په ۲۰۲۶ کال کې د فوټبال نړیوال جام: د کوربه لوبغالو نوملړ اعلان شو

د ۲۰۲۶ کال فوټبال نړیوال جام سیالیو لپاره د لوبغالو نوملړ اعلان شوی.

د مکسیکو ښار ازټېکا لوبغالی او د لاس انجلېس رام صوفي لوبغالی هم د ۲۰۲۶ کال فوټبال نړیوال جام کوربه توب لپاره ټاکل شوي.

دغه لوبې چې په لومړي ځل به په کې ۴۸ نړیوالې لوبډلې ګډون کوي د امریکا، مکسیکو او کاناډا په ګډ کوربه توب به ترسره شي.

د لوبو کوربه توب لپاره د امریکا ۱۱، د مکسیکو درې او د کاناډا دوه ښارونه انتخاب شوي‌.

دا به لومړی ځل وي چې درې هېوادونه په ګډه د یوه فوټبال نړیوال جام کوربه توب کوي.

د مکسیکو ازټېکا لوبغالی هم یوازینی هغه دی چې په دریو جلا نړیوالو اتلولیو کې د لوبو کوربه توب کوي.

د لاس انجلېس پاسادینا روز بال لوبغالی چې د ۱۹۹۴ نړیوال جام د پایلوبې کوربه وو، دې لېست کې نشته چې ډېرو لپاره حیرانوونکی ګام وو.

د امریکا واشنګټن ډي سي هم د لوبو کوربه ښارونو په لېست کې ځای نه لري.

د فیفا یا فوټبال نړیوال فدراسیون یوه چارواکي کالن سمېت ویلي: "د کوربه ښارونو ټاکلو بهیر له سختې سیالۍ وروسته بشپړ شو. د ټولو ښارونو وړاندیزونه عالي وو او موږ لپاره یې ټاکل اسانه کار نه وو."

امریکا کې د لوبو لپاره ټاکل شوي ټول ۱۱ لوبغالي د اېن اېف اېل کلبونو لوبغالي دي، چې په دې کې د نیویارک جاینټ مېټ لایف لوبغالی او صوفي لوبغالی چې د پنځه مېلیارد ډالرو په لګښت جوړ شوی هم شامل دي.

ښاغلی سمېت وایي: "لا هم باید ځینې خبرې وشي، موږ هڅه کوو چې د پایلوبې او د اتلولیو د پیل لوبو لپاره لوبغالي وټاکو،‌ خو سیالیو ته په کتو د دې اتلولیو هره لوبه به د پایلوبې په څېر وي. "

د لوبغالو بشپړ لېست:

اتلانتا - مرسډیز بېنز لوبغالی

باسټن - جېلېټ لوبغالی

ډالاس - ای ټي اېنډ ټي لوبغالی

ګواډالاجارا - اېستادیو اکرون لوبغالی

هوسټن - اېن ار جي لوبغالی

کنزاس سټي - اروهېډ لوبغالی

لاس انجلېس - صوفي لوبغالی

مکسیکو سټي - اېستادیو ازتېکا

میامي - هارډ راک لوبغالی

مونټېری - اېستادیو بي بي وي ای

نیویار / نیو جرسي - مېټ لایف لوبغالی

فېلاډلفیا - لېنکن فېنانشل فیلډ لوبغالی

سان فرانسېسکو بی اېریا - لېوېز لوبغالی

ټورانټو - بي اېم او فیلډ لوبغالی

وانکووور - بي سي پلېس لوبغالی