hor inta uusan cadowgu dagaalka soo gelin, waxaan bartilmaameedsannay saldhigga cadowga ee Urdun."

   Bishii Luulyo ee sanadkan, saddex askari oo Mareykan ah ayaa lagu dilay weerarro ay Iiraan ku qaadday saldhig ku yaalla Urdun iyadoo adeegsanaysa gantaallada riddada dheer (ballistic missiles) iyo diyaaradaha aan duuliyaha lahayn (drones).

   Afhayeenka ciidanka ayaa hadalkiisa sii watay isagoo leh: "Kani waa hal dhinac oo ka mid ah fikradda istiraatiijiyadda milateri ee ku dhisan weerarka, balse waxay leedahay dhinacyo kale, oo ay ka mid tahay in tallaabo kasta oo gardarro ah hubaal looga jawaabi doono si degdeg ah, jawaabtaasna ay hubaal noqon karto mid ka ballaaran tallaabada gardarrada ahayd."

   Warar dheeraad ah:

   Canada oo sheegtay inay qaadayso taalabo kasta oo u dhiganta tan Maraykanka kaddib hadal ka soo baxay Raysal Wasaaraha dalkaas

   Turkiga oo soo saaray waaran lagu xirayo Netanyahu sababo la xiriira Gaza

10. 22 Agoosto 2026Raysal Wasaaraha Ciraaq oo shaaciyey tallaabo weyn oo ay la gaareen xoogagga siyaasadeed ee dalkaas

    Ra’iisul Wasaaraha Ciraaq, Ali Faleh al-Zaidi, ayaa xaqiijiyay in xoogagga siyaasadeed ee dalka ay isku raaceen in la sii ambaqaado qorshaha hubka in lagu soo koobo gacanta dowladda, isagoo sheegay in la diyaarinayo hababka iyo nidaamyada lagu wareejinayo hubka dowladda.

    Arrintan waxay ka dhigan tahay in kooxaha hubaysan laga doonayo in hubkooda lagu wareejiyo hay’adaha dowladda, si awoodda hubka iyo amniga loogu ururiyo dowladda Ciraaq.

    Al-Zaidi wuxuu sidoo kale ku dhawaaqay qorshayaal dhaqaale oo ay ka mid yihiin, In la kordhiyo wax-soo-saarka shidaalka, In la xaqiijiyo bixinta mushaharrada shaqaalaha dowladda,In la sameeyo sanduuq horumarineed oo raasumaalkiisu yahay $100 bilyan.

    Wararka hadda jira waxay sidoo kale muujinayaan in dowladda Al-Zaidi ay waddo qorshayaal ballaaran oo la xiriira maalgelinta kaabayaasha dhaqaalaha iyo kordhinta wax-soo-saarka shidaalka.

    Al-Zaydi wuxuu hadalkaas ka sheegay shir wada-tashi ah oo ka dhacay caasimadda Baghdad. Wuxuu yiri:

    “Dhammaan xoogagga siyaasadeed waxay si buuxda ugu heshiiyeen in la sii wado qorshaha hubka lagu koobinayo gacanta dowladda,” isagoo intaas ku daray in hadda laga shaqeynayo “hababka hubka lagu wareejinayo dowladda iyo in xaaladdan gebi ahaanba la soo afjaro.”

    Macnaha guud ayaa ah in dowladda Ciraaq ay doonayso in hubka iyo awoodda milatari ee kooxaha hubaysan lagu soo celiyo gacanta dowladda, iyadoo la diyaarinayo hannaan rasmi ah oo lagu wareejinayo hubka. Dowladda ayaa arrintan ku tilmaantay arrin la xiriirta madaxbannaanida Ciraaq

11. 22 Agoosto 2026Tirada ciidamada Maraykanka ee ku dhaawacmay dagaalka Iiraan oo korortay

    Sida uu qoray wargeyska Washington Post, tirada askarta Maraykanka ee lagu dilay ama lagu dhaawacay dagaalka Iran ayaa gaartay 774, kadib markii Pentagon-ku maalmihii u dambeeyay liiska dhaawacyada ku daray askar cusub.

    Sida ku cad nidaamka Pentagon-ka ee diiwaangelinta khasaaraha:

    18 askari oo Maraykan ah ayaa la dilay.

    756 askari ayaa la dhaawacay.

    Wadarta guud waa 774 askari oo la dilay ama la dhaawacay.

    Kororka tiradan wuxuu yimid xilli Maraykanka iyo Iran ay toddobaadyadii u dambeeyay ku jireen xabbad-joojinno. Washington Post waxay sheegtay in qayb ka mid ah kororku ka iman karto dib-u-dhac u dhexeeya marka dhaawacyada lagu diiwaangeliyo nidaamka caafimaadka milatariga iyo marka lagu daro xogta rasmiga ah ee khasaaraha.

    Xabbad-joojintii Maraykanka iyo Iran ayaa dhammaatay Isniintii, Madaxweyne Donald Trump-na ma uusan kordhin. Si kastaba, labada dhinac tan iyo markaas dib uma bilaabin hawlgallo milatari oo baaxad weyn.

    Dagaalka oo Trump hore u sheegay inuu “dhowr toddobaad” gudahood ku dhammaan doono ayaa hadda galay bishiisii lixaad.

12. 21 Agoosto 2026Iiraan ma weerari kartaa Yurub?

    Iiraan waxay weerari kartaa saldhigyada milatari ee Maraykanka ee Yurub haddii Donald Trump uu mar kale weeraro Iiraan, sida ay qortay Financial Times, oo soo xiganaysa ilo ku dhow mas'uuliyiinta Iran.

    Arrintani waxay si weyn u ballaarin kartaa baaxadda dagaalka, iyadoo dagaalku ka gudbi karo xudduudaha Bariga Dhexe.

    Dhanka kale, Iiraan waxay wajahaysaa dhibaato kale: sida ay sheegtay CNN, Tehran waxay si tartiib-tartiib ah u luminaysaa gacan-ku-haynta Marinka Hormuz, oo ka mid ah marinnada ugu muhiimsan ee dunida ee sahayda iyo gaadiidka shidaalka.

    Hanjabaadda Yurub

    Sida ay qortay Financial Times, ciidamada Iiraan waxay ka fiirsanayeen inay weeraraan bartilmaameedyo Maraykan leeyahay oo ku yaalla koonfur-bari Yurub.

    Waxaa ka mid ah bartilmaameedyada suurtagalka ah saldhigga cirka ee Bezmer ee Bulgaria, sida ay sheegeen ilo uu wargeysku soo xigtay. Bishii hore, Maraykanka waxaa loo oggolaaday inuu saldhiggaas u isticmaalo diyaaradaha shidaal-qaadka.

    Sii akhri......

13. 21 Agoosto 2026Weerar seef loo adeegsaday oo ka dhacay Sweden

    Dhowr qof ayaa ku dhaawacmay weerar seef loo adeegsaday oo ka dhacay dugsi sare oo ku yaalla Sweden, sida ay sheegeen mas’uuliyiinta deegaanka.

    Booliisku waxay sheegeen inay qabteen hal nin kadib weerarka ka dhacay Dugsiga Brinell ee magaalada Fagersta, bartamaha Sweden.

    Ciidamada ammaanka ayaa goobta gaaray wax yar kadib 14:00 waqtiga maxalliga ah maanta. Warbaahinta Sweden ayaa sheegtay in qofka looga shakisan yahay weerarka ay booliisku lugta ka toogteen.

    Golaha deegaanka Fagersta ma uusan sheegin tirada saxda ah ee dadka dhaawacmay, balse wuxuu sheegay in booliisku ay dhismaha baarayeen, halka siddeed dugsi oo kale loo xiray si ku-meel-gaar ah oo taxaddar ah.

    Booliisku waxay sheegeen in xilligan aysan jirin khatar ku wajahan shacabka.

    Ra’iisul Wasaaraha Sweden Ulf Kristersson ayaa barta X ku tilmaamay weerarka “dhacdo halis ah”, isagoo sheegay in aan weli la ogeyn waxa ka dambeeya falka, balse booliisku ay si xooggan uga shaqeynayaan baaritaanka.

    Warar dheeraad ah:

    Soomaaliya oo caddeysay mowqifkeeda Qubrus kaddib qoraalkii guddoomiyaha Golaha Shacabka

    Sagaalka hub ee tiknoolajiyadda casriga ah ee beddeli doona dagaallada mustaqbalka

14. 21 Agoosto 2026Madaxweynaha Iiraan: Waxaa wanaagsan in dagaalka la soo afjaro hadda oo aan xukunka heyno

    Madaxweynaha Iran Masoud Pezeshkian ayaa sheegay in la joogo waqtigii la soo afjari lahaa dagaalka Mareykanka, maaddaama Tehran ay Washington kala joogto meel “awood” leh.

    Pezeshkian ayaa yiri: “Waxaa wanaagsan in dagaalka maanta la soo afjaro, xilli aan heyno xukunka oo aan leennahay sharaf, isla markaana dunida oo dhan ay qirayso guusheenna, ayna carrabka ku adkeynayso in Mareykanku, si ka baxsan dhammaan xeerarka, uu weeraray iskuulladeenna, isbitaalladeenna iyo kaabayaasheenna, isla markaana dunidu ay neceb tahay.”

    Madaxweynaha Iran ayaa sidoo kale natiijadii wadahadalladii Iran iyo Mareykanka, kuwaas oo horseeday in la saxiixo Is-afgaradkii Islamabad, ku tilmaamay “guul weyn”.

    Wuxuu sheegay in heshiiska “si midnimo iyo isfaham leh loogu ansixiyay Golaha Sare ee Amniga Qaranka, dhammaan xubnihii golaha ee arrintan ku lug lahaa ay si adag u difaaceenna.”

    Pezeshkian ayaa sidoo kale dhaliilay dadka uu sheegay inay “dibadda ka fadhiyaan” oo “aan garanayn waxa ay dowladdu ku guda jirto, xaaladda baarlamaanku ku jiro iyo waxa taliyayaashu ku jiraan.”

    Pezeshkian ayaa sidoo kale carrabka ku adkeeyay in hadalladiisu aysan ka dhignayn in Iran ay isu dhiibayso gardarro kasta oo iman karta: “Sinnaba uguma jilicsanaan doonno cagajuglaynta, arrintaasna shaki kuma jiro. Waxaan la hor istaagi doonnaa ilaa neeftayada ugu dambaysa, waxaana siin doonnaa jawaab burburinaysa.”

    Warar dheeraad ah:

    Soomaaliya oo caddeysay mowqifkeeda Qubrus kaddib qoraalkii guddoomiyaha Golaha Shacabka

    Sagaalka hub ee tiknoolajiyadda casriga ah ee beddeli doona dagaallada mustaqbalka

15. 21 Agoosto 2026Siddeed qof oo ku dhintay shil diyaaradeed oo ka dhacay xarun milatari oo ku taala Alaska

    Shil diyaaradeed oo ka dhacay meel fog oo ay leeyihiin Ciidanka Cirka Mareykanka ee Alaska ayaa waxaa ku dhintay dhammaan siddeeddii qof ee diyaaradda saarnaa, sida ay sheegeen milatariga Mareykanka.

    Diyaaradda oo ay maamusho shirkad rayid ah oo qandaraas kula jirta dowladda ayaa burburtay wax yar ka dib duhurnimadii waqtiga maxalliga ah, meel u dhow Cape Newenham, halkaas oo ku yaalla garoon diyaaradeed.

    Lama oga cidda rakaabku ahaayeen ama sababta ay halkaas u joogeen. Hase yeeshee, madaxa Taliska Ciidanka Cirka Mareykanka ee Alaska, Lt. Gen. Robert Davis, ayaa sheegay in dadkaasi ay ahaayeen “xirfadlayaal u heellan shaqadooda oo fulinayay hawl muhiim ah, iyadoo ay ku shaqeynayeen deegaan aad u adag.”

    “Tani waa khasaare aad u murugo badan oo ku dhacay qoyskeenna milatari iyo bulshooyinka aan u adeegno,” ayuu Davis intaa ku daray.

    Wuxuu bayaan uu soo saaray ku yiri: “Mudnaantayada ugu weyn hadda waa inaan taageero aan kala go’ lahayn siino qoysaskooda, asxaabtooda iyo kooxihii ay la shaqeynayeen inta lagu jiro waqtigan aadka u murugada badan.”

    “Waxaan si qoto dheer uga mahadcelineynaa jawaabtii degdegga ahayd iyo dadaalkii aan kala joogsiga lahayn ee ay muujiyeen shaqaalaha.”

    Diyaaradda ayaa markii hore ka duushay Garoonka Caalamiga ah ee Anchorage, waxayna ku si jeedday Cape Newenham, oo qiyaastii 450 mayl (725 km) dhanka galbeed kaga beegan Anchorage, sida uu sheegay Taliska Ciidanka Cirka Mareykanka ee Alaska.

    Samata-bixiyeyaashii ku degay meel u dhow goobta shilka ayaa “xaqiijiyay inaysan jirin wax badbaaday,” ayaa lagu sheegay bayaanka. Baaritaan ayaa socda, waxaana magacyada dadka dhintay la shaacin doonaa marka qaraabadooda dhow loo wargeliyo.

    Clint Johnson, oo ah madaxa gobolka Alaska ee Guddiga Badbaadada Gaadiidka Qaranka (NTSB), ayaa sheegay in diyaaradda ay saarnaayeen laba duuliye iyo lix rakaab ah, sida ay werisay CBS News ee Mareykanka, taas oo bah-wadaag la ah BBC-da.

    Goobta Cape Newenham, oo ku taalla xeebta koonfur-galbeed ee Alaska, waxay qayb ka tahay Nidaamka Raadaarka Alaska. Waa shabakad xarumo fog-fog ah oo kormeera diyaaradaha ku soo dhowaanaya ama ku shaqeynaya hawada Alaska.

16. 21 Agoosto 2026Muxuu yahay hubka uu dalkan Muslimka ah samaysatay ee aan dunida laga heysan?

    Milatariga casriga ah ee waddamada caalamka waxay qalabkooda ka saareen hub aad muhiim u ah oo la isticmaali jiray waa hore.

    Waa nooc ka mid ah taangiyada oo lagu tilmaamay in ay yihiin hub laga gudbay, balse miliyeriga Pakistan ayaa go'aansaday in uu dib u casriyeysto hubkaas.

    Labaatankii sano ee lasoo dhaafay waxay Pakistan ku mashquulsanayd dib u casriyeynta taangi lagu magacaabay Al-Khalid.

    Muxuu yahay Al-Khalid?

    Dowladda Pakistan waxa ay maalgelin wayn ku sameysay labo nooc oo ka mid ah taangiyadaas oo lagu guulaystay in si buuxda loo hormariyo.

    Labada noocba waa isla taangiga Al-Khalid.

    Warshad hubka farsamaysa oo ku taalla gudaha Pakistan ayaa taangiyadaas casriyaysay iyadoo taageero ka heleysa Shiinaha iyo Ukraine.

    Labadaas nooc ee hubka ah waxaa hadda lagu soo kordhiyay liiska qalabka ugu muhiimsan ee ay adeegsanayaan militeriga Pakistan.

    Al-Khalid waxa uu ka mid yahay gawaarida culus ee ku fiican dagaalka gacanta la iskula tago, waxaana aad loo adeegsan jiray 1990-meeyadii.

    Markii ugu horraysay waxaa farsamadiisa billaabay Shiinaha oo soo saaray nooc lagu magacaabo 90-IIM. Pakistan ayaa markii la soo gaaray sanadkii 2014-kii haysatay qiyaastii 310 taangi oo Al-Khalid ah. Tan iyo xilligaas wxii ka dambeeyay waxaa la sameeyay tiro kale oo aad u badan.

    Soo saaridda nooc saddexaad oo lagu magacaabo 'Al-Khalid II' ayaa dib u dhacday sababo la xiriira miisaaniyadda oo ku yaraatay.

    Sii akhri

17. 21 Agoosto 2026Itoobiya iyo Maraykanka oo gaaray heshiis dhanka difaaca iyo amniga ah

    Wafti heer sare ah oo uu hoggaaminayey Sareeye Guuto Teshome Gemechu, Agaasimaha Guud ee Xiriirka Dibadda iyo Iskaashiga Milatari ee Wasaaradda Difaaca Itoobiya (FDRE), ayaa booqday Maraykanka intii u dhaxaysay 19–20 Agoosto 2026.

    Waftiga ayaa wadahadallo laba geesood ah Pentagon-ka kula yeeshay dhiggiisa Maraykanka iyo madax kale oo sare oo ka tirsan Wasaaradda Dagaalka ee Maraykanka .

    Wadahadallada waxaa si wadajir ah u hoggaaminayey Brian J. Ellis, Ku-xigeenka Kaaliyaha Xoghayaha Wasaaradda Dagaalka ee Maraykanka u qaabilsan Arrimaha Afrika ee Pentagon-ka. Labada dhinac waxay ku heshiiyeen in iskaashiga milatari iyo diblomaasiyadeed ee labada dal la gaarsiiyo heer cusub oo horumarsan.

    Madaxda hay’adaha difaaca ee labada dal waxay ku heshiiyeen in la ballaariyo iskaashiga hay’adaha iyo in la sii xoojiyo isku-duwidda istiraatiijiga ah. Labada dhinac waxay sidoo kale ku heshiiyeen in iskaashiga istiraatiijiga ah ee dhammaystiran lagu saleeyo tiirar muhiim ah oo looga gol leeyahay ilaalinta danaha qaran iyo faa’iidooyinka labada dhinac, dhisidda iskaashi waara oo lagu xoojinayo kalsoonida labada dhinac, iyo kordhinta dadaallada wadajirka ah ee lagu xaqiijinayo nabad, amni iyo xasillooni waarta oo ka hanaqaadda Geeska Afrika iyo gobolka ka ballaaran.

    Sareeye Guuto Teshome Gemechu iyo Ku-xigeenka Kaaliyaha Xoghayaha Brian J. Ellis waxay xaqiijiyeen sida ay uga go’an tahay inay si degdeg ah u hirgeliyaan qaab-dhismeedyadii lagu heshiiyey, isla markaana xiriirka difaaca ee labada dal u qaadaan iskaashi istiraatiiji ah oo ka wanaagsan oo ku wajahan mustaqbalka.

    Intii ay joogeen Maraykanka, waftigu wuxuu sidoo kale wadahadallo ballaaran la yeeshay madax kale oo ka tirsan hay’adaha difaaca Maraykanka, wuxuuna booqday xarumo kala duwan.

18. 21 Agoosto 2026FBI oo xiray haweeney qorsheyneysay inay qarxiso dhismaha baarlamaanka Mareykanka

    Hay’adda Sirdoonka Gudaha Mareykanka ee FBI ayaa xirtay haweeney reer New York ah oo lagu eedeeyay inay qorsheynaysay inay qarxiso dhismaha Baarlamaanka Mareykanka si ay u disho xildhibaanno.

    Xeer-ilaaliyeyaashu waxay sheegeen in Jessica Bowie, oo 35 jir ah, ay taageere u ahayd kooxda la yiraahdo Dawladda Islaamiga ah (ISIS).

    Marwo Bowie waxaa sidoo kale lagu soo oogay dacwad ah inay siisay taageero iyo agab, urur argagixiso oo shisheeye.

    Xeer-ilaaliyeyaashu waxay sheegeen in haweeneyda lagu magacaabo Bowie ay dhowr jeer booqatay dhismaha Baarlamaanka si ay u soo indha-indhayso, isla markaana ay sidatay bam been-abuur ah iyo hub aan shaqaynayn oo ay siisay wakiillo FBI ah oo si qarsoodi ah u hawlgalayay.

    Sida ku cad dacwadda dembiga, Bowie waxay saraakiisha ku tiri: “Waxaan rabaa inaan burburiyo qaybta ugu weyn ee dhismaha intii suurtagal ah, oo aan dilo senatarada.”

    Ilaa hadda lama oga inay leedahay qorshe ay iskaga difaacdo eedeymaha loo soo jeediyay.

    Bowie, oo deggan agagaarka Albany ee waqooyiga gobolka New York, ayaa la sheegay inay qorshayaasheeda u sheegtay dad xog-wadaag la ahaa FBI, iyadoo muddo toddobaadyo ah la xiriiraysay wakiillo iska dhigay inay xubno ka yihiin ISIS.

    Xeer-ilaaliyeyaashu waxay sheegeen inay dooratay dhismaha Baarlamaanka ee ku yaalla Albany, New York, maadaama sida ay sheegeen ay u malaynaysay inuu ahaa bartilmaameed ka fudud Aqalka Cad.

    Waxay saraakiisha sido kale ku tiri: “Waxaan rabaa in arrintani ay saameyn ku yeelato nidaamka Mareykanka.”

    Xeer-ilaaliyeyaashu waxay sheegeen inay dhismaha booqatay qiyaastii shan jeer, iyadoo fulinaysay hawlo indha-indhayn ah ka hor weerarka.

    Qorshaheeda qayb ka mid ah, waxay qorshaysay inay boorso cuntada lagu geeyo ku qarsato bamka, sida ay saraakiishu sheegeen. Dukumentiyada dacwadda waxaa ku jira sawir boorsadda DoorDash ee ay u keentay wakiillada FBI-da.

    Waxaa la xiray Arbacadii, waxaana sidoo kale lagu soo qabtay mindiyo iyo qoraal ay ugu dhaaranayso inay daacad u tahay kooxda ISIS, sida ku cad dacwadda

    Intii uu socday baaritaanka, waxaa la sheegay inay wakiillada u sheegtay inay diinta islaamka ah ay qaadatay qiaastii shan sano ka hor.

19. 21 Agoosto 2026Trump: Iiraan waan weerareynaa hadii loo baahdo

    Madaxweynaha Mareykanka, Donald Trump, ayaa sheegay inuusan ka labalabeyn doonin inuu mar kale weeraro Iran haddii ay qasab noqoto, si looga hortago barnaamijkeeda nukliyeerka.

    Wareysi uu siiyay telefishinka WBBC77, Trump wuxuu sheegay in haddii aysan jiri lahayn tallaabooyinkii uu qaaday, Israel iyo Bariga Dhexe ay hadda ahaan lahaayeen kuwo burburay.

    Wareysigaas, wuxuu qirtay inuu amray weerarradii lagu qaaday xarumaha nukliyeerka Iran xilli dalkaasi ay u harsanaayeen laba toddobaad oo keliya, sida uu sheegay, ka hor inta uusan samayn hub nukliyeer ah.

    Trump wuxuu sheegay in, inkastoo warbaahintu ay si kale u tabinayso, Mareykanka uu yahay dalka gacanta ku haya marin-biyoodka Hormuz.

    Wuxuu mar kale ku adkeystay in awoodda Iran ee gantaallada iyo diyaaradaha aan duuliyaha lahayn (drones) si weyn loo wiiqay, dhaqaalihiisuna uu qarka u saaran yahay burbur.

    Trump wuxuu heshiiska JCPOA ku tilmaamay “masiibo”, isagoo intaas ku daray in ka bixitaanka heshiiska uu ahaa tallaabo lagama maarmaan u ah in Iran laga hor istaago inay hesho hub nukliyeer ah.

    Wuxuu Iran ku tilmaamay “dowladda kali-taliska ah ee Bariga Dhexe”, isagoo yiri: “Sida aan aragnay, Iran waxay mar hore weerartay xitaa dalal ay ka mid yihiin Qatar, Bahrain, Kuwait iyo Imaaraadka Carabta, kuwaas oo taageeradoodu Iran u ahayd mid aad u yar.”

    Madaxweynaha Mareykanka ayaa carrabka ku adkeeyay in haddii Mareykanku uusan qaadin tallaabo militari, Iran ay burburin lahayd dhammaan dalalkaas, isla markaana ay isu diyaarin lahayd inay weerarto Mareykanka.

    Sidoo kale akhri:

    Sawirka muranka dhaliyay ee muujinaya afhayeenka baarlamaanka Iran iyo dhiggiisa Ciraaq

    Iiraan ma weerari kartaa Yurub?

    Xiisad cusub oo u muuqata in ay ka dhex qaraxday Turkiga iyo Israa'iil

20. 21 Agoosto 2026Inaad labo jeer cadeysato maalintii ma wanaagsana, sababta ogow

    Dhammaanteen waxaan u maleyneynaa inaan naqaanno sida loo cadaydo ilkaheenna - xoqid subax iyo habeen, biyo ku raaci iyo laga yaabee isticmaalka af-dhaq ka sameysan nacnaac oo qiyaas wanaagsan ah.

    Laakiin sida ay qabaan khubarrada ilkuhu, xitaa dadka cadeysiga aadka ugu dadaala waxaa laga yaabaa inay samaynayaan khaladaad yar oo dib u dhigaya shaqadooda wanaagsan.

    Dr Praveen Sharma, oo ka tirsan dugsiga cilmiga ilkaha ee jaamacadda Birmingham, ayaa sheegay in kala bar dadka qaangaarka ah ee ku nool UK uu mar uun ku dhici doono cudurka cirridka iyo calaamadda hore ee cirridka oo dhiig baxaya.

    "Haddii cirridkaagu uu dhiig baxayo ama bararayo waa calaamad ku tusineysa inaad u baahan tahay inaad si fiican u cadayato," ayuu yiri.

    Iyo sidoo kale booqashooyinka joogtada ah ee dhakhtarka ilkaha, halkan waxaan idinkugu soo gudbineynaa afar shay oo isaga iyo daadiheyeyaasha barnaamijka What's Up Docs ee BBC Dr Xand iyo Dr Chris van Tulleken, ay ku sheegeen in qaar badan oo naga mid ah ay hadda khaldan yihiin kuwaas oo haddii aan beddelno hagaajin kara caafimaadka ilkaheenna.

    Inaad mar qura si fiican u cadeysato ayaa ka wanaagsan inaad labo jeer dhaqso u cadeysato

    Waa mid ka mid ah amarrada dhanka ilkaha ee weyn - cadayashada laba jeer maalintii - taasina waa waxa waaxda caafimaadka UK ee NHS ay ku talinayso.

    Laakiin Dr Sharma ayaa sheegay in furaha dhabta ah uu yahay tayada ee ma aha tiro.

    "Haddii aad heli karto waqti, markaa haa, labo jeer maalintii," ayuu yiri. "Laakiin way fiican tahay in la cadeysto hal mar maalintii si fiican halkii aad labo jeer si dhaqso ah u sameyn lahayd."

    Haddii aad cadaysto hal mar maalintii markaas wuxuu kugula talinayaa inay noqoto fiidkii oo aad hubiso inaad sidoo kale ilkaha istakiin isaga bixiso waxa ku haray.

    Dabcan, qofna ma jecla inuu isticmaalo waxyaabaha ilkaha looga bixiyo cunnada ku hartay kadib cadeysiga, laakiin Dr Sharma waxa uu sheegay in isticmaalka burushka ilkaha dhexdooda, gaar ahaan kuwa caagga ah, ay noqon karto mid fudud oo aan xanuun lahayn.

    Halkan ka sii akhri