குஜராத்தில் சிறுத்தைகளை காட்டுக்கு உள்ளேயே வைக்க வனத்துறை கோழிகளை பயன்படுத்துவது ஏன்?

குஜராத்தின் தபி (Tapi) மாவட்டத்தில் மனித - விலங்கு மோதலைக் குறைக்க காடுகளில் இரையை விடுவிக்கும் புதிய முயற்சி ஒன்றை வனத்துறையினர் எடுத்துள்ளனர்.

சிறுத்தைகள் அதிகம் வசிக்கும் தெற்கு குஜராத்தின் சில பகுதிகளில் இந்தத் திட்டம் செயல்படுத்தப்படுகிறது.

காட்டின் உணவுச் சங்கிலி பாதிக்கப்பட்டுள்ள நிலையில் அதனை மீட்டெடுப்பது இதன் நோக்கமாக உள்ளது.

இந்தத் திட்டத்தின் கீழ் சிவப்பு காட்டுக் கோழிகள் பண்ணைகளில் வளர்க்கப்பட்டு அருகில் உள்ள காட்டுப்பகுதிகளில் விடப்படுகின்றன. இது சிறுத்தை மற்றும் இதர மாமிசஉண்ணிகளுக்கு இயற்கையான உணவு ஆதாரமாக அமையும்.

அதில் ஒரு மையம் சடாத்வேல் (Sadadvel) வனச்சரகத்தின் கீழ் வரும் சோன்காத் (Songadh) தாலுகாவில் உள்ள குடி ருவாடி (Gudi Ruvadi) கிராமத்தில் நிறுவப்பட்டுள்ளது.

வனத்துறை அதிகாரிகள் பறவைகளுக்குச் சத்தான தீவனம், தடுப்பூசிகள் மற்றும் வெப்பநிலை மற்றும் ஈரப்பதம் கட்டுப்படுத்தப்பட்ட பாதுகாப்பான சூழல் ஆகியவற்றை வழங்குகின்றனர்.

வனத்துறை தகவலின்படி, இந்த முன்னெடுப்பு தபி மாவட்டத்தில் காட்டுக்கோழிகளின் எண்ணிக்கையை கணிசமாக அதிகரித்துள்ளது.

நன்கு வளர்ந்த பறவைகள் இப்போது மாவட்டம் முழுவதும் உள்ள அடர்ந்த காட்டுப்பகுதிகளில் பல்வேறு கட்டங்களாக விடுவிக்கப்படுகின்றன.

சிறுத்தைகள் மற்றும் பிற மாமிச உண்ணிகளுக்குத் தேவையான இயற்கையான இரையைத் தொடர்ந்து கிடைக்கச் செய்யவும், அவை கால்நடைகளைச் சார்ந்திருப்பதைக் குறைத்து, மனித குடியிருப்புகளை நோக்கி வருவதைக் கட்டுப்படுத்தவும் இது உதவும் என்று அதிகாரிகள் கருதுகின்றனர்.

- இது பிபிசிக்காக கலெக்டிவ் நியூஸ்ரூம் வெளியீடு