Россияда ўлат чиққанми – АҚШ 'диққат билан' кузатиб турибди, Иркутскда Ўзбекистон, Марказий осиёлик мигрантлар ҳам кўп

Россияда ўлат тадқиқотчиси вафот этган.

Аксарият минтақа давлатлари аллақачон эҳтиёт чорасини кўриб бўлишган.

Россия кўпчилик Марказий Осиё аҳолиси учун энг йирик ташқи меҳнат бозори.

У ерда ҳозир ҳам миллионлаб Марказий осиёлик ишлайди.

Россия минтақага ҳам чегарадош.

Қозоғистон билан қуруқликдаги чегараси дунёдаги энг узуни.

Сўнгги тафсилотлар.

АҚШ муносабати

Лаборатория ходимаси Сибирдаги ўлатни тадқиқ этиш марказида вафот этган.

Россияда юз берган ҳодиса минтақада ҳам кенг акс-садо берган, сарлавҳаларга чиққан.

Шу кунларда энг кўп ва изчил ёритилаётган мавзулардан бирига айланган.

Бунга Америка томонининг расмий муносабатига оид хабарлар сўнгги соатларда олинган.

Хабарларга кўра, бу ҳақда шахсан АҚШ Президенти Доналд Трампнинг ўзи гапирган.

Яна АҚШ Давлат котиби ҳам ўзининг расмий муносабатини билдириб ўтган.

Трампнинг айтишича, АҚШ бу ҳодисани "ўта диққат" билан кузатиб турибди.

Марко Рубио ҳам Вашингтон худди шундай қилаётганини тасдиқлаб ўтган.

Баёнотлар Россиядаги ҳолат энди зотилжамли - пневмоник ўлат тарқалиши мумкин, деган хавотирлар манзарасида янграган.

Аммо, АҚШ Давлат котибига кўра, хавотирланишга асос йўқ.

"Агар шундай ҳолат юзага чиқса, у тез тарқалиши мумкин. Шу боис биз вазиятни диққат билан кузатиб боряпмиз. Менимча, бу хавотирга тушишга асос бўлмайди, бироқ бу ҳолатга эътибор қаратиш ва уни назоратда ушлаб туриш лозим; биз айнан шундай қиляпмиз", - деб айтган Марко Рубио.

Октябр ойида АҚШ Давлат котибининг Марказий Осиёга сафари ҳам режаланган.

Россия томони нима дейди?

Иркутск губернатори ўлим сабабини "келиб чиқиши номаълум пневмония" деб эълон қилган.

Губернатор аёлнинг "биологик намуналарида" унинг касбий фаолияти билан боғлиқ "ҳеч қандай микроорганизмлар" аниқланмаганини айтган.

Айрим тасдиқланмаган хабарларга кўра, вафот этган аёл ё касаллик қўзғатувчиси бўлган пробиркани синдириб қўйган.

Ёки ёввойи кемирувчилар орасида ўлат табиий равишда учрайдиган ҳудудга уюштирилган сафардан кейин касалланган.

Иркутск губернаторининг маълум қилишича, ўшандан буён тадқиқот марказидан ҳеч ким шифохонага мурожаат қилмаган.

Игор Кобзев бу ҳақдаги чиқишида "Роспотребнадзор"га таянган.

Назорат органига кўра, биологик хавфсизлик гуруҳи Иркутскдаги Сибир ва Узоқ Шарқ ўлатга қарши кураш институтини кўздан кечирган. У ерда ҳеч қандай фавқулодда вазият аниқламаган.

Кремл матбуот котиби одамларни "турли миш-мишларга қулоқ солмасликка" даъват қилган.

Дмитрий Песков уларни бунинг ўрнига "Роспотребнадзор"нинг расмий баёнотларига таянишга" чақирган.

Россиядан ўтган ҳафта олинган хабарларда бемор билан мулоқотда бўлгани аниқланган 200 га яқин кишининг эҳтиёт чораси сифатида тиббий кузатув остига олингани айтилган.

Уларнинг бугунги ҳолатлари бўйича расмий маълумотлар шу соатларда имконли эмас.

Карантин остида экани айтилган бу инсонларнинг шахслари ҳам ҳалича очиқланмаган.

Уларнинг орасида Марказий осиёликлар бор-йўқлиги маълум эмас.

АҚШ "ёрдам беради"

Трампдан Россиядан ўлат тарқалиши хавфига қарши Вашингтон нима қилмоқчи экани ҳақида ҳам сўралган.

АҚШ президенти ҳали бу борада Кремл билан гаплашмаганини айтиб, жавоб берган.

Трамп, "уларнинг бундай аҳволга тушганини кўриш ўзи учун оғир" эканини айтган.

"Биз ёрдам берамиз. Кимда шундай муаммо бўлса, биз ҳар доим кўмак қиламиз", - дея қўшимча ҳам қилган.

Трамп ва Рубионинг бу гапларига расмий Москванинг муносабати ҳозирча маълум эмас.

Сўнгги йилларда интернетда бўй кўрсатган турли хабарларга таянилса, Иркутскда ўн минглаб Марказий осиёликлар ҳам меҳнат қилишади.

Уларнинг сирасида тўрт минтақа давлати - Ўзбекистон, Тожикистон, Қирғизистон ва Қозоғистон фуқаролари тилга олинишади.

Россия ҳозир яна Украина билан уруш ичида.

Россия бундан ташқари дунёнинг жами 14 давлатига чегарадош.

Буларнинг орасида Қозоғистондан ташқари яна еттита постсовет давлати - Эстония, Латвия, Литва, Беларус, Украина, Грузия ва Озарбайжон ҳам бор.

Улардан ташқари Норвегия, Финляндия, Полша, Хитой, Мўғулистон ва Шимолий Корея ҳам Россия билан ўзаро чегараларини бўлишади.

Пневмоник ўлат

Жаҳон Соғлиқни Сақлаш ташкилоти (ЖССТ) маълумотларига кўра, ўпка ўлатининг инкубация даври жуда қисқа — баъзан бор-йўғи 24 соатни ташкил этади — ва агар ўз вақтида ташхис қўйилиб, даволанмаса, у ўлимга олиб келиши мумкин.

Юқтириш йўллари:

Касалланган бургалар чақиши;

Тана суюқлиги ёки зарарланган сатҳ, буюм, нарсаларга тегиш;

Нафас йўллари орқали ажралувчи томчиларни ютиш;

Аломатлар орасида:

Нафас қисиши ва йўтал, кўпинча қон аралаш балғам ажралиши кузатилади.

Рединг университетининг ҳужайра микробиологияси бўйича доценти доктор Саймон Кларк, "пневмоник ўлат одамдан одамга юқиши мумкин, шу боис ҳам бу борада хавотир мавжуд", - дейди.

Аммо, унга кўра, "албатта, ҳар қандай юқумли касаллик авж олганда одамларнинг хаёлига дарҳол карантин чоралари ва COVID келади; бироқ бу ҳолатда бундай бўлмайди".

Иркутск вилоятида ўлат эпидемияси эҳтимоли ОАВ ва ижтимоий тармоқларда кенг муҳокама қилинмоқда.

Матбуот хабарларига кўра, Иркутскдаги бир нечта шифохона карантинга олинган.

Маҳаллий заводда эса ниқоб тақиш мажбурий қилиб белгиланган.

Ҳатто Россия Бош санитария шифокори Анна Попова ҳам ушбу ҳудудга ташриф буюргани айтилмоқда.

Бироқ на федерал ва на маҳаллий ҳокимият органлари ҳудудда ўлат эпидемияси бошланганини тасдиқлади.