ኢትዮጵያን በአፍሪካ 5ኛዋ ግዙፍ የኢኮኖሚ ባለቤት ያደረጋት የጂዲፒ ስሌት ለውጥ ለምን አስፈለገ?

ነጋዴዎች እና ገዥዎች የተለያዩ ባህላዊ ምርቶችን ሲገበያዩ
ታትሟል
የንባብ ጊዜ: 5 ደቂቃ

ኢትዮጵያ የአጠቃላይ አገራዊ ምርት (ጂዲፒ) መለኪያዋን አዘምና አዲስ ስሌት ይፋ አድርጋለች።

በአዲሱ ስሌት ኢትዮጵያ ከአፍሪካ ትልልቅ ኢኮኖሚዎች መካከል ከነበራት 9ኛ ደረጃ ወደ 5ኛ ከፍ ብላለች። ከሰሃራ በታች ካሉ የአፍሪካ አገራት መካከል ደግሞ 3ኛ ደረጃን ይዛለች።

የአንድ አገር ምጣኔ ሃብት ምን ያህል ትልቅ እንደሆነ የሚያሳየው አጠቃላይ አገራዊ ምርት (GDP) ከአነስተኛ የዕለት ተዕለት ግብይቶች ጀምሮ በመደብሮች የሚፈጸሙ ግዢዎችን፣ በድርጅቶች የሚከናወኑ ምርት እና አገልግሎቶችን፣ በመንግሥት የሚደረጉ የበጀት ወጪዎችን፣ እንዲሁም የውጭ ንግድን በማገናዘብ የሚሰላ ነው።

ኢትዮጵያ ከዚህ ቀደም የኢኮኖሚዋን መጠን ለማለካት 2008 ዓ. ም.ን እንደ መነሻ ዓመት ስትጠቀም ቆይታለች። አሁን ግን የ2017 ዓ.ም.ን አዲስ መነሻ ዓመት አድርጋ መጠቀም መጀመሯን አስታውቃለች።

ይህ አዲስ ስሌት በአገሪቱ ምጣኔ ሃብት ውስጥ የተፈጠሩ አዳዲስ ለውጦችን እና የዘርፎችን መስፋፋት በተሻለ ሁኔታ እንደሚያንጸባርቅ ተገልጿል።

የአጠቃላይ አገራዊ ምርት ስሌትን ማዘመን (GDP Rebasing) አገራት ምጣኔ ሃብታቸውን ለመለካት እንደ መነሻ የሚወስዱት ዓመት ሲሆን፣ ከጊዜ ወደ ጊዜ የኢኮኖሚው መዋቅር ሲቀየር ይህንኑ መነሻ ዓመት ማዘመን ያስፈልጋል።

አዲሱ ጠቅላላ የአገር ውስጥ ግመታ የኢትዮጵያ ኢኮኖሚ በ59.2 በመቶ ጨምሮ፣ 24.03 ትሪሊዮን ብር (201.42 ቢሊዮን ዶላር) መድረሱን ያሳያል። በዚሁ ስሌት የአገሪቱ የ2018 በጀት ዓመት ጠቅላላ አገራዊ ምርት 31.86 ትርሊዮን ብር ደርሷል።

ይሁንና ይህ ጭማሪ የአገሪቱ ኢኮኖሚ በአንድ ጊዜ በዚያኑ መጠን አድጓል ማለት እንዳልሆነ ባለሙያዎች ይናገራሉ።

መለኪያውን አሁን መቀየር ለምን አስፈለገ?

Skip podcast promotion and continue reading
BBC News Amharic የቢቢሲ አማርኛ ዩቲዩብ ቻናላችንን ይቀላቀሉ!
የቢቢሲ አማርኛ ዩቲዩብ ቻናል

ዜና፣ ትንታኔ እና ታሪኮችን በምሥል እና በድምጽ ለማግኘት

ይህንን በመጫን ሰብስክራይብ ያድርጉ

End of podcast promotion

የፕራግማ ካፒታል ኢንቨስትመንት እና ፋይናንስ አማካሪ መርዕድ ፍቅረዮሐንስ እንደሚያብራሩት፣ በዓለም አቀፍ አሠራር የአገር ውስጥ ጠቅላላ ምርት ስሌት በየአምስት ዓመቱ እንደገና ይገመገማል።

በዚህም ወቅት በኢኮኖሚው ውስጥ የተፈጠሩ አዳዲስ ዘርፎች፣ የተለወጡ የምርትና የአገልግሎት አሠራሮች፣ የዋጋ ለውጦችና መደበኛ ካልሆነው ዘርፍ ወደ መደበኛው የገቡ እንቅስቃሴዎች ይጠናሉ።

ኢትዮጵያ ግን ይህንን ማስተካከያ ካደረገች አሥር ዓመት ገደማ አልፏታል። በዚህ የጊዜ ርዝማኔ ውስጥ የአገሪቱ የምጣኔ ሃብት መዋቅር በከፍተኛ ሁኔታ ተቀይሯል ይላሉ።

የትግራይ ጦርነት በዋጋ ግሽበቱ ላይ ተጽዕኖ እንደነበረው የሚያነሱት አቶ መርዕድ፤ ከአሥር ዓመት በፊት በኢትዮጵያ ኢኮኖሚ ውስጥ ያልነበሩ ወይም በተለየ መጠን ያልተስፋፉ አዳዲስ የኢኮኖሚ እንቅስቃሴዎችም መምጣታቸውን አስታውሰዋል።

እንዲሁም ከአምስት ዓመት በፊት በሞባይል እና በዲጂታል መድረኮች የሚከናወኑ የገንዘብ ግብይቶች መጠን መጨመሩ እና የሜትር ታክሲ አገልግሎቶች መስፋፋት የኢኮኖሚ ሁኔታውን ቀይረውት እንደነበር ተናግረዋል።

የአጠቃላይ አገራዊ ምርት ማስተካከያው የተደረገው የዋጋ ለውጥን ብቻ ለማስተካከል ሳይሆን ከዚህ በፊት በስሌቱ ውስጥ በትክክል ያልተካተቱ የምጣኔ ሃብት እንቅስቃሴዎችን እና አዳዲስ ዘርፎችን ለማካተትም ጭምር ነው ይላሉ።

የምጣኔ ሃብት እና የፖሊሲ ባለሙያው ቆስጠንጢኖስ በርሄተስፋ (ዶ/ር) በበኩላቸው የማክሮ ኢኮኖሚ ፖሊሲ ለውጡ፣ የፋይናንስ ዘርፉ ማሻሻያዎች፣ የውጭ ባንኮች ወደ አገሪቱ እንዲገቡ መፈቀዱ እና የካፒታል ገበያ መቋቋሙ ከዚህ ለውጥ ጋር የሚያያዙ ጉዳዮች ናቸው ይላሉ።

የአጠቃላይ አገራዊ ምርት መነሻ ዓመት ማስተካከያው በእነዚህ የኢኮኖሚ ለውጦች ውስጥ ያሉ እንቅስቃሴዎችን በተሻለ ሁኔታ ለማካተት ያለመ መሆኑንም ይገልጻሉ።

የኢትዮጵያን አጠቃላይ አገራዊ ምርት በ2017 ዓ. ም. መለካት የሚያስችለውን አዲስ ስሌት የኢትዮጵያ ብሔራዊ ስትራቴጂ ሚኒስቴር ከኢትዮጵያ ስታትስቲክስ አገልግሎት ጋር በመቀናጀት ይፋ ማድረጉ ተገልጿል።

ሚኒስቴሩ እንዳስታወቀው፣ 2017 ዓ. ም. የተመረጠበት ምክንያት አንፃራዊ የማክሮ ኢኮኖሚ መረጋጋት የታየበት እና የዋጋ ግሽበት ምጣኔ እየቀነሰ የነበረበት ዓመት በመሆኑ ነው።

እንዲሁም የግብርና ቆጠራና የኢኮኖሚ ተቋማት ቆጠራ የተደረገበት ዓመት መሆኑ እና የቤተሰብ ፍጆታ ጥናት የተሠራበት በመሆኑ ነው ብሏል።

2017 ዓ. ም. ኢትዮጵያ የማክሮ ኢኮኖሚ ማሻሻያዋን የጀመረችበት ወቅት ከመሆኑ ጋር እንደሚያያዝ አቶ መርዕድ ይናገራሉ።

በመደበኛው እና ከመደበኛ ውጭ ባለው የውጭ ምንዛሪ ገበያ መካከል የነበረው ልዩነት ስሌቱን በወቅቱ ማስተካከል እንዳይቻል ካደረጉት ምክንያቶች መካከል መሆኑን ገልጸዋል።

ጥቅምት 25 ቀን 2019 ዓ.ም የብሔራዊ ስትራቴጂ ሚኒስቴር አዲስ ይፋ ባደረገው የአጠቃላይ ሀገራዊ ምርት (GDP) ማሻሻያ (Rebasing) ይፋ ሲያደርግ
የምስሉ መግለጫ, ጥቅምት 25 ቀን 2019 ዓ. ም. የብሔራዊ ስትራቴጂ ሚኒስቴር አዲስ የአጠቃላይ አገራዊ ምርት ማሻሻያ (GDP Rebasing) ይፋ አድርጓል

አጠቃላይ አገራዊ ምርት መለኪያው መቀየሩ ምን ተፅዕኖ ይኖረዋል?

የኢትዮጵያን አጠቃላይ አገራዊ ምርት መነሻ ዓመት መቀየሩ የኢትዮጵያን የኢኮኖሚ መጠን ከፍ አድርጎ ከማሳየቱ ባሻገር፣ በአገሪቱ የብድር አቅም፣ በውጭ ኢንቨስትመንት እና በግብር አሰባሰብ ላይ ተፅዕኖ ሊኖረው እንደሚችል የምጣኔ ሃብት እና የፖሊሲ ባለሙያው ዶ/ር ቆስጠንጢኖስ ያብራራሉ።

አንደኛው የሚጠቀሱት ጉዳይ የአገሪቱ የውጭ ዕዳ ከአጠቃላይ አገራዊ ምርት ጋር ሲነፃፀር የሚኖረው መጠን መቀነስ ነው።

ዕዳ ከአጠቃላይ አገራዊ ምርት ጋር ያለው ጥምርታ (Debt-to-GDP Ratio) የአገርን ዕዳ ከአጠቃላይ የኢኮኖሚ መጠን ጋር በማነፃፀር የሚያሳይ መለኪያ ነው።

ባለሙያው እንደሚያብራሩት፣ የአገሪቱ ዕዳ ሳይቀየር፣ የአጠቃላይ አገራዊ ምርት መጠን ከፍ ብሎ ከታየ የዕዳው መጠን ከአጠቃላይ አገራዊ ምርት አንፃር ይቀንሳል። ይህም አገሪቱ ተጨማሪ ብድር ለማግኘት የተሻለ የመደራደር አቅም እንዲኖራት ሊያግዝ ይችላል።

በተመሳሳይ የውጭ ኢንቨስተሮች የአገሪቱን ኢኮኖሚ በተሻለ ዕይታ እንዲመለከቱ ሊያበረታታ ይችላል ይላሉ።

የብድር ደረጃ የሚያወጡ ኤጀንሲዎችም የአንድን አገር የብድር መክፈል አቅም ሲገመግሙ የሚጠቀሙባቸው መረጃዎች ላይ ተፅዕኖ ሊኖረው እንደሚችል ያብራራሉ።

አዲሱ የአጠቃላይ አገራዊ ምርት መለከያ፣ መንግሥት አሁን ካለው ኢኮኖሚ ጋር በማነጻጸር ምን ያህል ታክስ እየሰበሰበ እንደሆነ ያሳያል የሚሉት አቶ መርዕድ፤ በግብር ሥርዓቱ ውስጥ ያልተካተቱ የኢኮኖሚ እንቅስቃሴዎችን ወደ ግብር ከፋይነት ለማምጣት እንደሚረዳ ያብራራሉ።

የአገሪቱ ኢኮኖሚ መጠን በአዲሱ ስሌት ሲጨምር፣ መንግሥት የሚሰበስበው የታክስ ገቢ ግን በተመሳሳይ መጠን አይጨመረም።

ለምሳሌ፣ የአንድ አገር ኢኮኖሚ ከ100 ብር ወደ 200 ብር ቢያድግ፣ መንግሥት የሚሰበስበው ታክስ ግን ከ10 ብር ወደ 12 ብር ብቻ ቢጨምር፣ ከኢኮኖሚው አጠቃላይ መጠን አንጻር የታክስ ገቢው ድርሻ ይቀንሳል።

ይህም የአገሪቱ ኢኮኖሚ ከቀድሞው ግምት የበለጠ ሰፊ መሆኑን ሲያሳይ፣ ከዚያ ኢኮኖሚ የሚሰበሰበው ታክስ ግን ከአጠቃላይ መጠኑ አንጻር ዝቅተኛ መሆኑን ያመለክታል።

መቶ ብሮችን የሚቆጥር ሰው
የምስሉ መግለጫ, አሁን የተቀየረው የ2008 ዓ. ም. መነሻ መለኪያ ከዚህ ቀደም የነበረውን የ2003 ዓ. ም. መነሻ ዓመት በመተካት ላለፉት 9 ዓመታት የኢኮኖሚውን ዕድገት ለመለካት በሥራ ላይ ውሏል

ይህንን ሁኔታ ለመቀየር መንግሥት የግብር ምኅዳሩን ማስፋት፣ የግብር አሰባሰብ ሥርዓቱን ማዘመን እና ከዚህ በፊት በግብር ሥርዓቱ ውስጥ ያልተካተቱ የኢኮኖሚ እንቅስቃሴዎችን ወደ ግብር ከፋይነት ማምጣት እንደሚጠበቅበት አቶ መርዕድ ያብራራሉ።

ሆኖም ይህ አዲስ ስሌት ይፋ መደረጉን ተከትሎ ከተደረገ አስቀድመው ታክስ እየከፈሉ ባሉ ዜጎች ላይ ተጨማሪ ጫና መፈጠር እንደሌለበት አቶ መርዕድ ይናገራሉ።

"በድርጅቶች ደረጃ የሚሰበሰበው ታክስ አብዛኞቹ በትክክል አይከፈልም፣ ደመወዝተኛውን ብንመለከት ግን መንግሥት ደመወዝተኞች ላይ ከፍተኛ ግብር ከሚጥልባቸው መካከል ነው" ይላሉ።

መንግሥት ከዚህ በኋላ ሊያተኩርባቸው ከሚገቡ ጉዳዮች አንዱ ከመደበኛ ውጭ የሚከናወኑ የኢኮኖሚ እንቅስቃሴዎችን ወደ ሕጋዊ እና መደበኛ ሥርዓት ማስገባት እንደሆነ ይገልጻሉ።

የንግድ ፈቃድ ያላቸው፣ ግብይታቸውን በትክክል የሚመዘግቡና ታክስ የሚከፍሉ ድርጅቶች ቁጥር እንዲጨምር ማድረግ ያስፈልጋል የሚሉት አቶ መርዕድ፤ ከዚህ በተጨማሪ በመደበኛ ዘርፍ ያሉ ድርጅቶች በትክክል ታክስ እንዲከፍሉና የገቢ መጠናቸውን አሳንሰው እንዳያስመዘግቡ ቁጥጥር ማድረግም የመንግሥት ተግባር መሆኑን ያነሳሉ።

ዶ/ር ቆስጠንጢኖስ በበኩላቸው "አጠቃላይ አገራዊ ምርት የአገሪቱን የኢኮኖሚ ደረጃ ሊያሳይ ይችላል፤ የሕዝቡን የኢኮኖሚ ድህነት ግን ሊያሳይ አይችልም" ይላሉ።

አንድ አገር የምታስመዘግበው አጠቃላይ አገራዊ ምርት እድገት በጥቂት የኢኮኖሚ ዘርፎች፣ በጥቂት ኩባንያዎች ወይም በጥቂት ግለሰቦች እንቅስቃሴ ምክንያት ሊመጣ እንደሚችል ይገልጻሉ።

ይህ እድገት በሕዝቡ ላይ ቀጥተኛ ተፅዕኖ እንዲኖረው የኢኮኖሚው እድገት አካታች መሆን፣ የገቢ ምንጮች መስፋፋት እና የሕዝቡ የኑሮ ደረጃ መሻሻል አስፈላጊ መሆናቸውን ባለሙያው ያስገነዝባሉ።

ኢትዮጵያ ከፈረንጆቹ 1960 ጀምሮ የጠቅላላ አገራዊ ምርት መረጃዋን በይፋ ስታሳውቅ ቆይታለች።

አሁን የተቀየረው የ2008 ዓ. ም. መነሻ መለኪያ ከዚህ ቀደም የነበረውን የ2003 ዓ. ም. መነሻ ዓመት በመተካት ላለፉት 9 ዓመታት የኢኮኖሚውን ዕድገት ለመለካት በሥራ ላይ ውሏል።

ጥቅምት 25 ቀን 2019 ዓ. ም. የብሔራዊ ስትራቴጂ ሚኒስቴር አዲስ ይፋ ባደረገው የአጠቃላይ አገራዊ ምርት ማሻሻያ መሠረት፣ ኢትዮጵያ ከደቡብ አፍሪካ፣ ግብፅ፣ ናይጄሪያ እና አልጀሪያ ቀጥላ በአምስተኛነት የአፍሪካን ግዙፍ ኢኮኖሚ የምትመራ አገር አድርጓታል።