காணொளி: இந்திய U-19 அணியின் ஆக்ரோஷமான கொண்டாட்டத்தால் சர்ச்சை

காணொளிக் குறிப்பு, காணொளி: இந்திய U-19 அணி வெற்றி... ஆக்ரோஷமான கொண்டாட்டத்தால் சர்ச்சை
காணொளி: இந்திய U-19 அணியின் ஆக்ரோஷமான கொண்டாட்டத்தால் சர்ச்சை
பிரசுரிக்கப்பட்டது

ஆசியக் கோப்பை இறுதிப்போட்டியில் பாகிஸ்தானுக்கு எதிராக இந்திய 19 வயதுக்குட்பட்டோருக்கான அணி பெற்ற வெற்றிக்குப் பிறகு இந்திய வீரர்கள் வெற்றியை கொண்டாடிய விதம் சமூக வலைத்தளங்களில் பேசுபொருளாக மாறியுள்ளது. பாகிஸ்தான் நிர்ணயித்த 337 ரன்கள் என்ற இலக்கை ஒரு விக்கெட் வித்தியாசத்தில் எட்டி இந்திய அணி சாம்பியன் பட்டத்தைக் கைப்பற்றியது. இந்த வெற்றிக்குப் பிறகு இந்திய வீரர்கள் வெளிப்படுத்திய கொண்டாட்டம் சமூக வலைதளங்களில் கவனம் பெற்ற நிலையில், முன்னாள் கிரிக்கெட் வீரர் சஞ்சய் மஞ்ச்ரேக்கர் இந்திய அணியின் கொண்டாட்டத்தை விமர்சித்துள்ளார்.

மைதானத்தில் தங்களது ஆக்ரோஷத்தை வெளிப்படுத்த விரும்பினால், தங்களுக்கு இணையானவர்களிடம் அதை வெளிப்படுத்த வேண்டும் என்றும் பாகிஸ்தான் அணி தற்போது மென்மையான சுலபமான இலக்காக உள்ளது. எனவே ஆஸ்திரேலியா, நியூசிலாந்து, இங்கிலாந்து அணிகளை நான் பரிந்துரைப்பேன் என தனது எக்ஸ் பக்கத்தில் சஞ்சய் மஞ்சரேக்கர் பதிவிட்டுள்ளார்.

இதற்கிடையே, பாகிஸ்தானுக்கு எதிரான இறுதிப்போட்டியில் இந்திய வீரர்கள் ஆக்ரோஷமாகக் கொண்டாடியதற்கான காரணம் குறித்து இளம் வீரர் யஷ்வீர் கவுட் விளக்கமளித்துள்ளார்.இதுகுறித்து ஸ்போர்ட்ஸ் டுடே ஊடகத்திடம் பேசிய யஷ்வீர் கவுட்,

"தீபாவளி அன்று நடைபெற்ற போட்டியில் நாங்கள் தோல்வியடைந்தோம். அப்போது இரு அணிகளுக்கும் இடையே சில வார்த்தைப் பரிமாற்றங்கள் நடந்தன. தகாத வார்த்தைகளும் பயன்படுத்தப்பட்டன. அந்தப் போட்டியில் தோல்வியடைந்ததால் எங்களால் அப்போது எதுவும் பதிலளிக்க முடியவில்லை. இறுதிப்போட்டிக்காகக் காத்திருந்தோம். சிறப்பாக விளையாடி, இந்திய அணியால் என்ன செய்ய முடியும் என்பதை நிரூபிக்க விரும்பினோம்" என்று தெரிவித்தார்.

- இது, பிபிசிக்காக கலெக்டிவ் நியூஸ்ரூம் வெளியீடு