የወሲብ ወንጀለኛው ኤፕስቲን ራሱን አጥፍቶ ሳይሆን ተገድሎ እንደሞተ አንድ የፎረንሲክ ባለሙያ ተናገሩ

የፎቶው ባለመብት, Getty Images
የወሲብ ወንጀሎችን በመፈፀም የተፈረደበት ጄፍሪ ኤፕስቲን እስር ቤት ሳለ ሕይወቱ ያለፈው ራሱን አጥፍቶ ሳይሆን ተገድሎ እንደሆነ እንደሚያምኑ አንድ የአስከሬን ምርመራ ባለሙያ ተናገሩ።
ፕሮፌሰር ማይክል ፍሪማን በኒው ዮርክ ከተማ የሚገኘውን የሕክምና ምርመራ መዝገብ ከገመገሙ በኋላ ኤፕስቲን ምን አልባትም ከጀርባ በኩል ታንቆ ተገድሏል ብለው እንደሚያምኑ ለቢቢሲ ኒውስናይት ገልጸዋል።
እአአ በ2019 የአስክሬን ምርመራውን ያደረጉት የሕክምና ባለሙያ ግን ኤፕስቲን የደረሰበት ጉዳት የሚያሳየው ራሱን እንዳጠፋ መሆኑን ደምድመው ነበር።
ባለሙያው በወቅቱ እንደተናገሩት የኤፕስቲን ሞት ምክንያት ራስን ማጥፋት እንደሆነ እና ለመከላከል ሲሞክር የደረሰበትን ጉዳት የሚያሳይ ምንም ዓይነት ማስረጃ አልነበረም።
ኤፕስቲን በወሲብ ወንጀሎች ክስ እስር ቤት ሆኖ ጉዳዩን እየተከታተለ ሳለ ነበር እአአ ነሐሴ 10/ 2019 ሕይወቱ አልፎ የተገኘው።
የኤፕስቲን አስክሬን ምርመራ በተደረገበት ወቅት የሕክምና ምርመራ ኃላፊ የነበሩት እና የሞቱ ምክንያት ራስን ማጥፋት እንደሆነ የገለጹት ዶ/ር ባርባራ ሳምፕሰን ቀደም ብሎ " የሞቱን መንስዔ እና አግባብ በተመለከተ በምርመራ ውጤታችን በቁርጠኝነት እቆማለሁ" ብለዋል።
ቢቢሲ ለዝርዝር ማብራሪያ ዶ/ር ሳምፕሰንን ቢጠይቅም ወዲያውኑ ምላሽ አላገኘም።
አሁን ላይ ኤፕስቴን ተገድሎ እንደሞተ እንደሚያምኑ የተናገሩት ፍሪማን፣ በአሜሪካ ለጠቅላይ አቃቤ ሕጎች በሚኒሶታ የተገደለውን ጆርጅ ፍሎይድን ጨምሮ በፖሊስ ቁጥጥር ሥር ሳሉ የሞቱ ግለሰቦችን ሞት መንስዔ የምርመራ ባለሙያ በመሆን አገልግለዋል።
ሰኞ ዕለት ምሽት በኒው ዮርክ ከተማ የሕክምና ምርመራ መዝገቦች እና የጥናታቸውን ውጤት በለንደን ካቀረቡ በኋላ ምርምራቸውን አሳትመዋል።
የኤፕስቲንን አስክሬን ያላዩት ፍሪማን፣ ከኤፕስቲን ወንድም ማርክ ኤፕስቲን የቀረበላቸው የመርማሪዎች ሪፖርት እና ፎቶግራፎች ላይ በመመስረት ነው ኤፕስቲን ተገድሎ እንደሞተ የደመደሙት።
ፍሪማን ምርመራቸው ገለልተኛ እንደሆነ እና ከሟች ወንድም ምንም ዓይነት ክፍያ እንዳልተቀበሉ ተናግረዋል። ሆኖም ምርመራቸው በሌሎች አቻ ባለሙያዎች አልተገመገመም።
ፍሪማን ለቢቢሲ እንደተናገሩት ግን በኤፕስቲን ላይ ጥቃት እንደተፈፀመ የሚያሳዩ እንደ በግራ ትከሻው ላይ ደም መፍሰስ እና ፊቱ ላይ የተመታ የሚመስሉ ምልክቶች እንዳሉ ያምናሉ።
ጨምረውም ማስረጃው በሰው እንደተገደለ የሚያሳይ ነው ብለዋል።
በኤፕስቲይን አንገት ላይ የጣት ጥፍር ምልክቶች እንዳሉም ተናግረዋል። ይህም "በተለይም ከኋላ ከመታፈን ጋር የሚመሳሰል እንዲሁም ተጎጂው አንገቱን ለማስለቀቅ ያደረገው ሙከራ" እንደሆነ አስረድተዋል።
እርሳቸው እንዳሉት የኤፕስቲን ጉዳት እና አስክሬኑ የተገኘበት ሁኔታም እንደማይጠጣም የገለጹት ፍሪማን፣ የሞቱ ምክንያት ግድያ እንደሆነ ያሳያል ብለዋል።
እንደ ፍትህ መሥሪያ ቤት ምርመራ ግን ኤፕስቲንን ያገኘው የእስር ቤቱ ጠባቂ ሌላ ባልደረባውን ለእርዳታ እንደጠራ እና ከተሰቀለበት አውርደው ሕይወቱን ለመመለስ እንደሞከሩ ያስረዳል።
የኤፕስቲን ሞት የተሰማውም ራሱን እንዳያጠፋ ክትትል ከተደረገበት ከአንድ ወር በኋላ መሆኑን የፍትህ ሚኒስቴሩ ሪፖርት አመልክቷል።
ኤፕስቲን በሰው እጅ ከተገደለ ገዳዩ ማን ሊሆን እንደሚችል የተጠየቁት ፍሪማን፣ ይህን እንደማያውቁ ተናግረዋል።
ኤፕስቲን ታዳጊ ልጆችን ለወሲብ ንግድ በማሰማራት ወንጀል ጥፋተኛ የተባለው እአአ በ2008 ነበር።
ግለሰቡ በ2019 እስር ቤት ውስጥ ሆኖ ፍርዱን እየተጠባበቀ ሳለ በኒውዮርክ ከተማ በሚገኘው የሜትሮፖሊታን ማረሚያ ቤት ሕይወቱ አልፎ ተገኝቷል።

































