Украина: Киевга ҳужум оқибатида камида 15 киши ҳалок бўлди. Мамлакат ҳаво ҳужумларидан қанчалик ҳимояланган?

Россия томонидан Украина пойтахти Киевга қилинган сўнгги ҳужумлар оқибатида камида 15 киши ҳалок бўлган, деди Киев мэри.

Украина Давлат фавқулодда вазиятлар хизмати маълум қилишича, тун давомида шаҳарнинг турли ҳудудларидаги кўп қаватли турар жой бинолари ва омборхоналар зарбага учраган. Шунингдек, болалар шифохонаси ва мактаб ҳам зарар кўрган.

Украина президенти Володимир Зеленский ҳалок бўлганлар ҳаво мудофаа ракеталари танқислиги оқибати эканини таъкидлади. Киев бу турдаги қуролларни етказиб бериш учун ғарбдаги иттифоқчиларига таянади.

Киевдаги вайрон бўлган кўп қаватли турар жой биноси олдида BBC билан суҳбатлашган шаҳар мэри Виталий Кличконинг айтишича, Украинага "ўқ-дорилар, ракетага қарши тизимлар керак, бизга ҳамкорларимиз ёрдами зарур".

Кличко зарар кўламини баҳолаш учун Соломянский туманида бўлган. Унинг атрофида фавқулодда вазиятлар хизмати ходимлари вайроналарда қутқарув-қидирув ишларини давом эттирар, одамлар эса вайрон бўлган уйлари ташқарисида турарди.

Улар орасида Валерия Бондарук ҳам бўлган. У Украина жанубидаги уйи бомбардимон қилинганидан кейин, ўзи ва қизига хавфсизроқ бўлади деб ҳисоблаб, Киевга кўчиб келган.

Энди эса бу уруш давомида у иккинчи марта ўз уйини тарк этишга мажбур бўлган.

Унинг ётоқхонаси деворига қадалиб қолган шиша парчаси ҳужум нақадар яқин бўлганини кўрсатади. Уларда ҳаво ҳужумларидан ҳимояланиш учун ер ости паноҳгоҳи бўлмагани учун у тунни йўлакда яшириниб ўтказган.

У BBC'га 13 ёшли қизининг келажагидан хавотирда эканини ва Украинани тарк этиш ҳақида ўйлаётганини айтган.

Украина парламенти аъзоси Олексий Гончаренко BBC'га берган интервюсида Украина баллистик ракета ҳужумларидан "мутлақо ҳимояланмагани" ва ҳаводаги нишонларни уриб туширувчи ракеталарсиз "ҳеч нарса қила олмаслиги"ни айтди.

BBC Radio 4'нинг Today дастурига берган интервсида у шундай деди, " Биз учун бу жуда оғриқли, чунки ҳаводаги нишонларни уриб туширувчи ракеталарсиз ҳар куни одамларимиз ҳалок бўляпти".

Зеленский Telegram'да ёзишича, "Украинада баллистик ракеталарга қарши етарлича ҳимоя воситалари бўлмас экан, Россия тинчлик ҳақида жиддий ўйламайди".

У шундай қўшимча қилди, "Patriot мажмуаси ракеталари ҳалигача тўлдирилгани йўқ, чунки улар ҳар куни керак. Ҳар бир қўшимча ракета одамларимизнинг ҳаётини сақлаб қолади".

Украина Ҳаво кучлари пайшанба куни эрталаб эълон қилган маълумотга кўра, тунги ҳужумларда қўлланган Россиянинг баллистик ракеталаридан бирортаси ҳам тутиб қолинмаган.

Россия Мудофаа вазирлиги эса ҳаво, қуруқлик ва денгиздан учириладиган қуроллар ёрдамида ҳарбий объектлар ҳамда омборхоналар нишонга олинганини билдирди.

Украина Россиянинг баллистик ракета ҳужумларига қарши курашиш учун АҚШ етказиб бераётган Patriot ҳаводаги нишонларни уриб туширувчи ракеталарига таяниб келади. Бироқ АҚШ Яқин Шарқдаги уруш давомида ўз захираларининг катта қисмини ишлатган ва кейинги вақтларда Украинага камроқ сонда ракета етказиб бермоқда.

Зеленскийнинг қўшимча ҳарбий ёрдам сўраб янгиланган мурожаати у машҳур собиқ мудофаа вазири Михайло Федоров томонидан тўғридан-тўғри сиёсий чақириққа дуч келаётган бир пайтда янгради. Федоров сайлов ўтказишга чақириб, коррупция армияни қурол-яроғдан маҳрум қилганини даъво қилар экан, ҳукуматни кескин танқид қилди.

Киевга қаратилган сўнгги ҳужумлар маҳаллий вақт билан ярим тун атрофида, шаҳар бўйлаб ҳаво ҳужуми ҳақидаги сиреналар янграши билан бошланди. Шундан сўнг Россия томонидан учирилган тахминан 20 та ракетанинг зарбаси кузатилди.

Ҳужумлар оқибатида минглаб объектларда электр таъминоти узилиб, Киев вилоятининг айрим ҳудудлари қоронғуликка чўмди.

Тунда ҳалок бўлганлар хотирасига жума куни мотам куни деб эълон қилинди.

Соломянский туманидаги маҳаллий мактаб ойналари синдириб ташланган, спорт майдонлари эса вайроналар билан қопланиб қолган эди.

Яқин-атрофдаги омборхона бутунлай вайрон бўлган ва ертўласи очилиб қолган. BBC мухбирига айтилишича, бу атрофдаги кўп қаватли турар жой биноларини иситиш билан таъминлаб келган кир ювиш ва қозонхона бўлган.

Чоршанбага ўтар кечаси амалга оширилган ҳужум Украина разведкасининг раҳбар ўринбосари BBC'га таърифлаган, Россия қиш олдидан ҳаётни қийинлаштириш мақсадида режалаштираётган ҳужумларга ўхшайди. Бу ҳатто уйлари вайрон бўлмаган одамларга ҳам тааллуқли.

Украина Ҳаво кучлари маълум қилишича, ҳужумда Россия томонидан 168 та дрон ва 44 та ракета қўлланган бўлиб, асосий нишон Киев бўлган. Шунингдек, ҳаво мудофаа тизимлари 146 та дрон ва 39 та қанотли ракетани уриб туширган.

31 ёшли Анастасия Ковтун тўққиз қаватли бинодаги вайрон бўлган хонадони қолдиқлари ёнида турмуш ўртоғи билан ўтирган эди.

Бошланғич синф ўқитувчиси Анастасиянинг айтишича, паноҳгоҳда турган пайтида ўз ҳудудидаги портлаш товушларини эшитгач, "бошим портлаб кетадигандек бўлди", каби ҳис қилган.

"Бу ўз уйинг эканини англаш жуда қўрқинчли, сен ҳеч қачон навбат сенга келади деб ўйламайсан", деди у BBC'га.

Ундан яна хонадонига қайтиб яшай оладими, деб сўралганда, у шундай жавоб берди: "Қайтиб кўчиб кириш имкони бўлган тақдирда ҳам, бу воқеадан кейин биз буни хоҳламасдик. Агар хонадонда яна ўн дақиқа қолганимизда, ҳалок бўлишимиз мумкин эди".

Киев вилоятининг бошқа ҳудудларида ҳам ҳужумлар кузатилди. Бровари ва Бориспил туманларидаги ҳужум оқибатида бир эркак ҳалок бўлди, етти киши яраланди. Маҳаллий расмийнинг айтишича, Донецк вилоятида бир киши ҳалок бўлган ва 11 киши жароҳат олган.

Россияда Мудофаа вазирлиги мамлакатнинг турли ҳудудларига йўналтирилган 726 та Украина дрони уриб туширилганини маълум қилди.

Руминия Мудофаа вазирлиги маълум қилишича, бир дрон Украина билан шимолий чегара орқали мамлакат ҳудудига кириб келган. Дрон "аҳоли яшамайдиган ҳудуд"га қулашидан олдин ҳаво хавфи ҳақидаги сирена ишга туширилган.

Полша ҳарбийлари ҳам ўз ҳаво ҳудудини ҳимоя қилиш мақсадида "мудофаа ҳаво амалиётлари"ни бошлаганини маълум қилди.

Сўнгги ҳафталарда урушнинг ҳар икки томони кенг кўламли ҳаво ҳужумларини амалга оширди. Бу ҳужумлар оқибатида ўнлаб одамлар ҳалок бўлди.

Украина Россия ичкарисидаги нишонларга қарши ҳужумларни кучайтирди ва ҳафта охирида пойтахт Москвага 600 та дрондан иборат тўлқинли ҳужум уюштирди.

Бу ҳафта Россияга қарши амалга оширилган икки алоҳида ҳужум натижасида камида 16 киши, жумладан бир нафар бола ҳалок бўлди.

Июл ойидан буён Украина Россиядаги Amazon'га тенглаштириладиган онлайн чакана савдо компанияси Wildberries'га тегишли объектларни бир неча бор нишонга олди.

Украина Мудофаа вазирлиги маълум қилишича, сўнгги ҳужум натижасида компаниянинг ҳар 10 та логистика марказидан еттитаси яроқсиз ҳолга келтирилган.

Ҳар икки томон ҳам давом этаётган ҳужумлар ва заифликларга дуч келаётганига қарамай, оташкесим бўйича дипломатик саъй-ҳаракатларда деярли ҳеч қандай силжиш кузатилмади. Ҳар икки томон бир-бирини тинч аҳолини нишонга олишда айбламоқда.

Россия Украинага қарши кенг кўламли босқинини илк бор 2022 йил феврал ойида бошлаган. Айни пайтда у Украина ҳудудининг тахминан бешдан бир қисмини назорат қилмоқда, бу ҳудудлар асосан шарқий чегара минтақаларида жойлашган.

Мақолада Киевдан Изабелла Жуэллнинг қўшимча маълумотларидан ҳам фойдаланилди.