ராஜீவ்-சோனியா காந்தியின் காதல், தனது காதலி பற்றி புத்தக வெளியீட்டு விழாவில் ராகுல் காந்தி பகிர்ந்துகொண்டது என்ன?

பட மூலாதாரம், @rahulgandhi/YT
டெல்லியில் சோனியா காந்தியின் புத்தக வெளியீட்டு விழாவில் பேசிய ராகுல் காந்தி, தன்னைப் பற்றியும் தனது பெற்றோரைப் பற்றியும் பல தனிப்பட்ட தகவல்களைப் பகிர்ந்துகொண்டார். தனது காதலி குறித்தும் அவர் குறிப்பிட்டார். அவரது இந்தக் கருத்துகள் தற்போது பெரும் விவாதத்தை ஏற்படுத்தியுள்ளன.
மேடைக்கு வந்தவுடன், "அரசியல் பேசக்கூடாது என்று எனக்கு மிகவும் கடுமையான உத்தரவு பிறப்பிக்கப்பட்டுள்ளது" என ராகுல் காந்தி கூறினார்.
இதைக் கேட்டதும், மக்களுக்குப் புதிதாக இருக்கக்கூடிய சில விஷயங்களை ராகுல் காந்தி பகிர்ந்துகொள்ளப் போகிறார் என்பது புரியத் தொடங்கியது. அவர் பேசிக்கொண்டிருந்தபோது, அவ்வப்போது பார்வையாளர்கள் சிரிப்பதையும், சில நேரங்களில் உணர்ச்சிவசப்படுவதையும் காண முடிந்தது.
மக்களவை எதிர்க்கட்சித் தலைவரான ராகுல் காந்தி, தனது தாயார் சோனியா காந்தியின் 'பிலாங்கிங்: எ ஜர்னி ஆஃப் லவ்' என்ற சுயசரிதை புத்தக வெளியீட்டு விழாவில், சோனியா காந்தியே குறிப்பிடாத பல கதைகளைப் பகிர்ந்துகொண்டார்.

பட மூலாதாரம், @rahulgandhi/YT
கேம்பிரிட்ஜ் உணவகத்தின் கதை
ராஜீவ் காந்தியும் சோனியா காந்தியும் முதன்முதலில் சந்தித்த உணவகம் குறித்து ராகுல் காந்தி குறிப்பிட்டார். கேம்பிரிட்ஜில் தனது தாய் ஊஞ்சலில் தலைகீழாகத் தொங்கிக்கொண்டிருக்கும் புகைப்படம் குறித்தும் பேசினார். தான் குழந்தையாக இருந்தபோது தனது தாய் அப்படித்தான் இருந்ததாக ராகுல் கூறினார்.
இதையடுத்து, தனது பெற்றோர் சந்தித்துக்கொண்ட கேம்பிரிட்ஜில் உள்ள 'வர்சிட்டி உணவகம்' குறித்த கதையை அவர் விவரித்தார்.
ராகுல் காந்தி கூறுகையில், "எனது பெற்றோரைப் பற்றி நிறைய கதைகள் உள்ளன. அவற்றில் மிக முக்கியமான ஒன்று, அவர்கள் வர்சிட்டி உணவகத்தில் சந்தித்துக் கொண்டது" என்றார்.
ராகுல் காந்தி மேலும் கூறுகையில், "பல ஆண்டுகளுக்குப் பிறகு, நான் கேம்பிரிட்ஜில் இருந்தபோது, எனது காதலியிடம், 'வர்சிட்டி உணவகத்திற்குச் செல்லலாம்' என்று கூறினேன். அந்த உணவகத்தைப் பற்றி அவருக்கு எதுவும் தெரியாது. நாங்கள் அங்கு சென்றோம். 'பார், எனது பெற்றோர் சந்தித்துக்கொண்ட அதே இடம் இதுதான்' என்று அவரிடம் கூறினேன்.
"நாங்கள் உள்ளே சென்றோம். அந்த மஞ்சள் நிறக் கதவு இன்னும் எனக்கு நினைவிருக்கிறது. அங்கு நின்றுகொண்டிருந்த ஒருவர், என்னுடன் எத்தனை பேர் வந்திருக்கிறார்கள் என்று கேட்டார். நான் இரண்டு பேர் என்று கூறினேன். பின்னர், அவர் ஒரு மேசையைக் காட்டி, அங்கு சென்று அமருமாறு கூறினார்" என்றார்.

பட மூலாதாரம், Sondeep Shankar/Getty Images
ராகுல் காந்தி கூறுகையில், "எனது பெற்றோர் இந்த உணவகத்தில்தான் சந்தித்துக் கொண்டார்கள் என்று அவரிடம் கூறினேன். அதற்கு அவர், 'ஆம், எனக்கு அவர்களைத் தெரியும்' என்றார். அவர்களைப் பற்றி உங்களுக்கு என்ன தெரியும் என்று நான் கேட்டேன். அதற்கு அவர், 'அவர்கள் இருவரையும் பற்றித்தான் பேசுகிறீர்கள் என்பது எனக்குத் தெரியும்' என்றார்."
"உங்கள் உணவகத்தில் எது சிறப்பான உணவு என்று நான் கேட்டேன். அதற்கு அவர், 'சிக்கன் ஷசார்' என்று கூறினார்" எனப் பகிர்ந்து கொண்டார்.
தொடர்ந்து பேசிய ராகுல் காந்தி, "நாங்கள் சிக்கனை வாங்கிச் சாப்பிட்டோம். நீங்கள் காதலித்து, வர்சிட்டி உணவகத்துக்குச் சென்றால், ஒருபோதும் சிக்கன் ஷஷ்ருத் சாப்பிடாதீர்கள். அது மிகச் சிறந்த உணவு என்று அவர்கள் கூறுவார்கள். ஆனால், அது மிகவும் மோசமாக இருந்தது" என்றார்.

பட மூலாதாரம், @rahulgandhi/YT
ராஜீவ் காந்தி, சோனியா காந்தி இடையிலான முரண்
ராஜீவ் காந்திக்கும் சோனியா காந்திக்கும் இடையே நடந்த ஒரு வாக்குவாதம் குறித்தும் ராகுல் காந்தி குறிப்பிட்டார்.
இந்தப் புத்தக வெளியீட்டு நிகழ்ச்சியில் பங்கேற்ற பஞ்சாப் மாநில முன்னாள் முதலமைச்சர் கேப்டன் அமரிந்தர் சிங்கும் அந்த வாக்குவாதத்திற்கு சாட்சியாக இருந்ததாக அவர் தெரிவித்தார்.
ராகுல் காந்தி கூறுகையில், "நீங்கள் இதை நம்பாமல் இருக்கலாம். எனது சகோதரியிடம் இதுகுறித்துக் கேட்கலாம். அவர்கள் (ராஜீவ் காந்தி மற்றும் சோனியா காந்தி) பலமுறை விவாதித்துப் பேசியதை நாங்கள் பார்த்திருக்கிறோம். ஆனால், அவர்கள் இருவரும் சண்டையிட்டுக் கொண்டதை நான் முதன்முதலாகப் பார்த்தது அப்போதுதான். அப்போது எனது தந்தை அமரிந்தர் சிங்குடன் பேசிக்கொண்டிருந்தார். அவர்கள் இருவருக்கும் இடையே சண்டை நடந்துகொண்டிருப்பதை அவர் புரிந்துகொண்டார்."
"அப்பா அமரிந்தர் சிங்கிடம் ஏதோ பேசிக்கொண்டிருந்தார். அதேவேளையில், அம்மா தனது கருத்துகளைத் தெரிவிக்க முயன்று கொண்டிருந்தார். அவர் தனது கருத்துகளை மூன்று அல்லது நான்கு முறை மீண்டும் தெரிவித்தார். ஆனால், அப்பா வெளிப்படையாகவே மன அழுத்தத்தில் இருந்தார். அதனால் கோபமடைந்தார்" எனப் பகிர்ந்து கொண்டார்.

பட மூலாதாரம், Shukdev Bhachech/Dipam Bhachech/Getty Images
ராகுல் காந்தி தனது தந்தை மற்றும் தாயாருக்கு இடையே நிலவிய அன்பு மற்றும் மகிழ்ச்சியான தருணங்களையும் நினைவுகூர்ந்தார்.
அதுகுறித்துப் பேசிய அவர், "வேறு எந்த வீட்டிலும் இதுபோன்ற ஒன்றை நான் பார்த்ததில்லை. ஒவ்வொரு முறையும் உணவு சாப்பிடும்போது, அப்பாவும் அம்மாவும் அமர்ந்திருப்பார்கள். அம்மா அப்பாவின் மடியில் அமர்ந்திருப்பார். இது இயல்பானது என்றுதான் நான் நினைத்தேன். எனது நண்பர்களின் வீடுகளுக்குச் சென்றபோது, அங்கு இதுபோன்று நடக்காது என்பதைத் தெரிந்து கொண்டேன். அப்போது, அவர்களிடம் ஏன் உங்கள் அம்மா அப்பாவின் மடியில் அமர்வதில்லை என்று கேட்பேன்" என்றார்.
ராகுல் காந்தி இந்தக் கதைகளை விவரித்துக்கொண்டிருந்தபோது, அரங்கில் அமர்ந்திருந்தவர்களும் புன்னகைத்தனர்.
இத்தகைய அன்பான சூழலில்தான், தான் வளர்க்கப்பட்டதாக ராகுல் காந்தி தெரிவித்தார்.
"ஆனால், பின்னர் இவை அனைத்தும் முடிவுக்கு வருவதை நாங்கள் பார்த்தோம்" என்று அவர் நினைவுகூர்ந்தார்.

பட மூலாதாரம், UPI/Bettmann Archive/Getty Images
'திடீரென எல்லாம் பறிக்கப்பட்டபோது'
ராகுல் காந்தி கூறுகையில், "இவை அனைத்தும் காலப்போக்கில் நடக்கவில்லை. திடீரென எங்கள் ஆதரவுத் தூண்களில் ஒன்று கொல்லப்பட்டது. மற்றொரு ஆதரவுத் தூணும் தகர்க்கப்பட்டது" என்றார்.
"இங்கு எனது தாயார் நிறைய நினைவுகளைப் பகிர்ந்துகொண்டார். அவரிடம் உங்களுக்கு மிகச் சிறந்த நினைவாற்றல் இருக்கிறது என்று நான் எப்போதும் கூறுவேன். ஆனால், அவர் அதை ஏற்றுக் கொள்வதில்லை" என்றார்.
தொடர்ந்து பேசிய ராகுல் காந்தி, "ஒரு விஷயத்தைத் தவிர மற்ற அனைத்தையும் அவர் நினைவில் வைத்திருந்தார். அப்பா உயிரிழந்த பிறகு என்ன நடந்தது என்று அவரிடம் கேட்டால், அது தொடர்பான எதுவுமே எனது தாயாருக்கு நினைவில் இல்லை. இந்தப் புத்தகத்தில் எழுதப்பட்டுள்ள நினைவுகள் அனைத்தும் எனது சகோதரியும் தாயாரும் இணைந்து சேகரித்தவை" என்றார்.
ராகுல் காந்தி இதை விவரித்தபோது, சோனியா காந்தி மற்றும் அரங்கில் அமர்ந்திருந்த பலரின் முகங்களிலும் உணர்ச்சிப் பெருக்கு ஏற்பட்டதைக் காண முடிந்தது.
ராகுல் காந்தி கூறுகையில், "எனது பெற்றோருக்கு இடையே இருந்த அன்பு ஒருநாள் திடீரென மறைந்துவிட்டது. அடுத்து என்ன நடக்கப் போகிறது என்பது எனது தாயாருக்குத் தெரிந்திருந்ததால், அது அவருக்கு மிகவும் அச்சமூட்டும் காலமாக இருந்தது. இந்தப் புத்தகம் எனது தந்தை தொடர்பானது. எனது தந்தை எனது தாயாருடன் தொடர்புடையவர். எனது தந்தை திடீரென மறைந்துவிட்டார். அதன் பிறகு எனது தாயார் ஒரு புதிய பயணத்தைத் தொடங்கினார்" என்றார்.

பட மூலாதாரம், Nora Schuster/Imagno/Getty Images
"முற்றிலும் மாறுபட்ட ஒரு தாயாராக அவர் மாறினார். மகிழ்ச்சியாகவும் புன்னகையுடனும் இருந்த அந்தத் தாய் மறைந்துவிட்டார். ஏனெனில், அவரது வாழ்க்கையில் இருந்த ஒளி அணைந்துவிட்டது. எனது தாயார் அமைதியானவர் என்று அனைவரும் நினைத்திருக்கலாம். ஆனால், அவர் அப்படியெல்லாம் இல்லை, மிகவும் கலகலப்பாகப் பேசக்கூடியவர். அனைவரிடமும் பேசிக்கொண்டிருப்பார். எனது பாட்டி கொலை செய்யப்படும் வரை அவர் அப்படித்தான் இருந்தார்" என ராகுல் காந்தி நினைவுகூர்ந்தார்.
முன்னாள் பிரதமர் இந்திரா காந்தி, 1984ஆம் ஆண்டு அக்டோபர் 31ஆம் தேதி டெல்லியில் உள்ள தனது இல்லத்தில் பாதுகாப்புப் படையினரால் சுட்டுக் கொல்லப்பட்டார். இந்திரா காந்தி உயிரிழந்தபோது, சோனியா காந்தி அவருடன் டெல்லியில் இருந்தார். இந்தப் புத்தகத்தை எழுதும்போது தனது வாழ்க்கையில் எதிர்கொண்ட பல கடினமான தருணங்களை சோனியா காந்தி மீண்டும் நினைவுகூர்ந்துள்ளார்.
இருப்பினும், இந்திரா காந்தி மற்றும் ராஜீவ் காந்தியின் படுகொலைகள் குறித்த அத்தியாயங்களை எழுதுவது தனக்கு எளிதாக இருக்கவில்லை என்று அவர் தெரிவித்துள்ளார்.
ராகுல் காந்தி கூறுகையில், "எனது தந்தையின் மரணத்திற்குப் பிறகு, அம்மா தன்னைத் தனிமைப்படுத்திக்கொண்டார். இதையெல்லாம் நான் நேரில் பார்த்திருக்கிறேன்" என்றார்.
இந்தியாவின் முன்னாள் பிரதமர் ராஜீவ் காந்தி, 1991ஆம் ஆண்டு மே 21ஆம் தேதி தமிழ்நாட்டின் ஸ்ரீபெரும்புதூரில் நடந்த தற்கொலைப் படைத் தாக்குதலில் படுகொலை செய்யப்பட்டார்.
- இது, பிபிசிக்காக கலெக்டிவ் நியூஸ்ரூம் வெளியீடு
































