'இது முழுவதும் அச்சத்தின் வெளிப்பாடுதான்' - ராகுல் பேசியது என்ன?

டெல்லியில் மக்களவை எதிர்க்கட்சித் தலைவர் ராகுல் காந்தி மற்றும் காங்கிரஸ் எம்.பி. பிரியங்கா காந்தி ஆகியோர் எதிர்க்கட்சி எம்.பி.க்களுடன் இணைந்து போராட்டம் நடத்துவதற்காக ஜந்தர் மந்தருக்குச் செல்ல முயன்றபோது காவல்துறையினரால் தடுத்து நிறுத்தப்பட்டு காவலில் வைக்கப்பட்டதாக அங்கிருந்த பிபிசி செய்தியாளர் தில்நவாஸ் பாஷா தெரிவித்தார்.

காவலில் வைக்கப்பட்ட பிறகு ராகுல் காந்தி பேசுகையில், "அமித் ஷா, நரேந்திர மோதி, ஞானேஷ் குமார், மோகன் பகவத் ஆகியோர் குற்றவாளிகள்; அவர்கள் இதுபோன்ற அனைத்தையும் செய்யக்கூடியவர்கள். ஆனால், அவர்களை சட்டத்தின் முன் நிறுத்தப் போகிறோம். அவர்கள் அனைவரும் சட்டத்தின் முன் நிறுத்தப்படுவார்கள் என்பதற்கு நான் உத்தரவாதம் அளிக்கிறேன். இதெல்லாம், அவர்களின் பதற்றமான எதிர்வினை மட்டுமே.

இது முழுவதும் அச்சத்தின் வெளிப்பாடுதான். அவர்கள் சட்டத்தின் முன் நிறுத்தப்படுவார்கள். என் வார்த்தைகளைக் குறித்துக்கொள்ளுங்கள். இந்த நாட்டின் மிகவும் புனிதமான ஒன்றை அவர்கள் தாக்கியுள்ளனர். அவர்கள் அரசியலமைப்பைத் தாக்கியுள்ளனர். அவர்கள் மக்களின் குரலைத் தாக்கியுள்ளனர். இந்தக் குற்றத்திற்காக அவர்கள் விலை கொடுக்க வேண்டியிருக்கும்." என்றார்.

தடுத்து வைக்கப்பட்டிருந்த ராகுல் காந்தி உள்ளிட்ட எதிர்க்கட்சித் தலைவர்களை காவல்துறையினர் இரவு சுமார் 8.30 மணியளவில் விடுவித்தனர்.

- இது, பிபிசிக்காக கலெக்டிவ் நியூஸ்ரூம் வெளியீடு