கணவர் மீதான 56 பாலியல் குற்றச்சாட்டுகள், 4 பேர் குற்றவாளிகள் - ஜோன் யங் வழக்கில் நடந்தது என்ன?

பட மூலாதாரம், Reuters
- எழுதியவர், பெத் க்ரூஸ் & ஃபியோனா லாம்டின்
- பதவி,
- பிரசுரிக்கப்பட்டது
- வாசிக்கும் நேரம்: 4 நிமிடங்கள்
கணவரால் போதைப்பொருள் கொடுக்கப்பட்டு, பாலியல் வன்கொடுமைக்கு ஆளாக்கப்பட்டதுடன், கணவரால் ஆன்லைனில் பாலியல் தொழிலுக்காக விளம்பரப்படுத்தப்பட்ட பெண், தன்னை பாலியல் ரீதியாகத் துன்புறுத்திய நான்கு பேர் குற்றவாளிகள் எனத் தீர்ப்பளிக்கப்பட்ட பிறகும், "தன்னால் ஒருபோதும் முழுமையாகப் பாதுகாப்பாக உணர முடியாது" என்று தெரிவித்துள்ளார்.
இங்கிலாந்தில் இதுபோன்ற வழக்கில் நடைபெற்ற முதல் விசாரணை இது. தனது அடையாளத்தை வெளியிடுவதற்கு ஒப்புக்கொண்ட ஜோன் யங், "இந்த உலகத்திலேயே நான் அதிகம் நம்பிய நபர், என்னை மிகக் கொடூரமான முறையில் ஏமாற்றிவிட்டார்" என்று தெரிவித்துள்ளார்.
வியாழக்கிழமையன்று, வின்செஸ்டர் கிரௌன் நீதிமன்றத்தில் நடந்த விசாரணையில், நார்மன் மேக்சோனி (48), ரிச்சர்ட் வில்கின்ஸ் (62), கானர் சாண்டர்சன்-டாய்ல் (32), முகமது ஹசன் (38) ஆகிய நான்கு பேரும் பல்வேறு பாலியல் குற்றங்களில் ஈடுபட்டது உறுதி செய்யப்பட்டது. இதில், வில்கின்ஸ், மேக்சோனி ஆகிய இருவரும் தலா ஒரு பாலியல் வன்கொடுமை குற்றச்சாட்டில் குற்றவாளிகளாக அறிவிக்கப்பட்டனர்.
கடந்த ஆண்டு ஃபிலிப் யங்கை விவாகரத்து செய்த ஜோன் யங், இந்தக் கொடுமைகள் "நான் வாழ்ந்து வந்த வாழ்க்கையை என்னிடம் இருந்து பறித்து விட்டது" தெரிவித்துள்ளார்.
நீதிமன்றத்திற்கு வெளியே பேசிய அவர், "எனக்கு நேர்ந்த கொடுமைக்கு என் கணவர் மட்டுமே காரணமல்ல. இதில் பங்கேற்க மற்றவர்களும் அழைக்கப்பட்டனர். அவர்களும் அதற்குச் சம்மதித்தனர்" என்று கூறினார்.

தனக்கு நேர்ந்த கொடுமைகள், தனது மற்றும் குழந்தைகளின் வாழ்க்கையைப் பெரிதும் பாதித்துள்ளதாக ஜோன் யங் கூறியுள்ளார்.
"என்னால் சொல்ல முடியாத அளவுக்கு வேதனையை அனுபவித்து வருகிறேன். இந்தச் சம்பவம் எங்கள் வாழ்க்கையை எப்போதும் பாதிக்கும். யாருக்கு வேண்டுமானாலும் இதுபோல நடக்கலாம் என்பதை நினைத்தாலே பயமாக இருக்கிறது" என்று அவர் கூறினார்.
"எனக்கு நேர்ந்த சம்பவத்திற்குப் பிறகு, இப்போது எங்கும் பாதுகாப்பாக உணர முடிவதில்லை. வீட்டை விட்டு வெளியே செல்வதற்கே பயமாக இருக்கிறது. பாதுகாப்பான இடம் என்று நினைத்த என் வீட்டில்கூட எனக்குப் பாதுகாப்பு கிடைக்கவில்லை" என்று அவர் கூறினார்.
"ஆண்களால் பாலியல் துன்புறுத்தலுக்கு ஆளான பெண்கள் மற்றும் சிறுமிகளுக்கும் இந்தத் தீர்ப்பு நம்பிக்கை அளிக்கும். அவர்களின் புகார்களும் நம்பப்படும் என்பதை இது உணர்த்தும்" என்று அவர் கூறினார்.
பெண்களின் பாதுகாப்பை உறுதி செய்ய, பாலியல் உறவுக்கான சம்மதம் தொடர்பான சட்டங்களை அரசு உடனடியாக மறுபரிசீலனை செய்ய வேண்டும் என்று அவர் வலியுறுத்தினார். தனது வழக்கு பல முக்கியமான கேள்விகளை எழுப்பியுள்ளதாகவும் அவர் கூறினார்.
சமூக ஊடக பதிவில், ஜோன் யங்கின் மகள் அலெக்ஸ், இங்கிலாந்து மற்றும் வேல்ஸில் 2003ஆம் ஆண்டுக்குப் பிறகு இந்தச் சட்டத்தில் எந்த மாற்றமும் செய்யப்படாதது "ஏற்றுக்கொள்ள முடியாதது" என்று தெரிவித்துள்ளார்.
"சமூகம் மாறிவிட்டது, குற்றங்களும் மாறிவிட்டன. அப்படியிருக்க, சட்டங்கள் மட்டும் ஏன் மாறவில்லை?" என்று அவர் கேள்வி எழுப்பினார்.

தீர்ப்பு வாசிக்கப்பட்டபோது அமைதியாக இருக்குமாறு நீதிபதி மிஸ்டர் ஜஸ்டிஸ் சைனி கேட்டுக்கொண்டார். அப்போது, ஜோன் யங் தனது குடும்பத்தினருடன் பார்வையாளர்கள் அமரும் பகுதியில் அமர்ந்திருந்தார். உணர்ச்சிவசப்பட்ட அவர், இரு கைகளாலும் தனது வாயைப் பொத்திக்கொண்டிருந்தார்.
கானர் சாண்டர்சன்-டாய்ல் மீதான முதல் குற்றவாளி தீர்ப்பு வாசிக்கப்பட்டபோது, ஜோன் யங் அதிர்ச்சியில் மூச்சுவிட்டார். பாலியல் அத்துமீறல் மற்றும் வலுக்கட்டாயமாக பாலியல் வன்கொடுமை செய்தது என இரு குற்றச்சாட்டுகளில் அவர் குற்றவாளியாக அறிவிக்கப்பட்டார். இதைக் கேட்டதும் அவர் தலைகுனிந்தார்.
எட்டு ஆண்கள், நான்கு பெண்கள் அடங்கிய நடுவர் குழு, வில்கின்ஸையும் பாலியல் வன்கொடுமை குற்றச்சாட்டில் குற்றவாளி என அறிவித்தது. ஹசன், பாலியல் அத்துமீறலில் ஈடுபட்ட ஒரு குற்றச்சாட்டில் குற்றவாளி என அறிவிக்கப்பட்டார்.
இந்த வழக்கில் ஆறாவது குற்றவாளியான, சோமர்செட் பகுதியைச் சேர்ந்த 47 வயதான டீன் ஹாமில்டன், கடந்த பிப்ரவரி மாதம் நீதிமன்றத்தில் நடந்த விசாரணையின்போது, பாலியல் வன்கொடுமை உள்ளிட்ட நான்கு குற்றச்சாட்டுகளையும் ஒப்புக்கொண்டார். இதில் இரண்டு பாலியல் அத்துமீறல் குற்றச்சாட்டுகளும் அடங்கும்.
இந்த வழக்கு விசாரணை முழுவதும் ஜோன் யங் மிகுந்த துணிச்சலுடன் செயல்பட்டதாக நீதிபதி பாராட்டினார். நீதிமன்றத்தை விட்டு வெளியேறும்போது, காவல்துறை அதிகாரி ஒருவரும் கண்ணீர் விட்டு அழுதார்.
குற்றவாளிகள் அனைவரும் டிசம்பர் 21, 22 ஆகிய தேதிகளில் தண்டனை அறிவிக்கப்படும்போது நீண்டகால சிறைத் தண்டனை கிடைக்கும் என நீதிபதி தெரிவித்தார். இதையடுத்து அவர்கள் நீதிமன்றத்தில் இருந்து அழைத்துச் செல்லப்பட்டபோது, ஜோன் யங்கின் குடும்பத்தினர் ஒருவரையொருவர் ஆரத்தழுவிக் கொண்டனர்.
கடந்த 2007 முதல் 2010ஆம் ஆண்டு வரை கன்சர்வேட்டிவ் கட்சி சார்பில் ஸ்விண்டன் நகராட்சி கவுன்சிலராக பதவி வகித்த ஃபிலிப் யங், 13 ஆண்டுகளாகத் தனது மனைவிக்குப் போதைப்பொருள் கொடுத்து பாலியல் வன்கொடுமை செய்துள்ளார். மேலும், அவரது சம்மதம் இல்லாமலேயே மற்ற ஆண்களையும் அவருடன் பாலியல் உறவு கொள்ள வரவழைத்துள்ளார்.
முன்னதாக நடைபெற்ற நீதிமன்ற விசாரணையில், தனது மனைவி தொடர்பாக 56 குற்றச்சாட்டுகளை ஃபிலிப் யங் ஒப்புக்கொண்டார். இதில் 14 உளவு பார்த்தல், 11 பாலியல் வன்கொடுமை, 11 போதைப்பொருள் கொடுத்தல், 7 பாலியல் அத்துமீறல், 4 பாலியல் துன்புறுத்தல், ஆபாசப் படங்களை வெளியிட்டது தொடர்பான ஒரு குற்றச்சாட்டு ஆகியவை அடங்கும்.
நீதிமன்றத்திற்கு வெளியே பேசிய அரசுத் தரப்பு வழக்கறிஞர் ஜேம்ஸ் ஃபாஸ்டர், "கணவரால் போதைப்பொருள் கொடுக்கப்பட்ட பெண்ணைப் பாலியல் வன்கொடுமை செய்த ஆண்கள் குற்றவாளிகள் என இங்கிலாந்தில் தீர்ப்பளிக்கப்பட்டது இதுவே முதல்முறை" என்று கூறினார்.

பிரான்ஸில் கிசெல் பெலிகாட் என்ற பெண்ணின் கணவர், அவருக்குப் போதைப்பொருள் கொடுத்து பாலியல் வன்கொடுமை செய்ததுடன், மேலும் 50 ஆண்களை வரவழைத்து அவர்களும் அவரைத் துன்புறுத்தச் செய்தார். இந்த வழக்கும் பெருமளவிலான கவனத்தைப் பெற்றது. ஜிசெலும் தனது அடையாளத்தை மறைக்காமல் வழக்கு விசாரணையில் பங்கேற்றார்.
கடந்த 2024ஆம் ஆண்டு, பிரான்ஸில் கிசெல் பெலிகாட்டின் கணவருக்கு 20 ஆண்டுகள் சிறைத் தண்டனை விதிக்கப்பட்டது. இந்த வழக்கில் குற்றம் சாட்டப்பட்ட அனைவரும் குறைந்தது ஒரு குற்றச்சாட்டிலாவது குற்றவாளிகள் எனத் தீர்ப்பளிக்கப்பட்டனர்.
ஃபிலிப் யங்குக்கு எதிரான வழக்கை விசாரித்த காவல்துறையினரும் அரசு வழக்கறிஞர்களும், அவருக்குத் தண்டனை பெற்றுத் தர பிரான்ஸ் புலனாய்வாளர்களின் உதவியை நாடினர். ஃபிலிப் யங்கின் கடைசி வசிப்பிடம் வடக்கு லண்டனில் உள்ள என்ஃபீல்டு என்பது விசாரணையில் தெரிய வந்தது. அவர் தனது மனைவியை 200 முறை புகைப்படம் மற்றும் காணொளி எடுத்துள்ளார். மொத்தம் 480 அந்தரங்கப் படங்கள் மற்றும் காணொளிகளை எடுத்த அவர், அவற்றில் பலவற்றை ஸ்விண்டனில் உள்ள குடும்ப வீட்டில் பதிவு செய்துள்ளார். மேலும், அந்தப் படங்களை இணையத்தில் குறைந்தது 500 முறை பதிவேற்றியுள்ளார்.
நான்கு பேருக்கு எதிரான வழக்கு விசாரணையின்போது, 2023ஆம் ஆண்டு ஃபிலிப் யங் ஆபாசப் படங்களை இணையத்தில் பதிவேற்றியதாக காவல்துறைக்குத் தகவல் கிடைத்த பிறகே விசாரணை தொடங்கியது என்பது தெரிய வந்தது. ஜோன் யங்குக்கு எதிரான பாலியல் குற்றங்களில் தொடர்புடையவர் எனச் சந்தேகிக்கப்படும் மற்றொரு நபரைத் தொடர்ந்து தேடி வருவதாக வில்ட்ஷயர் காவல்துறை தெரிவித்தது.
அந்த நபர் பருமனான உடலமைப்புடன் இருப்பார். உடலில் அதிக முடி இருக்கும். தலையின் பின்புறத்தில் தழும்புகளும், தடித்த உதடுகளும் இருக்கும். தலைமுடி குட்டையாகவோ அல்லது மொட்டையடிக்கப்பட்டோ இருக்கும். மார்பின் இடது பக்கத்தில் தனித்துவமான பச்சை குத்தியிருப்பார் என காவல்துறையினர் தெரிவித்தனர்.
போதைப்பொருள் கொடுத்து பாலியல் வன்கொடுமை செய்யப்பட்டவர்களுக்கு, தங்களுக்கு என்ன நடந்தது என்பதே தெரியாமல் இருக்கலாம். அதனால், இதுபோன்ற குற்றங்கள் எத்தனை நடந்துள்ளன என்பது தெரியவில்லை என்றும் வில்ட்ஷயர் காவல்துறை தெரிவித்தது.
காவல்துறை செய்தித் தொடர்பாளர் கூறுகையில், "மற்ற பாலியல் குற்றங்களுடன் ஒப்பிடும்போது, திட்டமிட்டு போதைப்பொருள் கொடுத்து பாலியல் வன்கொடுமை செய்யும் சம்பவங்கள் குறைவாகவே பதிவாகியுள்ளன. ஆனால், கிடைத்த தகவல்களும் சமீபத்திய வழக்குகளும், இதுபோன்ற குற்றங்கள் பல வெளியே தெரியாமல் இருப்பதைக் காட்டுகின்றன" என்றார்.
"பாதிக்கப்பட்டவர்களுக்குத் தங்களுக்கு போதைப்பொருள் கொடுக்கப்பட்டது என்பதே தெரியாமல் இருக்கலாம். நடந்த சம்பவங்கள் முழுமையாக நினைவில் இல்லாமல் போகலாம் அல்லது, அதனால் ஏற்பட்ட பாதிப்புகளை மது அருந்தியதால் ஏற்பட்டதாக முதலில் நினைக்கலாம்."
"இதனால், இதுபோன்ற குற்றங்களைக் கண்டறிவதும், புகார் அளிப்பதும் மிகவும் கடினமாகிறது."
- இது, பிபிசிக்காக கலெக்டிவ் நியூஸ்ரூம் வெளியீடு

































