சிறிய வளைகுடா நாடான பஹ்ரைன் அமெரிக்காவுக்கு எவ்வளவு முக்கியம்? இரான் குறி வைப்பதன் பின்னணி
பஹ்ரைனில் உள்ள அமெரிக்காவின் முன்கூட்டிய எச்சரிக்கை ரேடாரை குறிவைத்து அழித்துவிட்டதாக இரானின் இஸ்லாமிய புரட்சிகர காவல்படை சமீபத்தில் கூறியது. ஆனால், அந்தக் கூற்றை அமெரிக்கா மறுத்தது.
முன்கூட்டிய எச்சரிக்கை ரேடாரின் பணி, ஏவுகணைகள் போன்ற எதிரிகளின் அச்சுறுத்தல்களை சரியான நேரத்தில் கண்டறிந்து அதுபற்றி பாதுகாப்பு அமைப்புக்கு தகவல் தெரிவிப்பதாகும்.
ஒரு சிறிய வளைகுடா தீவு நாடான பஹ்ரைனில் ஏன் அமெரிக்க ரேடார் நிலைநிறுத்தப்பட்டுள்ளது? அமெரிக்காவுக்கு பஹ்ரைன் ஏன் முக்கியத்துவம் வாய்ந்தது? இரான் கூறுவது உண்மையாக இருந்தால், இது அமெரிக்க படைகளுக்கு எவ்வளவு பாதிப்பை ஏற்படுத்தும்?
வளைகுடா வரைபடத்தில் பஹ்ரைன் சிறியதாகத் தோன்றலாம், ஆனால் அமெரிக்கக் கடற்படையை பொறுத்தவரை அதன் பங்கு மிக முக்கியமானது.
அமெரிக்க நாடாளுமன்றத்திற்காக ஆய்வுப் பணிகளை மேற்கொள்ளும் 'காங்கிரஷனல் ரிசர்ச் சர்வீஸின் செப்டம்பர் 2026 அறிக்கைப்படி, 1948 முதல் அமெரிக்க கடற்படை கட்டளை தலைமையகம் பஹ்ரைனில் உள்ளது.
தலைநகர் மனாமாவில் 'நேவல் சப்போர்ட் ஆக்டிவிட்டி பஹ்ரைன்' என்ற அமெரிக்கக் கடற்படையின் முக்கிய ராணுவ தளம் உள்ளது. இது அமெரிக்காவின் ஐந்தாவது கடற்படை பிரிவின் தலைமையகமாகவும், மத்திய கிழக்கில் கடற்படை நடவடிக்கைகளைக் கண்காணிக்கும் மையமாகவும் செயல்படுகிறது.
காங்கிரஷனல் ரிசர்ச் சர்வீஸின் அறிக்கைபடி, அந்தத் தளம் நீண்டகாலமாக அமெரிக்கக் கடற்படை நடவடிக்கைகளுக்கு தேவையான தளவாடங்கள், தகவல் தொடர்பு மற்றும் பிற தேவைகளுக்கான முக்கிய மையமாகச் செயல்பட்டு வருகிறது. மேலும், ஆயிரக்கணக்கான அமெரிக்க ராணுவ வீரர்கள், பணியாளர்கள் மற்றும் அவர்களது குடும்பத்தினர் அங்கு வசிக்கின்றனர்.
பஹ்ரைனில் உள்ள 'கலிஃபா பின் சல்மான்' துறைமுகமும் அமெரிக்காவிற்கு மிக முக்கியமானது. இங்கு அமெரிக்காவின் விமானம் தாங்கி போர்க்கப்பல்கள் மற்றும் படைகளையும் ராணுவத் தளவாடங்களையும் ஏற்றிச் செல்லும் பிரம்மாண்ட கப்பல்கள் நங்கூரமிட முடியும்.
அமெரிக்காவிற்கும் பஹ்ரைனுக்கும் இடையே 1991 முதல் பாதுகாப்பு ஒப்பந்தமும் நடைமுறையில் உள்ளது. அந்த ஒப்பந்தத்தின்படி, பஹ்ரைனில் உள்ள ராணுவ வசதிகள், தளங்கள் மற்றும் வான்வெளியைப் பயன்படுத்த அமெரிக்காவிற்கு அனுமதி உண்டு.
அமெரிக்க கடற்படையின் தகவல்படி, ஐந்தாவது கடற்படை பிரிவின் கண்காணிப்பு எல்லை சுமார் 2.5 மில்லியன் சதுர மைல் பரப்பளவை கொண்ட கடல் பகுதியாகும். இதில் அரேபிய வளைகுடா, செங்கடல், ஓமன் வளைகுடா மற்றும் இந்திய பெருங்கடலின் சில பகுதிகள் இதில் அடங்கும்.
மேலும், ஹோர்மூஸ் நீரிணை, பாப் அல்-மண்டேப் மற்றும் சூயஸ் கால்வாய் போன்ற மிக முக்கிய மூன்று கடல் வழித்தடங்களும் இந்தப் பகுதிக்குள் வருகின்றன.
மனாமாவில் அமைந்துள்ள கட்டளை மையத்திலிருந்து, இவ்வளவு பரந்த கடல் பகுதியில் அமெரிக்கா தனது நடவடிக்கைகளையும், நட்பு நாடுகளுடனான ஒருங்கிணைப்பையும் கண்காணித்து வருகிறது.
பஹ்ரைனின் அமைவிடமும் அதை சிறப்புத்தன்மை வாய்ந்ததாக மாற்றுகிறது. அதன் அமைவிடம் வளைகுடாவின் பெரும்பகுதிக்கு எளிதில் அணுகக்கூடிய வாய்ப்பை வழங்குகிறது. இருப்பினும், வரைபடத்தில் ஒரு இடத்தை பார்த்து மட்டும், அங்கு நிறுவப்பட்ட ரேடார் எவ்வளவு முக்கியமானது என்பதை தீர்மானிக்க முடியாது.
இதற்கு அந்த ரேடாரின் மாதிரி, அதன் செயல்பாட்டு வரம்பு மற்றும் பிற பாதுகாப்பு அமைப்புகளுடனான அதன் இணைப்பு குறித்த தகவல்கள் தேவை. இரான் முன்வைத்துள்ள சமீபத்திய கூற்றில் அத்தகைய தகவல்கள் எதுவும் வெளியிடப்படவில்லை.
ரேடார் என்பது ஏவுகணையை அழிக்கும் திறன் கொண்ட ஆயுதம் அல்ல. இருப்பினும், அது வழங்கும் தகவல்கள் இல்லையெனில், ஒரு ஏவுகணையைச் சரியான நேரத்தில் இடைமறிப்பது கடினமாகிவிடும்.
எனவே, ஒரு முக்கியமான ரேடார் சேதமடைவது தீவிர பாதிப்பை ஏற்படுத்தக்கூடும் என்றாலும், ஒரு ரேடார் செயலிழந்தால் அமெரிக்காவின் ஒட்டுமொத்த பாதுகாப்பு அமைப்பும் முடங்கிவிடும் என்று அர்த்தமல்ல.
இதன் தாக்கம், அந்த ரேடாரின் செயல்பாட்டைப் பொறுத்தும், அதன் இடத்தில் பிற ரேடார்கள் அல்லது சென்சார்ஸ் எவ்வளவு தகவல்களை வழங்க முடியும் என்பதை பொறுத்தும் அமையும்.
மேலும், பஹ்ரைனில் எந்த ரேடார் இலக்கு வைக்கப்பட்டதாக கூறப்படுகிறது என்பதும் தெளிவாகத் தெரியவில்லை.
இரானை பொறுத்தவரை, பஹ்ரைனை இலக்கு வைப்பது எதை காட்டுகிறது?
அமெரிக்க கடற்படையின் ஐந்தாவது கடற்படை தலைமையகம் மற்றும் பிற ராணுவக் கட்டமைப்புகள் பஹ்ரைனில் அமைந்துள்ளதால், அது இரானுக்கு ஒரு முக்கிய இலக்காக மாறுகிறது.
அமெரிக்க ஆய்வு அமைப்பான மூலோபாய மற்றும் சர்வதேச ஆய்வுகளுக்கான மையம், தனது ஒரு பகுப்பாய்வில், வளைகுடாப் பகுதியில் உள்ள அமெரிக்க ராணுவத் தளங்கள் மற்றும் உபகரணங்கள் மீது தாக்குதல் நடத்துவதன் மூலம், அமெரிக்காவின் போர் புரியும் திறனுக்கு நெருக்கடிகொடுக்க இரான் முயல்வதாக குறிப்பிட்டுள்ளது.
அத்தகைய தாக்குதல்கள், அமெரிக்கப் படைகளையும், ராணுவக் கட்டமைப்புகளையும் தங்கள் மண்ணில் அனுமதித்துள்ள வளைகுடா நாடுகளையும் பாதிக்கின்றன. அமெரிக்காவின் இருப்பு தங்களுக்கு பாதுகாப்பை வழங்குகிறதா அல்லது தங்களை மோதல்களுக்கான இலக்காக மாற்றுகிறதா என்ற கேள்வி அந்த நாடுகளுக்கு எழக்கூடும்.
- இது, பிபிசிக்காக கலெக்டிவ் நியூஸ்ரூம் வெளியீடு



