రంగుల హరివిల్లులాంటి నిర్మాణాలు.. ప్రపంచ ప్రసిద్ధ 8 కలర్‌ఫుల్ కట్టడాలు ఇవే..

మనసుకు ఆహ్లాదాన్ని కలిగించేందుకు రంగులను వినియోగించడం ఆది మానవుడి దగ్గరనుంచీ ఉన్నదే.

భూమిలో దొరికే రాళ్ల నుంచి రంగులను చేసి అందమైన రూపాలకు ప్రాణం పోశారు ఎంతో మంది ఆర్టిస్టులు, ఆర్కిటెక్ట్‌లు.

ఎందుకంటే రంగులు.. కనువిందు చేస్తాయి.

తన్మయత్వాన్ని కలిగిస్తాయి.

అలా రంగులను వాడుకొని సందర్శకులకు అద్భుతమైన అనుభవాన్ని కలిగించే ప్రముఖ కట్టడాల జాబితా ఇది.

1. శ్రీ రంగనాథ స్వామి ఆలయం, తమిళనాడు, భారతదేశం

ఆకర్షణీయమైన రంగురంగుల కట్టడాలకు భారతదేశంలోని తమిళనాడు ప్రసిద్ధి. శ్రీ రంగనాథ స్వామి ఆలయ నిర్మాణ పనులు క్రీస్తు శకం ఒకటో శతాబ్దంలోనే మొదలైనా దాని నిర్మాణ పనులు వేర్వేరు రాజ్యాల ఆధ్వర్యంలో 20వ శతాబ్దం వరకు కొనసాగాయి.

ఈ ఆలయానికి 21 గోపురాలు ఉన్నాయి. వాటిపై ఉన్న వర్ణాలు.. భక్తులు, సందర్శకులలో ఆధ్యాత్మిక భావన రేకెత్తించడం సహా అద్భుత ఊహా ప్రపంచంలోకి తీసుకెళ్తాయి.

2. పాలౌ డి ల మ్యూజిక కాటలానా, బార్సిలోనా, స్పెయిన్

స్పెయిన్‌లో 1908లో అత్యంత వేగంగా పారిశ్రామికీకరణ జరుగుతున్న, సుసంపన్న ప్రాంతం.. కాటలానా.

దాని విభిన్నమైన సంస్కృతిని సూచించే విధంగా ప్రపంచ ప్రసిద్ధిగాంచిన కట్టడాల స్ఫూర్తితో లూయి డొమెనెక్ ఈ కాన్సర్ట్ హాల్ రూపొందించారు.

3. గార్డియన్ బిల్డింగ్, డెట్రాయిట్, మిషిగన్, యూఎస్

1929లో ప్రముఖ ఆర్కిటెక్ట్ విర్ట్ సి. రోలాండస్ రూపొందించిన ఈ ఆఫీస్ బిల్డింగ్.. 'కేథడ్రల్ ఆఫ్ ఫైనాన్స్‌'గా స్థానికంగా ప్రాచుర్యం పొందింది.

ప్రపంచవ్యాప్తంగా ఉన్న ప్రముఖ కళాత్మకమైన హర్మ్యాలలో ఇదొకటి.

4. డ బియెన్‌కార్ఫ్ డిపార్ట్‌మెంట్ స్టోర్, ఐందోవన్, నెదర్లాండ్స్

డచ్ ఫార్మ్ ల్యాండ్స్‌ని విమానం నుంచి చూసినప్పుడు కలిగిన స్పూర్తితో ఇటాలియన్ ఆర్కిటెక్ట్, ఆర్టిస్ట్ జియో పాంటీ నెదర్లాండ్స్‌‌లోని ఈ డిపార్ట్‌మెంట్ స్టోర్‌ని డిజైన్ చేసినట్లు పలు నివేదికలు చెబుతున్నాయి. కిటికీలు లేకుండా ఇంత భారీ ఆకర్షణీయ నిర్మాణాన్ని చేపట్టడం పాంటీ నైపుణ్యానికి నిదర్శనమని అవి పేర్కొన్నాయి.

5. రివర్సబుల్ డెస్టినీ లోప్ట్స్, టోక్యో, జపాన్

అమెరికాకు చెందిన ప్రముఖ న్యాయవాది, రచయిత హెలెన్ కెల్లర్ జ్ఞాపకార్థం 2005లో ఈ రెంటల్ స్కీమ్‌ని రూపొందించారు. తాము ఎంచుకునే రంగులు నివాసితుల మతిపోగొట్టేలా ఉండాలని భావించినట్లు ఆర్టిస్ట్, కవి జిన్స్ తెలిపారు.

6. మైషిమ వేస్టే ఇన్సినెరేటర్ ప్లాంట్, ఒసాక, జపాన్

చేతితో పసుపు, ఎరుపు రంగు గీతలను గీసినట్లు ఉన్న ఈ వేస్ట్ ఇన్సినెరేటర్ ప్లాంట్ (చెత్త నుంచి కరెంట్ ఉత్పత్తి చేసే కర్మాగారం) బయటకు చూడడానికి ఓ అమ్యూస్‌మెంట్ పార్క్‌లా ఉంటుంది.

తాను డిజైన్ చేసిన ఈ నిర్మాణం పూర్తవడానికి ఏడాది ముందే ఆస్ట్రియన్ విజువల్ ఆర్టిస్ట్, ఆర్కిటెక్ట్ హండర్ట్‌వాసర్ 2000వ సంవత్సరంలో చనిపోయారు.

7. లెగనీస్ సెంట్రల్ లైబ్రరీ, లెగనీస్, స్పెయిన్

గ్రంథాలయం లోపల పుస్తకాలను షెల్ఫ్‌లో పేర్చినట్లుగా భవనం ఆకృతినీ అదే విధంగా రూపొందించారు బీఎన్ అసోసియడోస్ ఆర్కిటెక్టార్స్.

గోడలపై సూర్యకిరణాలు పడినప్పుడు, అందులోని సాఫ్ట్ పాస్టెల్స్, మ్యాట్ టెక్చర్.. అచ్చం పేపర్ వంటి అనుభూతిని కలిగిస్తాయని రచయిత మజాడే తెలిపారు.

8. క్రాయ్‌డన్ కొలనాడె, లండన్, యూకే

పాదచారుల కోసం 2023లో దీనిని నిర్మించారు. వేలాది 3డీ హ్యాండ్‌మేడ్ పోర్సీలియన్ టైల్స్‌ని పొదిగి.. రెండు గోడలు, 16 పెద్ద స్తంభాలతో ఆడమ్ ఫర్మాన్ దీనిని రూపొందించారు.

సమీపంలోని ఈస్ట్ క్రాయ్‌డన్ రైల్వే స్టేషన్‌కి వచ్చే ప్రయాణికులకు, పాదచారులకు అపూర్వమైన అనుభూతిని ఇచ్చే లక్ష్యంతో దీనిని రూపొంచినట్లు ఫర్మాన్ తెలిపారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)