امریکہ میں دوسرے روز بھی 1100 سے زیادہ اموات، مجموعی ہلاکتیں ایک لاکھ 43 ہزار سے زیادہ
امریکہ میں بدھ کو لگاتار دوسرے روز کورونا وائرس سے ہلاکتوں کی تعداد 1100 سے زائد رہی جو کہ مئی کے مہینے سے اب تک پہلی مرتبہ ہے۔
خبر رساں ادارے روئٹرز کے مطابق اب حالیہ ہفتوں میں کورونا وائرس کے نئے متاثرین کی تعداد میں اضافہ ہوا ہے اور اب 23 ریاستیوں میں ہلاکتوں کی تعداد میں بھی اضافہ ہو رہا ہے اور ایلابامہ، کیلیفورنیا، نیواڈا اور ٹیکساس کی ریاستوں میں یومیہ ہلاکتوں کی تعداد ریکارڈ سطح تک پہنچ گئی ہے۔
تاہم یہاں پر یہ وضاحت ضروری ہے کہ یہ اعداد و شمار روئٹرز کے اپنے حسابات کے مطابق ہیں جو دیگر ذرائع مثلاً سی ڈی سی یا جانز ہاپکنز یونیورسٹی کے اعداد و شمار سے مختلف ہو سکتے ہیں۔
بدھ کو سب سے زیادہ ہلاکتیں ٹیکساس میں 197، کیلیفورنیا میں 159، فلوریڈا میں 140 اور اوہائیو میں 106 ہوئیں جس کے بعد امریکہ میں ہلاکتوں کی کُل تعداد ایک لاکھ 43 ہزار سے زیادہ ہو چکی ہے۔
امریکہ میں ویسے تو اموات میں اضافہ کو یہ دوسرا ہفتہ ہے تاہم اس کی سطح اپریل میں دیکھی گئی سطح سے کافی کم ہے جب روزانہ اوسطاً دو ہزار لوگ ہلاک ہو رہے تھے۔