‘రెండు బస్తాల గోధుమ పిండి కోసం 14 ఏళ్ల కూతురికి పెళ్లి చేసిన తండ్రి’- గాజాలో పరిస్థితులపై ఐరాస సంస్థ నివేదికలో ఇంకా ఏమున్నాయంటే...

గాజా స్ట్రిప్‌లో మహిళలు, బాలికలపై లైంగిక దాడులు, బలవంతపు బాల్య వివాహాలు ఆందోళనకర స్థాయిలో పెరుగుతున్నాయని ఐక్యరాజ్యసమితి జనాభా నిధి (UNFPA) తాజా నివేదికలు స్పష్టం చేస్తున్నాయి.

దీర్ఘకాలంగా సాగుతున్న యుద్ధం, గాజాలో మహిళలను లింగపరమైన హింసకు గురిచేసే పరిస్థితులను సృష్టించిందని ఆ నివేదికలు వెల్లడించాయి.

గాజా, ఖాన్ యూనిస్ నగరాల్లో అత్యంత రద్దీగా ఉండే శరణార్థి శిబిరాల్లో జీవిస్తున్న 230 మంది మహిళలు ఎదుర్కొన్న హింస, అనుభవాల ఆధారంగా మరో నివేదిక రూపొందింది. దాని ప్రకారం..

రేపిస్టులతోనే పెళ్లి: "అత్యాచారానికి గురైన బాధితులను, పరువు కోసం, కళంకం నుంచి తప్పించడానికి వారిపై దాడి చేసిన వ్యక్తులకే ఇచ్చి పెళ్లి చేస్తున్నారు. ఇలాంటి కేసులు బయటపడిన మరుసటి రోజే అక్కడికక్కడే పెళ్లి, వేడుకులను జరిపించేస్తున్నారు." అని శిబిరంగా మారిన పాఠశాలలో నివసిస్తున్న ఓ మహిళ తెలిపారు.

ఆహారం కోసం పెళ్లి: "గత ఏడాది కరవు సమయంలో, తనతో పాటు బిడ్డల కడుపు నింపేందుకు కేవలం 2 బస్తాల గోధుమ పిండికి బదులుగా తన 14 ఏళ్ల కూతురిని ఇచ్చి ఓ తండ్రి పెళ్లి చేశారు" అని మరో మహిళ గుర్తు చేసుకున్నారు.

2023లో గాజా, హమాస్‌కి మధ్య యుద్ధం తలెత్తడానికి ముందు కనీసం ఊహించడానికి కూడా వీల్లేని ఘటనలు ఎన్నో జరిగినట్లు వేర్వేరు శిబిరాల్లో నివసిస్తున్న ఆరుగురు మహిళలు తెలిపారు.

"ఈ ధోరణి చాలా భయానకంగా ఉంది" అని పాలస్తీనాకు యూఎన్ఎఫ్‌పీఏ ప్రతినిధి నెస్టర్ ఓవోముహంగి అన్నారు.

"గాజాలో గత మూడేళ్లలో సంభవించిన వేలాది మరణాలు, ఆకలి, విధ్వంసం, నిరంతర వలసల కారణంగా సామాజిక వ్యవస్థలు కుప్పకూలాయి. పరిస్థితి పూర్తిగా దిగజారిపోయింది. ఇక్కడ వ్యవస్థ అనేదే లేదు" అని ఆయన చెప్పారు.

ఆహార మార్కెట్లు తెరుచుకున్నా సరుకులు కొనుక్కునేందుకు ప్రజల దగ్గర డబ్బులు లేవు. పేదరికం, ఆకలితో జనం అలమటిస్తున్నారు. విరాళాలపైనే ఆధారపడి జీవిస్తున్నారు.

గాజాలోని మొత్తం 20 లక్షల మందికి పైగా జనాభా తప్పనిసరి పరిస్థితుల్లో తమ ఇళ్లను వదిలి, దెబ్బతిన్న భవనాల్లో లేదా అపరిశుభ్రంగా ఉన్న గుడారాల్లో దుర్భరమైన జీవనం గడుపుతున్నారు. ప్రభుత్వ సేవలు దాదాపుగా లేవు.

కాల్పుల విరమణ ఒప్పందం జరిగినా ఇజ్రాయెల్ ఇంకా వైమానిక దాడులను కొనసాగిస్తూనే ఉంది.

గాజాలో యుద్ధానికి ముందు చదువులో బాలురుతో పోలిస్తే బాలికలదే పైచేయి. ప్రస్తుతం చాలాకాలంగా పాఠశాలు మూతబడి ఉండటంతో ఎంతోమంది చిన్నారులు చదువుకు దూరమయ్యారు.

కుటుంబాలను పోషించేందుకు అబ్బాయిలు అసంఘటిత రంగంలో ఉద్యోగాలను వెతుక్కునే ఒత్తిడిలో ఉన్నారు.

మరోవైపు అమ్మాయిల భద్రతకు సంబంధించిన సమస్యలు విపరీతంగా పెరిగిపోయాయి.

పెరుగుతున్న బాల్య వివాహాలు

కచ్చితమైన గణాంకాలను సేకరించడం కష్టమైనదే అయినా, ఈ ఏడాది మొదటి త్రైమాసికంతో పోలిస్తే రెండో త్రైమాసికంలో బలవంతపు బాల్య వివాహాల (12-17 ఏళ్ల వయసు) నమోదు కేసులు ఏకంగా 123% పెరిగాయని యూఎన్ఎఫ్‌పీఏ తెలిపింది.

శిబిరాలు ఇరుకు గదుల్లో ఉండటం, కనీస గోప్యత లేకపోవడం వల్ల వేధింపులు పెరిగాయి. ఈ నేపథ్యంలోనే తమ గౌరవం, కూతుళ్లను రక్షించుకునే మార్గంగా బాలికలకు వివాహాలను జరిపించేస్తున్నారు.

బాధ్యత వదిలించుకునేందుకు...

"యుద్ధంలో తల్లిదండ్రులను కోల్పోయిన అనాథ బాలికల పరిస్థితి మరీ దయనీయంగా ఉంది. ఆ బాలికల బాధ్యత, పోషణ ఖర్చు భరించలేక బంధువులు (ముఖ్యంగా మేనమామలు/బాబాయిలు) 14, 15 ఏళ్ల వయసులోనే వారికి బలవంతంగా వివాహాలు చేస్తున్నారు. వారికి పెళ్లి, జీవితం అంటే ఏమిటో కూడా తెలియదు" అని ఆ బాలికల వివాహానికి హాజరైన ఓ మహిళ తెలిపారు.

దీనికి తోడు బాల్య వివాహాల వల్ల టీనేజ్ ప్రెగ్నెన్సీలు పెరుగుతున్నాయని యూఎన్ఎఫ్‌పీఏ ఆందోళన వ్యక్తం చేస్తోంది.

ఓ నివేదిక ప్రకారం, శారీరకంగా గర్భం దాల్చేందుకు ఏమాత్రం సిద్ధంగా లేని ఆ బాలికలు తీవ్రమైన ఆరోగ్య సమస్యలు ఎదుర్కొంటున్నారు. గర్భస్రావాలు కావడం లేదా తక్కువ బరువున్న శిశువులకు జన్మనివ్వడం జరుగుతోంది.

"బిడ్డను కనేందుకు శారీరకంగా సిద్ధంగా లేని, అపరిశుభ్రమైన స్థితిలో, ఆకలితో అలమటిస్తున్న చిన్నారులకు శిశువును ఎలా చూసుకోవాలో తెలియదు. కనీసం తమను తాము ఎలా చూసుకోవాలో కూడా వారికి తెలియదు" అని ఓవోముహంగి అన్నారు.

గాజాలో కనీస వివాహ వయసు 17 సంవత్సరాలు. తల్లిదండ్రుల అనుమతి, కోర్టు ఆమోదం ఉంటే చట్టం ఈ నిబంధనకు మినహాయింపు ఇస్తుంది. 14 ఏళ్ల 7 నెలల వయసు ఉంటే వివాహానికి కోర్టు అనుమతించవచ్చు.

అయితే, యుద్ధం కారణంగా కుటుంబ వ్యవహారాలను చూసుకునే ఇస్లామిక్ కోర్టులు చాలావరకు మూతపడి ఉండటంతో బాధితులకు ఎలాంటి రక్షణ లేకుండా పోయిందని స్థానిక షరియా లా నిపుణులు ఒకరు తెలిపారు.

‘బాత్‌రూమ్‌లు కూడా వాడుకునే పరిస్థితి లేదు’

పరువు పోతుందన్న భయం, ప్రతీకార దాడుల వల్ల గాజాలో చాలావరకు లైంగిక హింస కేసులు బయటకు రావడం లేదు.

రాత్రి పూట క్యాంపుల్లో మహిళలు, బాలికలకు ఏమాత్రం రక్షణ లేకుండా పోయింది. దీంతో వారు క్యాంప్ టాయిలెట్లు, బాత్‌రూమ్‌లు కూడా వాడుకునే పరిస్థితి లేదని యూఎన్ నివేదిక తెలిపింది.

వితంతువులపై లైంగిక దోపిడీ...

ముఖ్యంగా భర్తలను కోల్పోయిన మహిళలు తీవ్ర లైంగిక దోపిడీకి గురవుతున్నారు. "నీకు టెంట్ ఇస్తాను, రాత్రి నాతో గడపాలి" అని ఒక క్యాంప్ ప్రతినిధి తనను అడిగినట్లు ఒక బాధిత మహిళ వాపోయింది.

మహిళల భద్రత కోసం మెరుగైన షెల్టర్లు, మరుగుదొడ్లు, విద్యుత్ దీపాలు వంటి కనీస సదుపాయాలను గాజాలోకి అనుమతించాలని మానవతా సంస్థలు ఇజ్రాయెల్‌ను కోరుతున్నాయి.

విద్య, వైద్య వ్యవస్థలను మెరుగుపరచడం సహా దీర్ఘకాలంలో గృహ హింస, బాల్య వివాహాలను అడ్డకునేందుకు అక్కడ చర్యలు కొనసాగుతున్నాయి.

అయితే గాజా ప్రజల జీవితాలు ఇప్పటికే కోలుకోలేని విధంగా దెబ్బతిన్నప్పటికీ, కనీసం భవిష్యత్తులోనైనా భద్రంగా బతకగలమనే ఆశతో అక్కడి మహిళలు ఎదురుచూస్తున్నారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)