டெல்லியில் எதிர்க்கட்சிகள் 3வது நாளாக போராட்டம்

சிறப்பு தீவிர வாக்காளர் பட்டியல் திருத்தம் எனப்படும் எஸ் ஐ ஆர் நடைமுறையில் முறைகேடுகள் நடந்ததாக எழுந்துள்ள குற்றச்சாட்டுகளை முன்வைத்து இந்திய தலைமைத் தேர்தல் ஆணையர் ஞானேஷ் குமார் பதவி விலகக்கோரி எதிர்க்கட்சிகள் நடத்தும் போராட்டம் 3வது நாளை எட்டியுள்ளது.

ஏற்கனவே கடந்த செவ்வாய்க்கிழமை அன்று போராட்டத்தில் ஈடுபட்ட ராகுல் காந்தி உள்ளிட்டோா் கைது செய்யப்பட்டு, பின்னா் விடுவிக்கப்பட்டனா். அதைத் தொடர்ந்து, டெல்லி ஜந்தா் மந்தரில் புதன்கிழமை அன்று போராட்டத்தில் ஈடுபட்ட இந்தியா கூட்டணி எம்.பி.க்கள் பேருந்தில் சென்றனர். அந்த பேருந்துகளை காவல்துறையினா் நடுவழியில் தடுத்து நிறுத்தி, ராகுல் காந்தி, பிரியங்கா காந்தி உள்ளிட்டோரை குண்டுக்கட்டாக தூக்கிச் சென்று கைது செய்தனர். பின்னர், நேற்றிரவே காவல்துறையினர் விடுவித்தனர்.

இந்த நிலையில் 3வது நாளில் என்ன நடந்தது என்பதை இந்த காணொளியில் பார்க்கலாம்.

தலைமைத் தேர்தல் ஆணையர் ஞானேஷ் குமாருக்கு எதிராக 'இந்தியா' கூட்டணித் தலைவர்கள் மற்றும் நாடாளுமன்ற உறுப்பினர்களின் போராட்டம் இன்றும் தொடர்ந்து நடைபெற்று வருகிறது.

காங்கிரஸ் தலைவர் மல்லிகார்ஜுன கார்கே 'இந்தியா' கூட்டணி நாடாளுமன்ற உறுப்பினர்கள் மற்றும் தலைவர்களுக்காக மதிய உணவு விருந்து அளித்தார். காங்கிரஸ் இந்த மதிய விருந்தை ஏற்பாடு ஏற்பாடு செய்திருந்தது. இது தொடர்ச்சியாக இரண்டாவது நாளாக அளிக்கப்படும் விருந்தாகும்.

இதில் பிரியங்கா காந்தி, கே.சி. வேணுகோபால், ஜெய்ராம் ரமேஷ், விவேக் தங்கா, மாணிக்கம் தாகூர், ஜோதிமணி, ராஜீவ் சுக்லா, தீபேந்தர் ஹூடா உள்ளிட்ட பல காங்கிரஸ் நாடாளுமன்ற உறுப்பினர்கள் கலந்துகொண்டனர். அதோடு சமாஜ்வாதி கட்சி, சிவசேனா-யுபிடி மற்றும் தேசியவாத காங்கிரஸ் கட்சி ஆகிய கட்சிகளின் தலைவர்கள் பங்கேற்றனர்.

மேலும் இமாச்சலப் பிரதேசம் மற்றும் தெலங்கானா முதல்வர்களான சுக்விந்தர் சிங் சுகு மற்றும் ரேவந்த் ரெட்டியும் இதில் கலந்துகொண்டனர்.

அதன்பிறகு ராகுல் காந்தி, மல்லிகார்ஜுன கார்கே உள்ளிட்ட எதிர்க்கட்சித் தலைவர்கள் ராஜ்காட்டை நோக்கிப் பேரணியாகச் சென்று அங்கு தர்ணா போராட்டத்தில் ஈடுபட்டனர்.

இவர்கள் ஞானேஷ் குமாருக்கு எதிரான முழக்கங்களே எழுப்பினர். அவர் தனது பதவியை ராஜினாமா செய்ய வேண்டும் என்றும், பாஜகவும் தேர்தல் ஆணையரும் கூட்டு சேர்ந்துள்ளதாகக் குற்றம் சாட்டினர்.

டெல்லி மட்டுமன்றி பாட்னா, பெங்களூரு உள்ளிட்ட பல்வேறு இடங்களிலும் இதுதொடர்பான போராட்டங்கள் நடைபெற்றன.

பாட்னாவில் ஆர்.ஜே.டி தலைவர் தேஜஸ்வி யாதவ் தலைமையில், பேரணி நடத்தப்பட்டது.

சட்டப்பேரவைக்கு முன்பாக உள்ள ஷஹீத் ஸ்மராக் பகுதியில் இருந்து லோக் பவனை நோக்கிச் சென்றனர். ஆனால் தலைமைத் தேர்தல் அதிகாரி அலுவலகம் அருகில் காவல்துறையினரால் இவர்கள் தடுத்து நிறுத்தப்பட்டனர். 'ஆக்ரோஷ் மார்ச்' என்று பெயரிடப்பட்ட இந்தப் போராட்டம், வாக்காளர் பட்டியலின் சிறப்பு தீவிர திருத்தத்தில் உள்ள முறைகேடுகள் காரணமாக தலைமைத் தேர்தல் ஆணையர் ஞானேஷ் குமார் ராஜினாமா செய்ய வேண்டும் என்ற கோரிக்கையை மையமாகக் கொண்டது.

காவல்துறையினர் தன்னை வாகனத்தில் அழைத்துச் சென்றபோது செய்தியாளர்களிடம் பேசிய தேஜஸ்வி யாதவ், "எங்களை ஆளுநரைச் சந்திக்க அனுமதிக்கவில்லை. தேசிய ஜனநாயக கூட்டணி தலைவர்கள் ஜனநாயகத்தை அழித்து வருகிறார்கள்" என்றார்.

காக்ரோச் ஜனதா பார்ட்டியின் இந்த போராட்டம் தற்போது பெங்களூரூவையும் அடைந்துள்ளது. காக்ரோச் ஜனதா பார்ட்டி மற்றும் மாணவர் அமைப்புகள் இணைந்து கர்நாடகா மாநிலம் பெங்களூருவில் போராட்டத்தில் ஈடுபட்டனர். இதில், Youtuber துருவ் ரத்தீ மற்றும் நடிகர் பிரகாஷ் ராஜ் ஆகியோர் கலந்துகொண்டனர்.

மறுபுறம் குடியரசுத் தலைவர் திரௌபதி முர்முவைச் சந்திக்க நேரம் கோரப்பட்டுள்ளதாக கே.சி. வேணுகோபால் தெரிவித்தார். அக்டோபர் 2-ம் தேதி முதல் கோரிக்கை கடிதம் அனுப்பப்பட்டதாகவும் இதுவரை எந்த பதிலும் வரவில்லை என்றும் அவர் தெரிவித்தார்.

இந்நிலையில் இந்த போராட்டம் குறித்து பேசிய பாஜக தேசிய தலைவர் நிதின் நபின், "தேர்தல் ஆணையத்தை நிராகரிக்க ராகுல் காந்திக்கு என்ன உரிமை இருக்கிறது? அவ்வளவு தைரியம் இருந்தால், முதலில் அவர் தனது ராஜினாமாவை சமர்பிக்கட்டும். அதன்பிறகு தேர்தல் ஆணையத்திற்கு எதிரான இந்த அராஜக நாடகத்தை நடத்தட்டும்" எனத் தெரிவித்துள்ளார்.

இந்நிலையில் இந்த போராட்டம் குறித்து பேசிய பாஜக தேசிய தலைவர் நிதின் நபின், "தேர்தல் ஆணையத்தை நிராகரிக்க ராகுல் காந்திக்கு என்ன உரிமை இருக்கிறது? அவ்வளவு தைரியம் இருந்தால், முதலில் அவர் தனது ராஜினாமாவை சமர்பிக்கட்டும். அதன்பிறகு தேர்தல் ஆணையத்திற்கு எதிரான இந்த அராஜக நாடகத்தை நடத்தட்டும்" எனத் தெரிவித்துள்ளார்.

- இது, பிபிசிக்காக கலெக்டிவ் நியூஸ்ரூம் வெளியீடு