برطانوی فضائی اڈے کے قریب مبینہ دہشت گردی کے الزام میں برطانوی۔ایرانی شہری گرفتار: پولیس
،تصویر کا ذریعہGetty Images
برطانیہ کی کاؤنٹر ٹیررازم پولیس کا کہنا ہے کہ اس نے ایک برطانوی-ایرانی شخص کو آر اے ایف فیئرفورڈ فضائی اڈے کے خلاف دہشتگردی کی کارروائیوں کی تیاری کے شبے میں گرفتار کیا ہے۔
اس 27 سالہ شخص کو لندن کے علاقت ویسٹ منسٹر سے گرفتار کیا گیا ہے۔ ایک دوسرے شخص، جو 26 سالہ برطانوی شہری ہے، سے بھی پوچھ گچھ کی گئی ہے، جبکہ علاقے میں واقع دو جائیدادوں کی تلاشی لی گئی ہے۔
اتوار کے روز گلوسٹرشائر میں واقع فضائی اڈے کے قریب گرفتار کیے گئے بیس سے کچھ زائد عمر کے پانچ افراد بدستور ضمانت پر ہیں۔ یہ پانچوں افراد لندن سے تعلق رکھنے والے برطانوی شہری تھے۔
کاؤنٹر ٹیررازم پولیس کی سینیئر کوآرڈینیٹر وکی ایونز کا کہنا ہے کہ پولیس ’تمام ممکنہ پہلوؤں پر غور کر رہی ہے، جن میں کسی غیر ملکی ریاست کے ممکنہ کردار کا امکان بھی شامل ہے۔‘
انھوں نے کہا ’گلوسٹرشائر میں پیش آنے والے واقعات سے متعلق تحقیقات انتہائی پیچیدہ ہیں اور ہماری ماہر ٹیمیں مختلف پہلوؤں سے تحقیقات کر رہی ہیں۔‘
انھوں نے مزید کہا ’میں عوام کی مسلسل حمایت اور صبر پر ان کا شکریہ ادا کرنا چاہوں گی۔‘
خیال رہے اتوار کی صبح دیگر پانچ افراد کو اس وقت گرفتار کیا گیا تھا جب امریکی فضائیہ کے زیرِ انتظام اڈے کی جانب ’تین مشتبہ گاڑیوں‘ کے جانے کی اطلاع ملی تھی۔