Umukuru wa CIA yerekeje i Moscow mu biganiro bitari byatangajwe – ibivugwa n'ibitangazamakuru byo muri Amerika

Inyandiko gusa
Ifoto igaragaza John Ratcliffe yambaye ikositimu y'ubururu butsitse na karuvati itukura.

Ahavuye isanamu, Getty Images

Insiguro y'isanamu, Amakuru avuga ko John Ratcliffe yagiye mu murwa mukuru w'Uburusiya ku wa kabiri mu ndege ya gisirikare y'Amerika
    • Umwanditsi, Joe Coughlan
  • Yatangajwe
  • Igihe co gusoma: iminota 4

Umukuru w'urwego rw'ubutasi bwo mu mahanga rw'Amerika (CIA) yagiye i Moscow mu biganiro bitari byaratangajwe, nkuko bitangazwa n'igitangazamakuru CBS gikorana na BBC muri Amerika.

Amakuru avuga ko John Ratcliffe yageze aho mu murwa mukuru w'Uburusiya ku wa kabiri. Washington cyangwa Moscow, nta ruhande rwemeje imiterere y'urwo ruzinduko cyangwa uwo byari biteganyijwe ko ahura na we.

Ibiganiro by'imbonankubone hagati y'abategetsi bo ku rwego rwo hejuru bo muri Amerika n'abo mu Burusiya ni imbonekarimwe.

Amakuru y'imbuga zo kuri murandasi (internet) zikurikirana ingendo z'indege yemeje ko indege nini ya gisirikare y'Amerika ku wa kabiri yerekeje mu Burusiya ivuye muri Amerika inyuze muri Latvia (Lettonie).

BBC News yasabye CIA, ibiro bya perezida w'Amerika (White House) n'ibiro bikuru by'ingabo z'Amerika (Pentagon) kugira icyo babivugaho.

Videwo yatangajwe ku mbuga nkoranyambaga yerekanye indege ya gisirikare y'ubwikorezi yo mu bwoko bwa C-17 ubwo yari igeze hafi y'ikibuga mpuzamahanga cy'indege cya gisirikare cya Vnukovo cy'i Moscow.

Yahagurutse ku kibuga cy'indege cya Riga mu murwa mukuru wa Latvia ku wa kabiri saa moya n'iminota 50 za mu gitondo (07:50) ku isaha yo mu Rwanda no mu Burundi, ndetse uko bigaragara yaguye kuri icyo kibuga cyo mu murwa mukuru w'Uburusiya kuri uwo munsi mu ma saa tatu n'iminota ine za mu gitondo (09:04) ku isaha yo mu Rwanda no mu Burundi, nkuko amakuru y'urubuga FlightRadar24 rukurikirana ingendo z'indege abigaragaza.

Yaje kongera kugera i Riga mbere gato ya saa moya z'ijoro (19:00) ku isaha yo mu Rwanda no mu Burundi, kuri uwo wa kabiri.

Skip Ibisomwa cane and continue reading
Ibisomwa cane

End of Ibisomwa cane

Videwo yatangajwe ku mbuga nkoranyambaga binavugwa ko igaragaza urukurikirane rw'imodoka z'abadipolomate zirimo kugenda muri Moscow.

Mbere y'urwo ruzinduko, Amerika yari yabwiye Ukraine ko intumwa zo ku rwego rwo hejuru ziza kwerekeza i Moscow ndetse isaba Ukraine kuba ihagaritse ibitero kugeza izo ntumwa zimaze kuhava, nkuko umutegetsi wo ku rwego rwo hejuru wo muri Ukraine yabibwiye igitangazamakuru CBS.

Insiguro ya video, Reba: Videwo igaragaza indege ya gisirikare y'Amerika iri hafi kugwa ku kibuga cy'indege cy'i Moscow
Skip podcast promotion and continue reading
WhatsApp channel ya BBC Gahuza

Amakuru ya BBC Gahuza ako kanya kuri WhatsApp yawe

Kanda hano ujyeho

End of podcast promotion

Byibazwa ko urwo ruzinduko ari rwo rwa mbere Ratcliffe agiriye mu Burusiya nk'umukuru wa CIA, nubwo yakomeje kuvugana n'abo mu nzego z'ubutasi z'Uburusiya.

John Foreman, wabaye umujyanama mu bya gisirikare muri ambasade y'Ubwongereza i Moscow hagati y'umwaka wa 2019 n'uwa 2022, yabwiye ikiganiro PM cya Radio 4 ya BBC ko urwo ruzinduko rushobora kuba rwibanze ku buryo bwo "guhosha gufata indi ntera" bitewe n'ibihwihwiswa ko igikorwa cy'indege nto y'intambara itajyamo umupilote (izwi nka 'drone') cyabaye mu Budage muri uku kwezi gishobora kuba gifitanye isano n'Uburusiya.

Yagize ati: "Abanyamerika ubusanzwe ntibohereza i Moscow umutegetsi nk'uwo wo ku rwego rwo hejuru cyane batabanje kubitangaza [kandi ngo babikore] habura igihe gito ngo uruzinduko rube keretse iyo hari ikintu kidasanzwe."

Foreman yavuze ko urwo ruzinduko rushobora no kuba rujyanye n'irekurwa ry'imfungwa z'Abanyamerika ubu zifungiye mu Burusiya.

Ratcliffe yagize uruhare mu biganiro bijyanye n'irekurwa ry'Umurusiyakazi ufite n'ubwenegihugu bw'Amerika, Ksenia Karelina, wafungiwe mu Burusiya mu gihe kirenga umwaka umwe ashinjwa guha ubufasha Ukraine.

CIA yanagize uruhare mu guhererekanya imfungwa kwabaye mu mwaka wa 2024, kwatumye umunyamakuru Evan Gershkovich w'ikinyamakuru Wall Street Journal, hamwe n'Umunyamerika wahoze mu ngabo z'Amerika mu mutwe w'aba 'Marines', Paul Whelan, ndetse n'umunyamakuru w'Umurusiya ufite n'ubwenegihugu bw'Amerika, Alsu Kurmasheva, barekurwa.

Amerika yashyize agatotsi mu mubano wayo n'Uburusiya kuva bugabye igitero gisesuye kuri Ukraine mu mwaka wa 2022. Kuva icyo gihe, Uburusiya bwashyizwe mu kato ku rwego mpuzamahanga ndetse bufatirwa ibihano mpuzamahanga byo mu rwego rw'ubukungu.

Uko bigaragara Ratcliffe ni umwe mu bategetsi bo hejuru cyane bo muri Amerika bagiriye uruzinduko mu Burusiya kuri iyi manda ya kabiri ya Perezida Donald Trump.

Mu mwaka ushize, Trump yahuye na Perezida w'Uburusiya Vladimir Putin muri leta ya Alaska muri Amerika ariko inama yabo ntiyatumye hari intambwe ikomeye iterwa. Ibiganiro by'amahoro biyobowe n'Amerika byakurikiyeho hagati y'Uburusiya na Ukraine uko bigaragara byarahagaze.

Amakuru y'inyongera yatawe n'umunyamakuru wa BBC i Washington Daniel Bush hamwe n'ishami rya BBC rigenzura ukuri kw'amakuru rya BBC Verify