டெல்லியில் 4 மாடி குடியிருப்பு திடீரென இடிந்ததில் 3 பேர் பலி, 7 பேர் காயம்

டெல்லியின் புதிய சீமாபுரியில் உள்ள இட்கா மீன் சந்தைக்கு அருகே 4 மாடி குடியிருப்புக்கட்டடம் இடிந்து விழுந்தது . அக்டோபர் 7-ஆம் தேதி, நடந்த இந்த சம்பவத்தில் 3 பேர் உயிரிழந்ததாகவும் இடிபாடுகளில் சிக்கியிருந்த 7 பேர் மீட்கப்பட்டு ராஜிவ் காந்தி அரசு மருத்துவமனைக்கு கொண்டுசெல்லப்பட்டனர் என்றும் மீட்பு பணிகள் தொடர்ந்து நடைபெற்று வருவதாகவும் ஷஹ்தாரா மாவட்ட துணை காவல் ஆணையர் ராஜேந்திர பிரசாத் மீனா கூறியுள்ளதாக ஏ.என்.ஐ செய்தி முகாமை குறிப்பிட்டுள்ளது.

அருகில் இருந்த மற்றொரு கட்டடத்தை இடிக்கும் பணி மேற்கொள்ளப்பட்டதாகவும், அதற்காக அதிர்வுகளை ஏற்படுத்தக்கூடிய இயந்திரங்கள் பயன்படுத்தப்பட்டதாகவும் அதன் காரணமாக ஏற்பட்ட அதிர்வு இந்தக் கட்டடத்தையும் பாதித்து, அது இடிந்து விழுந்திருக்கலாம் என்றும் முதற்கட்ட தகவல்கள் தெரிவிப்பதாக டெல்லி வடகிழக்கு மாவட்ட ஆட்சியர் அஜய் குமார் தெரிவித்துள்ளார்.

- இது, பிபிசிக்காக கலெக்டிவ் நியூஸ்ரூம் வெளியீடு