உலகளவில் முடங்கிய மைக்ரோசாஃப்ட் சேவை
மைக்ரோசாஃப்ட் நிறுவனத்தின் சேவைகள் உலகளவில் முடங்கியுள்ளன. டீம்ஸ், மின்னஞ்சல் (அவுட்லுக்), செயற்கை நுண்ணறிவு மென்பொருளான கோபைலட் உள்ளிட்ட சேவைகள் இணைப்புச் சிக்கலால் பாதிக்கப்பட்டுள்ளன. இந்த முடக்கம் இணையவழித் தாக்குதலால் ஏற்பட்டிருக்க வாய்ப்பில்லை என மைக்ரோசாஃப்ட் தெரிவித்துள்ளது.
இணையச் சேவைகளில் ஏற்படும் முடக்கங்களைக் கண்காணிக்கும் டவுன்டிடெக்டர் இணையதளம், சுமார் 74 நாடுகளில் இந்தப் பாதிப்பு ஏற்பட்டுள்ளதாகவும், எட்டு மணி நேரத்துக்கும் மேலாக முடக்கம் நீடிப்பதாகவும் தெரிவித்துள்ளது. இதனால் குறைந்தது 28,000-க்கும் மேற்பட்ட பயனர்கள் பாதிக்கப்பட்டுள்ளதாகவும் அந்த இணையதளம் குறிப்பிட்டுள்ளது.
மைக்ரோசாஃப்ட் சேவைகளில் ஏற்பட்டுள்ள முடக்கம், பிற முக்கிய இணையத் தளங்களையும் பாதித்துள்ளதாகத் தெரிகிறது. மைக்ரோசாஃப்ட் சேவைகளுடனான இணைப்பில் சிக்கல் ஏற்பட்டுள்ளதா என ஆய்வு செய்து வருவதாகவும், இதனால் சில கருவிகள் எதிர்பார்த்தபடி செயல்படவில்லை என்றும் ஓபன்ஏஐ நிறுவனம் தெரிவித்துள்ளது.
ஆந்த்ரோபிக் நிறுவனமும் மைக்ரோசாஃப்ட் 365 சேவைகளுடனான தனது இணைப்பில் சிக்கல் ஏற்பட்டுள்ளதைக் கண்டறிந்துள்ளதாகத் தெரிவித்துள்ளது.
இந்தப் பிரச்சனையைச் சரிசெய்யும் முயற்சிகளில் ஆரம்பத்தில் சாதகமான முடிவுகள் கிடைத்து வருவதாக மைக்ரோசாஃப்ட் கூறியிருந்தது. ஆனால், தற்போது தனது முயற்சிகள் எதிர்பார்த்த பலனை அளிக்கவில்லை என அந்நிறுவனம் தெரிவித்துள்ளது.
மைக்ரோசாஃப்ட் இணையதளத்தின் தகவலின்படி, அவுட்லுக், டீக்ஸ் உள்ளிட்ட சந்தா அடிப்படையிலான சேவைகளைக் கொண்ட மைக்ரோசாஃப்ட் 365 செயலிகளை 43 கோடிக்கும் அதிகமானோர் பயன்படுத்துகின்றனர்.
- இது, பிபிசிக்காக கலெக்டிவ் நியூஸ்ரூம் வெளியீடு



