અમેરિકા અને ભારત વિશ્વની સ્થિરતાના બે આધારઃ ટિલરસન

અમેરિકાના વિદેશ પ્રધાન રેક્સ ટિલરસને તાજેતરમાં જણાવ્યું હતું કે ભારત સાથેના સંબંધને વધુ મજબૂત કરવા ટ્રમ્પ વહીવટીતંત્ર કટિબદ્ધ છે.

વોશિંગ્ટનમાં એક વિચારમંડળને સંબોધન કરતા ટિલરસને એમ પણ કહ્યું, ''અમેરિકા અને ભારત વિશ્વના બે છેડે આવેલા સ્થિરતાના આધાર છે.''

ટિલરસને કરેલા સંબોધનના મુખ્ય અંશ આ મુજબ છેઃ

ભારત-અમેરિકાની દોસ્તીનું ચીન કનેક્શન

ચીનમાં સત્તાધારી કોમ્યુનિસ્ટ પક્ષનું મહત્વનું અધિવેશન ચાલી રહ્યું હતું ત્યારે જ અમેરિકાના વિદેશ પ્રધાને ભારત સાથે સહકાર વધારવાના સંકેત આપ્યા હતા.

ડોનલ્ડ ટ્રમ્પ આવતા મહિને સૌપ્રથમવાર ચીનની મુલાકાત લેવાના છે.

તમને આ વાંચવું પણ ગમશે :

એ મુલાકાત પહેલાં ટિલરસને ચીનના મુદ્દે કહ્યું, ''અમેરિકાએ એશિયામાં ચીનના માળખાગત રોકાણના વિકલ્પ શોધવાની ચર્ચા પણ શરૂ કરી દીધી છે.''

ટિલરસને ઉમેર્યું, ''એશિયામાં ચીનની નકારાત્મક અસરના સંદર્ભમાં અમેરિકા ભારતને મહત્વનું સહયોગી ગણી રહ્યું છે.''

આ વર્ષે જૂનમાં અમેરિકન સંસદને સંબોધન કરતાં નરેન્દ્ર મોદીએ કહ્યું હતું, ''મને સંબોધનની તક આપીને આપે ભારતીય લોકશાહી અને તેના સવાસો કરોડ લોકોનું સન્માન કર્યું છે. ''

''ભારત અને અમેરિકા વચ્ચેનો સંબંધ પ્રભુત્વને બદલે સહકારનો હશે.''

એશિયા અને વિશ્વમાં ચીનના વધતા પ્રભાવને રોકવા માટે ભારતની નજીક આવવાની અમેરિકાની નીતિ સફળ થશે કે કેમ એ તો ભવિષ્યમાં જ ખબર પડશે.

રેક્સ ટિલરસન આગામી સપ્તાહે ભારત અને પાકિસ્તાનની મુલાકાતે આવવાના છે.

તમે અમને ફેસબુક, ઇન્સ્ટાગ્રામ, યુટ્યૂબ અને ટ્વિટર પર ફોલો કરી શકો છો