ይህ ዝቅተኛ ዳታን በመጠቀም ጽሑፍ ብቻ የሚቀርብበት የቢቢሲ አማርኛ ድረ ገጽ ነው
አውሮፓ የዩክሬንን ጦርነት ለማስቆም ከሩሲያ ጋር ለመደራደር ዝግጁ መሆኗን አስታወቀች
የአውሮፓ መሪዎች የዩክሬንን ጦርነት ለማስቆም ከሩሲያ ጋር ለመደራደር ዝግጁ እንደሆኑ እና ለኪየቭ ጠንካራ ድጋፍ እንደሚያደርጉ አስታወቁ።
የዩናይትድ ኪንግደም ጠቅላይ ሚኒስትር ኤንዲ በርንሃም "አውሮፓ ግልጽ እና ቀጣይነት ያለው እንዲሁም ትብብር የሚታይበት ድርድር ለማድረግ ቁርጠኛ ናት" ያሉ ሲሆን የጀርመኑ መራሔ መንግሥት ፍሬድሪክ መርዝ በበኩላቸው "የሞስኮ ፍላጎቶች ተጨባጭ አይደሉም" ብለዋል።
መሪዎቹ ይህን ያስታወቁት የዩክሬን አጋሮች በበርሊን ባካሄዱት እና 'የበጎ ፈቃደኞች ትብብር' በሚል በሚታወቀው ጉባዔ ወቅት ነው።
በጉባኤው ላይ ከተገኙት የአሜሪካ መልዕክተኞች አንዱ የሆኑት እና የፕሬደዚንት ዶናልድ ትራምፕ አማች ጃረድ ኩሽነርም "ትራምፕ ከአውሮፓ ጎን ሆነው ከሩሲያ ጋር ስምምነት ላይ መድረስ ይፈልጋሉ" ብለዋል።
የሩሲያው ፕሬዚደንት ቭላድሚር ፑቲን ግን በአሜሪካ በሚመራው የሰላም ድርድር እስካሁን የአውሮፓውያኑን ሚና አልተቀበሉትም።
ትራምፕ ቀደም ብሎ ከፑቲን እና ከቻይናው ፕሬዚደንት ዢ ጂንፒንግ ጋር በደቡብ ምሥራቅ ቻይና ሸንዘን ከተማ ታሪካዊ የሦስትዮሽ ንግግር አድርገዋል።
ፑቲን ከሁለቱ አቻዎቻቸው ጋር ንግግር ካደረጉ በኋላ በሰጡት ረዥም ጋዜጣዊ መግለጫ ለቀረቡላቸው ጥያቄዎች ሲመልሱ አውሮፓውያኑ በድርድሩ እንዲሳተፉ ከአሜሪካ በተደጋጋሚ ጥያቄ እንደቀረበላት ተናግረዋል።
ፑቲን፣ ሞስኮ ሃሳቡን እንደማትቃወም፤ ነገር ግን "አውሮፓ ለዚህ የሰላም ንግግር ምን ልታመጣ ትችላለች?" የሚለው ግልጽ ሊደረግላት ይገባል ብለዋል።
ከዚያ በኋላ "በምን ዓይነት መልኩ ከዩክሬን ጋር ውይይት እንደምናደርግ እንወስናለን" ሲሉ ተናግረዋል።
"የአውሮፓ መሪዎች በየዕለቱ በ2030 ስለሚከሰት ጦርነት እንደሚያወሩ ሩሲያ ሰምታለች" ያሉት ፑቲን፤ ነገር ግን ማንንም የማጥቃት እቅድ እንደሌላቸው ገልጸዋል። " ያለ አውሮፓውያኑ ተሳትፎ በአውሮፓ ስላለ የፀጥታ ጉዳይ በተመለከተ መነጋጋርም ትርጉም እንደሌለው ሩሲያ ትገነዘባለች" ብለዋል።
የአሜሪካው መልዕክተኛ ጃረድ ኩሽነር ለጋዜጠኞች ሲናገሩም የአሜሪካው ፕሬዚደንት ወደ ሸንዘን ያቀኑት "ሰላም ማምጣ እንደሚቻል" ስላመኑ ነው።
ኩሽነር ጨምረውም ሩሲያ ፤ "አውሮፓውያኑ ከእኛ ጋር በድርድሩ ላይ እንዲሳተፉ ፈቃደኛ መሆኗን እንዲሁም ዩክሬን በኔቶ አንቀጽ አምስት ላይ በተቀመጠው እና አገሪቷ ጥቃት ከደረሰባት አጋሮቿ እንዲከላከሉላት በሚፈቅደው ሕግ መሠረት የደኅንነት ዋስትና ማግኘቷ ሞስኮ አሁን ላይ እንደማይጎረብጣት" አመልክተዋል።
በጀርመን መዲና በርሊን ጉባዔ ላይ የተገኙት የዩክሬኑ ፕሬዚደንት ቮሎድሚር ዜሌንስኪ በበኩላቸው ከኔቶ የጋራ የመከላከያ አንቀጽ ጋር የሚስተካከል ዋስትና ለማግኘት ለረዥም ጊዜ ሲፈልጉ መቆየታቸውን አስታውሰው፤ ነገር ግን ፑቲን ይህንን ዓይነቱን ቅድመ ሁኔታ እንደሚቀበሉ የሚያሳይ ፍንጭ የለም ብለዋል።
ሩሲያ ዩክሬን የኔቶ አባል መሆኗን ሙሉ በሙሉ ውድቅ ያደረገች ቢሆንም ፤ የአሜሪካ ተደራዳሪዎች በግዛት ውዝግብ ላይ ከስምምነት ከተደረሰ፤ ኪየቭ የምዕራባውያኑ የመከላከያ ጥምረት አባል ሳትሆን እንደ አንቀጽ አምስት ዓይነት ያሉ ዋስትናዎችን የመስጠት ሀሳብን እንዳላቸው ዘገባዎች አመልክተዋል።
ሩሲያ የዩክሬንን ጦርነት በተመለከተ ባለፈው ዓመት በርካታ ውይይቶችን አካሂዳለች። ሆኖም ሞስኮ በዩክሬን ላይ የምታካሂደውን ጦርነት ለመቀነስ እያሰበች እንደሆነ የሚጠቁም ነገር የለም።
የአውሮፓውያኑ የክረምት ወቅት እየመጣ ሲሄድ የኪየቭን የኃይል መሠረተ ልማቶች ለማዳከም ጥቃት መፈፀሟን ቀጥላለች።
በጥቃቶቹ በመላ አገሪቱ የሚሞቱ ሲቪሎች ቁጥር እየጨመረ እንደሆነ ተገልጿል።
ሐሙስ ዕለት ልዑካን ቡድኑ በቻይና እና በጀርመን ስብሰባ ላይ በነበሩበት ወቅት፣ በኪየቭ ታሪካዊ ማዕከል ውስጥ የሚገኙ በርካታ ሕንፃዎች የድሮን ጥቃት ተፈፅሞባቸዋል። በፖዲልስኪ ሰፈር ውስጥ በሚገኝ የመኖሪያ ሕንፃ ላይ በተፈጸመ ጥቃት አንድ ሰው ተገድሏል።
የኔዘርላንድስ እና የኦስትሪያ ኤምባሲዎች እንዲሁም የሴንት ቮሎዲሚር ካቴድራል ጉዳት እንደደረሰባቸው ሪፖርት አድርገዋል።