ஒரு தேர்வுக்காக ஸ்தம்பித்த தென் கொரியா – ஏன் தெரியுமா?
தென்கொரியாவில் நவம்பர் 19ஆம் தேதி நடைபெற்ற இந்த ஆண்டுக்கான பல்கலைக்கழக நுழைவுத் தேர்வில், மாணவர்கள் முன்னெப்போதும் இல்லாத வகையில் கடுமையான முறைகேடு தடுப்பு நடவடிக்கைகளை எதிர்கொண்டனர்.
சட்டையின் பட்டன்களுக்குள் ரகசியக் கேமராக்கள் மறைத்து வைக்கப்பட்டிருக்கலாம் என்பதால், தேர்வுக் கண்காணிப்பாளர்கள் சட்டைப் பட்டன்களில் ஸ்டிக்கர்களை ஒட்டினர்.
இதே காரணங்களுக்காக, மாணவர்கள் தங்களுடைய பேனா மற்றும் அழிப்பான்களைக்கூடக் கொண்டுவர அனுமதிக்கப்படவில்லை.
மேலும், மாணவர்கள் அணிந்திருந்த அனைத்து கண்ணாடிகளும் சோதிக்கப்பட்டன. குறிப்பாக, அவை ஏஐ தொழில்நுட்பம் கொண்ட ஸ்மார்ட் கண்ணாடிகளா என்பதும் பரிசோதிக்கப்பட்டது.
மிகக் கடுமையான நடவடிக்கையாக, நாடு முழுவதும் உள்ள செல்போன்களுக்கு அவசரகால எச்சரிக்கை குறுஞ்செய்தி அனுப்பும் ஏற்பாடும் செய்யப்பட்டது.
தேர்வு நடைபெற்றுக்கொண்டிருந்தபோது, எதிர்பாராத நேரத்தில் இந்த எச்சரிக்கை அனுப்பப்பட்டு, மிக அதிக ஒலியளவில் 10.5 விநாடிகளுக்கு ஒலிக்கும் வகையில் ஏற்பாடு செய்யப்பட்டிருந்தது.
மறைத்து வைக்கப்பட்டிருக்கும் செல்போன்களைக் கண்டறிவதற்காகவே இந்த நடவடிக்கை மேற்கொள்ளப்பட்டது.
தேர்வில் முறைகேடு செய்பவர்களுக்குக் கடுமையான தண்டனை வழங்கப்படும் என்றும், அதிகபட்சமாக ஐந்து ஆண்டுகள் வரை சிறைத்தண்டனை விதிக்கப்படலாம் என்றும் அரசு எச்சரித்திருந்தது.
தேர்வில் முறைகேடு செய்வதைத் தடுப்பதற்கான நடவடிக்கைகள் ஏன் இவ்வளவு கடுமையாக உள்ளன?
'சுனுங்' என்று அழைக்கப்படும் இந்தத் தேர்வு மிகவும் கடினமானதாகக் கருதப்படுகிறது.
தென்கொரியாவில் ஒருவரின் வாழ்க்கையிலேயே மிக முக்கியமான தேர்வாக இது பார்க்கப்படுகிறது.
பல்கலைக்கழகத்தில் சேருவதற்கான வாய்ப்பைத் தீர்மானிப்பது மட்டுமின்றி, ஒருவரின் வேலைவாய்ப்பு முதல் சமூக அந்தஸ்து வரை பல விஷயங்களிலும் இந்தத் தேர்வு முடிவுகள் தாக்கத்தை ஏற்படுத்தக்கூடும்.
இந்தத் தேர்வுக்கு அளிக்கப்படும் முக்கியத்துவம் எந்த அளவுக்கு இருக்கிறது என்றால், தேர்வு நாளன்று ஆங்கில மொழித் திறன் தேர்வு நடைபெறும் நேரத்தில், மாணவர்களுக்கு விமானங்களின் இரைச்சலால் இடையூறு ஏற்படுவதைத் தவிர்ப்பதற்காக, விமானங்களின் புறப்பாடு மற்றும் தரையிறக்கத்தை அரசு தற்காலிகமாக நிறுத்துகிறது.
இந்த ஆண்டுக்கான தேர்வு குறித்த பதற்றம் சில நாட்களுக்கு முன்பே தொடங்கியது.
தேசிய அளவிலான வரி கணக்கியல் தேர்வில், ஏஐ தொழில்நுட்பத்தையும் ரகசியக் கேமராவையும் பயன்படுத்தி முதலிடம் பிடித்ததாக ஒருவர் ஒப்புக்கொண்டார்.
அவர் பெற்ற மதிப்பெண் நம்ப முடியாத அளவுக்கு அதிகமாக இருந்ததால்தான் அவர் பிடிபட்டார். முதல் சுற்றுத் தேர்வில், மொத்தம் 400 மதிப்பெண்களுக்கு 397.5 மதிப்பெண்களை அவர் பெற்றிருந்தார்.
- இது, பிபிசிக்காக கலெக்டிவ் நியூஸ்ரூம் வெளியீடு



