Inyuma y’igitero ku kiraro ca Crimée, Zelensky ati 'Intambara izosubira aho yatanguriye'

Perezida Volodymyr Zelensky avuga ko intambara amaherezo izosubira aho yatanguriye, inyuma y'uko ibitero vy'indege zitajamwo abadereva (drone) vya Ukraine bisamburiye igice c’ikiraro gihuza akarere ka Crimée/Crimea n'Uburusiya.
Amasanamu yerekanye ko igice c'ikiraro cahora gicamwo imodoka caguye mu kiyaga, hasigara umwobo munini. Ariko uruja n'uruza rw'amagari ya moshi rwasubiriye kubandanya mu nzira y’uruhande rumwe rw’ico kiraro.
Zelensky yavuze ko ico gitero caje gikurikira igikorwa cari categuwe neza casambuye, intambwe ku yindi, ubuhinga bw’Uburusiya bwo kwivuna ibitero vyo mu kirere hamwe n'ibikoresho vya radar.
Ico kiraro c'ibirometero 19, cuguruwe na Perezida Vladimir Putin mu 2018, ni kimwe mu bintu bihambaye vyakozwe n’Uburusiya kuko ari co gifatanya iki gihugu na Crimée, intara cigaruriye mu 2014.
Gifise akamaro kanini mu vya gisirikare no mu kwunguruza abantu n’ibintu kuko giha Uburusiya inzira ishikana muri Crimée butarinze guca ku butaka bugenzurwa na Ukraine.
Igihe Uburusiya bwatangura igitero cabwo cagutse kuri Ukraine mu 2022, ico kiraro cabaye inzira nyamukuru yo gutwara abasirikare, ibitoro, amasasu n'ibindi bikoresho vya gisirikare hagati ya Crimée n’ubumanuko bwa Ukraine.
Umukuru w'ingabo za Ukraine zikoresha amadrone, Robert Brovdi, yabwiye itororokanirizo ry’amakuru Reuters mu ntango z'uyu mwaka ko gusambura iyo nzira ari imwe mu ntego nyamukuru ya Ukraine.










