संयुक्त राष्ट्रांच्या सभेत रशियाच्या विरुद्ध ठराव मंजूर, भारत मतदानाला अनुपस्थित

लाईव्ह कव्हरेज

अमृता दुर्वे

1. 2 मार्च 2022रशिया-युक्रेन युद्धाला अमेरिका जबाबदार- उत्तर कोरिया

   

   फोटो स्रोत, Reuters

   रशियाने युक्रेनवर केलेल्या हल्ल्यासाठी उत्तर कोरियाने अमेरिकेला जबाबदार धरलं आहे. वॉशिंग्टनची म्हणजेच पर्यायाने अमेरिकेचं अधिपत्य गाजवण्याचं धोरण दुसऱ्या देशांनाही धोकादायक आहे असं उत्तर कोरियाने म्हटलं आहे.

   दक्षिण कोरियाच्या योनहाप या वृत्तसंस्थेनं दिलेल्या बातमीनुसार, संयुक्त राष्ट्रांच्या महासभेदरम्यान आपात्कालीन सत्रावेळी किम साँग बोलत होते.

   ते म्हणाले,अमेरिका आणि पश्चिमेकडील देशांनी रशियाच्या सुरक्षेच्या मागणीची अवहेलना केली. नेटो संघटनेचा पूर्वेत विस्तार व्हावा यासाठी शस्त्रास्त्रं प्रणाली लागू करण्याच्या प्रयत्नांचा भाग म्हणून युरोपचं सुरक्षित वातावरण कमकुवत करण्याचा डाव आहे.

   याआधी 28 फेब्रुवारीला उत्तर कोरियाच्या परराष्ट्र मंत्रालयाने अमेरिकेची अधिपत्य गाजवण्याची वृत्ती रशिया-युक्रेन वादाला कारणीभूत आहे असा दावा केला होता.

   संयुक्त राष्ट्रांच्या सभेत दक्षिण कोरियाचे दूत चो ह्युन यांनी युक्रेनविरुद्धचं युद्ध रशियाने स्वत: लादलेलं आहे अशी भूमिका घेतली.

2. 2 मार्च 2022युक्रेन युद्धातून हे मराठी कुटुंब कसं बाहेर पडलं?

3. 2 मार्च 2022पोलंड, हंगेरीने खुल्या मनाने केलं निर्वासितांचं स्वागत

   

   फोटो स्रोत, Getty Images

   युद्धामुळे जीव वाचवण्यासाठी युक्रेनमधून निघालेल्या नागरिकांचं पोलंड आणि हंगेरी या देशांनी स्वागत केलं आहे.

   युद्ध सुरू झाल्यानंतर युक्रेनचे लाखभर नागरिक हंगेरीत दाखल झाले आहेत.

   रस्ते मार्गाने दाखल झालेल्या या नागरिकांची तात्पुरती व्यवस्था शाळा, महाविद्यालयं तसंच क्रीडा संकुलांमध्ये करण्यात आली आहे.

   बस, मिनीबस, छोट्या गाड्यांद्वारे त्यांना गंतव्यस्थळी पोहोचवण्यात येत आहे. स्वयंसेवक आणि भाषांतरकार या नागरिकांना कोणतीही अडचण येणार नाही याची काळजी घेत आहेत.

   संयुक्त राष्ट्र संघटनेनं दिलेल्या माहितीनुसार युक्रेन सोडणाऱ्या लोकांमध्ये महिला आणि मुलांची संख्या जास्त आहे. रशियाने युद्ध पुकारल्यानंतर आतापर्यंत युक्रेनच्या 6,60,000 नागरिकांनी देश सोडला आहे.

4. 2 मार्च 2022रशिया-बेलारुसच्या स्केटर्सना आंतरराष्ट्रीय स्पर्धांमध्ये बंदी

   

   फोटो स्रोत, Getty Images

   युक्रेनविरुद्ध युद्ध पुकारल्यामुळे रशिया आणि बेलारुसच्या स्केटर्सना आंतरराष्ट्रीय स्केटिंग स्पर्धांमध्ये प्रवेशाची बंदी घातली. आंतरराष्ट्रीय स्केटिंग युनियनने यासंदर्भात घोषणा केली.

   काही दिवसांपूर्वी फिफा आणि युएफाने रशियावर बंदी घातली होती.

   युक्रेनमध्ये युद्धाचा फटका बसलेल्या प्रत्येक नागरिकाच्या दु:खात आम्ही सहभागी आहोत असं आंतरराष्ट्रीय स्केटिंग युनियनने म्हटलं आहे.

   येत्या महिनाभरात जागतिक स्केटिंग अजिंक्यपद स्पर्धा होत आहे.

   स्केटिंग या खेळात रशिया अव्वल देश आहे. बीजिंग 2022 विंटर ऑलिम्पिक स्पर्धेत रशियाने स्केटिंग खेळाच पाच पदकांची कमाई केली होती.

5. 2 मार्च 2022मराठी मुलं युक्रेन-रशियामध्ये या चार कारणांसाठी जातात

6. 2 मार्च 2022युक्रेनची राजधानी कीव्हवर हल्ला, शहर सोडण्यासाठी झुंबड

7. 2 मार्च 2022युक्रेनमध्ये नवीन शेखरप्पा या भारतीय विद्यार्थ्याचा 'या' कारणाने झाला मृत्यू

8. 2 मार्च 2022ब्रेकिंग, खारकीव्हमध्ये रशियाचे पॅराट्रूपर्स दाखल

   

   फोटो स्रोत, Getty Images

   युक्रेनमधलं दुसरं मोठं शहर असलेल्या खारकीव्हमध्ये रशियाचे पॅराट्रूपर्स दाखल झाले आहेत. युक्रेनच्या लष्करानेच यासंदर्भात सांगितलं आहे.

   रशियाने हवाई हल्ले सुरू केले आणि खारकीव्ह आणि आजूबाजूच्या प्रदेशात सायरनचा आवाज घुमू लागला.

   रशियाच्या फौजांनी प्रादेशिक लष्करी रुग्णालयावर हल्ला केला. त्याठिकाणी अजूनही संघर्ष सुरू आहे.

   युक्रेनमधल्या धूमश्चक्रीचं खारकीव्ह केंद्र झालं आहे.

   मंगळवारी एका क्षेपणास्त्राने खारकीव्ह शहरातल्या सरकारी इमारतीला लक्ष्य केलं होतं. क्षेपणास्त्र आदळल्यानंतर आगीच्या, धुराच्या लोळांनी आसमंत व्यापून गेला.

   यानंतर थोड्या वेळात खारकीव्हच्या निवासी भागातही क्षेपणास्त्रांचा मारा करण्यात आला. मंगळवारी खारकीव्ह शहरात झालेल्या हल्ल्यांमध्ये 17 जणांचा मृत्यू झाला तर दोन डझनहून अधिकजण जखमी झाले.

9. 2 मार्च 2022युक्रेनमध्ये लष्कर पाठवणार नाही- बायडन

   

   फोटो स्रोत, Getty Images

   युक्रेनचे राष्ट्राध्यक्ष तसंच युक्रेनच्या नागरिकांच्या मनोधैर्याचं कौतुक करणारे अमेरिकेचे राष्ट्राध्यक्ष जो बायडन यांनी रशियाविरुद्ध लढण्यासाठी युक्रेनमध्ये लष्कर पाठवणार नसल्याचं सांगितलं.

   युक्रेनमध्ये लष्कर पाठवणार नसलो तरी युक्रेनसाठी काय केलं यासंदर्भात बायडन यांनी संसदेला माहिती दिली. ते म्हणाले, “35 कोटी डॉलर्स रकमेची शस्त्रास्त्रं युक्रेनला पुरवली. 5.4 कोटी डॉलर रकमेची मानवी मदत केली. रशियाच्या काही बँकांना स्विफ्ट प्रणालीतून काढलं. रशियाच्या बँकांनी देशाचं चलन असलेल्या रुबलला वाचवण्यापासून रोखलं. ओलिगार्कची संपत्ती जप्त करण्यासाठी ट्रान्स अटलांटिक टास्क फोर्समध्ये सहभागी होण्याचा निर्णय घेतला. रशियाला जाणाऱ्या येणाऱ्या विमानांना वाहतूक बंदी केली आहे”.

10. 2 मार्च 2022ब्रेकिंग, रशियाच्या सर्व विमानांना अमेरिकेत बंदी- बायडन यांचा निर्णय

    

    फोटो स्रोत, Getty Images

    रशियाच्या विमानांना आता अमेरिकेच्या हवाई हद्दीत प्रवेश करता येणार नाही असा निर्णय अमेरिकेचे राष्ट्राध्यक्ष जो बायडन यांनी संसदेला संबोधित करताना जाहीर केला.

    रशियाच्या सर्व व्यावसायिक आणि खासगी उड्डाणांना अमेरिकेत प्रवेश मिळणार नाही असं त्यांनी आपल्या भाषणात स्पष्ट केलं.

    

    फोटो स्रोत, Getty Images

    अशीच बंदी युरोपियन राष्ट्रांनी आणि कॅनडाने अशी बंदी रशियावर लादली आहे.

    अशा उड्डाणबंदीमुळे रशियाला एकटं पाडता येईल आणि त्यांच्या अर्थव्यवस्थेवर मोठा दबाव टाकता येईल बायडन यांनी सांगितलं आहे.

11. 2 मार्च 2022अण्वस्त्रांचे नेमके काय परिणाम होतात?

    

12. 2 मार्च 2022आता चीन काय करणार?

    रशियन राष्ट्रपती व्लादिमीर पुतीन यांनी युक्रेनच्या पूर्व भागात सैनिकी कारवाईची घोषणा करण्याच्या काहीच तास आधी अमेरिकेने रशिया व चीन यांच्यावर आरोप केला होता की, 'हे दोन देश मिळून अत्यंत अनुदार जागतिक व्यवस्था निर्माण करू पाहत आहेत.

    युक्रेन-रशिया यांच्यातील युद्धामुळे चीनला अनेक आघाड्यांवर एका मोठ्या आव्हानाला सामोरं जावं लागतं आहे.

    चीनमध्ये नुकत्याच पार पडलेल्या 'हिवाळी ऑलम्पिक क्रीडास्पर्धां'साठी बीजिंगमध्ये उपस्थित राहिलेल्या मोजक्याच जागतिक नेत्यांमध्ये पुतीन यांचा समावेश होता. यावरून रशिया व चीन यांच्या घनिष्ठ राजनैतिक संबंधांची चुणूक मिळाली होती.

    विशेष म्हणजे युक्रेनमधील दोन फुटीरतावादी प्रदेशांना मान्यता देण्यासाठी आणि तिथे रशियन लष्कर पाठवण्यासाठी पुतीन यांनी 'हिवाळी ऑलम्पिक' संपण्याची वाट पाहिली.

    युक्रेनमधील तणाव कमी होण्यासाठी सर्व बाजूंनी प्रयत्न करावेत, असं आवाहन चिनी सरकारने या संदर्भात केलेल्या जाहीर निवेदनामध्ये केलं आहे.

    सविस्तर वाचण्यासाठी क्लिक करा- युक्रेनमधील संकट हे चीनसमोरचं मोठं आव्हान

13. 2 मार्च 2022कोणत्या देशांकडे किती अण्वस्त्रं आहेत?

    

14. 2 मार्च 2022बोइंगने रशियाशी संबंध तोडले

    

    फोटो स्रोत, Getty Images

    विमान निर्मितीत जगातल्या अव्वल कंपन्यांमध्ये समावेश होणाऱ्या बोइंगने रशियाशी संबंध तोडण्याचा निर्णय घेतला आहे.

    मंगळवारी बोइंगने यासंदर्भात घोषणा केली. मॉस्कोतील सर्व कामकाज थांबवण्यात येत आहे. अमेरिकास्थित बोइंग आता रशियाला तांत्रिक साहाय्य तसंच देखभालसंदर्भात कोणतीही मदत देणार नाही.

    बोइंग कंपनीने सोमवारी युक्रेनची राजधानी कीव्हमधील कार्यालय बंद केलं आणि मॉस्कोतील पायलट ट्रेनिंग बंद करण्यात येत असल्याची घोषणा केली.

    आमच्या सहकाऱ्यांची सुरक्षितता हे सर्वोच्च प्राधान्य आहे असं बोइंगच्या प्रवक्त्याने सांगितलं.

15. 2 मार्च 2022ब्रेकिंग, आक्रमकतेची किंमत चुकवावी लागत नाही तेव्हा हुकूमशहा अधिक नुकसान करतात- बायडन

    

    फोटो स्रोत, Getty Images

    सहा दिवसांपूर्वी रशियाचे राष्ट्राध्यक्ष व्लादिमीर पुतिन यांनी मुक्त जगाच्या संकल्पनेला धक्का दिला. आपण वाकवू तसं जग वाकेल असं त्यांना वाटलं. पण त्यांची ही मोहीम पूर्णत: फसली आहे असं अमेरिकेचे राष्ट्राध्यक्ष जो बायडन यांनी म्हटलं आहे.

    युक्रेनच्या नागरिकांच्या अतुलनीय धैर्याची त्यांनी जराही कल्पना नाही. युक्रेनचे राष्ट्राध्यक्ष व्होल्दोमीर झेलेन्स्की यांनी अतिशय सक्षमतेनं देशाचं नेतृत्व केलं आहे. त्यांनी जगासमोर अनोखं उदाहरण सादर केलं आहे. आपण सगळ्यांनी युक्रेनच्या ठामपणे युक्रेनच्या पाठीशी उभं राहायला हवं असं बायडन म्हणाले.

    ते अमेरिकन काँग्रेसला उद्देशून केलेल्या 'स्टेट ऑफ द युनियन' भाषणात बोलत होते. दरवर्षी या खालच्या सभागृहाचं सत्र सुरू होण्याआधी अमेरिकन राष्ट्राध्यक्ष देशातील परिस्थितीविषयी संसदेला माहिती देतात.

    "हूकूमशहांना आपल्या आक्रमकतेची किंमत चुकवावी लागत नाही तेव्हा ते जास्त नुकसान करतात. रशियाने आखणी करूनच हल्ला केला आहे. पण स्वातंत्र्याचं महत्त्व उमगलेल्या देशांनी एकत्र येत ताकद दाखवून दिली आहे", असं बायडन यांनी पुढे सांगितलं.

    "पुतिन चुकले आहेत. आम्ही तयार आहोत. रशिया ज्या पद्धतीने युक्रेनवर हल्ले करत आहे त्यासाठी पुतिनच सर्वस्वी जबाबदार आहेत. रशियाला याची जबर किंमत चुकवावी लागेल.

    पुतिन यांच्या हिंसक राजवटीत त्यांच्या सहकाऱ्यांनी पैशाची अमाप उधळपट्टी केली आहे. त्यांना याचं उत्तर द्यावं लागेल", असं बायडन म्हणाले.

    

    फोटो स्रोत, Getty Images

    अमेरिकेने रशियाच्या कमर्शियल आणि खाजगी विमान वाहतुकीवर बंदी घातली आहे. युरोपियन युनियन आणि कॅनडाने याच स्वरुपाची बंदी घातली आहे.

    या बंदीमुळे रशिया आणखी एकटं पडेल. रशियाचा शेअर बाजार 30 टक्क्यांनी घसरला आहे. अमेरिकेच्या नागरिकांनी युक्रेनच्या नागरिकांच्या निर्भय मानसिकतेतून प्रेरणा घ्यावी.

    पुतिन त्यांच्या लष्कराच्या बळावर युक्रेनची राजधानी कीव्हला वेढा देऊ शकतात पण ते युक्रेनच्या लोकांचं मन जिंकू शकत नाहीत असं बायडन यांनी सांगितलं.

16. 2 मार्च 2022मुघलांनी राजपूतांबरोबर जे केलं तसं रशियाचं वर्तन-युक्रेनचे राजदूत

17. 2 मार्च 2022रशियाच्या विमान प्रवेशावर अमेरिका बंदी लादण्याची शक्यता

    युरोपीय देश आणि कॅनडाने आपले हवाई क्षेत्र वापरू देण्याबद्दल रशियावर निर्बंध लादले आहेत. त्या पाठोपाठ आता अमेरिकादेखील रशियावर असे निर्बंध लादू शकतं अशी शक्यता मांडण्यात आली आहे.

    मंगळवारी रात्री, जो बायडन हे अमेरिकन संसदेला संबोधित करणार आहेत.

    अमेरिका रशियावर पुढील 24 तासांसाठी हे निर्बंध लावू शकतं असा अंदाज आहे.

    

18. 2 मार्च 2022रशियाचा प्रतिकार करण्यासाठी दिले जात आहे नागरिकांना प्रशिक्षण

    

    एकीकडे रशियाकडून रॉकेट आणि अत्याधुनिक शस्त्रांस्त्रांनी हल्ले होत आहेत. त्याचवेळी युक्रेनचे नागरिक त्या हल्ल्याचा प्रतिकार करताना दिसत आहेत.

    युक्रेनची राजधानी कीव्हमध्ये महिला आणि पुरुषांना रशियाचा प्रतिकार कसा करावा याचे प्रशिक्षण दिले जात आहे. त्यांना मोलोटोव्ह कॉकटेल्स, पेट्रोल बॉम्ब कसे फेकावेत याचे प्रशिक्षण दिले जात आहे.

19. 2 मार्च 2022युक्रेनवर रशियाने केलेल्या हल्ल्याचा आज सातवा दिवस, आतापर्यंत काय काय घडलं?

    युक्रेनवर रशियाने केलेल्या हल्ल्याचा आज सातवा दिवस आहे. युक्रेनवरील हल्ले वाढल्यानंतर लाखो लोक युक्रेन सोडून पलायन करत आहेत. युद्धाच्या पार्श्वभूमीवर अनेक गोष्टी घडत आहेत. त्याची इत्यंभूत माहिती आम्ही तुमच्यापर्यंत या लाइव्ह पेजच्या माध्यमातून पोहोचवत आहोत. तत्पूर्वी काय घडले हे आपण पाहू.

    • कीव्हमध्ये टीव्ही टॉवरजवळ स्फोट. कीव्ह मधल्या टीव्ही टॉवरच्या परिसरातून धुराचे मोठाले लोट उठताना दिसत होते.
    • रशियाच्या संरक्षण मंत्रालयानं कीव्हच्या नागरिकांना इशारा दिला आहे. युक्रेनच्या राजधानीतल्या निवडक ठिकाणांना लक्ष्य करण्यासाठी आम्ही तयारी करत आहोत.
    • युक्रेनमध्ये अडकलेल्या भारतीय विद्यार्थ्यांना घेऊन दोन विमानं मंगळवारी दिल्लीमध्ये पोहोचली. त्यांपैकी एक विमान हंगेरीहून आलं आहे.
    • युक्रेनच्या खारकीव्हमध्ये गोळीबारात एका भारतीय विद्यार्थ्याचा मृत्यू झाला. मृत्यूमुखी पडलेला भारतीय विद्यार्थी कर्नाटकचा होता.
    • युक्रेनमध्ये झालेल्या गोळीबारात मृत्यमूखी पडलेल्या भारतीय विद्यार्थ्याच्या मृत्यूवर काँग्रेस नेते राहुल गांधी यांनी शोक व्यक्त केला आहे. युक्रेनमधून भारतीयांना बाहेर काढण्यासाठी निश्चित धोरण हवं, असंही राहुल गांधींनी म्हटलं.
    • युक्रेनमधलं दुसरं मोठं शहर असलेल्या खारकीव्हमध्ये झालेल्या एका मोठ्या स्फोटामध्ये किमान दहा लोक ठार झाले आणि 20 जण जखमी झाले आहे
    • युरोपियन युनियनच्या विशेष सत्राला युक्रेनचे राष्ट्रपती वोलोदोमीर जेलेन्स्की यांनी संबोधित केलं. त्यांच्या या भावूक भाषणानंतर सर्वांनी उठून उभं राहात त्यांचं अभिनंदन केलं. दुसरीकडे, रशियाच्या प्रतिनिधींच्या भाषणाकडे सर्वांना पाठ फिरवली.

    कालचे अपडेट्स जाणून घेण्यासाठी बीबीसी मराठीच्या या पेजला भेट द्या.

    

    फोटो स्रोत, Getty Images

20. 25 फेब्रुवारी 2022रशिया-युक्रेन युद्धात अडकलेली 8 मराठी मुलं म्हणतात, 'आमच्याकडे 4 दिवसांचंच रेशन'