Tanzania: Impanuka y'imodoka yishe abantu nibura 29 abandi benshi barakomereka

Impanuka y'imodoka muri Tanzania yishe abantu nibura 29 naho abandi hafi 30 barakomereka.

Iyi mpanuka yabaye ku wa kane, ibera i Mkambarani mu karere ka Morogoro kari mu burasirazuba bw'igihugu, muri kilometero 174 uvuye mu murwa mukuru w'ubucuruzi, Dar es Salaam.

Andrew Kantimbo, umukuru wa polisi mu karere ka Morogoro, yavuze ko bisi yagonganye n'ikamyo yari itwaye ibiti yageragezaga kunyura ku yindi modoka.

Iyo bisi yafashwe n'umuriro, abantu 28 bahise bapfa, naho undi umwe wari uri mu ikamyo ahita apfa nawe.

Kantimbo yavuze ko abantu hafi 30 bakomeretse, bakaba bari kuvurirwa ku bitaro by'akarere ka Morogoro.

Yagize ati: "Turi gukorana n'andi matsinda, harimo impunguke mu by'ubugenzacyaha, mu kumenya imyirondoro y'abo bapfuye ndetse n'andi makuru kubera ko imirambo yabo yangiritse cyane."

Amafoto yafotorewe aho byabereye agaragaza iyo bisi irimo kugurumana, na nyuma yaho yamaze gushya burundu.

Uwarokotse iyi mpanuka Landorine Mwanjigu yavuze ko ari ikamyo yashakaga kunyura ku zindi modoka, ubundi igongana na bisi. Yavuze ko benshi mu barokotse ari abari bicaye hagati ndetse n'inyuma muri iyo modoka.

Yagize ati: "Benshi mu bapfuye cyangwa abakomeretse ntibabashije gusohoka muri bisi kuko umuriro wahise waka ako kanya zikimara kugongana."

Polisi yatangaje ko iyi bisi yavaga i Dar es Salaam yerekeza i Mbeya mu majyepfo ya Tanzania.

Mu yindi mpanuka itandukanye n'iyi muri aka karere n'ubundi, yabaye ku wa kane nimugoroba, abantu bane, barimo abapolisi batatu, barapfuye naho abandi bantu barindwi barakomereka.

Polisi yavuze ko abo bapolisi bari barimo bajya aho bakorera, ubwo ikamyo yagonganaga n'imodoka yabo.