"Waxaan bixiyay $30,000 si aan u qaato diblooma lagu barto sida qof saameyn leh looga noqdo baraha bulshada"

Dadka jaamacadaha dhigta waxay ula ekaan kartaa mid la yaab leh marka hore. Si kastaba ha ahaatee, Destiny McGowan waxay ku kalsoon tahay in maadada ay dooratay in ay barato ay aad anfacday.

Destiny, oo 21 jir ah, waxay ka qalin jabisay Jaamacadda Nottingham Trent ee England iyadoo haysata shahaadada muuqaalo abuurista bishii July.

Barnaamijk waxaa lagu bartaa sida loo abuuro fiidiyowyo iyo boostiyo wax ku ool ah oo loogu talagalay Instagram, TikTok, iyo YouTube, iyo sidoo kale hababka lagu dhiso dhagaystayaal, iyada oo lala shaqeynayo shirkado, muuqaalada lacag laga sameynayo.

Destiny waxay leedahay, "Waxaan had iyo jeer doonayay inaan noqdo ganacsade. Marka, xirfadaha aan aaminsanaa inaan ka heli doono barnaamijkan, oo aan sidoo kale u isticmaali karo meelo kala duwan, ayaa muhiim ii ahaa."

Waxay xustay inay tababar ku qaadatay baraha bulshada iyo maamulka ganacsiga labadaba.

Destiny, oo weli ku jirta bilowga xirfadeeda, ma shaacinayso cadadka saxda ah ee lacagta ay samayso, balse waxay sheegtay inay mar horeba bilowday inay lacag sameyso.

Marka laga soo tago inay akoonnadeeda gaarka ah ku soo bandhigto waxyaabaha la xiriira moodalka, waxay sidoo kale dadka kale u samaysaa muuqaallo. Waxaa sidoo kale loo shaqaaleysiiyay inay noqoto soo-jeediyaha iibka ee baahinta tooska ah ee TikTok, halkaas oo ay kamaradda horteeda ku soo bandhigto alaabada.

Destiny waxay sharraxaysaa in barnaamijku u suurageliyay inay hesho qalab, tiknoolajiyad, iyo xiriiro dhanka waaxdaas ah.

"Xiriirka aan la sameystay dadkaas cajiibka ah ee aan kula kulmay jaamacadda waxaa laga yaabaa inay qof kale ku qaadan lahayd shan ama toban sano," ayay tiri.

Jaamacadda Nottingham Trent waxay sheegtay in barnaamijkeeda ku saabsan abuurista nuxurka muuqaalada, oo la bilaabay sannadkii 2022-kii, uu ardayda siinayo "khibrad wax-qabad oo toos ah."

Dhowr jaamacadood oo ku yaalla Boqortooyada Ingiriiska ayaa hadda bixiya barnaamijyo la mid ah midkaas. Jaamacadda Brighton ayaa sheegtay inay ardayda bari doonto sida loo soo saaro barnaamijyo "ka dhex muuqda badweynta barnaamijyada kale ee jira."

Jaamacadda Arizona State ee dalka Mareykanka ayaa sheegtay in barnaamijkeeda la midka ah uu u suurtagelinayo ardayda inay "hal-abuurkooda u beddelaan muuqaallo xiriira ama saameyn ku leh dhagaystayaasha."

Si kastaba ha ahaatee, arrintani waxay ku kacaysaa kharash badan. Lacagta sannadlaha ah ee laga qaado ardayda ka yimid Ingiriiska ee ku jira barnaamijyada saddexda sano ah ee jaamacadaha Nottingham Trent iyo Brighton ayaa hadda ah £9,790 Dhanka Jaamacadda Arizona State, lacagta caadiga ah ee sannadlaha ah ee laga qaado dadka deegaanka gobolkaas waa $14,724.

Maadadaan ma u qalantaa lacagta?

Knightenator, oo si buuxda uga shaqeeya muuqaal sameynta gudaha UK, arrintan si buuxda uguma qanacsana.

"Uma maleynayo inaan baran lahaa maadadan," ayuu yiri.

Muuqaal sameeyaha oo ah 31 sano jir isla markaana aan shaacin magaceeda dhabta ah, ayaa tan iyo sanadkii 2015-kii baraha bulshada ku soo bandhigaysay muuqaallo ku saabsan ciyaaraha iyo safarrada.

Waqtigan xaadirka ah, waxay haysataa 65,000 oo qof oo ku xiran barteeda Twitch iyo in ka badan 100,000 oo ku xiran TikTok.

Abuurista muuqaalada ayaa ah shaqadeeda ugu weyn. Ma sheegin inta ay lacag ay shaqayso, balse waxay xustay in inta badan dakhligeeda uu ka yimaado heshiisyo ay la gasho shirkadaha ay xayaysiiso.

"Run ahaantii, marka loo eego waayo-aragnimadeyda, uma maleynayo inay shirkaduhu dhab ahaan u daneynayaan inaad haysato shahaado ku saabsan abuurista muuqaalada," ayay tiri.

Waxay intaas ku dartay inay jiraan talooyin badan oo bilaash ah oo laga heli karo internetka oo ku saabsan sida ganacsi loo bilaabo:

"Haddii aad si dhab ah u doonayso inaad noqoto qof abuura muuqaalada, talooyinka lagama maarmaanka ah mar horeba way jiraan. Uma baahnid inaad iska diiwaangeliso jaamacad saddex sano soconaysa arrintaas darteed."

Si kastaba ha ahaatee, Aiesha Beasley oo ah qof ku takhasusay sameynta muuqaal sameynta kana soo jeedda Phoenix, Arizona, ayaa arrintaas ka soo horjeedda.

Beasley, oo 36 jir ah, isla markaana soo dhigta baraha bulshada qoraallo ku saabsan cuntada, moodalka, iyo qaab-nololeedka, ayaa sheegtay in haddii Tumblr ay lahaan lahayd aqoon noocan oo kale ah xilligii ay billowday qorista blog-ga horraantii sannadihii 2010-meeyadii, ay sidaan ka hormari lahayd.

Waxay aaminsan tahay in shahaadada jaamacadeed ay u muujin doonto "waddo cad," gaar ahaan dhanka helitaanka hab nololeed.

"Runtii waa inaad u eegtaa arrinta sida qof ganacsade ah si aad u ogaato sida hiwaayad loogu beddeli karo ganacsi faa'iido leh," ayay tiri.

Si kastaba ha ahaatee, Jacky Gurr, madaxa abuurista muuqaalada oo ah macallin sare oo ka tirsan Jaamacadda Nottingham Trent, ayaa sheegtay in ardayda badankood aysan dhab ahaantii higsanayn inay noqdaan dad saameyn ku leh baraha bulshada.

Sida laga soo xigtay Gurr, abuurista muuqaalada waa xirfad si isa soo taraysa ay ugu baahan yihiin dad badan, ha ahaadaan kuwo maamula ganacsigooda, kuwa u shaqeeya urur ama hay'ad, ama kuwa madax-bannaan ee macaamiil dad kala duwan u shaqeeya.

"Xirfadahani waa kuwo hubaal ah in la baran karo. Ardaydu waxay bartaan inay qorsheeyaan oo ay soo saaraan muuqaallo, horumariyaan ololeyaal, fahmaan dhagaystayaasha bartilmaameedka ah, falanqeeyaan xogta waxqabadka, iyo inay la qabsadaan istaraatiijiyadoodu iyagoo ku salaynaya xogtaas."

Gurr waxay raacisay in qaybta maamulka, oo lagu barto hababka lacag sameynta iyo dhinacyada ganacsiga ee warshadaha, ay sidoo kale tahay "qayb muhiim ah oo ka mid ah koorsada."

Si kastaba ha ahaatee, waxay digniin u dirtay kuwa u maleynaya in shahaadada jaamacadeed ay habeen gudihiis ka dhigi doonto kuwo saameyn leh oo guuleysta: "Qayb weyn oo ka mid ah inaad noqoto qof saameyn leh waxay ku xiran tahay nasiibka. Ma bari karno dadka nasiib ama sida shakhsiyad loo yeesho."