એકસાથે બે સિસ્ટમ બની, ગુજરાતમાં કયા જિલ્લામાં વરસાદ પડી શકે?
ઇમેજ સ્રોત, Getty Images
ભારતમાં એક તરફ ચોમાસાની વિદાયની શરૂઆત થઈ ગઈ છે અને બીજી તરફ બંગાળની ખાડી અને અરબી સમુદ્રમાં વરસાદી સિસ્ટમ બની રહી છે.
ગુજરાતમાં હાલ કેટલાક વિસ્તારોમાં વરસાદ પડી રહ્યો છે અને કેટલાક વિસ્તારોમાં વરસાદ બંધ થઈ ગયો છે. આવનારા દિવસોમાં પણ હવામાન વિભાગે રાજ્યમાં વરસાદની આગાહી કરી છે.
હવામાન વિભાગે કહ્યું છે કે અરબી સમુદ્ર અને બંગાળની ખાડી બંનેમાં બનેલી સિસ્ટમો મજબૂત બનીને લૉપ્રેશર એરિયામાં ફેરવાઈ ઘણા વિસ્તારોમાં ભારે વરસાદ આપશે.
જૂનમાં શરૂ થયેલા દક્ષિણ-પશ્ચિમ ચોમાસાનો આ છેલ્લો મહિનો ચાલી રહ્યો છે અને રાજસ્થાનમાંથી ચોમાસાની વિદાય પણ શરૂ થઈ ગઈ છે અને હવે ગુજરાતમાં પણ આવનારા દિવસોમાં ચોમાસાની વિદાય શરૂ થશે.
અરબી સમુદ્રની સિસ્ટમથી ગુજરાતમાં ચોમાસું લંબાશે?
ઇમેજ સ્રોત, Getty Images
હવામાન વિભાગે આપેલી માહિતી પ્રમાણે અરબી સમુદ્રમાં કોંકણ અને ગોવાના દરિયાકાંઠે જે સિસ્ટમ સર્જાઈ છે તે હવે લૉ-પ્રેશર એરિયામાં પરિવર્તિત થઈ ગઈ છે. આ સિસ્ટમ હજી પણ વધારે મજબૂત બનીને વેલમાર્ક્ડ લૉ-પ્રેશર એરિયા બનશે. આ સિસ્ટમને કારણે ગોવા, કોંકણ, મહારાષ્ટ્ર, કર્ણાટકના કેટલાક વિસ્તારોમાં ભારે વરસાદ થવાની શક્યતા છે અને વેસ્ટર્ન ઘાટના કેટલાક વિસ્તારોમાં અતિભારે વરસાદ પણ થવાની શક્યતા છે.
આ સિસ્ટમ આગળ વધીને ગોવા-કોંકણના દરિયાકાંઠે જ વિખેરાઈ જાય તેવી શક્યતા હાલ દેખાઈ રહી છે એટલે કે ગુજરાત તરફ આવે તેવી શક્યતા દેખાતી નથી.
હવામાન વિભાગે જે આગાહી કરી છે તે પ્રમાણે આ સિસ્ટમની અસર ગુજરાત પર થાય તેવી શક્યતા નથી અને તેના કારણે રાજ્યમાં વરસાદનું પ્રમાણ વધે તેવી પણ શક્યતા જણાતી નથી.
બંગાળની ખાડીની સિસ્ટમ કઈ તરફ જશે?
ઇમેજ સ્રોત, Getty Images
તાજેતરમાં જ બંગાળની ખાડીમાં બનેલી સિસ્ટમ વધારે મજબૂત બનીને ગુજરાતની પાસે રાજસ્થાન પરથી થઈને પસાર થઈ હતી અને તેના લીધે ખાસ કરીને પૂર્વ ગુજરાત અને ઉત્તર ગુજરાતના ઘણા વિસ્તારોમાં ભારે વરસાદ પડ્યો હતો.
End of સૌથી વધારે વંચાયેલા સમાચાર
હવામાન વિભાગે આપેલી માહિતી પ્રમાણે બંગાળની ખાડીમાં બનેલી સિસ્ટમ પણ વધારે મજબૂત બનીને વેલમાર્ક્ડ લૉપ્રેશર એરિયા બનશે અને તે પણ ઘણા વિસ્તારોમાં અસર કરશે.
બંગાળની ખાડીની અંદર બનેલી સિસ્ટમ ભારતના ભૂ-ભાગો પર આવીને ઉત્તર-પશ્ચિમ તરફ આગળ વધે તેવી શક્યતા છે એટલે કે તેની વધારે અસર ઉત્તર અને ઉત્તરપૂર્વના કેટલાક વિસ્તારોમાં થાય તેવી શક્યતા છે.
જોકે, આ સિસ્ટમ ગુજરાત તરફ આવે તેવી શક્યતા નથી અને આ સિસ્ટમ મધ્ય પ્રદેશ ઉપર પણ આવે તેવી શક્યતા ખૂબ ઓછી છે જેના લીધે રાજ્યમાં ફરીથી વરસાદ વધવાની હાલ શક્યતા દેખાતી નથી.
ગુજરાતમાં હજી કેટલા દિવસ સુધી વરસાદ પડશે?
ઇમેજ સ્રોત, Getty Images
તમારા કામની સ્ટોરીઓ અને મહત્ત્વના સમાચારો હવે સીધા જ તમારા મોબાઇલમાં વૉટ્સઍપમાંથી વાંચો
વૉટ્સઍપ ચેનલ સાથે જોડાવ
Whatsapp કન્ટેન્ટ પૂર્ણ
ગુજરાતમાં હજી બે કે ત્રણ દિવસ સુધી વરસાદ પડે તેવી શક્યતા દેખાઈ રહી છે અને કેટલાક વિસ્તારોમાં હળવાથી મધ્યમ પ્રકારનો વરસાદ થાય તેવી શક્યતા છે.
દક્ષિણ ગુજરાત અને સૌરાષ્ટ્રના કેટલાક વિસ્તારોમાં હજી બે-ત્રણ દિવસ સુધી વરસાદી માહોલ છવાયેલો રહે તેવી શક્યતા છે અને ત્યારબાદ વરસાદનું પ્રમાણ ઘટે તેવી શક્યતા છે.
ભાવનગર, અમરેલી, ગીર-સોમનાથ, જૂનાગઢ, વલસાડ, નવસારી, સુરત, ભરૂચ, ડાંગ, તાપી સહિતના કેટલાક વિસ્તારોમાં છુટોછવાયો વરસાદ થાય તેવી શક્યતા છે.
કચ્છ, ઉત્તર ગુજરાત તથા મધ્ય ગુજરાતના ઘણા વિસ્તારોમાં હવે વરસાદની શક્યતા ખૂબ ઓછી થઈ ગઈ છે અને ચોમાસાની વિદાયનો સમય આવી ગયો છે.
સામાન્ય રીતે રાજસ્થાનમાં ચોમાસાની વિદાયની શરૂઆત થાય તેના એકાદ અઠવાડિયામાં ગુજરાતમાંથી પણ ચોમાસાની વિદાયની શરૂઆત થતી હોય છે.
ભારતમાં ચોમાસાની વિદાયની અધિકારીક તારીખ 17 સપ્ટેમ્બર છે પરંતુ આ વર્ષે ચોમાસાની વિદાય એકાદ અઠવાડિયું મોડી થઈ છે. આ વર્ષે 25 સપ્ટેમ્બરના રોજ ચોમાસાની વિદાયની શરૂઆત થઈ છે.
