"ቤተሰቤ ጥቁር መሆኔን ለምን አልነገሩኝም?"

የፎቶው ባለመብት, Lacey Tezino
"ጥቁር መሆንሽን ታውቂያለሽ፣ አይደል?"
ጥያቄውን የጠየቀቻት ልጅ እየቀለደች መሰላት። ሌሲ ጥቁር መሆኗን እንዴት ላታውቅ ትችላለች? ነገሩ ለሁሉም ግልጽ ነበር።
"ከንፈሮችሽን፣ ጸጉርሽን ተመልከቺ። አንቺ ጥቁር ነሽ። ከወላጆችሽ አንዱ ጥቁር ነው፤ የትኛው ነው?" ስትል ልጅቷ ደጋግማ ጠየቀቻት።
ነገር ግን ለሌሲ ቴዚኖ ይህ ከሰማይ የወረደ መብረቅ ነበር።
ጥቁር መሆኗን አታውቅም ነበር፤ እናም ያደገችው በቴክሳስ ግዛት ቪዶር በተባለች ከተማ ነበር፣ ይህችም ከተማ በዘረኝነት ታሪኳ የታወቀች ነች።
ያለፈ ታሪኳን ሳይሆን ወደፊቷን ለመመልከት ተዘጋጅታ ወደ ዩኒቨርሲቲ ለገባች ወጣት፣ ያ ቅጽበት ሕይወቷን ሙሉ በሙሉ የለወጠ ነበር።

የፎቶው ባለመብት, Lacey Tezino
ሌሲ እናቷን ፈጽሞ አታውቅም። ቤተሰቦቿ እናቷ አደንዛዥ ዕፅ ትጠቀም እንደነበር እና ሌሲ ገና ሕፃን ሳለች ከኤች አይ ቪ ጋር በተያያዘ ሕመም እንደሞተች ነግረዋት ነበር። እንዲሁም እናቷ የሃዋይ ተወላጅ እንደሆነች በመንገር፣ ሌሲ ከአጎቶቿ እና ከአክስቶቿ ልጆች ለምን የተለየ መልክ እንዳላት ለማስረዳት ሞክረው ነበር።
"ምስሏን በሳልኩ ቁጥር በፀጉሯ ላይ አበባ አደርግላት ነበር፤ ምክንያቱም ሃዋይን ሳስብ ከአበባ ጋር ነው የማያያዘው።"
አባቷ ሮኒ፣ በካንሰር ከተያዘ በኋላ፣ ሌሲን በልጅነቷ ከሂውስተን ወደ ቪዶር በመውሰድ ከወላጆቹ ጋር እንድትኖር አደረጋት። አባቷ የሞተው ሌሲ ስድስት ዓመት ሲሆናት ነው።
ነገር ግን ሁለቱንም ወላጆቿን ብታጣም ሁልጊዜ በነጮች ቤተሰቦቿ ዘንድ ተቀባይነት እንዳላት ይሰማት ነበር፤ ከአጎቶቿ እና ከአክስቶቿ ልጆች ጋር መጫወትም ትወድ ነበር።
"ከአንድ ቤት ወደ ሌላ ቤት እየተዘዋወርኩ ነበር... ሁሉም ከእኔ ጋር መጫወት ይፈልጉ ነበር... ስጦታዎችን ይሰጡኝ ብዙ ፍቅርና እንክብካቤም ይደረግልኝ ነበር።"

የፎቶው ባለመብት, Lacey Tezino
ሆኖም ግን ሁልጊዜ የማይመች ስሜት ነበራት። ሌሲ የ17 ዓመት ልጅ ሳለች "ረጅም ቁመት ያለው፣ ራሱን የተላጨ ጥቁር ሰው" የቤታቸውን በር አንኳኩቶ እናቷ አሁንም በሕይወት እንዳለች ተናገረ።
የሌሲ አያቶች ግን ሰውየው እየዋሸ መሆኑን ነገሯት። ሌሲ ምንም እንኳን ይህ ነገር በጣም አስቆጥቷትና ፍጹም ግራ እንድትጋባ አድርጓት የነበረ ቢሆንም ክስተቱን ከአእምሮዋ ለማውጣረ ሞከረች።
ነገር ግን ወደ ሂውስተን ዩኒቨርሲቲ ስትገባ፣ በጠንካራው የገጠር ቅላጼዋ የምትናገር ሌሲ ስለ ማንነቷ የነበራት እምነት ሙሉ በሙሉ ተናወጠ። ሦስቱ አፍሪካ-አሜሪካዊ አብረዋት የሚኖሩ ተማሪዎች፣ አባቷ ነጭ እና እናቷ የሃዋይ ተወላጅ መሆኗን ለማመን አልቻሉም።
"ይህን ነገር ማመኔ አስቆጥቷቸዋል። አሳዝኗቸዋልም" ትላለች። "እነሱ እንደሚሉት፣ በሕይወታቸው ውስጥ የግል ተልዕኮአቸው ይህ ሁሉ ምን እንደሆነ እንድገነዘብ መርዳት ሆነ።"

የፎቶው ባለመብት, Lacey Tezino
በዓመት በዓላት ወቅት ሌሲ ወደ ቤቷ በተመለሰች ጊዜ "ነገሮች እየተቀየሩ እንዳሉ ተሰምቶኛል" ትላለች፤ በዙሪያዋም የነበረውን ዘረኝነት ማስተዋል ጀመረች።
ስለ እውነተኛ የትውልድ ማንነቷ ለምን እንዳልተነገራት የቤተሰቧን አባላት በጠየቀቻቸው ጊዜ፣ "አንቺ የቤተሰባችን አባል ነሽ... ምንም የተለየ ነገር አድርገን አላሰብነውም" ብለው መለሱላት።
አንዳንድ ጊዜም የአጎቶቿ እና የአክስቶቿ ልጆች እርሷን ዘረኛ ስድብ ከተሳደቡ እንደሚጣሉ አወቀች።
ሌሲ አሁን አያቶቿ እውነቱን የደበቋት እሷን ለመጠበቅ በማሰብ ነው ስትል ታምናለች።
አንድ ቀን ከሴት አያቷ ጋር ሲወያዩ፣ ጥቁር ወንድ ጓደኛ ይዛ ወደ ቤት ብትመጣ እንደሚቀበሏት ተነገራት። "በእርግጥ በጣም ደግ ለመሆን እየሞከረች ነበር፤ ክፍት አመለካከትም እንዳላት ለማሳየት ትጥር ነበር" ትላለች።
ነገር ግን አያቷ ጋዜጣ ሲያነብ ዘረኛ ስድብ ሲጠቀም፣ እንደምትናደድ ትናገራለች፤ "ፊት ለፊቴ ይህን ዓይነት ንግግር አትናገር" ማለቷንም ታስታውሳለች።
እያለቀሰች ከክፍሉ ከወጣች በኋላ፣ እርሱ ተከትሏት በመሄድ ይቅርታ ጠየቃት።
"ይህ ያሳደገኝና ሕይወቴን በሙሉ የተንከባከበኝ አያቴ ነው። እርሱም 'በጣም ይቅርታ፣ ዳግም አይደገምም' አለኝ። እናም በእርግጥ ከዚያ በኋላ አልደገመውም።"

የፎቶው ባለመብት, Lacey Tezino
እናቷ መሞቷ ቢነገራትም ስለ እሷ የበለጠ የማወቅ ፍላጎት ነበራት።
ሁለተኛ ዓመት የኮሌጅ ተማሪ ሳለች በእናቶች ቀን ዕለት፣ ወደ የስልክ ማውጫ አገልግሎት ደውላ በእናቷ ስም የተመዘገበ ሰው ስለመኖሩ ጠየቀች።
ሳትጠብቀው ወዲያውኑ ከአንዲት ሴት ጋር ተገናኘች። ምናልባት ልጇ ልትሆን እንደምትችል ስትነግራት፣ ሴቲቱም የሰጠቻት ምላሽ የምትፈልገውን ማረጋገጫ አስገኘላት።
"ሌሲ?"
እናቷ እርሷ ከምትኖርበት የአንድ ሰዓት መንገድ ርቀት ላይ ትኖር ነበር።
በዚያው ቀን ለመገናኘት መኪና እየነዳች ስትሄድ፣ ከጥቂት ዓመታት በፊት ወደ ቤታቸው መጥቶ የነበረው ያው ሰው ከእናቷ ጋር እንደነበረ አየች፤ እርሱም የእናቷ ፍቅረኛ ነበር።
ነገር ግን ዓይኖቿ ያተኮሩት በእናቷ ኤልዛቤት ላይ ብቻ ነበር።
"በሕይወቴ አይቼው የማላውቃት እጅግ ቆንጆ ሰው ነበረች... ሰላምታ አልተለዋወጥንም፣ ምንም አልተናገርንም፤ በቃ እርስ በርሳችን ተቃቅፈን እያለቀስን ነበር።"
ከዚያ በኋላ በተከታታይ ባደረጉት ውይይት፣ ሌሲ ሮኒ ወላጅ አባቷ ሳይሆን ያሳደጋት መሆኑን ተረዳች።
ሮኒ እናቷ በሂዩስተን በሚገኝ መጠጥ ቤት ውስጥ በምትጠጣበት ወቅት ጓደኛዋ ነበር። እናቷም ከአንድ አፍሪካ-አሜሪካዊ የጭነት መኪና ሹፌር ፀንሳ ፅንሱን ለማስወረድ እንዳሰበች ለሮኒ ነገረችው። ሮኒ ግን ሁሌም ልጅ እንዲኖረው እንደሚፈልግ ነገራት።
ስለዚህ ሁለቱ ተስማሙ። ሮኒ እናቷ ከአደንዛዥ ዕፅ ሱስ እንድትላቀቅና ንጹሕ ሕይወት እንድትኖር ይረዳታል፣ ይንከባከባታል። ከዚያም የምትወልደውን ሕፃን በሕግ ይወስዳል።
ሌሲ ግን እስከዚያ ጊዜ ድረስ በጉዲፈቻ መወሰዷን አታውቅም ነበር።

የፎቶው ባለመብት, Lacey Tezino
በቀጣዮቹ ዓመታት ውስጥ ሌሲ ከእናቷ ጋር ያላትን ግንኙነት ቀስ በቀስ እንደገና ገነባች። ኤልዛቤት ታማ ከዘጠኝ ዓመታት በኋላ በካንሰር ስትሞትም ሌሲ "እስከ መጨረሻው ድረስ ከእሷ ጋር አብሬ ተጓዝኩ" ትላለች።
በዚያ ወቅት ቤተሰቧን ይቅር ብላ ነበር።
"ወላጆቻችሁን በታላቅ ርኅራኄና ይቅርታ ማየት አለባችሁ፤ ምክንያቱም እነሱም ልክ እንደ እኛ መንገዳቸውን ለመፈለግ የሚጥሩ ወጣት ሰዎች ነበሩ" ትላለች።
በአሁኑ ጊዜ ትኩረቷ በሙያዋም ሆነ በግል ሕይወቷ፣ ሰዎች በእናትና ልጅ ግንኙነታቸው ውስጥ የሚያጋጥሟቸውን ችግሮች እንዲፈቱ መርዳት እና በሰዎች መካከል ያሉትን አጥሮችና ልዩነቶች ማፍረስ ላይ ነው።

የፎቶው ባለመብት, Lacey Tezino
ሌሲን ነጮች ብቻ በሚኖሩበት አካባቢ ያሳደጓት አያቷ፣ በኋላ ላይ አውሎ ነፋስ ቤታቸውን ካፈራረሰ በኋላ በሂውስተን ከሚኖረው የሌሲ ጥቁር ቤተሰብ ጋር ለመኖር መጡ።
ሌሲ እንደምትናገረው፣ በመጀመሪያ ጊዜ ክርክሮች ነበሩ፤ ምክንያቱም በዚያን ወቅት በአሜሪካ በዘር ጉዳይ "ብዙ ነገሮች እየተከሰቱ ነበር"።
ሌሲ ለአያቷ ስትል አንዳንድ አመለካከቶቿን በትዕግስት ለመቀበል ብትሞክርም፣ በተመሳሳይ ጊዜ ለልጆቿ "ኩሩ ነን፤ ራሳችንንም እንከላከላለን" የሚለውን ማሳየት እንደምትፈልግ ትናገራለች።
ነገር ግን ከአንዳንድ "ጠቃሚና ውብ ውይይቶች" በኋላ፣ አያቷ 86 ዓመት ሲሞላት የቤተሰቡ ማዕከላዊ አባል ሆና ነበር።
"ሴት ልጄ ስድስት ዓመቷ ነው፤ የቅርብ ጓደኛዋም አያቴ ናት።"
"ሁለቱም በሶፋ ላይ ተቀምጠው አይስ ክሬም ይበላሉ፤ ከቤት ጀርባ ያሉትን ተክሎችም ይንከባከባሉ።"
"ይህ በእውነት ቆንጆ ነው።"


































