ይህ ዝቅተኛ ዳታን በመጠቀም ጽሑፍ ብቻ የሚቀርብበት የቢቢሲ አማርኛ ድረ ገጽ ነው
በኢትዮጵያ እና ኤርትራ ድንበር ወታደሮች መሰማራታቸው መዘገቡን ተከትሎ አሜሪካ ለዜጎቿ የጉዞ ማስጠንቀቂያ ሰጠች
ኢትዮጵያ እና ኤርትራ በድንበር አቅራቢያ ከፍተኛ ቁጥር ያላቸው ወታደሮችን ማሰማራታቸው መዘገቡን ተከትሎ የጦርነት ስጋት መባባሱን የሚጠቁሙ መረጃዎች እየወጡ ይገኛሉ።
ውጥረቱ በመካረሩም በኢትዮጵያ የሚገኘው የአሜሪካ ኤምባሲ ለዜጎቹ የደኅንነት እና የጉዞ ማስጠንቀቂያ ሰጥቷል።
ሮይተርስ፤ አክሌድን፣ ለኢትዮጵያ መንግሥት ቅርብ የሆነ የትግራይ ሚሊሻን እንዲሁም በአካባቢው ላለው አማጺ ቡድን ቅርብ የሆነ ምንጭን ጠቅሶ እንደዘገበው፤ በድንበር አካባቢው የሁለቱን አገራት ጦሮች "በቅርብ በቅርብ ርቀት ተፋጠው ይገኛሉ።"
የፈረንሳዩ የዜና ወኪል (ኤኤፍፒ) "የከባድ መሣሪያ ጥቃት እና ድንበር ተሻጋሪ ወረራ" በኢትዮጵያ እና በኤርትራ መካከል ያለውን ውጥረት እንዳካረረው ተንታኞችን ጠቅሶ ዘግቧል።
ይህንን ተከትሎም ትናንት ኅዳር 10/ 2019 ዓ. ም. በኢትዮጵያ የሚገኘው የአሜሪካ ኤምባሲ ለዜጎቹ ማስጠንቀቂያ ሰጥቷል።
ኤምባሲው ባወጣው መግለጫ፤ በኤርትራ ድንበር አቅራቢያ በትግራይ ክልል ገጠራማ አካባቢዎች ግጭቶች መቀጠላቸውን ጠቅሷል።
በዚህም ምክንያት ወደ አማራ ክልል፣ ትግራይ ክልል እና አፋር ክልል (በተለይም የክልሉ ደቡባዊ ክፍል) ዜጎቹ እንዳይጓዙ የአሜሪካ መንግሥት ማስጠንቀቂያ ሰጥቷል።
በእነዚህ አካባቢዎች የሚገኙ አሜሪካውያን "ደኅንነቱ የተጠበቀ እስከሆነ ድረስ አካባቢውን ለቅቀው እንዲወጡ" አሳስቧል።
ዜጎቹ ወደ እነዚህ አካቢዎች ለመጓዝ አቅደው ከሆነ ውሳኔያቸውን "መልሰው እንዲያጤኑ" አስጠንቅቋል።
ኤኤፍፒ ኅዳር 9/ 2019 ዓ. ም. ባወጣው ዘገባ ኢትዮጵያ እና ኤርትራ "የለየለት ጦርነት ጫፍ ላይ" መሆናቸውን ጠቁሟል።
በዓለም አቀፍ ደረጃ የተከሰቱ የፖለቲካ ግጭቶችን፣ ጥቃቶችን፣ አመጾችን እና ተያያዥ የፀጥታ ክስተቶችን የሚመዘግበውን እና የሚተነትነውን አክሌድን እንዲሁም ለአማጺያኑ ቅርብ የሆኑ ምንጭን ጠቅሶ ሮይተርስ ኅዳር 9/ 2019 ዓ. ም. ባወጣው ዘገባ ሁለቱ ወገኖች "ባለፉት ቀናት ቀጥተኛ ወታደራዊ ልውውጥ" አድርገዋል።
ለኢትዮጵያ መንግሥት ቅርብ የሆኑት ሚሊሻ ግን ይሄንን አስተባብለዋል።
የኤርትራ የማስታወቂያ ሚኒስትር አቶ የማነ ገብረመስቀል በድንበር አካባቢ ያለውን ሁኔታ በተመለከተ የኢትዮጵያ ገዢ ፓርቲ "ፕሮፓጋንዳ" ሲሉ ማጣጣላቸውን ዘገባው ያትታል።
ሆኖም ሚኒስትሩ በድንበር አቅራቢያ ስላለው የወታደሮች ስምሪት እና ግጭቶችን በተመለከተ በቀጥታ ምላሽ አልሰጡም።
ኢትዮጵያ ባሕር በር የማግኘት ፍላጎቷን መግለጽ ከጀመረችበት ጊዜ አንስቶ የሁለቱ አገራት ግንኙነት እየሻከረ መጥቷል። ኢትዮጵያ አማጺያንን በመደገፍ ኤርትራን የምትከስ ሲሆን፤ ሁለቱ አገራት ሙሉ በሙሉ ዲፕሎማሲያዊ ግንኙነታቸውን አቋርጠዋል።
መስከረም ወር ላይ በተቀሰቀሰው ጦርነት የኤርትራ ወታደሮች በኢትዮጵያ ትግራይ ክልል የሚገኙ አማጺያንን ደግፈው ወደ ኢትዮጵያ ግዛት ዘልቀው ገብተው የነበረ ሰሆን፤ በኢትዮጵያ ጦር ተገፍተው መውጣታቸው ተዘግቧል።
ሆኖም ባለፈው ሳምንት የባድመ አካባቢዎችን ዳግም መቆጣጠራቸውን አክሌድ አመልክቷል።
በአካባቢው ከፍተኛ ወታደራዊ እንቅስቃሴ እና የከባድ መሣሪያ ተኩስ ልውውጥ መኖሩን የጠቀሰው ተቋሙ፤ "በባድመ ግንባር ሰፊ ወታደራዊ ግጭት የመከሰቱ ዕድል ከፍተኛ ነው" ብሏል።
ሁለቱም አገራት ይገባኛል የሚሏት ባድመ ታሪካዊ ጠቀሜታ ያላት ከተማ ናት። ከተማዋ በአሥር ሺህዎች የሚቆጠሩ ሰዎች ሕይወት በጠፋበት እና እአአ ከ1998 እስከ 2000 ድረስ የተካሄደው ጦርነት ማዕከልም ነበረች።
ኤኤፍፒ ስማቸው እንዳይጠቀስ የጠየቁ በኢትዮጵያ የሚገኙ የውጭ ደኅንነት ምንጮችን ጠቅሶ እንደዘገበው፤ ባለፈው ሳምንት በባድመ አካባቢ ከባድ ግጭት የነበረ ሲሆን የኢትዮጵያ ወታደሮች ወደ ኤርትራ ግዛት ገብተው ነበር።
ይህንን በተመለከተ መንግሥት ከዜና ወኪሉ ለቀረበለት ጥያቄ ምላሽ አልሰጠም።
አክሌድ በበኩሉ የኤርትራ ወታደሮች በባድመ አቅራቢያ በሚገኙት ጓል ገምሃሎ እና ስምበል መንደሮች "በርካታ ወታደሮችን እና ከባድ መሣሪያዎችን አሰማርቷል" ብሏል።
በኢትዮጵያ በኩልም ከግንባሩ በቅርብ ርቀት ሠራዊቶች መሰማራታቸውን እና ዘላቂ እና ቀጥተኛ ጦርነት ውስጥ ሊገቡ ይችለሉ የሚል ስጋት መፍጠሩን ተቋሙ አክሏል።
የሰብአዊ ተቋም ምንጮችም በኢትዮጵያ በኩል ከባድ ዝግጅት መኖሩን ለኤኤፍፒ ተናግረዋል።
አክሌድ ባወጣው መግለጫ፤ ከባለፈው ሳምንት ጀምሮ በባድመ አቅራቢያ ወታደራዊ ግጭት መነሳቱን ጠቅሶ፤ የኢትዮጵያ መከላከያ የትግራይ ኃይሎችን ለማስወጣት እየተንቀሳቀሰ መሆኑን አመልክቷል።
በባድመ አቅራቢያ "የኢትዮጵያ ድሮን የኤርትራ ይዞታዎች ሊሆኑ የሚችሉ ሥፍራዎችን ዒላማ እንዳደረገ" እንዲሁም ወደ ኢትዮጵያ ይዞታ "የኤርትራ ኃያሎች መሣሪያ እንደተኮሱ" ገልጿል።
"በቀጣዩ ቀን ሁለቱ ኃይሎች በኢትዮጵያ በኩል ባለው የድንበሩ ክፍል ተጋጭተዋል" ሲለም አክሌድ ባወጣው መግለጫ አስታውቋል።
ሮይተርስ የጠቀሳቸው ለአማጺያኑ ቅርብ የሆኑ ምንጭ እንደተናገሩት፤ በድንበር አካባቢ በኢትዮጵያ እና በኤርትራ ኃይሎች መካከል "አልፎ አልፎ ግጭቶች" ነበሩ።
የመንግሥት አጋር ለሆነው የትግራይ ሰላም ኃይል ቅርብ የሆኑ ምንጭ በበኩላቸው፤ መከላከያ ሠራዊት ወደ ድንበር አካባቢ እየገፋ የሄደው የትግራይ ኃይሎችን እያሳደደ መሆኑን ተናግረዋል። ሆኖም ግን በኢትዮጵያ እና ኤርትራ ወታደሮች መካከል ግጭት አለመከሰቱን ተናግረዋል።
ባለፈው ሳምንት በኢትዮጵያ እና ኤርትራ ድንበር አካባቢዎች በመከላከያ ሠራዊት እና በትግራይ ኃይሎች መካከል "በከባድ መሣሪያ የታገዘ" ግጭት ታካሂዶ እንደነበር ነዋሪዎች ለቢቢሲ መናገራቸው ይታወሳል።
ግጭቱን ተከትሎ በድንበር አቅራቢያ ባሉ አካባቢዎች የሚገኙ ነዋሪዎች መፈናቀላቸውንም ገልጸዋል።
በትግራይ ክልል ሸራሮ፣ ዓዲ ሃገራይ እና ቢያራ በተባሉት አካባቢዎች የሚገኙ ነዋሪዎች ለቢቢሲ እንደተናገሩት፣ ባለፈው ሳምንት ኅዳር 2/ 2019 ዓ. ም. የተካሄደው ውጊያ፣ የገጠር አካባቢዎችን ያዳረሰ ነበር።
በክልሉ በሰሜን ምዕራብ ዞን፣ ባድመ አቅራቢያ፣ ከባድመ የገጠር ቀበሌዎች አንዱ በሆነችው ቢያራ ቀበሌ ኅዳር 7/ 2019 ዓ. ም. በደረሰ የድሮን ጥቃት ቢያንስ 4 ሰዎች መጎዳታቸውን ምንጮች ለቢቢሲ መግለጻቸውም አይዘነጋም።
ቢቢሲ ከሳምንት በፊት ያነጋገራቸው ነዋሪዎች እንደ መድፍ ያለ ከባድ መሣሪያ እና ድሮን በውጊያው ጥቅም ላይ መዋላቸውን ገልጸዋል።
የትግራይ ኃይሎች ወደሚገኙበት የባድመ አቅጣጫ መድፍ ሲተኮስ እንደነበርም ነዋሪዎቹ ተናግረዋል።
ቢቢሲ በድንበር አካባቢ ያለውን ሁኔታ በተመለከተ ከመከላከያ ሠራዊት ኮሚዩኒኬሽን ኃላፊ ኮሎኔል ቢረሳው ሽፈራው አስተያየት ለማግኘት ያደረገው ጥረት አልተሳካም።
በመስከረም አጋማሽ በትግራይ ክልል ዳግም ጦርነት ከተነሳ ወዲህ፣ ላለፉት ዓመታት ውጥረት ውስጥ የገቡት ኢትዮጵያ እና ኤርትራ ወደ ወታደራዊ ግጭት ሊገቡ ይችላሉ የሚል ስጋት ተፈጥሯል።
የኤርትራ ወታደሮች ወደ ትግራይ አካባቢዎች መግባታቸው እና የድሮን ጥቃት እንደተፈጸመባቸውም ተዘግቧል።
የኢትዮጵያ መንግሥትም የኤርትራ ሠራዊት ድንበር አልፎ በመግባት "ወረራ" እንደፈጸመ በመግለጽ፣ "ራሱን ከመከላከል ውጪ አማራጭ እንደሌለው" በመስከረም መጨረሻ ለተባበሩት መንግሥታት በጻፈው ደብዳቤ አስታውቆ ነበር።
ኤርትራም በተመሳሳይ መልኩ ለተባበሩት መንግሥታት የፀጥታው ምክር ቤት በላከችው ደብዳቤ፣ ኢትዮጵያ "ራስን በመከላከል ስም" በሉዓላዊት የተመድ አባል ላይ የምትፈጽመውን ጦርነት ምክንያታዊ ለማድረግ እየሞከረች ነው የሚል ክስ አቅርባለች።