Шанхай ташкилоти Россияга бензин берадими? Эрон уруши ҳақида нима гап бўлди?

Бишкекда Шанхай Ҳамкорлик ташкилоти декларацияси қабул қилинди.

ШҲТга аъзо мамлакатлар раҳбарларининг саммитига мезбонлик қилган Қирғизистон раҳбарлари ҳали июл ойидаёқ пойтахт Бишкек аҳолисини август ойининг охирги кунлари ва сентябр бошида шаҳардан ташқарига чиқиб кетишга чақирдилар.

Саммит муносабати билан шаҳар кўчалари ёпилиши, хавфсизлик чоралари кучайтирилишидан одамлар огоҳлантирилдилар.

Пойтахт Бишкекка ўн минглаб хавфсизлик кучлари ходимлари жойлаштирилдилар.

Шанхай ташкилоти саммити муносабати билан бошқа давлатлар раҳбарлари ҳам ўз кун тартибларини ўзгартирдилар.

Президент Шавкат Мирзиёев Ўзбекистон мустақиллиги 35 йиллигининг асосий тантаналарини 28 август куни ўтказди, 31 август куни Бишкекда VI Бутунжаҳон Кўчманчилар ўйинларининг тантанали очилиш маросимида иштирок этди.

1 сентябр куни Шанхай ташкилоти саммити асосий тадбирлари бошланди.

"Давлат раҳбарлари Шанхай Ҳамкорлик ташкилоти 25 йиллигининг Бишкек декларациясини имзоладилар", деб хабар берди саммит ташкилий қўмитаси.

Декларациядан ташқари яна 27 ҳужжат имзоланди.

Улар орасида ШҲТ давлатларига нисбатан таҳдидларга қарши туриш универсал маркази низоми ва аъзо давлатлар бандаргоҳлари ва логистика марказларини ривожлантириш режаси борлиги хабар қилинмоқда.

Шунингдек, ШҲТга аъзо давлатлар раҳбарларининг энергетика соҳасида ҳамкорликни ривожлантиришга бағишланган баёноти имзолангани хабар қилинди.

Бишкекдаги саммитни ёритаётган мухбирлар эътибор қаратишларича, Бишкек декларациясида Украина уруши тилга олинмаган.

Бироқ Шанхай ташкилоти аъзоси ҳисобланган Россия Украинага тўлақонли босқин бошлаганидан кейинги янги мушкулликларга дуч келган.

Охирги ойларда Украина Россиянинг энг йирик нефтни қайта ишлаш заводларига дрон ҳужумларини кўпайтирди.

Оқибатда бутун Россия бўйлаб ёқилғи қуйиш шохобчаларида бензин тақчиллиги кузатилаяпти.

Россиянинг Amazonи деб аталадиган Wildberries ширкати, охирги кунларда эса Ozon логистика марказлари ва омборларига зарбалар аллақачон миллионлаб доллар зарар келтирди.

Wildberries ўз омборларини Марказий Осиё мамлакатлари, хусусан, Ўзбекистонга кўчиришни ўйлаб қолди.

Шунингдек, Россиянинг Қора денгиздаги Новороссийск шаҳридаги ҳарбий ва нефт ташийдиган кемалар тўхтовсиз Украина дрон ҳужумларига учраяпти, оқибатда Қозоғистонга тегишли Каспий трубопровод консорциуми ва Туркияга тегишли кемалар ҳам шикаст кўрди.

Саммитдаги баёнотлар

Бишкекдан олинаётган хабарларга кўра, Россия Президенти Владимир Путин энергетика соҳасида мувофиқлаштирилган сиёсат юритишга чақирган.

"Ўйлайманки, Шанхай Ҳамкорлик ташкилотининг энергетика соҳасидаги ҳамкорлик стратегиясида кўзда тутилганидек, энергетика соҳасида мувофиқлаштирилган ва мувозанатли сиёсатни давом эттириш ҳамманинг манфаатига мос келади", деди Президент Путин.

Бишкек декларациясида айтилишича, Шанхай Ҳамкорлик ташкилоти аъзолари инсон ҳуқуқларида икки хил стандартлар қўлланиши ва суверен давлатларнинг ички ишларига аралашишига қаршилар.

Бу баёнотда кузатувчилар АҚШнинг Эронга нисбатан сиёсатига муносабатни кўрмоқдалар.

Бишкек саммитида Эрон Президенти Маъсуд Пезешкиён ҳам иштирок этаяпти.

"Агар АҚШ июн ойида имзоланган оралиқ келишув бўйича ўз мажбуриятларига қайтса, Эрон ҳам дарҳол жавоб тарзида худди шундай йўл тутади", дея Президент Пезешкиёндан иқтибос келтираяпти Эрон оммавий ахборот воситалари.