தீவிர பாஜக ஆதரவு குடும்பத்தில் பிறந்து, இடதுசாரி இயக்கத்தின் முகமாக மாறியுள்ள 'நேஹா போரா'

தலைமைத் தேர்தல் ஆணையர் பதவி விலகக் கோரி தற்போது நடைபெற்றுவரும் போராட்டத்தின் முக்கிய முகமாக உருவெடுத்துள்ளவர் 29 வயதான நேஹா போரா.

இந்திய கம்யூனிஸ்ட் கட்சி (மார்க்சிஸ்ட்-லெனினிஸ்ட்) கட்சியின் மாணவர் அமைப்பான 'ஐசா' அமைப்பின் தேசியத் தலைவராக தற்போது நேஹா போரா பொறுப்பு வகித்து வருகிறார்.

போராட்டக் களங்கள் நேஹாவுக்குப் புதியவை அல்ல. கடந்த ஜூலை மாதம், நீட் வினாத்தாள் கசிவு விவகாரத்தில் மத்திய கல்வி அமைச்சர் தர்மேந்திர பிரதான் பதவி விலகக் கோரி உண்ணாவிரதப் போராட்டத்தில் ஈடுபட்ட அபிஜித் திப்கே மற்றும் சோனம் வாங்சுக் ஆகியோருடன் இணைந்து நேஹா போராவும் தீவிரக் கவனம் ஈர்த்தார்.

அப்போராட்டத்திற்கு ஆதரவு தெரிவித்து அவர் 23 நாட்கள் உண்ணாவிரதம் இருந்திருந்தார்.

உத்தரகண்ட் மாநிலத்தைச் சேர்ந்த நேஹா போரா, தனது தொடக்கக் கல்வியைத் தொடர்ந்து தில்லி பல்கலைக்கழகத்தில் பட்டப்படிப்பை முடித்தார். பின்னர், தில்லியில் உள்ள அம்பேத்கர் பல்கலைக்கழகத்தில் முதுகலைப் பட்டம் பெற்ற அவர், தற்போது தில்லி ஜவஹர்லால் நேரு பல்கலைக்கழகத்தில் முனைவர் பட்ட ஆய்வு மேற்கொண்டு வருகிறார்.

தற்போது நாட்டில் நடைபெற்று வரும் மக்கள் இயக்கங்கள் மற்றும் இடதுசாரி அமைப்புகளின் வலுவான குரலாகவும் அவர் உருவெடுத்து வருகிறார்.

பாஜக அரசைத் தொடர்ந்து நேஹா விமர்சித்து வந்தாலும், அவரது குடும்பத்தினரோ தீவிர பாஜக ஆதரவாளர்களாகக் குறிப்பிடத்தக்கது.

இதுகுறித்து பேட்டி ஒன்றில் நேஹா கூறுகையில், "எனது குடும்பமே தீவிரமான பாஜக ஆதரவாளர்களைக் கொண்டது. இதனால் எங்கள் குடும்பத்திற்குள் மிகப்பெரிய கருத்து வேறுபாடுகள் ஏற்பட்டுள்ளன. இந்த முரண்பாடு நீண்ட காலமாகவே நீடித்து வருகிறது. நான் தில்லிக்கு வந்து அரசியலில் தீவிரமாகச் செயல்படத் தொடங்கியதிலிருந்து இந்தக் குடும்ப மோதல் தொடர்கிறது" என்றார்.

- இது, பிபிசிக்காக கலெக்டிவ் நியூஸ்ரூம் வெளியீடு