کورونا: دنیا بھر میں متاثرین کی تعداد 89 لاکھ سے زیادہ

لائیو کوریج

1. 20 جون 2020سعودی عرب میں کرفیو اٹھانے اور معیشت بحال کرنے کی تیاری

   

   ،تصویر کا ذریعہGetty Images

   سعودی عرب کا کہنا ہے کہ وہ اتوار سے ملک میں نافذ کرفیو ختم کر کے معیشت کو بحال کر رہا ہے۔ یہ فیصلہ ملک میں کووڈ 19 کے بڑھتے ہوئے کیسز کے باوجود کیا جا رہا ہے۔

   لاک ڈاؤن کے اقدامات مقامی وقت کے مطابق 6:00 بجے سے اٹھا لیے جائیں گے اور مساجد اور کاروباروں کو کام کرنے کی اجازت ہوگی۔

   سعودی حکومت کے مطابق بین الاقوامی پروازیں اور ملک میں داخلے پر پابندی کے ساتھ ساتھ 50 سے زاید افراد کے اتماع پر پابندی برقرار رہے گی۔

   ابھی تک سعودی حکام نے یہ فیصلہ نہیں کیا کہ ہر سال ملک میں آنے والے 20 لاکھ حاجیوں کو بھی آنے کی اجازت دے جائے یا نہیں۔

   سعودی عرب بھی اب کورونا وائرس کے کیسز مںی اضافہ ہو رہا ہے اور گذشتہ 24 گھنٹوں میں وہاں 3941 کیسز ریکارڈ کیے گئے۔ اب تک وہاں مجموعی مصدقہ متاثرین کی تعداد 154233 ہے۔

   سنیچر تک وہاں اس وبا سے 1230 اموات ہو چکی ہیں۔

2. 20 جون 2020خیبر پختونخوا میں مزید 654 کیسز اور 19 ہلاکتیں

   

   پاکستان کے صوبہ خیبر پختونخوا کے محکمہ صحت کے مطابق صوبے میں مزید 654 افراد میں کورونا وائرس کی تصدیق ہوئی ہے۔ جس کے بعد اب تک مصدقہ متاثرین کی کل تعداد 21444 ہو گئی ہے۔

   ان تازہ کیسز میں 48 افراد وہ ہیں وہ بیرون ملک سے سفر کر کے آئے ہیں۔

   گذشتہ چوبیں گھنٹوں میں مزید 19 افراد اس وبا کے باعث ہلاک ہوئے جس کے بعد ہلاکتوں کی مجموعی تعداد 801 تک پہنچ چکی ہے۔

   صبے میں اب تک صحت یاب ہونے والی افراد 6063 ہیں جن میں سے 440 گذشتہ 24 گھنٹوں میں صحت یاب قرار دیے گئے ہیں۔

   X پوسٹ نظرانداز کریں

   X کا مواد دکھانے کی اجازت دی جائے؟?

   اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔

   Accept and continue

   تنبیہ: بی بی سی دیگر ویب سائٹس کے مواد کی ذمہ دار نہیں ہے۔

   X پوسٹ کا اختتام

3. 20 جون 2020پوپ فرانسس کا لاک ڈاؤن میں نرمی کے بعد پہلی بار حاظرین سے خطاب

   

   ،تصویر کا ذریعہEPA

   رومن کیتھولک مسیحی برادری کے روحانی پیشوا پوپ فرانسس نے اٹلی میں کورونا وائرس کی وبا سے نمٹنے کے لیے ڈاکٹروں اور نرسوں کا شکریہ ادا کیا ہے۔

   انھوں نے آج لاک ڈاؤن کی پابندیاں اٹھائے جانے کے بعد آج پہلی مرتبہ حاظرین سے خطاب کیا۔

   پوپ نے اٹلی کے شمالی خطے لومبارڈی کے ‘فرشتہ صفت’ طبی عملے کی بے حد تعریف کی۔ اٹلی کا یہ خطہ کبھی اس وبا کا عالمی مرکز تھا۔

   انھوں نے ویٹیکن کے کلیمنٹائن ہال میں ایک وفد سے خطاب کرتے ہوئے کہا: ‘آپ اس ملک کو سہارا دینے والے ستون تھے۔’

   انھوں نے طبی عملے کا شکریہ ادا کیا۔

   اٹلی میں 3 جون کو لاک ڈاؤن کی پابندیوں میں نرمی کر دی گئی تھی۔ یہاں اب تک 34 ہزار سے زائد اموات ہوچکی ہیں جبکہ دو لاکھ 38 ہزار سے زیادہ متاثرین سامنے آ چکے ہیں۔

4. 20 جون 2020پاکستان میں کووڈ 19 کی تشخیص کے لیے کون کون سے ٹیسٹ کیے جا رہے ہیں اور ان کی اہمیت اور قیمت کیا ہے؟

   

   ،تصویر کا ذریعہAFP

   دنیا بھر میں کورونا وائرس کی تشخیص کے لیے کئی قسم کے ٹیسٹ کیے جا رہے ہیں۔ ان ٹیسٹوں کا طریقہ ایک دوسرے سے مختلف ہونے کے ساتھ ساتھ ان کے نتائج کی حساسیت بھی مختلف ہے۔

   اس وقت پاکستان سمیت دنیا بھر میں اس وائرس کی تشخیص کے لیے زیادہ تر ’پی سی آر‘ ٹیسٹ ہی کیے جا رہے ہیں۔

   تاہم پاکستان کی کچھ نجی لیبارٹریوں نے پی سی آر ٹیسٹ کے علاوہ اینٹی باڈی ٹیسٹ (آئی جی جی اور آئی جی ایم) بھی متعارف کروائے ہیں۔

   پاکستان میں دستیاب مختلف ٹیسٹوں اور ان کی قیمتوں کے بارے میں یہاں جانیے۔

5. 20 جون 2020برطانیہ سمیت دنیا بھر کی تازہ ترین صورتحال کیا ہے؟

   

   ،تصویر کا ذریعہPA Media

   انگلینڈ میں وزیرِ ثقافت اولیور ڈاؤڈین کا کہنا ہے کہ دو میٹر کی سماجی دوری کے قاعدے پر نظرِثانی چند دنوں میں مکمل کر لیا جائے گا۔ اس حوالے سے خدشات ظاہر کیے گئے ہیں کہ کئی شراب خانے اور ریستوران موجودہہدایات کے تحت اپنا کاروبار جاری نہیں رکھ سکیں گے۔

   برطانوی ہوائی اڈوں آنے والے لوگ ممکنہ طور پرتھوک کے نمونوں کا وہی ٹیسٹ کروا سکیں گے جو نیشنل ہیلتھ سروس کورونا کی سکریننگ کے لیے استعمال کرتی ہے۔ یہ اُمید کی جا رہی ہے کہ منفی نتائج والوں کو 14 روزہ سفری قرنطینے سے جلد گھر بھیج دیا جائے گا۔

   برطانیہ کے شہر گلاسگو میں شہر کے مرکز میں سینکڑوں لوگ نسل پرستی کے خلاف مظاہرہ کرنے کے لیے اکٹھے ہوئے باوجود اس کے کہ لاک ڈاؤن کی پابندیوں کے باعث ان سے شرکت نہ کرنے کی اپیل کی گئی تھی۔

   اس حوالے سے خدشات موجود ہیں کہ امریکہ میںکورونا وائرس کی دوسری لہر شروع ہو رہی ہے کیونکہ کئی ریاستوں نے حالیہ دنوں میں کورونا وائرس کے ریکارڈ متاثرین کی اطلاع دی ہے۔ مگر نائب صدر مائیک پینس نے کہا ہے کہ ان خدشات کو بڑھا چڑھا کر پیش کیا جا رہا ہے۔

   برازیل اب دس لاکھ سے زیادہ متاثرین والا دنیاکا دوسرا ملک بن گیا ہے۔ یہاں گذشتہ 24 گھنٹوں میں ریکارڈ 54 ہزار متاثرین سامنے آئے ہیں۔ اب تک اس وائرس سے تقریباً 49 ہزار افراد ہلاک ہو چکے ہیں۔

   دلی میں جمعے کو کورونا وائرس متاثرین کی تعداد میں اضافے کے بعد متاثرین کے لیے پانچ روزہ سرکاری قرنطینہ لازم قرار دے دیا گیا ہے۔

6. 20 جون 2020روس، انڈونیشیا اور ایران سے تازہ ترین اعداد و شمار

   

   ،تصویر کا ذریعہGetty Images

   انڈونیشیا، ایران اور روس تینوں ہی ممالک کو کورونا وائرس کی شدید وبا کا سامنا ہے اور ان ممالک کے تازہ ترین اعداد و شمار کچھ یوں ہیں۔

   روس میں گذشتہ 24 گھنٹوں کے دوران کورونا وائرس سے 161 ہلاکتیں ہوئی ہیں جس کے بعد یہاں ہلاکتوں کی کُل تعداد 8002 تک پہنچ گئی ہے۔ یہاں متاثرین کی تعداد پانچ لاکھ 76 ہزار 952 ہے جو امریکہ اور برازیل کے بعد دنیا میں سب سے زیادہ ہے۔

   ایران میں سنیچر کو کورونا متاثرین کی تعداد دو لاکھ 2584 ہوگئی۔ مزید 115 افراد ہلاک ہوئے جس کے بعد یہاں کووڈ 19 سے ہلاکتوں کی تعداد 9507 ہوچکی ہے۔

   انڈونیشیا میں کورونا وائرس کے 1226 نئے متاثرین سامنے آئے ہیں جس کے بعد یہاں متاثرین کی کُل تعداد 45 ہزار 29 ہوچکی ہے۔ مزید 56 اموات سامنے آنے کے بعد اموات کی کُل تعداد فی الوقت 2429 ہے۔

   تینوں ممالک کے بارے میں خدشہ ہے کہ ٹیسٹنگ کم ہونے اور رپورٹنگ کے مسائل کی وجہ سے یہاں متاثرین کی حقیقی تعداد اس سے کہیں زیادہ ہوگی۔

7. 20 جون 2020بل گیٹس کووڈ 19 سے متعلق سازشی نظریات کا مرکز کیسے بنے؟

   کچھ لوگوں کا الزام ہے کہ بِل گیٹس دنیا کی اشرافیہ کے نمائندے ہیں اور باقی لوگ سمجھتے ہیں کہ وہ ان لوگوں کے رہنما ہیں جن کی کوشش ہے کہ کسی طرح دنیا کی آبادی کو کم کیا جائے۔

   ایک بڑی اکثریت کا الزام ہے کہ وہ نہ صرف مختلف بیماریوں کی ویکسین کو لازمی قرار دینا چاہتے ہیں بلکہ ان کی کوشش ہے کہ لوگوں کے جسم میں مائیکرو چِپ لگا دی جائے۔

   مگر مائیکروسافٹ کے بانی ان سازشی نظریات کا مرکز کیوں اور کیسے بنے، نامہ نگار جین ویکفیلڈ کے اس تفصیلی مضمون میں پڑھیے۔

   

   ،تصویر کا ذریعہAFP/Getty

8. 20 جون 2020دلی: کورونا متاثرین کو پانچ روز سرکاری قرنطینے میں گزارنے ہوں گے

   

   ،تصویر کا ذریعہGetty Images

   انڈیا کے دارالحکومت دلی کے حکام نے کہا ہے کہ کووڈ 19 سے متاثرہ کسی بھی شخص کو سرکاری قرنطینے میں پانچ روز ضرور گزارنے ہوں گے۔

   قرنطینے کے اس نئے قاعدے کا اعلان دلی کی ڈزاسٹر مینیجمنٹ اتھارٹی نے جمعے کے روز انفیکشنز کی تعداد میں زبردست اضافے کے بعد کیا۔

   ریاستی حکومت نے اس اقدام پر تنقید کرتے ہوئے گھر پر قرنطینے کے پروگرام کی مبینہ کامیابی کی جانب توجہ دلائی ہے۔ حکومت نے کہا: ‘ہم نے روزانہ مانیٹرنگ اور کونسلنگ کے ذریعے معتدل اور بغیر علامات کے ہزاروں مریضوں کا علاج گھروں پر کیا ہے۔’

   طبی حکام نے بھی اس فیصلے پر سوالات اٹھائے ہیں اور کہا ہے کہ اس سے پہلے ہی دباؤ کے شکار ہسپتالوں پر مزید بوجھ پڑے گا جبکہ ہجوم زیادہ ہونے سے مرض پھیلنے کی شرح میں اضافہ ہوسکتا ہے۔

   مگر دلی کے لیفٹیننٹ گورنر انیل بیجل نے کہا کہ گھروں پر قرنطینے میں موجود لوگوں کی مانیٹرنگ میں کمی مسائل پیدا کر رہی ہے۔ جمعے کو دلی میں 3137 نئے متاثرین سامنے آئے جس کے بعد یہاں متاثرین کی کُل تعداد 53 ہزار 116 ہوگئی ہے۔

   یہ وبا کے آغاز سے اب تک ہونے والا سب سے بڑا یومیہ اضافہ ہے۔

9. 20 جون 2020پنجاب بھر میں آکسیجن کی ذخیرہ اندوزی کے خلاف دفعہ 144 نافذ

   

   ،تصویر کا ذریعہGetty Images

   پاکستان کے صوبے پنجاب میں محکمہ پرائمری اینڈ سیکنڈری ہیلتھ کئیر کی سفارش پر محکمہ داخلہ نے پنجاب بھر میں آکسیجن کی ذخیرہ اندوزی کے خلاف دفعہ 144 نافذ کر دی۔

   آکسیجن سلنڈر، ریگولیٹر، کنسنٹریٹر، پلس آکسی میٹر کی ذخیرہ اندوزی اور منافع خوری کے خلاف 144 لگائی گئی ہے۔

   سیکرٹری پرائمری اینڈ سیکنڈری ہیلتھ کیئر کیپٹن (ر) محمد عثمان کے مطابق ذخیرہ اندوزی اور ناجائز منافع خوری سے کورونا وائرس کے مریضوں کو سخت مشکلات کا سامنا ہو سکتا ہے۔

   ان کا کہنا تھا کہ وزیر اعلی پنجاب سردار عثمان بزدار کورونا وائرس مریضوں کے لیے سہولیات کی ازخود نگرانی کر رہے ہیں۔

   دفعہ 144 کے نفاذ سے ضلعی انتظامیہ کو ذخیرہ اندوزی روکنے میں مدد ملے گی۔

   کیپٹن (ر) محمد عثمان کے مطابق مریضوں کے لیے کسی بھی چیز کی مصنوعی قلت پیدا کرنے والوں کے خلاف سخت کاروائی کی سفارش کر رہے ہیں۔

   دفعہ 144 کا نفاذ فی الفور ہو گا، اور یہ 2 ماہ تک لاگو رہے گی۔

10. 20 جون 2020بیرون ملک پھنسے پاکستانیوں کے لیے پی آئی اے کی 100 سے زائد پروازوں کا منصوبہ

    

    پاکستان کی قومی ایئر لائن کا کہنا ہے کہ بیرون ملک سے 25،000 پاکستانیوں کو ایک سو سے زائد خصوصی پروازوں کے ذریعے واپس لایا جائے گا۔ یہ تمام خصوصی پروازیں پاکستان سے خالی جائیں گی۔

    پی آئی اے کے ترجمان کا کہنا ہے کہ پی آئی اے کے دفاتر پر وطن واپسی کیلئے مسافروں کا بے پناہ دباؤ ہے اور پروازیں دفاتر، ایجنٹس یا ویب سائیٹ کے ذریعے منٹوں کے اندر فروخت ہو جاتی تھیں۔

    ان کے بقول پی آئی اے نے حکومت پاکستان سے اضافی افراد کو واپس لانے کیلئے اجازت مانگی ہے اور اگلے ایک ہفتے کے دوران پی آئی اے نے بہت بڑا فضائی آپریشن ترتیب دے دیا۔

    اگلے ایک ہفتے کے دوران پی آئی اے سعودی عرب سے 10،000 جبکہ متحدہ عرب امارات سے 15،000 افراد کو وطن واپس لے کر آئے گی۔

    پی آئی اے کے مطابق اتنی زیادہ تعداد میں پروازیں اس لیے مہیا کی گئی ہیں تاکہ ٹکٹ آرام سے سب کو دستیاب ہو سکیں۔

    یہ ٹکٹ پاکستان میں پی ائی اے کے دفاتر، ویب سائیٹ یا ایجنٹوں سے حاصل کیے جاسکتے ہیں۔

11. 20 جون 2020گریٹا ٹونبرگ کا موسمیاتی تبدیلی کے خلاف بھی کورونا جیسی کوششوں پر زور

    

    ،تصویر کا ذریعہGetty Images

    دنیا اس وقت کورونا وائرس سے نمٹنے میں مصروف ہے اور توجہ موسمیاتی تبدیلیوں کو روکنے کی کوششوں سے ہٹ چکی ہے۔

    مگر موسمیاتی تبدیلیوں کے خلاف سرگرم سوئیڈش کارکن کہتی ہیں کہ یہ غلطی ہے کیونکہ موسمیاتی تبدیلی بھی ایسا بحران ہے جسے اتنی ہی ہنگامی توجہ کی ضرورت ہے۔

    بی بی سی کے ساتھ ایک خصوصی انٹرویو میں گریٹا ٹونبرگ کا کہنا تھا کہ دنیا کو کاربن کا اخراج روکنے کے لیے بھی ایسی ہی ‘ضروری قوت’ درکار ہے۔

    انھوں نے کہا: ‘لوگ اب یہ سمجھنے لگے ہیں کہ ہم ان چیزوں سے چشم پوشی نہیں کیے رکھ سکتے۔’ انھوں نے مزید کہا کہ لاک ڈاؤن نے انھیں لوگوں کی نظروں سے دور رہ کر سکون حاصل کرنے کا موقع دیا ہے۔

    گریٹا تھنبرگ کے بارے میں مزید ہمارے اس مضمون میں پڑھیے۔

12. 20 جون 2020لاطینی امریکہ میں کورونا وائرس کی صورتحال کیا ہے؟

    لاطینی امریکہ دنیا کے ان خطوں میں ہے جہاں اس وقت نئے متاثرین کی تعداد میں تیزی سے اضافہ دیکھنے میں آ رہا ہے اور متعدد ممالک میں یہ وبا بڑے پیمانے پر پھیلی ہوئی ہے۔

    برازیل میں متاثرین کی مصدقہ تعداد 10 لاکھ سے تجاوز کر چکی ہے جبکہ گذشتہ 24 گھنٹوں کے دوران 54 ہزار سے زائد نئے متاثرین سامنے آئے ہیں۔

    میکسیکو دنیا کا وہ ساتواں ملک ہے جہاں کورونا وائرس سے 20 ہزار سے زائد اموات چکی ہیں۔

    چلی اور پیرو میں بھی متاثرین کی تعداد میں تیزی سے اضافہ ہو رہا ہے اور دونوں ممالک میں دو لاکھ 30 ہزار سے زائد متاثرین سامنے آ چکے ہیں۔

    

13. 20 جون 2020کورونا کے خدشات کے باوجود صدر ٹرمپ انتخابی جلسہ کریں گے

    

    ،تصویر کا ذریعہReuters

    امریکہ کے صدر سنیچر کو ریاست اوکلاہوما میں ایک انتخابی جلسہ منعقد کریں گے جو کہ وبا کے آغاز سے اب تک اُن کا پہلا جلسہ ہوگا۔

    بند دروازوں والی جلسہ گاہ میں منعقد ہو رہے اس جلسے کو قانونی طور پر چیلنج کیا گیا تھا کہ کہیں اس کے منعقد ہونے سے کورونا وائرس مزید نہ پھیلے۔

    تاہم ریاستی سپریم کورٹ نے اس درخواست کو مسترد کر دیا ہے جس کے بعد 19 ہزار لوگوں کی گنجائش والے بینک آف اوکلاہوما سینٹر میں یہ جلسہ منعقد کیا جا رہا ہے۔

    اوکلاہوما میں وائرس کے متاثرین میں تیزی سے اضافہ ہو رہا ہے اور مقامی طبی اہلکاروں نے اس جلسے کے انعقاد پر خدشات کا اظہار کیا ہے۔ صدر ٹرمپ کو امید ہے کہ یہ جلسہ انھیں نومبر میں ہونے والے صدارتی انتخابات کے لیے سیاسی قوت فراہم کرے گا۔

    جمعے کو انھوں نے اس حوالے سے کہا تھا کہ ‘کل اوکلاہوما میں ایک ہنگامہ خیز رات ہوگی۔’

14. 20 جون 2020کورونا وائرس: فلم انڈسٹری کو ہونے والے نقصان سے کیسے نمٹا جائے گا؟

15. 20 جون 2020’بلوچستان کو مزید وینٹیلیٹرز کی ضرورت ہے`, محمد کاظم، بی بی سی اردو، کوئٹہ

    

    پاکستان کے صوبہ بلوچستان کے حکومتی ترجمان لیاقت شاہوانی کا کہنا ہے کہ ’ہم نے این ڈی ایم اے (ہنگامی صورتحال سے نمٹنے کے ادارے) سے 145 وینٹیلیٹرز کی گزارش کی ہے۔‘

    کوئٹہ میں وزیر اعظم عمران کے معاون خصوصی شہباز گل کے ہمراہ ایک پریس کانفرنس سے خطاب کرتے ہوئے ان کا کہنا تھا کہ ’این ڈی ایم اے نے بلوچستان کے لیے 20 وینٹیلیٹرز بھیجے ہیں جس پر ہم ان کے شکر گزار ہیں۔ بلوچستان میں کسی اور چیز کی کمی نہیں ہے تاہم وینٹیلیٹرز اور ٹیسٹنگ کے لیے پی سی آر مشینوں کی ضرورت ہے۔‘

    انھوں نے کہا کہ پہلے ہمارے پاس 25 وینٹیلیٹرز تھے لیکن اب ان کی تعداد کو بڑھا کر 90 کردیا گیا ہے جبکہ ڈسپوزیبل وینٹیلیٹرز اس کے علاوہ ہیں۔

    انھوں نے بتایا کہ بلوچستان حکومت اس وقت یومیہ 1200 ٹیسٹ کر رہی ہے۔ ان کا کہنا تھا ’ہماری کوشش ہے کہ اس کو پانچ ہزار تک بڑھائیں اور اس مقصد کے لیے ہم ضلعی سطح پر ہر ہیڈکوارٹر میں ایک پی سی آر مشین لگانا چاہتے ہیں۔‘

    لیاقت شاہوانی کے مطابق بلوچستان میں کورونا سے متاثر ہونے والے ڈاکٹروں سمیت طبی عملے کی تعداد 356 ہے جبکہ اب تک کورونا سے بلوچستان میں پانچ ڈاکٹر زندگی کی بازی ہار چکے ہیں۔

    ترجمان کے مطابق حکومت بلوچستان نے کورونا اور اس سے متعلقہ دیگر مسائل سے نمٹنے کے لیے اب تک چھ ارب روپے جاری کیے ہیں۔

16. 20 جون 2020میکسیکو: 20 ہزار اموات کے بعد کاروبار دوبارہ کھولنے کا منصوبہ ملتوی کر دیا گیا

    

    ،تصویر کا ذریعہReuters

    میکسیکو میں 20 ہزار اموات کے بعد کاروبار دوبارہ کھولنے کا پروگرام ملتوی کر دیا گیا ہے۔

    میکسیکو کی مئیر کا کہنا ہے کہ کورونا وائرس انفیکشن کے خاتمے تک کاروباری سرگرمیاں دوبارہ شروع کرنے کا ارادہ ملتوی کر دیا گیا ہے کیونکہ ملک بھر میں کووڈ 19 متاثرین بدستور بڑھتے جا رہے ہیں۔

    توقع کی جا رہی تھی کہ لاک ڈاؤن میں نرمی کے بعد شہر کے ہوٹل، ریستوران اور خریداری کے مراکز کھولے جا سکیں گے۔

    لیکن سنیچر کے روز میئر کلاڈیا شینبام نے کہا کہ اگلے ہفتے تک شہر میں سخت ترین لاک نافذ ڈاؤن رہے گا۔

    میکسیکو میں ابھی کورونا وائرس کی وبا اپنے عروج کو نہیں پہنچی ہے لیکن جمعہ کے روز اموات 20،000 سے تجاوز کرگئیں۔

    میکسیکو میں اب تک کورونا وائرس سے متاثرہ افراد کی تصدیق شدہ تعداد 170،000 ہے لیکن ماہرین کا ماننا ہے کہ اصل تعداد اس سے کہیں زیادہ ہو سکتی ہے۔

17. 20 جون 2020کورونا کی وجہ سے سماجی دوری، یہ دو میٹر ہوتا کتنا ہے؟

    تین آسٹریلوی کوالا ہوں یا ایک مائیکل جورڈن یا پھر نصف واکس ویگن بیٹل، یہ وہ فاصلہ ہے جتنا آپ کو کسی بھی فرد سے کورونا کی وبا کے دوران سماجی دوری اختیار کرتے ہوئے رہنا چاہیے اور اگر بات سمجھ نہیں آئی تو یہ ویڈیو دیکھ کر سمجھ لیں۔

18. 20 جون 2020روس: ایک دن میں کووڈ 19 کے تقریباً 8000 نئے متاثرین کی تصدیق

    

    ،تصویر کا ذریعہReuters

    روس میں سنیچر کے روز ناول کورونا وائرس کے 7889 نئے متاثرین کی تصدیق کی گئی ہے۔

    روس میں کورونا وائرس کا بحران شروع ہونے کے بعد اب تک متاثرہ افردا کی مجموعی تعداد 576،952 ہوگئی ہے۔

    نیشنل کورونا وائرس ریسپانس سینٹر کے مطابق گذشتہ 24 گھنٹوں کے دوران 161 افراد ہلاک ہوگئے جس کے بعد سرکاری طور پر اموات کی تعداد 8002 ہوگئی ہے۔

19. 20 جون 2020جنوبی افریقہ نے کووڈ 19 سے نمٹنے کے لیے ایک ارب ڈالر کا قرضہ حاصل کر لیا

    

    ،تصویر کا ذریعہReuters

    بریکس کے قائم کردہ نئے ترقیاتی بینک نے جنوبی افریقہ کے لیے کووڈ 19 ایمرجنسی قرضے کی مد میں ایک ارب ڈالر کی منظوری دی ہے تاکہ عالمی وبا کے دوران ملک سماجی و معاشی اثرات کا مقابلہ کر سکے۔

    خبر رساں ادارے اے ایف پی کے مطابق جنونی افریقہ عالمی وبا سے قبل بھی بحران کا شکار تھا لیکن اب صنعتی اعتبار سے افریقہ کا سب سے ترقی یافتہ ملک کڑِے امتحان سے گزر رہا ہے۔

    وزارت خزانہ کے مطابق: ’یہ قرضہ فوری مطالبے کی صورت میں جنوبی افریقہ کی حکومت کو دیا جا رہا ہے۔‘

    امکان ہے کہ وزیر خزانہ بدھ کو پالیمان کے سامنے ایک ایمرجنسی بجٹ پیش کریں گے جس میں اخراجات میں بڑی تبدیلی کی جائے گی۔

    ملک میں دو ماہ تک سخت اقدامات رہے لیکن اب معاشی سرگرمیاں بحال کرنے کے لیے صورتحال میں نرمی لائی گئی ہے۔

    یہاں اب تک کورونا کے کل 87,715 مصدقہ متاثرین ہیں اور 1831 اموات ہوئی ہیں۔

    نئے ترقیاتی بینک کی بنیاد بریکس نے ڈالر تھی جس کے رکن برازیل، روس، انڈیا، چین اور جنوبی افریقہ ہیں۔

20. 20 جون 2020اسلام آباد: سیکٹر جی نائن ٹو، تھری اور کراچی کمپنی میں لاک ڈاؤن میں توسیع

    اسلام آباد کے ڈپٹی کمشنر نے کہا ہے کہ پاکستان کے دارالحکومت کے سیکٹر جی نائن ٹو اور تھری کے علاوہ کراچی کمپنی میں لاک ڈاؤن میں تین روزہ توسیع کر دی گئی ہے۔

    ان کا کہنا تھا کہ ’لاک ڈاؤن نافذ ہونے سے اب تک 600 سے زیادہ مثتبہ متاثرین کے نمونے لیے جا چکے ہیں۔ روزانہ کی بنیاد پر متاثرین کا جائزہ لیا جا رہا ہے۔‘

    X پوسٹ نظرانداز کریں

    X کا مواد دکھانے کی اجازت دی جائے؟?

    اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔

    Accept and continue

    تنبیہ: بی بی سی دیگر ویب سائٹس کے مواد کی ذمہ دار نہیں ہے۔

    X پوسٹ کا اختتام