வங்கக்கடலில் அக்டோபர், நவம்பர் மாதங்களில் புயல்கள் அதிகம் உருவாவது ஏன்?

காணொளிக் குறிப்பு, அக்டோபர், நவம்பர் மாதங்களில் புயல்கள் அதிகம் உருவாவது ஏன்?
வங்கக்கடலில் அக்டோபர், நவம்பர் மாதங்களில் புயல்கள் அதிகம் உருவாவது ஏன்?
பிரசுரிக்கப்பட்டது

அக்வான் .. முரசு... அர்னாப்... ஹுத் ஹுத்... டிட்லி... மொந்தா... ஒகி...

இந்தப் புயல்களின் பெயர்களைக் கேள்விப்பட்டிருக்கிறீர்களா?

இந்தப் புயல்கள் எல்லாவற்றுக்கும் ஒரு ஒற்றுமை இருக்கிறது. இவை அனைத்தும் அக்டோபர், நவம்பர் மாதங்களில் உருவானவை! ஏன் ஒவ்வோர் ஆண்டும் இந்த இரண்டு மாதங்களில்தான் வங்கக் கடலில் அதிக புயல்கள் உருவாகின்றன?

இதற்குப் பின்னால் இருக்கும் முக்கியக் காரணம் என்ன தெரியுமா?

இந்திய வானிலை ஆய்வு மையத்தின் தரவுகளின்படி, 1891 முதல் 2025 வரை வங்கக் கடலில் மொத்தம் 1,261 புயல் மற்றும் காற்றழுத்தத் தாழ்வு சார்ந்த அமைப்புகள் பதிவாகியுள்ளன.

இவற்றில் பெரும்பாலானவை அக்டோபர், நவம்பர் மாதங்களில்தான் உருவாகியுள்ளன.

இந்த மாதங்களில் கடல் மேற்பரப்பு வெப்பநிலை சராசரியாக 26.5 டிகிரி செல்சியஸுக்கு மேல் இருப்பது புயல்கள் உருவாவதற்குச் சாதகமாக அமைகிறது என்கின்றனர் விஞ்ஞானிகள்.

குறிப்பாக, தென்மேற்குப் பருவமழை விலகிய பிறகு இந்தியாவின் கிழக்குக் கடற்கரையை ஒட்டிய கடல் பகுதிகளில் வெப்பநிலை அதிகமாக இருக்கும். இதனால் உருவாகும் காற்றழுத்தத் தாழ்வுப் பகுதிகள் வலுப்பெற்று புயல்களாக மாறுகின்றன.

முதலில் காற்றழுத்தத் தாழ்வுப் பகுதி உருவாகும். அது வலுப்பெற்று காற்றழுத்தத் தாழ்வு மண்டலமாகவும், பின்னர் ஆழ்ந்த காற்றழுத்தத் தாழ்வு மண்டலமாகவும் மாறும்.

  • காற்றின் வேகம் மணிக்கு 62 கி.மீ.யை எட்டும்போது அது புயலாக வகைப்படுத்தப்படுகிறது.
  • அதுவே மணிக்கு 89 கி.மீ. வேகத்தைத் தாண்டினால் தீவிரப் புயல்... 118 கி.மீ.யைத் தாண்டினால் மிகத் தீவிரப் புயல்... 168 கி.மீ.யைத் தாண்டினால் அதி தீவிரப் புயல்!
  • மணிக்கு 222 கி.மீ. அல்லது அதற்கு மேல் காற்று வீசினால் அது சூப்பர் புயல்!

அக்டோபர், நவம்பர் மாதங்களில் ஏன் அதிக புயல்கள் உருவாகின்றன என்பதற்கான அறிவியல் காரணம் இதுதான்.

புயல்கள் உருவாவதில் கடல் வெப்பநிலை மற்றும் காற்றின் போக்குகள் முக்கியக் காரணிகளாக இருக்கும் என்று விஞ்ஞானிகள் தெரிவிக்கின்றனர்.

அமராவதி வானிலை ஆய்வு மையத்தின் இயக்குநர் கே. நாகரத்னா பிபிசியிடம் பேசுகையில், தென்மேற்குப் பருவமழை விலகிய பிறகு (பருவமழைக்குப் பிந்தைய காலம்) கிழக்குக் கடற்கரைப் பகுதிகளில் பெரும்பாலும் புயல்கள் உருவாகின்றன என்று தெரிவித்தார்.

"பசிபிக் பெருங்கடலில் உருவாகும் காற்றழுத்தத் தாழ்வுப் பகுதிகள், அந்தமான் கடலின் வழியாக வங்கக் கடலுக்குள் நுழைகின்றன."

''பருவமழைக்கு முன்பு மியான்மர் கடற்கரையை ஒட்டிய கடல் பகுதியில் கடல் மேற்பரப்பு வெப்பநிலை அதிகமாக இருக்கும். இதனால் புயல்கள் அந்தத் திசையை நோக்கி நகர்கின்றன. ஆனால், பருவமழை விலகிய பிறகு வங்கக் கடலில் இந்தியாவின் கிழக்குக் கடற்கரையை ஒட்டிய பகுதிகளில் கடல் மேற்பரப்பு வெப்பநிலை அதிகமாக இருக்கும். இதனால் புயல்கள் இந்த கிழக்குக் கடற்கரையை நோக்கி நகர்கின்றன. காற்றின் நகர்வும் இதற்குப் பங்களிக்கிறது" என்று நாகரத்னா தெரிவித்தார்.

இந்தக் காலகட்டத்தில் வங்கக் கடலின் வெப்பநிலை சராசரியாக 26.5 டிகிரி செல்சியஸுக்கு மேல் இருக்கும் என்றும் அவர் கூறினார்.

இதே விவகாரம் குறித்து இன்காய்ஸ் விஞ்ஞானி பி. சிவய்யாவும் பிபிசியிடம் பேசினார்.

"கடல் மேற்பரப்பு வெப்பநிலை இரண்டு பருவங்களில் உச்சத்தில் பதிவாகிறது. ஒருமுறை மார்ச், ஏப்ரல் மற்றும் மே மாதங்களிலும்... மீண்டும் அக்டோபர் மற்றும் நவம்பர் மாதங்களிலும் இது நிகழ்கிறது," என்று பி. சிவையா கூறினார்.

பருவமழைக்குப் பிறகு குளிர்காலம் தொடங்கினாலும், கடல் மேற்பரப்பு வெப்பநிலை குறைவதில் சிறிது தாமதம் ஏற்படுகிறது என்று அவர் கூறினார்

"இந்தச் சூழ்நிலைகள் காற்றழுத்தத் தாழ்வுப் பகுதி உருவாவதற்குச் சாதகமாக அமைகின்றன" என்று அவர் கூறினார்.

- இது, பிபிசிக்காக கலெக்டிவ் நியூஸ்ரூம் வெளியீடு