ரிசர்வ் வங்கி ரெப்போ ரேட்டை உயர்த்தினால் சாமானியருக்கு என்ன பாதிப்பு?

ரெப்போ ரேட் என்பது என்ன?

ரெப்போ ரேட் என்பது, ரிசர்வ் வங்கி, வங்கிகளுக்கு வழங்கும் குறுகிய காலக் கடனுக்கான வட்டி விகிதம். இந்த வட்டி விகிதத்தை ரிசர்வ் வங்கி அவ்வப்போது மாற்றும்.

கடந்த 4 ஆண்டுகளிலும் ரெப்போ விகிதத்தில் மாற்றங்கள் செய்யப்பட்டுள்ளன. 2023-ஆம் ஆண்டு ரெப்போ ரேட் 6.50 சதவீதமாக இருந்தது. அதன் பிறகு படிப்படியாகக் குறைக்கப்பட்டது. கடைசியாக கடந்த டிசம்பர் மாதம் 5.25 சதவீதமாகக் குறைக்கப்பட்டது. அதன்பிறகு எந்த மாற்றமும் செய்யப்படாமல் இருந்தது.

இந்த நிலையில், அக்டோபர் 7-ஆம் தேதி ரிசர்வ் வங்கியின் நிதிக் கொள்கைக் குழு கூட்டம் நடைபெற்றது. இதில் ரெப்போ விகிதத்தை 0.25 சதவீதம் உயர்த்த முடிவு செய்யப்பட்டது.

இதன்படி, ரெப்போ ரேட் 5.25 சதவீதத்தில் இருந்து 5.50 சதவீதமாக உயர்ந்துள்ளது.

இதுகுறித்து ரிசர்வ் வங்கி ஆளுநர் சஞ்சய் மல்ஹோத்ரா பேசும்போது, எதிர்காலத்தில் வட்டி விகிதத்தை மேலும் உயர்த்துவதற்கான வாய்ப்பும், இதே அளவில் தொடர்வதற்கான வாய்ப்பும் இருப்பதாகத் தெரிவித்துள்ளார். அதாவது, உடனடியாக வட்டி விகிதம் குறைக்கப்படுவதற்கான வாய்ப்பு இல்லை என்பதையே இது காட்டுகிறது.

ரெப்போ ரேட் உயர்வால் சாமான்யருக்கு என்ன பாதிப்பு?

ரெப்போ ரேட் என்பது ரிசர்வ் வங்கிக்கும் வங்கிகளுக்கும் இடையிலான வட்டி விகிதம். அதனால், "இதனால் நமக்கு என்ன பாதிப்பு?" என்ற கேள்வி எழலாம்.

இதுகுறித்து வங்கி அதிகாரிகளிடம் கேட்டபோது, அவர்கள் சில விஷயங்களை விளக்கினர்.

ரிசர்வ் வங்கி 5.50 சதவீத வட்டியில் வங்கிகளுக்கு கடன் வழங்குகிறது என்பதற்காக, வங்கிகளும் வாடிக்கையாளர்களுக்கு அதே 5.50 சதவீத வட்டியில் கடன் வழங்குவதில்லை. ஒவ்வொரு வங்கியும் தனது விதிமுறைகளுக்கு ஏற்ப வெவ்வேறு வட்டி விகிதத்தில் கடன் வழங்கும்.

தற்போது ரெப்போ ரேட் உயர்ந்துள்ளதால், வங்கிகளுக்கு கிடைக்கும் கடனுக்கான வட்டி செலவு அதிகரிக்கிறது. இந்த கூடுதல் செலவு, வாடிக்கையாளர்களுக்கான கடன் வட்டியிலும் பிரதிபலிக்க வாய்ப்பு உள்ளது.

இதனால், வங்கிகளில் வீட்டுக் கடன், வாகனக் கடன் அல்லது தனிநபர் கடன் வாங்கியிருப்பவர்களுக்கு, கடனுக்கான வட்டி விகிதம் அதிகரிக்க வாய்ப்பு உள்ளது.

அதன் விளைவாக, உங்கள் மாதத் தவணையான இ.எம்.ஐ அதிகரிக்கலாம். அல்லது இ.எம்.ஐ தொகை மாறாமல் இருந்தால், கடனைத் திருப்பிச் செலுத்த வேண்டிய கால அவகாசம்,, அதிகரிக்கலாம்.

உதாரணமாக, நீங்கள் தற்போது மாதம் ரூ.2,000 இ.எம்.ஐசெலுத்துகிறீர்கள் என்றால், வட்டி விகிதம் அதிகரித்த பிறகு அது ரூ.2,300 ஆக உயர வாய்ப்பு உள்ளது.

அல்லது, தற்போது 12 ஆண்டுகளில் முடிக்க வேண்டிய கடன், வட்டி விகித மாற்றத்தால் 15 ஆண்டுகளில் முடியும் நிலை ஏற்படலாம்.

எனவே, ரெப்போ ரேட் உயர்வுக்குப் பிறகு, உங்கள் கடனுக்கான இ.எம்.ஐஎவ்வளவு மாறும் அல்லது கடன் காலம் எவ்வளவு நீளும் என்பதை உங்கள் வங்கியில் கேட்டுத் தெரிந்துகொள்ளலாம்.

- இது, பிபிசிக்காக கலெக்டிவ் நியூஸ்ரூம் வெளியீடு