கோவை, கரூர் அரசு மருத்துவமனை மாத்திரை கவர்களில் இந்தி வந்தது எப்படி?

தமிழ்நாட்டில் கரூர் மற்றும் கோவை அரசு மருத்துவமனைகளில் வழங்கப்பட்ட மாத்திரை கவர்களில் தமிழ் மற்றும் ஆங்கிலத்துடன் இந்தி மொழியும் இடம்பெற்ற கவர்களை தனது சமூக வலைதளப்பாக்கத்தில் பகிர்ந்த திமுகவின் முன்னாள் டி.ஆர்.பி. ராஜா தமிழ்நாட்டில் மும்மொழிக் கொள்கை அமலுக்கு வந்துவிட்டது போல எனக் குறிப்பிட்டிருந்தார்.

இதுகுறித்து விளக்கம் அளித்த சுகாதாரத்துறை அமைச்சர் அருண்ராஜ் "கரூர் அரசு மருத்துவக் கல்லூரி மருத்துவமனையில் நோயாளிகளுக்கு வழங்கப்படும் மாத்திரை கவர்கள் பொதுவாக மத்திய சிறையில் இருந்து பெறப்பட்டு, அதில் 'காலை / மதியம் / இரவு' போன்ற குறிப்புகள் தமிழ் மொழியில் மட்டுமே முத்திரையிடப்பட்டு வழங்கப்படுவது வழக்கம். கடந்த டிசம்பர் 2025-ல், மத்திய சிறையிலிருந்து வரும் கவர்களுக்கு தட்டுப்பாடு ஏற்பட்டதால், ஈரோடு மாவட்ட அச்சக தொழில் கூட்டுறவு சங்கம் மூலம் 4 லட்சம் கவர்கள் அச்சிட கடந்த திமுக ஆட்சியில் டிசம்பர் 31, 2025 அன்று அவசர ஆணை வழங்கப்பட்டு, அந்த கவர்கள் 2026 ஜனவரி மாதத்திலேயே மக்களிடம் புழக்கத்திற்கு வந்துவிட்டன. அதேபோல் கோவையில் சரியாக மூன்று ஆண்டுகளுக்கு முன்பே திமுக ஆட்சியில் அலுவலக நடைமுறையால் அதிகாரப்பூர்வமாக அங்கீகரிக்கப்பட்டு நோயாளிகளிடமும் புழக்கத்திற்கு வந்துவிட்டது" என்று குறிப்பிட்டிருந்தார்.

இதுகுறித்து பிபிசி தமிழிடம் பேசிய கோவை அரசு மருத்துவமனை தர மேலாளர் கடந்த 2,3 ஆண்டுகளாகவே இந்த கவர் புழக்கத்தில் இருந்து வந்ததாகவும் இதுகுறித்தான பிரச்னை கவனத்திற்கு வந்தவுடன் உடனடியாக இந்தி எழுத்துக்கள் அச்சிடப்பட்ட கவர்கள் நிறுத்தப்பட்டு இருமொழி எழுத்துக்கள் அடங்கிய கவர்கள் விநியோகிக்கப்பட்டு வருவதாகத் தெரிவித்தார்

அதேபோல இதுகுறித்துப் பேசிய கரூர் அரசு மருத்துவமனை முதல்வர் இந்தி எழுத்துக்கள் அச்சிடப்பட்ட கவர்கள் டிசம்பர் 2025 அச்சிடப்பட்டதாகவும் அந்த கவர்கள் பிப்ரவரி மாதத்திலேயே தீர்ந்துவிட்டதாகவும் மீதமான சில கவர்கள் மட்டும் நேற்றையதினம் பயன்படுத்தப்பட்டு பிரச்னை கவனத்துக்கு வந்த உடனேயே அவை நிறுத்தப்பட்டுவிட்டதாகவும் தெரிவித்தார்.

- இது, பிபிசிக்காக கலெக்டிவ் நியூஸ்ரூம் வெளியீடு