தோனியை சிஎஸ்கே வாங்கிய கதை - ஏலத்தில் என்ன நடந்தது?
சென்னை சூப்பர் கிங்ஸ் (சிஎஸ்கே) என்ற பெயரைக் கேட்டவுடன் நம் நினைவுக்கு வரும் முதல் மூன்று விஷயங்களில் தோனியின் முகமும் நிச்சயம் இடம்பெறும்.
இதற்கு முக்கியக் காரணம், 2008ஆம் ஆண்டு முதல் 2026ஆம் ஆண்டு வரை சென்னை அணியில் தோனி ஏற்படுத்திய தாக்கமும், அவரது பயணத்தின் மூலம் ரசிகர்களுக்குக் கிடைத்த மறக்க முடியாத நினைவுகளும்தான்.
தோனி சென்னை சூப்பர் கிங்ஸ் அணிக்காக விளையாடத் தொடங்கி 18 ஆண்டுகள் ஆகிவிட்டன.
ஆனால், அந்தக் காலகட்டத்தில் பிறந்த இளம் ரசிகர்கள் பலருக்கு, 2008ஆம் ஆண்டு நடைபெற்ற முதல் ஐபிஎல் ஏலத்தில் என்ன நடந்தது, தோனியை சென்னை சூப்பர் கிங்ஸ் அணி எப்படி வாங்கியது என்ற பின்னணி தெரியாமல் இருக்கலாம்.
2008ஆம் ஆண்டு ஐபிஎல் தொடர் அறிமுகமானபோது, பெரும்பாலான அணிகள் தங்களுடைய பிராந்தியத்தைச் சேர்ந்த பிரபல வீரர்களை அணியின் அடையாளமாகக் கொண்டிருந்தன.
மும்பை இந்தியன்ஸ் அணிக்கு சச்சின் டெண்டுல்கர், கொல்கத்தா நைட் ரைடர்ஸ் அணிக்கு சௌரவ் கங்குலி, டெல்லி டேர்டெவில்ஸ் அணிக்கு வீரேந்திர சேவாக், ராயல் சேலஞ்சர்ஸ் பெங்களூரு அணிக்கு ராகுல் டிராவிட் எனப் பிரபல வீரர்கள் இடம்பெற்றிருந்தனர்.
ஆனால், சென்னை சூப்பர் கிங்ஸ் அணி, சென்னையிலிருந்து சுமார் 1,700 கி.மீ. தொலைவில் உள்ள ஜார்க்கண்ட் மாநிலத்தின் ராஞ்சியைச் சேர்ந்த மகேந்திர சிங் தோனியைத் தேர்ந்தெடுத்தது.
2008ஆம் ஆண்டு நடைபெற்ற ஐபிஎல் ஏலத்தில் தோனியின் பெயரை ஏலதாரர் ரிச்சர்ட் மேட்லி அறிவித்தபோது, அவரை வாங்குவதற்குச் சென்னை, மும்பை, ராஜஸ்தான் ஆகிய அணிகளுக்கு இடையே கடும் போட்டி ஏற்பட்டது.
4 லட்சம் அமெரிக்க டாலரில் தொடங்கிய ஏலத்தொகை, படிப்படியாக உயர்ந்து 13 லட்சம் அமெரிக்க டாலரை எட்டியது.
அன்று என்ன நடந்தாலும் தோனியை வாங்கியே தீர வேண்டும் என்ற உறுதியுடன் சென்னை சூப்பர் கிங்ஸ் அணி இருந்ததாக, ஏலதாரர் ரிச்சர்ட் மேட்லி நேர்காணல் ஒன்றில் தெரிவித்திருந்தார்.
இறுதியாக, அப்போது சென்னை சூப்பர் கிங்ஸ் அணி நிர்வாகத்தில் இடம்பெற்றிருந்த முன்னாள் கிரிக்கெட் வீரர் வி.பி. சந்திரசேகர், தோனிக்கு 15 லட்சம் அமெரிக்க டாலர் ஏலத்தொகையை அறிவித்தார்.
அதன்பிறகு வேறு எந்த அணியும் ஏலத்தொகையை உயர்த்தவில்லை.
ஒருமுறை... இருமுறை... மூன்றுமுறை...
தோனியை சென்னை அணி வாங்கியதாக ரிச்சர்ட் மேட்லி அறிவித்தார்.
அந்த அறிவிப்புதான் சென்னை சூப்பர் கிங்ஸ் அணிக்கும் மகேந்திர சிங் தோனிக்கும் இடையிலான வெற்றிகரமான பயணத்தின் தொடக்கப்புள்ளியாக அமைந்தது.
- இது, பிபிசிக்காக கலெக்டிவ் நியூஸ்ரூம் வெளியீடு



